Pakasaritaan ti Biag

Insuronak ni Jehova Sipud Kinaagtutubok

KAS INSALAYSAY NI RICHARD ABRAHAMSON

“O Dios, insuronak nanipud pay kinaagtutubok, ket agingga ita isarsaritak ti maipapan iti nakaskasdaaw nga ar-aramidmo.” Ipalubosyo nga ilawlawagko no apay a naisangsangayan kaniak ti kaipapanan dagita a sasao ti Salmo 71:17.

IDI 1924, ni nanangko, a ni Fannie Abrahamson, ket naam-ammo dagiti Estudiante ti Biblia, kas pannakaawag idi kadagiti Saksi ni Jehova. Agtawenak la idi iti maysa. No adda maisuro ken ni Nanang a kinapudno iti Biblia, iranudna a dagus kadagiti kaarrubana, ken isurona met dayta kaniak ken kada manong ken manang. Sakbay pay a nakasursuroak nga agbasa, tinulongannak a mangikabesa kadagiti adu a teksto maipapan kadagiti bendision nga iyeg ti Pagarian ti Dios.

Idi arinunos ti dekada 1920, sumagmamano a babbai ken ubbing ti mangbukel iti grupo dagiti Estudiante ti Biblia a nakaikamenganmi idiay La Grande, iti rehion ti Oregon, E.U.A., a nakayanakak ken dimmakkelak. Nupay naiputputongkami, maminsan wenno mamindua kada tawen a bisitaendakami dagiti agdaldaliasat a ministro. Nangipaayda kadagiti makaparegta a palawag, nakikaduada kadakami iti panagbalaybalay a ministerio, ken nangipakitada iti naasi a pannakaseknan kadagiti ubbing. Sumagmamano kadagitoy a dungdungnguen isu da Shield Toutjian, Gene Orrell, ken John Booth.

Idi 1931, awan iti grupomi ti nakatabuno iti kombension idiay Columbus, Ohio, idi a dagiti Estudiante ti Biblia naawaganda iti Saksi ni Jehova. Ngem dagiti kongregasion, ken dagiti naiputputong a grupo a di nakatabuno iti kombension nagtitiponda iti lugarda iti dayta nga Agosto ket nangaramidda iti resolusion tapno awatenda ti nagan. Kasta ti inaramid ti bassit a grupomi iti La Grande. Kalpasanna, iti kampania idi 1933 a mangiwaras iti bokleta a The Crisis, nangikabesaak iti presentasion iti Biblia ket, iti kaunaan a gundaway, nangasabaak iti binalaybalay.

Idi dekada 1930, kumarkaro ti ibubusor iti trabahomi. Tapno madaeranmi daytoy, dagiti kompania nagrupoda iti makuna a dibision, a nangangay iti babassit nga asamblea ken nakiraman kadagiti panangasaba a mision a naawagan kas kampania dagiti dibision maminsan wenno mamindua kada tawen. Kadagitoy nga asamblea, naisuro kadakami dagiti metodo ti panangasaba ken naipakita kadakami no kasano ti siraraem a pannakisango kadagiti bumallaet a polis. Yantangay dagiti Saksi ket masansan a maisaklang iti maysa nga ukom a polis wenno iti korte, ensayuenmi no kasano a sawen dagiti nailanad nga instruksion a naawagan Order of Trial. Daytoy ti timmulong kadakami a mangsango kadagiti ibubusor.

Ti Damo nga Irarang-ay ti Kinapudno iti Biblia

Immuneg ti apresasionko kadagiti kinapudno iti Biblia ken iti naibatay-Biblia a namnama a biag nga agnanayon ditoy daga iti sidong ti nailangitan a Pagarian ti Dios. Iti daydi a tiempo, saan unay a naipaganetget ti bautismo kadagidiay awanan iti namnama a makipagturay ken Kristo idiay langit. (Apocalipsis 5:10; 14:1, 3) Kaskasdi, naibaga kaniak a no naimpusuan ti determinasionko a mangaramid iti pagayatan ni Jehova, rumbeng nga agpabautisarak. Inaramidko dayta idi Agosto 1933.

