Rumangrang-ay ti Pudno a Kristianidad

NAGDAKKEL ti epekto ti ministerio ni Jesu-Kristo idi umuna a siglo. Ti mensahena ket makapakired, manglawag, ken manggutugot iti pamay-an a namagsiddaaw kadagiti tattao. Kasta unay ti pannakatignay ti adu gapu iti nangngeganda a sasaona.​—Mateo 7:28, 29.

Situtured a nagkedked ni Jesus a makiraman kadagiti mangirurumen a narelihiosuan ken napolitikaan a sistema idi kaaldawanna ngem nagbalin a nasinged kadagiti ordinario a tattao. (Mateo 11:25-30) Imbatadna ti nasaknap nga impluensia dagiti dakes nga espiritu ditoy daga ken pinarmekna dagita babaen ti pannakabalin a naggapu iti Dios. (Mateo 4:2-11, 24; Juan 14:30) Sisisigo nga inlawlawag ni Jesus ti dakkel a pagnaigan ti panagsagaba ken ti basol, ken siaayat nga insurona a ti Pagarian ti Dios ti makaipaay iti agnanayon a bang-ar. (Marcos 2:1-12; Lucas 11:2, 17-23) Namimpinsan nga inikkatna ti naespirituan a kinasipnget a nabayag a nangpalidem iti pudno a personalidad ni Amana, nga impalgakna ti nagan ti Dios kadagiti amin nga interesado a maaddaan iti personal a relasion Kenkuana.​—Juan 17:6, 26.

Gapuna, saan a pagsiddaawan nga iti laksid ti nakaro a narelihiosuan ken napolitikaan a panangidadanes, nagpartak a naisaknap dagiti adalan ni Jesus ti mamagbalbaliw a mensahena. Iti uneg laeng ti agarup 30 a tawen, nabuangay dagiti aktibo a kongregasion Kristiano iti Africa, Asia, ken Europa. (Colosas 1:23) Dagiti simple a kinapudno nga insuro ni Jesus linawaganna ti puspuso dagiti napakumbaba, nalinteg-panagpuspusoda a tattao iti intero nga Imperio ti Roma.​—Efeso 1:17, 18.

Ngem kasano a dagitoy a kabbaro nga adalan manipud iti nagduduma a kasasaad, kultura, lenguahe, ken narelihiosuan a nalikudan agkaykaysada iti “maysa a pammati,” kas kinuna ni apostol Pablo? (Efeso 4:5) Ania ti mamagtultuloy kadakuada nga ‘agsao a sangsangkatunos,’ tapno awan kadakuada ti sumiasi? (1 Corinto 1:10) Gapu iti nakaro a kinaawan ti panagkaykaysa dagiti agkunkuna a Kristiano ita, nasken nga usigentayo no ania ti insuro a mismo ni Jesus.

Ti Pakaibatayan ti Nakristianuan a Panagkaykaysa

Idi maisaklang ken ni Poncio Pilato, dinakamat ni Jesus ti pakaibatayan ti Nakristianuan a panagkaykaysa. Kinunana: “Maigapu itoy a nayanakak, ken maigapu itoy nga immayak iti lubong, tapno saksiak ti kinapudno. Tunggal maysa nga adda iti dasig ti kinapudno imdenganna ti timekko.” (Juan 18:37) No kasta, ti panangawat iti sursuro ni Jesus agraman ti amin a linaon ti naipaltiing a Sao ti Dios, ti Biblia, addaan iti nabileg a mamagkaykaysa nga impluensia kadagiti pudno nga adalan ni Kristo.​—1 Corinto 4:6; 2 Timoteo 3:16, 17.

