Ti Kapatgan a Matawid

ITI arinunos ti biagna, insurat ti lakayen a ni apostol Juan: “Awanen ti adda kaniak a dakdakkel pay a pakaigapuan ti kinamanagyaman ngem kadagitoy a banag, a mangngegko koma a ti annakko agtultuloyda a magna iti kinapudno.”​—3 Juan 4.

Ti matalek nga apostol tuktukoyenna dagiti annakna iti naespirituan. Ngem adu a nagannak ti makarikna iti kas iti inyebkas ti apostol. Nagbalinda a naanep iti panangpadakkel kadagiti annakda “iti disiplina ken panangiturong-panunot ni Jehova,” ket ita maragsakanda ta dimmakkel dagiti annakda a ‘nagtultuloy a magna iti kinapudno.’ (Efeso 6:4) Iti kinapudnona, ti panangisuro kadagiti annak no kasano a gun-oden ti biag nga agnanayon ket kaipapananna ti panangted kadakuada iti kapatgan a mabalin a maipatawid. Ngamin ti nadiosan a debosion, nga iramanna ti panagbiag a maitunos iti kalikaguman ni Jehova kadagiti Kristiano, ket “addaan kari a biag itan ken daydiay nga umay.”​—1 Timoteo 4:8.

Ni Jehova, ti perpekto nga Ama, tagipatgenna unay dagiti nagannak a mangikagkagumaan a mangipaay iti naespirituan nga edukasion kadagiti annakda. No agpaisuro dagiti annak, maaddaanda iti dakkel a rag-o a mangiporsegi iti nasin-aw a panagdayaw a kadua dagiti dadakkelda. Bayat nga agmataengan dagiti kasta nga annak, maaddaanda kadagiti kapadasan a malaglagipda a siraragsak. Dadduma ti siraragsak a makalagip iti damo a pannakipasetda iti Teokratiko nga Eskuelaan ti Panagministro.a Wenno malagipda ti gundaway a damoda ti nangbasa iti teksto ti Biblia bayat ti panagbalaybalay a kaduada dagiti dadakkelda. Kasano koma a malipatanda ti nangngegda a panangbasa dagiti dadakkelda iti linaon Ti Librok Dagiti Estoria ti Biblia wenno ti Panagimdeng iti Naindaklan a Mannursuro?b Adda malagip ni Gabriel a nagustuanna unay: “Idi agtawenak laeng iti uppat, inaldaw a kantaannak ni Nanang bayat ti panaglutona. Kaay-ayok a lagipen ti maysa a kanta ti Pagarian. Timmulong dayta idi agangay tapno maipategko ti panagserbi ken ni Jehova.” Nalabit a malagipyo met ti napintas a kanta a tuktukoyen ni Gabriel. Isu dayta ti kanta numero 157 iti pagkantaan nga Agkanta iti Daydayaw ken ni Jehova, a napauluan “Dayawem ni Jehova Bayat ti Kinaagtutubom.”

Kuna ti rugi ti kanta: “Ub-ubbing inusar idi ti Dios;/Tapno idayawdan Kristo Jesus.” Kinapudnona, addada ubbing a naaddaan iti pribilehio a makilangen ken ni Jesus, ket naragsakan la ketdi kadakuada gapu iti makapabang-ar, napudno a kababalinda. Inusar pay ketdi ni Jesus ti kinalaka dagiti ubbing a maisuro kas maysa nga ulidan a tuladen dagiti pasurotna. (Mateo 18:3, 4) Gapuna, addaan dagiti ubbing iti mayanatup a paset iti panagdayaw ken ni Jehova. Iti kinapudnona, intuloy ti kanta: “Wen, uray ubbing Dios maipadayag.”