Idi agtawenak iti 12, kinuna ti maestrak a nalaingak nga agpalawag iti publiko, isu nga indagadagna ken ni Nanang a mangyurnos iti kanayonan a pannakasanayko. Napanunot ni Nanang a mabalin a makatulong daytoy tapno ad-adda a makapagserbiak ken ni Jehova. Nagserbi ngarud ni Nanang kas labandera iti babai nga instruktorko kasukat ti pannakaisurok iti makatawen. Nakatulong iti ministeriok dayta a panagsanay. Idi agtawenak iti 14, nagsakitak iti rheumatic fever, ket diak nakaeskuela iti nasurok a makatawen.

Idi 1939, dimteng iti lugarmi ti amin-tiempo a ministro nga agnagan Warren Henschel.a Nagserbi ni Warren kas nataengan a kabsatko iti naespirituan, nga ikuyognak iti tay-ak ti ministerio iti adu nga aldaw. Di nagbayag, tinulongannak a sumrek iti vacation pioneer service, maysa a temporario a kita ti amin-tiempo a ministerio. Iti dayta a kalgaw, naorganisar ti grupomi kas maysa a kompania. Nadutokan ni Warren kas company servant, ken nadutokanak kas konduktor iti Panagadal iti Pagwanawanan. Idi pimmanaw ni Warren tapno agserbi iti Bethel, ti sangalubongan a hedkuarter dagiti Saksi ni Jehova idiay Brooklyn, New York, nagbalinak a company servant.

Iseserrek iti Amin-Tiempo a Ministerio

Ti dimmakkel nga annongek iti panagserbi kas company servant ad-adda a pinabilegna ti tarigagayko a sumrek iti regular nga amin-tiempo a ministerio. Gapuna, inaprobetsarko dayta idi agtawenak iti 17, kalpasan a naturposko ti maikatlo a tawenko iti haiskul. Saan a manamati ni Tatang, ngem impaayna ti kasapulan ti pamilia ken addaan kadagiti nangato a prinsipio. Diak napatgan ti tarigagayna a makakolehioak. Ngem kinunana a no la ketdi ta saan nga isu ti aggasto iti pagdagusak ken taraonko, mabalinko nga aramiden ti kayatko. Isu nga inrugik ti agpayunir idi Setiembre 1, 1940.

Idi pumanawak iti pagtaenganmi, impabasa ni Nanang ti Proverbio 3:5, 6: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” Talaga a dakkel a nakatulong iti biagko ti kanayon a panagpannuray ken ni Jehova.

Di nagbayag, kinaduaak da Joe ken Margaret Hart iti ministerio iti makin-amianan a sentro ti Washington State. Nagduduma dagiti teritoria sadiay​—rantso dagiti baka, rantso dagiti karnero, luglugar dagiti Indian, ken adu a babassit nga ili ken purok. Idi primavera ti 1941, nadutokanak kas company servant iti kongregasion iti Wenatchee, Washington.

Iti maysa kadagiti asambleami iti Walla Walla, Washington, nagserbiak kas maysa nga attendant, a mangabrasa kadagiti sumrek iti auditorium. Napaliiwko ti maysa nga agtutubo a kabsat a marigrigatan a mangpauni iti loud-speaker. Isu nga insingasingko nga agsinnukatkami iti annongen. Idi a ti regional servant, a ni Albert Hoffman, nagsubli ket nakitana a pinanawak ti annongek, nakaisem nga inlawlawagna kaniak ti kinapateg ti panagtalinaed iti annongen agingga nga awan ti bilin. Silalagipak iti balakadna agingga ita.

