Ti Umiso a Rason a Mamati

TI Koreano a libro a 31 Reasons Why Young People Leave the Church kunana nga adu ti saanen a makimismisa gapu ta awan ti masarakanda a makapnek a sungbat kadagiti saludsodda. Kas pagarigan, iyimtuodda, ‘Apay nga agsagaba dagiti tattao a mamati iti Dios?’ ken ‘Apay a masapul a patientayo ti amin nga isuro dagiti relihion idinto ta makariro ken agkokontra ti adu kadagiti sursuroda?’

Gapu ta naupayda kadagiti sungbat dagiti kleroda, adu ti mangibaga nga awan ti sungbat a masarakan iti Biblia. No mangipaay ti maysa a klero iti panangilawlawag a naibatay laeng iti personal a kapanunotanna, masansan nga agresulta dayta iti di pagkikinnaawatan, panangilaksid pay ketdi iti Dios ken iti Biblia.

Kasta ti kapadasan ni Abel, a napadakkel kas maysa a Luterano idiay South Africa. Malagipna: “Isursuro ti simbaan a matay ti tao gapu ta ‘alaen’ ida ti Dios. Ngem diak maawatan no apay a ti maysa a Dios ti ayat ‘alaenna’ dagiti nagannak manipud kadagiti annakda. Iti away ti Africa a dimmakkelak, saanmi a partien ti maysa nga upa no saan pay a dimmakkel dagiti piekna. No masikog ti maysa a baka, itantanmi a partien agingga a maipasngay ken mapusot ti urbonna. Diak maawatan no apay a ti maysa a naayat a Dios saanna nga ipakita ti umasping a konsiderasion kadagiti tattao.”

Kasta met laeng ti narikna ni Aram a taga Canada. “Pimmusay ni tatangko idi agtawenak iti 13,” insalaysayna. “Iti pumpon, inlawlawag ti maysa a prominente a klero a ti Dios kayatna a matay ni tatangko tapno mayadani kenkuana idiay langit. ‘Ti Dios alaenna dagiti naimbag a tattao,’ kinunana, ‘agsipud ta ay-ayaten ti Dios dagiti nalinteg.’ Diak maawatan no apay a managimbubukodan unay ti Dios.”

Idi agangay, da Abel ken Aram naam-ammoda dagiti Saksi ni Jehova, nagpayadalda iti Biblia, ket nasungbatan met laengen dagiti saludsodda. Nasukayda ti ayat iti Dios ken natibker a pammati kenkuana. Nagangayanna, indedikarda ti biagda ken ni Jehova ket nagbalinda a nasungdo nga adipenna.

Umiso a Pannakaammo​—Maysa a Tulbek iti Panamati iti Dios

Ania ti maadaltayo kadagitoy a kapadasan? Ipakitada a ti umiso a pannakaammo iti Biblia ket napateg iti panamati iti Dios. Ni apostol Pablo kinunana kadagiti Kristiano iti nagkauna a siudad ti Filipos: “Daytoy ti agtultuloy nga ikarkararagko, a ti ayatyo umadu koma nga ad-adda pay buyogen ti umiso a pannakaammo ken naan-anay a panangilasin.” (Filipos 1:9) Ditoy, ti ayat iti Dios ken kadagiti kapammatian ket innaig ni Pablo iti umiso a pannakaammo iti Dios ken panangtarus iti pagayatanna.

Rasonable daytoy, yantangay kasapulan nga am-ammuen nga umuna ti maysa a tao sakbay a mabalin a pagtalkan​—ket nasaysayaat no maam-ammo a naimbag. Umasping iti dayta, kasapulam ti umiso a pannakaammo tapno matignayka a mamati iti Dios. “Ti pammati isu ti sigurado a panangsegsegga iti bambanag nga in-inanamaen, ti nabatad a parangarang dagiti kinapudno nupay saan a makita,” kinuna ni Pablo. (Hebreo 11:1) Ti panamati iti Dios nga awan ti umiso a pannakaammo iti Biblia ket mayasping iti sinsinan balay a naaramid iti baraha. Mapuyotan laeng bassit, marippuogen dayta.