Siempre, dagiti adalan ni Jesus addaanda kadagiti napasnek a saludsod wenno di pagkikinnaawatan no dadduma. Ania ngarud ti tumulong kadakuada? Inlawlawag ni Jesus: “Inton dumteng dayta, ti espiritu ti kinapudno, idalannakayto iti isuamin a kinapudno, ta saanto nga agsao iti bukodna a pannakatignay, no di ket sawennanto ti bambanag a mangngegna, ket ideklarananto kadakayo ti bambanag nga um-umay.” (Juan 16:12, 13) No kasta, ti nasantuan nga espiritu ti Dios tulonganna dagiti pudno nga adalan ni Jesus a mangtarus iti kinapudno bayat nga in-inut nga ipalgak dayta ti Dios. Kasta met, dayta nga espiritu ket mangpataud iti bungbunga, kas iti ayat, rag-o, ken talna, a mamagkaykaysa kadakuada.​—Aramid 15:28; Galacia 5:22, 23.

Insuro ni Jesus a nasken a liklikan dagiti adalanna ti panagririri wenno panagsisina; saanna met nga inautorisaran ida a mangbaliw iti kaipapanan dagiti kinapudno iti Biblia tapno maitunos daytoy kadagiti kultura wenno narelihiosuan a tradision dagiti makasabaanda. Imbes ketdi, iti maudi a rabii a kaduana ida, sipapasnek nga inkararagna: “Agkiddawak, saan a maipapan kadagitoy laeng, no di ket maipapan met kadagidiay addaan iti pammati kaniak babaen iti saoda; tapno maymaysada koma amin, a kas kenka, Ama, naikaykaysaka kaniak ket naikaykaysaak kenka, tapno isuda met maikaykaysada koma kadata, tapno patien ti lubong a sika imbaonnak.” (Juan 17:20, 21) No kasta, ti pudno a panagkaykaysa iti espiritu ken kinapudno ket maysa a pakabigbigan dagiti adalan ni Kristo manipud idi nangrugi ti Kristianidad agingga iti panawentayo. (Juan 4:23, 24) Ngem apay a nabingaybingay, imbes a nagkaykaysa, dagiti relihion ita?

No Apay a Nabingaybingay Dagiti Relihion

Ti prangka a rason no apay a nakaro ti panagduduma ti patpatien ken ar-aramid dagiti agdama nga agkunkuna a Kristiano ket gapu ta saanda nga iyap-aplikar dagiti pannursuro ni Jesus. Kinuna ti maysa a mannurat: “Kas iti naglabas, dagiti agdama a kabbaro a Kristiano awatenda laeng ti adda iti Biblia a mayanatup kadagiti kasapulanda​—ket ilaksidda ti aniaman a di maitunos iti narelihiosuan a tradisionda.” Kasta ti mismo a mapasamak nga impakpakauna ni Jesus ken dagiti apostolna.

Kas pagarigan, napaltiingan ni apostol Pablo a mangisurat ken ni Timoteo a padana a manangaywan: “Addanto las-ud ti tiempo a saandanto nga anusan ti makapasalun-at a sursuro, no di ket, maitunos kadagiti bukodda a tarigagay, mangurnongdanto kadagiti mannursuro a maipaay iti bagbagida tapno gagatelenda dagiti lapayagda; ket iyadayodanto dagiti lapayagda iti kinapudno, idinto ta maisiasidanto nga agturong iti ulbod a sarsarita.” Mayaw-awan kadi ti amin a Kristiano? Saan. Intuloy ni Pablo: “Sika, nupay kasta, agtalinaedka a sipupuot iti amin a bambanag, anusam ti dakes, aramidem ti trabaho ti managebanghelio, naan-anay nga itungpalmo ti ministeriom.” (2 Timoteo 4:3-5; Lucas 21:8; Aramid 20:29, 30; 2 Pedro 2:1-3) Ni Timoteo ken dagiti padana a matalek a Kristiano inalagadda dayta a naipaltiing a balakad.

Agtultuloy nga Agkaykaysa Dagiti Pudno a Kristiano

Kas ken ni Timoteo, nagtalinaed a nasiput dagiti agdama a pudno a Kristiano babaen ti pananglaksidda kadagiti natauan a panagrasrason ken panangawat kadagiti laeng Nainkasuratan a patpatien a doktrina. (Colosas 2:8; 1 Juan 4:1) Kas panangtulad kadagiti Kristiano idi umuna a siglo, dagiti Saksi ni Jehova itungtungpalda ti ministerioda iti nasurok a 230 a pagilian, nga idandanonda ti orihinal a mensahe ni Jesus, ti naimbag a damag ti Pagarian, kadagiti tattao iti sadinoman. Usigenyo ti uppat a napateg a pamay-an ti sangsangkamaysa a panangtuladda ken ni Jesus ken panangalagadda iti pudno a Kristianidad sadinoman ti pagnanaedanda.