Idi Agosto 1941, dagiti Saksi ni Jehova nangiplanoda iti dakkel a kombension idiay St. Louis, Missouri. Da Hart inikkanda iti linong ti likud ti luganda a pickup ket nangikabilda kadagiti pagtugawan. Siamkami a payunir a naglugan iti dayta ket nagbiahekami iti 2,400 a kilometro a napan iti St. Louis. Agarup makalawas ti panagbiahe a mapan. Iti kombension, pinattapatta ti maysa a polis a 115,000 ti kangatuan a bilang dagiti timmabuno. Uray pay nalabit nababbaba ngem iti dayta ti bilang dagiti timmabuno, sigurado nga ad-adu dayta ngem ti nganngani 65,000 a Saksi idi iti Estados Unidos. Talaga a makapabileg iti naespirituan daydi a kombension.

Panagserbi iti Bethel Idiay Brooklyn

Idi addaakon idiay Wenatchee, nakaawatak iti surat a mangkidkiddaw iti ipapanko iti Bethel idiay Brooklyn. Idi sumangpetak idi Oktubre 27, 1941, naayabanak iti opisina ni Nathan H. Knorr, ti manangaywan iti paktoria. Siaanus nga inlawlawagna kaniak ti kasasaad ti Bethel ken impaganetgetna a ti panagtalinaed a nasinged ken ni Jehova ket napateg iti naballigi a panagserbi sadiay. Kalpasanna, naipanak iti Shipping Department ket nagtrabahoak kas para reppet kadagiti maibiahe a karton ti literatura.

Idi Enero 8, 1942, pimmusay ni Joseph Rutherford, ti mangidadaulo idi kadagiti Saksi ni Jehova iti sangalubongan. Lima nga aldaw kalpasanna, dagiti direktor ti Sosiedad imbutosda ni Kabsat Knorr kas sumuno. Idi impakaammona daytoy iti pamilia ti Bethel, kinuna ni W. E. Van Amburgh, ti nabayagen a sekretario-tesorero ti Sosiedad: “Malagipko pay idi pimmusay ni C. T. Russell [idi 1916] ket sinuktan ni J. F. Rutherford. Intultuloy ti Apo nga iturong ken pagballigien ti trabahona. Ita, naan-anay nga inanamaek nga agtultuloy a rumang-ay ti trabaho iti panangidaulo ni Nathan H. Knorr kas presidente, agsipud ta trabaho daytoy ti Apo, saan a ti tao.”

Idi Pebrero 1942, naipakaammo a mayussuat ti “Advanced Course in Theocratic Ministry.” Nairanta daytoy a mangsanay kadagiti adda iti Bethel a mangpasayaat iti abilidadda nga agsukimat maipapan kadagiti suheto ti Biblia, siuumiso a mangorganisar iti materialda, ken sieepektibo a mangilawlawag kadagita. Gapu iti pannakasanayko idi iti panagpalawag iti publiko, napartak ti irarang-ayko iti daytoy a programa.

Di nagbayag, naibaonak iti Service Department, a mangiwanwanwan iti ministerio dagiti Saksi iti Estados Unidos. Di nagbayag iti dayta a tawen, naikeddeng a maipasdek manen ti maysa a programa para kadagiti ministro nga agbisita kadagiti kompania dagiti Saksi. Idi agangay, dagitoy nga agdaldaliasat a ministro, a damo a naawagan kas ad-adipen dagiti kakabsat, naawaganda iti manangaywan iti sirkito. Bayat ti kalgaw ti 1942, maysa a kurso iti Bethel ti nayurnos a mangsanay kadagiti kakabsat a lallaki para iti daytoy a kita ti ministerio, ket maysaak kadagiti naikkan iti pribilehio nga agsanay. Nangruna a malagipko ti punto nga impaganetget ni Kabsat Knorr, maysa kadagiti instruktor: “Saanyo nga ay-aywen dagiti tattao. Awanto pulos ti ay-aywenyo a tao. Ay-aywenyo ni Jehova, ket maay-ayonto kadakayo dagiti amin nga agayat ken ni Jehova.”