Ti panagadal iti Biblia matulongannaka a mangsapul iti sungbat dagiti saludsod a kas iti nabayagen a pinampanunot da Abel ken Aram, Apay a matay ti tao? Ilawlawag ti Biblia a “babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Lumakay ken matay dagiti tattao, saan a gapu ta alaen ida ti Dios, no di ket gapu ta nagbasol ni Adan. (Genesis 2:16, 17; 3:6, 17-19) Kanayonanna, ipalgak ti Biblia ti pudno a namnama nga ituktukon ni Jehova a Dios. Babaen ti Anakna, ni Jesu-Kristo, mangipapaay ti Dios iti namnama a panagungar para iti managbasol a sangatauan.​—Juan 5:28, 29; Aramid 24:15.

Tapno matulongantayo a mangtarus iti kinapudno maipapan iti panagungar, nailanad iti Biblia ti sumagmamano a pagarigan dagiti indibidual a pinagungar ni Jesus. (Lucas 7:11-17; 8:40-56; Juan 11:17-45) Bayat a basaenyo dagitoy a salaysay ti Biblia, imutektekanyo ti rag-o ken panagdir-i dagiti gagayyem ken pamilia dagiti napagungar. Imutektekanyo met ta natignayda a mangidayaw iti Dios ken mamati ken ni Jesus.

Ti umiso a pannakaammo maipapan iti Dios ken kadagiti panggepna ti mabalin nga addaan met iti umasping nga epekto kadagiti tattao ita. Adu dagiti mariro, madagdagsenan, ken naitibkol pay ketdi idi damo gapu ta awan ti masapulanda a makapnek a sungbat kadagiti napapateg a saludsodda. Ngem bayat nga inadalda ti Biblia, nasarakanda dagiti sungbat, ket dayta ti naan-anay a nangbalbaliw iti biagda.

Ti Ayat iti Dios​—Kangrunaan a Rason Tapno Agserbi Kenkuana

Nupay napateg ti umiso a pannakaammo tapno maaddaan iti pammati iti Dios, adda pay kasapulan tapno matignay ti maysa nga agtulnog ken agserbi kenkuana. Idi mayimtuod no ania ti kadakkelan a bilin ti Dios, kinuna ni Jesus: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo ken buyogen ti intero a pigsam.” (Marcos 12:30) No ti maysa a tao ket ayatenna ti Dios iti pamay-an nga insuro ni Jesus, situtulok nga agtulnog ken agserbi Kenkuana. Pudno kadi dayta kenka?

Ni Rachel, a nagserbi kas maysa a misionero idiay Korea iti sumagmamano a dekada, dinakamatna ti rason a nakaibatayan ti pammatina: “Pampanunotek ti kinaparabur ni Jehova kadagiti parsuana, ti manangpakawan a pannakilangenna kadagiti adipenna, ken ti pannakaseknanna iti pagimbagantayo babaen ti panangipakaammona no ania ti kalikagumanna kadatayo. Dagitoy ken amin nga umasping a banag pinarayrayda ti panagayatko iti Dios. Ket dayta nga ayat ti mangtigtignay kaniak nga agserbi kenkuana.”

Ni Martha, maysa a balo a taga Alemania, ket nagserbi ken ni Jehova iti 48 a tawen. Kunana: “Apay nga agserserbiak ken ni Jehova? Gapu ta ay-ayatek. Tunggal rabii, agkararagak ken ni Jehova ket iyebkasko kenkuana no kasano kadakkel ti panagyamanko gapu kadagiti amin a bendisionna, nangruna maigapu iti daton a pangsubbot.”