Babaen ti mapagulidanan a konduktada​—iti pagtaengan, iti eskuelaan, ken kadagiti dadduma a lugar​—adu nga ubbing ti nangyeg iti pakaidayawan ti Dios ken ti pamiliada. Anian a bendision kadakuada ti maaddaan kadagiti “nagannak a Kristiano.” (Deuteronomio 6:7) Dagiti nadiosan a nagannak aramidenda ti ibaga ti Dios, a kas iti naayat nga Ama, isurona dagiti parsuana a magna iti dalan a rumbeng a pagnaanda. Ket anian ti pannakabendisionda! Bayat nga isuroda met dagiti naganus a kameng ti pamiliada, anian ti ragsakda! Kas kuna ti kanta, “No agtulnog an-annak pagrag-oan.” (Isaias 48:17, 18) Ni Angélica, nga agdama nga agserserbi iti sanga nga opisina dagiti Saksi ni Jehova idiay Mexico, kunana: “Dagiti dadakkelko kanayon nga ikagumaanda nga iyaplikar dagiti prinsipio ti Biblia. Dayta ti namagbalin iti kinaagtutubok a makaay-ayo. Nakaragragsakak.”

Dagiti kasta a Kristiano umanamongda a makagunggona ti panangilala iti naespirituan a panagbiag nga impatawid dagiti nagannak kenka. Nalabit a maysaka nga agtutubo a napadakkel iti pamilia a mangal-alagad kadagiti pudno a Nakristianuan a prinsipio. No kasta, idagadag kenka ti isu met laeng a kanta: “O agtutubo, dalan dalusan.” Dumtengto ti tiempo a mangaramidka kadagiti bukodmo a desision, isu nga ita “ni Jehovat’ inka pagtaklinan./Pannakaidayaw dimo int’resen.”

No sibibiddut nga ipangpangrunam iti biagmo ti pannakaidayaw, mabalin a masayang dagiti amin a pannakasanaymo ket mabalin a madadaelmo ti masanguanam. Ti tarigagay nga agbalin a natan-ok mabalin a pakapuyenna ti kinasalukagmo. Isu a dadduma ti nakitimpuyog payen kadagidiay kasla di makadangran, makaay-ayo pay ketdi, ngem awan panagraemda kadagiti Nakristianuan a pagalagadan. Kasta ti napasamak ken ni Tara, ti kangrunaan a karakter iti video a Young People Ask​—How Can I Make Real Friends? Kas ken ni Tara, siasinoman nga agtutubo a Kristiano a makitimpuyog kadagiti saan a mangipatpateg iti nasin-aw a panagdayaw maamirisdanto a ti “dakes a kadua indaka perdien,” kas iti kuna ti kanta. Adu a tawen ti panangikagumaan a mangsukay kadagiti nasayaat nga ugali, ngem nagbiitda a madadael.

Siempre, saan a nalaka ti agbiag nga addaan panagbuteng iti Dios. Kaskasdi, kas iti ituloy a kunaen ti kanta, “No bayat ti kinaagtutubom,/Dios pagserbiam ’ti amin a pusom,” pudpudno a naballigikanto. Ken “naragragsakkanton lumakayka.” Ad-addanto a maamirismo nga iti sidong ti naayat a panangaywan ni Jehova, awan ti makapasardeng kenka a mangaramid iti umiso iti imatangna. Isu dayta ti pamay-an tapno agbalin a nataengan, nadiosan nga adulto. Kanayonanna, ti nainsiriban a panangaprobetsar iti Nakristianuan a pannakasanay ipaayannaka iti gundaway tapno ti “Dios maay-ayom ti pusona.” Ania pay koma ti ad-adda a pakaitan-okan ti tao?​—Proverbio 27:11.

Gapuna, dakayo nga agtutubo, kanayon a laglagipenyo a nakapatpateg ti panangsanay ni Jehova ken dagiti Kristiano a dadakkelyo. Ti koma naindaklan a panagayatda kadakayo ti mangtignay kadakayo a mangaramid iti makaay-ayo iti imatang ni Jehova. Kas ken ni Jesu-Kristo ken ni matalek nga agtutubo a Timoteo, maparagsakyo ti nailangitan nga Amayo ken dagiti mismo a nagannak kadakayo. Ken no agbalinkayto met a nagannak, nalabit nga umanamongkayo ken ni Angélica, a nadakamat itay, a nagkuna: “No bilang ta maaddaanakto iti anak, ikagumaak nga ipasagepsep iti pusona manipud kinamaladaga ti panagayat ken ni Jehova, tapno agbalin dayta kenkuana kas mangiwanwan a lawag.” Pudno unay, ti nalinteg a dana nga agturong iti biag nga agnanayon isu ti kapatgan a banag a matawid!

[Footnotes]