Naipatungpal ti trabaho a panagdaliasat idi Oktubre 1942. Dadduma kadakami iti Bethel ti nakiraman iti dayta kadagiti ngudo ti lawas, nga agbisitakami kadagiti kongregasion a masarakan iti uneg ti 400 a kilometro iti aglikmut ti New York City. Rinepasomi ti rekord ti panangasaba ken bilang ti makigimgimong iti kongregasion, mitingenmi dagidiay addaan iti annongen iti kongregasion, agpalawagkami iti maminsan wenno mamindua, ken mangasabakami a kadua dagiti lumugar a Saksi.

Idi 1944, maysaak kadagiti naggapu iti Service Department a naibaon nga agbisita iti uneg ti innem a bulan, nga agserbi kadagiti estado ti Delaware, Maryland, Pennsylvania, ken Virginia. Idi agangay, iti sumagmamano a bulan, nagbisitaak kadagiti kongregasion iti Connecticut, Massachusetts, ken Rhode Island. Idi makasubliak iti Bethel, paset-tiempo a nagtrabahoak iti opisina ni Kabsat Knorr ken ti sekretariona a ni Milton Henschel, a sadiay nagbalin a pamiliar kaniak ti trabaho iti sangalubongan. Paset-tiempo met a nagserbiak iti Treasurer’s Office iti sidong ti panangiwanwan ni W. E. Van Amburgh ken ti katulonganna, a ni Grant Suiter. Kalpasanna, idi 1946, nagbalinak a manangaywan iti sumagmamano nga opisina iti Bethel.

Dadakkel a Panagbalbaliw iti Biagko

Bayat ti panagserbik kadagiti kongregasion idi 1945, naam-ammok ni Julia Charnauskas idiay Providence, Rhode Island. Idi katengngaan ti 1947, napanunotmi ti agkasar. Napateg unay kaniak ti agserbi iti Bethel, ngem saan idi a maipalubos ti agserbi sadiay a naasawaan. Isu nga idi Enero 1948, rimmuarak iti Bethel, ket nagkasarkami ken Julia (Julie). Nakastrekak iti paset-tiempo a trabaho iti maysa a dakkel a merkado idiay Providence, ket inrugimi a dua ti nagpayunir.

Idi Setiembre 1949, naawisak nga agserbi kas manangaywan iti sirkito idiay amianan a laud ti Wisconsin. Maikawakami ken ni Julie a mangasaba iti kaaduanna a babassit nga ili ken aw-away a pakasarakan kadagiti pagaramidan iti produkto a gatas. Nabayag ken nakaro ti lam-ek no tiempona, nga adu a lawas a nakababbaba unay ti temperatura ken naniebe. Awan luganmi. Ngem adda latta kanayon a mangilugan kadakami nga agturong iti sumaganad a kongregasion.

Di nagbayag kalpasan nga inrugik ti agserbi kas manangaywan iti sirkito, nangangaykami iti asamblea sirkito. Nainget a sinukimatko idi no maay-aywanan met la a naimbag dagiti amin a departamento, isu a medio alusiisen ti dadduma a kakabsat. Napaliiw daytoy ni Nicholas Kovalak, ti manangaywan iti distrito, isu a siaasi nga inlawlawagna a nairuam dagiti lokal a kakabsat iti panangasikaso kadagiti banag iti bukodda a pamay-an ket saanko a kasapulan a pakaringgoran ti amin a banag. Sipud idi, dayta a balakad ti nakatulong kaniak iti panangtaming kadagiti adu nga annongen.

