Agpaiwanwankayo iti Sibibiag a Dios
“Agbaw-ingkayo . . . iti Dios a sibibiag, a nangaramid iti langit ken iti daga ken iti baybay ken iti amin a bambanag nga adda kadakuada.”—ARAMID 14:15.
1, 2. Apay a nainkalintegan a bigbigen a ni Jehova “ti sibibiag a Dios”?
KALPASAN a pinaimbag da apostol Pablo ken Bernabe ti maysa a lalaki, impatalged ni Pablo kadagiti agdengdengngeg idiay Listra: “Tattaokami met nga addaan kadagiti isu met laeng a pagkapuyan a kas kadakayo, ket idekdeklarami kadakayo ti naimbag a damag, tapno agbaw-ingkayo manipud kadagitoy ubbaw a banag nga agturong iti Dios a sibibiag, a nangaramid iti langit ken iti daga ken iti baybay ken iti amin a bambanag nga adda kadakuada.”—Aramid 14:15.
2 Talaga a “sibibiag a Dios” ni Jehova, saan ket a maysa nga awan biagna nga idolo! (Jeremias 10:10; 1 Tesalonica 1:9, 10) Ngem saan laeng a sibibiag ni Jehova, isu pay ti Gubuayan ti biagtayo. “Isu mangted iti biag ken anges ken amin a bambanag iti amin a tattao.” (Aramid 17:25) Kayatna a matagiragsaktayo ti biag, iti agdama ken iti masanguanan. Innayon ni Pablo a ti Dios “saanna a binay-an nga awan mangsaksi iti bagina iti panagaramidna ti naimbag, nga inikkannakayo kadagiti tudo manipud langit ken kadagiti nabunga a panawen, a pinunnona a naan-anay dagiti pusoyo iti taraon ken ragsak.”—Aramid 14:17.
3. Apay a makapagtalektayo iti panangiwanwan ti Dios?
3 Gapu ta maseknan ti Dios iti biagtayo, agtalektayo iti panangiwanwanna. (Salmo 147:8; Mateo 5:45) Mabalin a saan a kasta ti reaksion ti dadduma no adda bilin ti Biblia a dida maawatan wenno kasla nainget. Kaskasdi, napaneknekan a kinasirib ti panagtalek iti panangiwanwan ni Jehova. Kas panangyilustrar: Uray no saan a maawatan ti maysa nga Israelita no apay a maiparit ti panangsagid iti bangkay, pagimbaganna ti panangannurotna iti dayta. Umuna, ti panagtulnogna ti mangpasinged kenkuana iti sibibiag a Dios; maikadua, tumulong dayta kenkuana a mangliklik kadagiti sakit.—Levitico 5:2; 11:24.
4, 5. (a) Sakbay ti panawen dagiti Kristiano, ania a panangiwanwan ti impaay ni Jehova maipapan iti dara? (b) Kasanotay nga ammo nga agaplikar met kadagiti Kristiano ti panangiwanwan ti Dios maipapan iti dara?
4 Kasta met laeng no maipapan iti bilin ti Dios maipapan iti dara. Imbilinna ken ni Noe a maiparit ti pannangan dagiti tattao iti dara. Sa iti Linteg, impalgak ti Dios a ti laeng maipalubos a pakausaran ti dara ket iti altar—nga agpaay a mangabbong iti basol. Babaen kadagita a bilin, impasdek ti Dios ti kakaisuna a kapatgan a pakausaran ti dara—ti panangisalakan kadagiti biag babaen ti subbot nga indatag ni Jesus. (Hebreo 9:14) Wen, iwanwannatayo ti Dios gapu ta pampanunotenna ti biag ken pagimbagantayo. Iti panangilawlawagna iti Genesis 9:4, insurat ti eskolar iti Biblia a ni Adam Clarke idi maika-19 a siglo: “Daytoy a bilin [ken ni Noe] ket siiinget nga an-annuroten pay laeng dagiti Kristiano iti oriente . . . Saan a maipalubos ti pannangan iti dara iti sidong ti linteg gapu ta impatuldona ti dara a masapul a maibukbok agpaay iti basol ti lubong; ken maiparit ti pannangan iti dara iti sidong ti Nakristianuan nga urnos gapu ta naibilang dayta a mangiladawan iti dara a naibukbok agpaay iti pannakapunas dagiti basol.”
5 Mabalin a tuktukoyen daytoy nga eskolar ti pamunganayan nga ebanghelio, wenno naimbag a damag, a naisentro ken ni Jesus. Nairaman iti dayta ti panangibaon ti Dios iti Anakna tapno matay agpaay kadatayo, nga ibukbokna ti darana tapno maaddaantayo iti biag nga agnanayon. (Mateo 20:28; Juan 3:16; Roma 5:8, 9) Karaman met iti komento ti eskolar ti maipapan iti naud-udi a bilin nga adaywan dagiti Kristiano ti dara.