Naibatay iti Sao ti Dios dagiti patpatienda. (Juan 17:17) Maysa a padi iti parokia idiay Belgium ti nagsurat maipapan kadakuada: “Ti maysa a masursurotayo kadakuada [dagiti Saksi ni Jehova] isu ti kinatulokda a mangipangag iti Sao ti Dios ken ti regtada a mangikasaba iti dayta.”

Ti Pagarian ti Dios ti namnamaenda a mangrisut kadagiti sangalubongan a parikut. (Lucas 8:1) Idiay Barranquilla, Colombia, maysa a Saksi ti nakasarita ni Antonio, maysa a nabileg a mangsupsuporta iti napolitikaan a grupo. Saan nga inayonan ti Saksi, saan met a nangitandudo iti dadduma a napolitikaan nga ideolohia. Imbes ketdi, intukonna ken ni Antonio ken kadagiti adingna a babbai ti libre a panagadalda iti Biblia. Di nagbayag, naammuan ni Antonio a ti laeng Pagarian ti Dios ti talaga a namnama dagiti napanglaw idiay Colombia ken ti intero a lubong.

Dayawenda ti nagan ti Dios. (Mateo 6:9) Idi damo a nakasabaan dagiti Saksi ni Jehova idiay Australia ti maysa a napasnek a Katoliko nga agnagan iti Maria, impalubosna nga ipakitada iti Biblia no ania ti nagan ti Dios. Ania ti reaksionna? “Nakasangitak idi damo a makitak iti Biblia ti nagan ti Dios. Nagutugotak unay iti pannakaammo a mabalinko gayam a maammuan ken usaren ti personal a nagan ti Dios.” Intuloy ni Maria ti panagadalna iti Biblia, ket iti umuna a gundaway iti biagna, naammuanna no ania a kita a persona ni Jehova ken naaddaan iti manayon a relasion kenkuana.

Nagkaykaysada babaen ti ayat. (Juan 13:34, 35) Maysa nga artikulo iti The Ladysmith-Chemainus Chronicle, iti Canada, ti nagkuna: “Aniaman ti narelihiosuan a patpatiem, wenno awananka man iti dayta, rumbeng a padayawam dagiti 4,500 a Saksi ni Jehova nga aldaw ken rabii a nagtrabaho bayat ti naglabas a maysa ket kagudua a lawas tapno mangibangon iti 2,300 a metro kuadrado nga Assembly Hall idiay Cassidy . . . Pagilasinan ti pudno a Kristianidad ti naragsak a panangbangon iti dayta nga awan ti panagririkkiar, di pagkikinnaawatan wenno panagiinnagaw iti dayaw.”

Gapuna, usigenyo ti pammaneknek. Bayat a dagiti teologo, misionero, ken mannakimisa iti Kakristianuan agtultuloy a maipaspasangoda kadagiti kontrobersia iti relihionda, rumangrang-ay ti pudno a Kristianidad iti sangalubongan. Kinapudnona, dagiti pudno a Kristiano itungtungpalda ti naipaannong a ministerioda a panangikasaba ken panangisuro iti Sao ti Dios. (Mateo 24:14; 28:19, 20) No maysaka kadagiti “agsensennaay ken umas-asug” gapu kadagiti makarimon a mapaspasamak ita ken maringgoranka gapu iti kinaawan ti panagkaykaysa kadagiti relihion ti Kakristianuan, awisendaka a makiraman kadagiti Saksi ni Jehova iti nagkaykaysa a Nakristianuan a panagdayawda iti maymaysa a pudno a Dios, ni Jehova.​—Ezequiel 9:4; Isaias 2:2-4.