Idi 1950, nakaawatak iti temporario nga annongen​—ti panangiwanwan iti pannakaisagana ti pagdagusan dagiti delegado iti damo kadagiti adu a dadakkel a kombensionmi iti Yankee Stadium iti New York City. Makapagagar ti kombension manipud rugi agingga idi malpas, a tinabunuan ti 123,707 a kangatuan a bilang dagiti delegado manipud iti 67 a pagilian! Kalpasan ti kombension, intuloymi ken ni Julie ti panagdaliasat a ministeriomi. Naragsakkami iti trabaho iti sirkito. Ngem ammomi a nasken a situtulokkami nga umawat iti aniaman nga amin-tiempo a serbisio. Isu a kada tawen, mangipatulodkami iti aplikasion agpadpada para iti panagserbi iti Bethel ken iti panageskuela iti Gilead. Idi 1952, naragsakankami a nakaawat iti imbitasion a tumabuno iti maika-20 a klase ti Watchtower Bible School of Gilead, a nakasanayanmi para iti panagmisionero.

Panagserbi iti Sabali a Pagilian

Idi agturposkami idi 1953, naibaonkami idiay Britania, ket sadiay nagserbiak kas manangaywan iti distrito iti abagatan ti Inglatera. Kalpasan ti kumurang a makatawen iti daytoy a trabaho, a tinagiragsakmi unay ken ni Julie, nasorpresakami idi maibaonkami nga agserbi idiay Denmark. Kasapulan idi a mabalbaliwan ti panangiwanwan iti sanga nga opisina ti Denmark. Yantangay asidegak iti Denmark ken nasanayak iti kasta a trabaho idiay Brooklyn, naibaonak a tumulong. Naglayagkami a napan idiay Netherlands, ket manipud sadiay naglugankami iti tren nga agturong iti Copenhagen, Denmark. Simmangpetkami idi Agosto 9, 1954.

Maysa kadagiti parikut a masapul a mataming isu ti kaadda ti sumagmamano a kakabsat nga addaan iti dadakkel nga annongen a saan a nagpaiwanwan iti hedkuarter iti Brooklyn. Kasta met, tallo kadagiti uppat a mangipatpatarus kadagiti publikasiontayo iti pagsasao a Danes ti pimmanaw iti Bethel ket didan makitimtimpuyog kadagiti Saksi ni Jehova. Ngem sinungbatan ni Jehova dagiti kararagmi. Dua a payunir, da Jørgen ken Anna Larsen, a paset-tiempo nga agipatpatarus, ti nangipaay iti amin-tiempo a serbisioda. Naitultuloy ngarud ti pannakaipatarus dagiti magasintayo iti pagsasao a Danes nga awan ti isyu a nalaktawan. Agingga ita, agserserbi da Larsen iti Bethel idiay Denmark. Ni Jørgen ti coordinator ti Branch Committee.

Ti maysa a talaga a gubuayan ti pammaregta kadagidi a tawen isu ti regular a panagbisita ni Kabsat Knorr. Iwayaanna idi a kasarita ti tunggal maysa, a mangisalaysay kadagiti kapadasan a mangilawlawag no kasano ti panangtaming kadagiti parikut. Bayat ti panagbisitana idi 1955, naikeddeng a mangibangonkami iti baro a sanga nga opisina nga addaan kadagiti pasilidad a pagimprentaan tapno makapataudkami kadagiti magasin para iti Denmark. Ti lote a nagatang ket masarakan iti adayo a lugar iti amianan ti Copenhagen, ket idi kalgaw ti 1957, immakarkami iti kaibangbangon a pasdek. Da Harry Johnson ken ti asawana a ni Karin, a kasangsangpet iti Denmark kalpasan ti panagturposda iti maika-26 a klase ti Gilead, timmulongda a nangisaad ken nangpaandar iti pagimprentaan.

