666​—Saan Laeng a Maysa a Misterio

“Awan ti asinoman a makabalin a gumatang wenno aglako malaksid ti tao nga addaan marka, ti nagan ti atap nga animal wenno ti numero ti naganna. Ditoy a sumrek ti sirib: Daydiay addaan kinasaririt pattapattaenna koma ti numero ti atap nga animal, ta dayta ket numero ti tao; ket ti numerona innem a gasut ken innem a pulo ket innem.”​—Apocalipsis 13:17, 18.

MANMANO a topiko iti Biblia ti makapainteres ken mamagpanunot unay a kas iti padto maipapan iti misterioso a marka, wenno nagan, “ti atap nga animal”​—ti numero 666. Iti telebision ken Internet, uray kadagiti pelikula, libro, ken magasin, awan patinggana ti pattapatta maipapan iti marka ti animal.

Adda dagiti mamati a ti 666 ket marka ti antikristo a tuktukoyen ti Biblia. Kuna ti dadduma nga ipasimudaag dayta ti sumagmamano a kita ti makalikaguman a pakabigbigan, kas iti tato wenno naimula a microchip nga addaan iti digital code a mangipabigbig iti tao kas maysa nga adipen ti animal. Ngem kunaen ti dadduma a ti 666 ket marka ti papa ti Katoliko. Napataud ti 666 babaen dagiti numero dagiti Romano nga insukatda kadagiti letra ti opisial a titulo ti papa a ni Vicarius Filii Dei (Ti Vicario ti Anak ti Dios), ken sumagmamano a panangmanipular kadagiti numero. Adda met dagiti mangibaga a dayta a numero mabalin a makalkular manipud iti Latin a nagan ni Romano nga Emperador Diocletian ken iti Hebreo a bersion ti nagan a Nero Cesar.a

Nupay kasta, dagitoy a naputar a panangipaulog ket naiduma unay iti mismo a kunaen ti Biblia maipapan iti marka ti animal, kas makitatayo iti sumaganad nga artikulo. Iti kinapudnona, ipalgak ti Biblia a dagidiay addaan iti kasta a marka mapasaranda ti pungtot ti Dios inton pagpatinggaenna ti agdama a sistema ti bambanag. (Apocalipsis 14:9-11; 19:20) No kasta, ti panangtarus iti kaipapanan ti 666 ket saan laeng a basta panangsolbar iti maysa a makapainteres a misterio. Makaparagsak ta ni Jehova a Dios, ti mismo a personipikasion ti ayat ken ti Gubuayan ti naespirituan a lawag, inlawlawagna kadagiti adipenna ti maipapan iti daytoy a napateg a banag.​—2 Timoteo 3:16; 1 Juan 1:5; 4:8.

[Footnote]