Pananglaglagip a Mangapektar Kadakayo

IDI adda ditoy daga, inyussuat ni Jesu-Kristo ti maysa a pananglaglagip a pakaidayawan ti Dios. Daytoy ti kakaisuna a narelihiosuan a seremonia a direkta nga imbilinna a rambakan dagiti pasurotna. Isu daytoy ti Pangrabii ti Apo, a pagaammo met kas ti Maudi a Pangrabii.

Darepdepenyo a naimatanganyo dagiti pasamak sakbay dayta nga okasion. Nagtataripnong da Jesus ken dagiti apostolna iti makinngato a siled ti Jerusalem tapno rambakanda ti Paskua dagiti Judio. Nalpasdan a nagraranudan ti kaugalian a pangrabii iti Paskua, a pakairamanan ti tinuno a kordero, napait a natnateng, awan lebadurana a tinapay, ken nalabaga nga arak. Napapanawen ti saan a nasungdo nga apostol a ni Judas Iscariote a nakasaganan a mangliput iti Apona. (Mateo 26:17-25; Juan 13:21, 26-30) Nabati ni Jesus ken dagiti 11 a matalek nga apostolna. Ni Mateo ti maysa kadakuada.

Sigun iti panangisalaysay ni Mateo iti nakitana, kastoy ti panangyussuat ni Jesus iti Pangrabii ti Apo: “Ni Jesus nangala iti [awan lebadurana a] tinapay ket, kalpasan ti panangisaona iti pamendision, pinispisina ket, idi intedna kadagiti adalan, kinunana, ‘Alaenyo, kanenyo. Daytoy kaipapananna ti bagik.’ Kasta met, nangala iti kopa [ti arak] ket, idi nakapagyamanen, intedna kadakuada, a kunkunana: ‘Uminumkayo manipud iti dayta, dakayo amin; ta daytoy kaipapananna ti bukodko a “dara ti tulag,” a maiparukpok maigapu iti adu maipaay iti pannakapakawan dagiti basol.’”​—Mateo 26:26-28.

Apay nga inyussuat ni Jesus ti Pangrabii ti Apo? Iti dayta nga okasion, apay a nagusar iti awan lebadurana a tinapay ken nalabaga nga arak? Amin kadi a pasurot ni Kristo ket mangan ken uminum kadagitoy nga emblema? Kasano kasansan a rambakan daytoy a pangrabii? Ken adda kadi napateg a kaipapananna daytoy kadakayo?