Pinarang-aymi ti panangorganisar kadagiti maang-angay a dadakkel a kombension idiay Denmark, ket talaga a nakatulong ti kapadasak bayat ti panagtrabahok idi kadagiti kombension iti Estados Unidos. Idi 1961, ti dakkel nga internasional a kombensionmi idiay Copenhagen ket tinabunuan dagiti delegado manipud iti nasurok a 30 a pagilian. Agdagup iti 33,513 ti kangatuan a bilang dagiti timmabuno. Idi 1969, indauluanmi ti kadakkelan kadagiti amin a kombension a naangay idiay Scandinavia, nga 42,073 ti kangatuan a bilang dagiti timmabuno!

Idi 1963, naawisak a tumabuno iti maika-38 a klase ti Gilead. Daytoy ket nabalbaliwan a sangapulo a bulan a kurso a kangrunaanna a nadisenio a mangsanay kadagiti agserserbi iti sanga nga opisina. Makaparagsak a makadua manen ti pamilia ti Bethel iti Brooklyn ken magunggonaan kadagiti kapadasan dagidiay adun a tawen a mangay-aywan kadagiti operasion ti hedkuarter.

Kalpasan daytoy a kurso a panagsanay, nagsubliak idiay Denmark tapno itultuloyko nga iwanwan dagiti trabaho sadiay. Kanayonanna, naaddaanak iti pribilehio nga agserbi kas manangaywan iti sona, nga agbisita kadagiti sanga nga opisina iti makinlaud ken makin-amianan a Europa tapno paregtaen dagiti agserserbi sadiay ken tulongan ida a mangtungpal kadagiti annongenda. Di pay nabayag, inaramidko ti kastoy a trabaho iti Makinlaud nga Africa ken iti Caribbean.

Idi arinunos ti dekada 1970, dagiti kakabsat idiay Denmark nangrugida nga agsapul iti lugar a pakaibangonan ti dakdakkel a pasilidad para iti umad-adu a trabaho iti panagipatarus ken panagimprenta. Adda nasayaat a lote a nasarakan iti agarup 60 a kilometro iti laud ti Copenhagen. Nakipagtrabahoak iti panangplano ken panangdisenio iti daytoy a baro a pasilidad, ket ninamnamami ken ni Julie nga agserbikami iti pamilia ti Bethel iti maibangon a baro a pagtaengan. Ngem saan a kasta ti napasamak.

Nagsublikami iti Brooklyn

Idi Nobiembre 1980, naawiskami ken ni Julie nga agserbi iti Bethel idiay Brooklyn, ket dimtengkami sadiay idi Enero 1981. Nganngani aginnem a pulo idin ti tawenmi, ken kalpasan ti panangbusbosmi iti nganngani kagudua ti biagmi a nakikadua kadagiti patgenmi a kakabsat idiay Denmark, saan a nalaka ti agsubli iti Estados Unidos. Kaskasdi, saanmi a pinampanunot ti pagayatanmi no di ket impamaysami ti atensionmi kadagiti agdama nga annongenmi ken kadagiti aniaman nga iyegda a karit.

Simmangpetkami iti Brooklyn ket nagiankami sadiay. Naibaon ni Julie nga agtrabaho iti opisina ti kuenta, a kas iti trabahona idiay Denmark. Naibaonak met iti Writing Department, a tumulong iti panangyurnos iti proseso dagiti publikasiontayo. Idi rugrugi ti dekada 1980, addada panagbalbaliw a naaramid kadagiti operasion iti Brooklyn. Manipud iti panagusar iti makinilia ken typesetting iti napudot a buli, nasukatan iti proseso ti kompiuter ken offset printing. Awan ti ammok maipapan iti kompiuter ngem adda ammok iti panangorganisar ken pannakipagtrabaho.

Di nagbayag kalpasanna, kasapulan ti ad-adda a panangpasayaat iti pannakaorganisar ti Art Department idi inrugimi ti agusar iti de kolor nga offset printing ken de kolor nga ilustrasion ken retrato. Nupay awan kapadasak kas artesano, makatulongak iti panangorganisar. Isu a naaddaanak iti pribilehio a mangiwanwan iti dayta a departamento iti uneg ti siam a tawen.