Wen, ti panagayat iti Dios tignayennatayo nga agserbi kenkuana a naimpusuan. Ngem kasano a masukay ti kasta nga ayat? Ti kabilgan a pakatignayan tapno masukay ti panagayat iti Dios isu ti nauneg a panagyaman iti ayat nga impakitana kadatayo. Utobenyo daytoy makaliwliwa a pammalagip ti Biblia: “Ti saan nga agayat saanna a naam-ammo ti Dios, agsipud ta ti Dios ket ayat. Babaen itoy naiparangarang ti ayat ti Dios iti kasasaadtayo, agsipud ta ti Dios imbaonna ti bugbugtong nga Anakna ditoy lubong tapno magun-odantayo ti biag babaen kenkuana. Ti ayat adda itoy a banag, saan a gapu ta inayattayo ti Dios, no di ket gapu ta inayatnatayo ket imbaonna ti Anakna a kas pangikappia a sakripisio maipaay kadagiti basoltayo.”​—1 Juan 4:8-10.

Ammoyo kadi no kasano kapateg daytoy nga ayat? Ipapanmo a malmalmeska iti karayan, ket maysa a tao ti nangirisgo iti biagna tapno maispalka. Malipatam kadi dayta a tao, wenno mariknam ti napalalo a panagyaman kenkuana? Saanka kadi a sidadaan a mangaramid iti amin maipaay kenkuana? Ti kadakkelan nga ayat isu ti impakita ti Dios idi impaayna ti Anakna, ni Jesu-Kristo, kas daton a pangsubbot. (Juan 3:16; Roma 8:38, 39) No ipategyo ti ayat ti Dios, matignaykayo nga agayat ken agserbi kenkuana a naimpusuan.

Dagiti Bendision Ita ken iti Masanguanan

Nupay ti panagayat iti Dios ti kangrunaan koma a rason nga aramiden ti pagayatanna, makaliwliwa a maammuan a gunggonaan ti Dios dagidiay agserbi kenkuana. Inlawlawag ni apostol Pablo: “No awan ti pammati isu di mabalin nga ay-aywen a naan-anay, ta ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.”​—Hebreo 11:6.

Ti Dios talaga a bendisionanna dagidiay agayat ken agtulnog kenkuana. Adu dagiti nasalun-at gapu iti panangsurotda kadagiti prinsipio ti Biblia. (Proverbio 23:20, 21; 2 Corinto 7:1) Dagidiay mangyaplikar kadagiti prinsipio ti Biblia maipapan iti panagbalin a napudno ken nagaget ket kaaduanna a pagtalkan ida dagiti amoda, isu a tagtagiragsakenda ti natalged a pagsapulan. (Colosas 3:23) Babaen ti panagtalekda ken ni Jehova, dagiti adipen ti Dios nabendisionanda iti talna ti panunot uray iti sidong dagiti narigat a kasasaad. (Proverbio 28:25; Filipos 4:6, 7) Kangrunaan iti amin, sitatalek a paspasungadenda ti bendision a biag nga agnanayon iti Paraiso a daga.​—Salmo 37:11, 29.

Maipapan ken Jehova, ania ti marikna dagidiay mangtagtagiragsak kadagiti kasta a bendisionna? Ni Jacqueline, maysa a Kristiano a taga Canada, inyebkasna ti apresasionna iti Dios: “Kanayon nga ipaayannakami kadagiti agkakasayaat a sagut, ken ipanamnamana ti agnanayon a biag.” Ni Abel, nga immunan a nadakamat, inladawanna ti riknana iti kastoy a pamay-an: “Baro a banag kaniak ti namnama a biag nga agnanayon iti maysa a paraiso a daga, ket il-iliwek dayta. Ngem uray no awan ti Paraiso, pagragsakak latta nga ayaten ti Dios babaen ti panagserbi kenkuana.”

Mabalinyo Met ti Maaddaan iti Pudno a Pammati

“Ni Jehova ti buybuyot manguk-ukom a buyogen ti kinalinteg; suksukimatenna dagiti bekkel ken ti puso,” kuna ti Biblia. (Jeremias 11:20) Wen, suksukimaten ni Jehova ti kaunggan ti kinataotayo. Nasken a sukimaten ti tunggal maysa no ania ti motibona no apay a mamati iti Dios. Dagiti di umiso a patpatien ken kapanunotan maipapan iti Dios ti mabalin a makagapu kadagiti di umiso nga aramid iti naglabas. Ngem ti umiso a pannakaammo iti Biblia tulongannatayo a maaddaan iti nasinged a relasion iti Namarsua, ni Jehova a Dios.​—1 Timoteo 2:3, 4.

Babaen ti urnosda a libre a panangyadal iti Biblia iti pagtaengan, dagiti Saksi ni Jehova tultulonganda dagiti tattao a gumun-od iti umiso a pannakaammo iti Dios. (Mateo 28:20) Adu a nangawat iti kasta a tulong ti natignay a mangayat iti Dios ken naaddaanda iti pudno a pammati kenkuana. Babaen ti panagadal iti Biblia, nagun-odda ti “praktikal a sirib ken ti pannakabael nga agpanunot,” a tumulong kadakuada a ‘magna a sitatalged’ kadagitoy napeggad a tiempo. (Proverbio 3:21-23) Kangrunaan iti amin, patiendan ti namnama nga “agpadpada a sigurado ken natibker” maipaay iti masanguanan. (Hebreo 6:19) Mabalinyo met ti maaddaan iti pudno a pammati ken matagiragsak dagitoy a bendision.

[Kahon iti panid 6]

Dagiti Mamagpanunot a Saludsod nga Agkasapulan iti Sungbat

“Bayat ti pannakasanayko iti ospital kas agad-adal iti medisina, naimatangak dagiti naimbag a tattao nga umas-asug gapu iti ut-ot a resulta dagiti sakit ken didigra. No adda ti Dios, apay a mapaspasamak dagitoy a banag? Ti kadi relihion ket maysa laeng a pamay-an tapno maaddaan iti talna ti panunot?”​—Maysa a dati a Presbiteriano a taga Korea.

“Masansan a mapanunotko no ti pimmusay a tatangko, a mammartek, ket napan idiay impierno wenno idiay langit. Mabutbutengak kadagiti natay ken iti kapanunotan nga adda umap-apuy nga impierno. Diak maawatan no kasano a ti maysa a naayat a Dios ibaonna ti maysa a tao iti impierno tapno agsagaba iti agnanayon.”​—Maysa a dati a Katoliko a taga Brazil.

“Ania ti masakbayan ti daga ken ti sangatauan? Kasano a makapagbiag iti agnanayon dagiti tattao? Kasano a masagrap ti sangatauan ti pudno a talna?”​—Maysa a dati a Katoliko a taga Alemania.

“Kinaubbaw ti sursuro a reinkarnasion. Saan a makapagdayaw dagiti animal, isu a no nagbasolka ket agbalinka a maysa nga animal tapno madusaka, kasanom a mailinteg ti biagmo tapno makalapsutka iti kasta a kasasaad?”​—Maysa a dati a Hindu a taga South Africa.

“Dimmakkelak iti maysa a Confuciano a pamilia, ken makipaspasetak iti seremonia a mangyeg iti talna kadagiti inapomi. Babaen ti pannakipasetko iti panangisagana iti lamisaan a pagdatonan ken panagrukbab, pagduaduaak no dagiti natay nga inapomi ket kankanenda dagiti taraon ken no makitkitada met laeng ti panagruknoymi kadakuada.”​—Maysa a dati a Confuciano a taga Korea.

Amin dagitoy nga indibidual nasungbatan dagiti saludsodda idi nakipagadalda iti Biblia kadagiti Saksi ni Jehova.