Idi 1992, nadutokanak a tumulong iti Publishing Committee ti Bagi a Manarawidwid ket nayakarak iti Treasurer’s Office. Ditoy nga intultuloyko ti agserbi mainaig kadagiti pinansial a trabaho dagiti Saksi ni Jehova.

Panagserbi Manipud Kinaagtutubok

Manipud idi ubingak ken bayat ti 70 a tawen a dedikado a panagserbik, siaanus nga insuronak ni Jehova babaen ti Saona, ti Biblia, ken dagiti manangtulong a kakabsat iti nakaskasdaaw nga organisasionna. Natagiragsakko ti amin-tiempo a ministerio iti nasuroken nga 63 a tawen, a nasurok a 55 kadagitoy a tawen iti denna ti nasungdo a baketko a ni Julie. Talaga a mariknak a sibabaknang a binendisionannak ni Jehova.

Idi 1940, idi pimmanawak iti pagtaenganmi tapno agserbiak kas payunir, inumsi ni tatangko ti desisionko ket kinunana: “Anak, no pumanawka tapno aramidem dayta, dimo ipapan a makapagsublika pay kaniak tapno kumiddaw iti aniaman a tulong.” Kadagiti naglabas a tawtawen, awan pulos ti makagapu tapno aramidek dayta. Sipaparabur nga impaay ni Jehova dagiti kasapulak, a masansan a babaen ti tulong dagiti pada a Kristiano. Idi agangay, rinaem ni Tatang ti trabahomi, ken rimmang-ay pay iti pannakaammona iti kinapudno iti Biblia sakbay a pimmusay idi 1972. Ni Nanang, nga addaan iti namnama a nailangitan a biag, nagtultuloy a simamatalek a nagserbi ken ni Jehova agingga iti ipupusayna idi 1985, idi agtawen iti 102.

Nupay talaga nga adda dagiti parikut iti amin-tiempo a ministerio, saanmi pulos a pinanunot ken ni Julie a panawan ti annongenmi. Kanayon a tinulongannakami ni Jehova a mangtaginayon iti kasta a determinasion. Uray idi nataenganen dagiti nagannakko ket kasapulanda ti tulong, nagboluntario ni manangko, a ni Victoria Marlin, ket siaayat nga inaywananna ida. Pagyamananmi unay ti naayat a suportana tapno maitultuloymi ti amin-tiempo a ministerio.

Ni Julie sisusungdo a tinulongannak kadagiti amin a pakaibaonanmi, a minatmatanna daytoy kas paset ti bukodna a dedikasion ken ni Jehova. Ken nupay agtawenak itan iti 80 ken addaan kadagiti parikut iti salun-at, mariknak a sibabaknang a binendisionannak ni Jehova. Naparegtaak unay iti kuna ti salmista, a kalpasan nga iwaragawagna ti panangisuro kenkuana ti Dios manipud iti kinaagtutubona, immararaw, ‘Uray pay agingga iti kinalakay, O Dios, saannak a baybay-an, agingga a maisaritak ti maipapan iti kinamannakabalinmo kadagidiay umay.’​—Salmo 71:17, 18.

[Footnote]

[Ladawan iti panid 20]

Dakami ken ni Nanang idi 1940, idi inrugik ti agpayunir

[Ladawan iti panid 21]

Siak ken dagiti padak a payunir a da Joe ken Margaret Hart

[Ladawan iti panid 23]

Ti kasarmi idi Enero 1948

[Ladawan iti panid 23]

Dakami kadagiti kaklasek iti Gilead idi 1953. Manipud kannigid: Don ken Virginia Ward, Geertruida Stegenga, ni Julie, ken siak

[Ladawan iti panid 23]

Dakami kada Frederick W. Franz ken Nathan H. Knorr idiay Copenhagen, Denmark, idi 1961

[Ladawan iti panid 25]

Dakami ken Julie ita