6. Ania a panangiwanwan maipapan iti dara ti naited kadagiti Kristiano, ken apay?
6 Ammoyo a ginasut a bilin ti impaannurot ti Dios kadagiti Israelita. Idi natay ni Jesus, saanen nga obligado dagiti adalanna a mangannurot kadagiti amin a linteg idi. (Roma 7:4, 6; Colosas 2:13, 14, 17; Hebreo 8:6, 13) Ngem idi agangay, adda saludsod a timmaud maipapan iti maysa a napateg nga obligasion—pannakakugit dagiti lallaki. Nasken kadi a makugit dagiti saan a Judio nga agtarigagay a magunggonaan iti dara ni Kristo, a mangipakita nga addada pay laeng iti sidong ti Linteg? Idi 49 K.P., ti Kristiano a bagi a manarawidwid rinisutna dayta nga isyu. (Aramid, kapitulo 15) Babaen ti tulong ti espiritu ti Dios, natinong dagiti apostol ken dagiti lallakay a nagpatinggan ti obligado a panagpakugit idi nagpatingga ti Linteg. Kaskasdi, nagtultuloy a maipaannurot kadagiti Kristiano ti sumagmamano a bilin. Kastoy ti surat ti bagi a manarawidwid kadagiti kongregasion: “Ti nasantuan nga espiritu ken dakami inanamonganmi ti saanen a panangnayon pay iti dadagsen kadakayo, malaksid kadagitoy nasken a banag, nga itultuloyyo ti umadayo iti bambanag a naisakripisio kadagiti idolo ken iti dara ken iti bambanag a nabekkel ken iti pannakiabig. No siaannad nga iyadayoyo ti bagbagiyo kadagitoy a banag, rumang-aykayto.”—Aramid 15:28, 29.
7. Apay a napateg kadagiti Kristiano ti ‘iyaadayo iti dara’?
7 Nalawag a ti bagi a manarawidwid minatmatanna ti ‘iyaadayo iti dara’ a kas kapateg ti panangliklik iti seksual nga imoralidad wenno panagdayaw iti idolo. Dayta ti mangpaneknek a serioso ti bilin maipapan iti dara. Dagiti Kristiano a di agbabawi no makabasolda iti idolatria wenno seksual nga imoralidad dida ‘tawiden ti Pagarian ti Dios’; “ti bingayda ket . . . ti maikadua nga ipapatay.” (1 Corinto 6:9, 10; Apocalipsis 21:8; 22:15) Imutektekanyo ti nagdumaanda: Ti panangilaksid iti panangiwanwan ti Dios maipapan iti kinasagrado ti dara ket agresulta iti agnanayon nga ipapatay. Ti panangraem iti sakripisio ni Jesus ket mangyeg iti biag nga agnanayon.
8. Ania ti mangipakita a serioso ti panangmatmat dagiti nagkauna a Kristiano iti instruksion ti Dios maipapan iti dara?
8 Ania ti pannakaawat dagiti nagkauna a Kristiano iti instruksion ti Dios maipapan iti dara ken kasano ti panagtignayda? Lagipenyo ti komento ni Clarke: “Maiparit ti pannangan iti dara iti sidong ti Nakristianuan nga urnos gapu ta naibilang dayta a mangiladawan iti dara a naibukbok agpaay iti pannakapunas dagiti basol.” Patalgedan ti historia a serioso ti panangmatmat dagiti nagkauna a Kristiano iti dayta a banag. Insurat ni Tertullian: “Panunotenyo dagidiay gapu iti kinarawetda, no adda pabuya iti arena, alaenda ti sadiwa a dara dagiti kriminal . . . tapno pangagasda iti kissiwda.” Saan a kas kadagiti pagano a kanenda ti dara, kuna ni Tertullian a dagiti Kristiano “dida pulos pagtaraon ti dara dagiti animal . . . Kadagiti pannakabista dagiti Kristiano, tukonam ida kadagiti longganisa a dara. Siempre, ammom a maiparit dayta kadakuada.” Wen, iti laksid dagiti pangta ti pannakapapatay, saan a kanen dagiti Kristiano ti dara. Kasta kapateg kadakuada ti instruksion ti Dios.
9. Ania ti ramanen ti iyaadayo iti dara malaksid iti saan a pannangan iti dayta?
9 Mabalin a panunoten ti dadduma a ti laeng iparparit ti bagi a manarawidwid ket ti pannangan wenno pananginum dagiti Kristiano iti dara wenno pannanganda kadagiti karne dagiti saan a napadara nga animal ken taraon a nalaokan iti dara. Pudno, dayta ti umuna a kaipapanan ti bilin ti Dios ken ni Noe. Ken imbilin dagiti apostol kadagiti Kristiano nga ‘adaywanda dagiti bambanag a nabekkel,’ dagiti karne a di napadara. (Genesis 9:3, 4; Aramid 21:25) Ngem ammo dagiti nagkauna a Kristiano a saan laeng a dayta ti makalikaguman. No dadduma, mausar ti dara a pangagas. Kinuna ni Tertullian a gapu iti panagreggetda a maagasan ti kissiwda, dadduma a pagano ti imminum iti sadiwa a dara. Ken mabalin nga adda pay dadduma a pakausaran ti dara a mangpaimbag iti sakit wenno maipagarup a mangpaimbag iti salun-at. Gapuna, para kadagiti Kristiano, ti iyaadayoda iti dara ramanenna ti saan a panangipauneg iti dayta kas ‘pangagas.’ Tinaginayonda dayta a takder uray agpeggad ti biagda.
Ti Dara Kas Medisina
10. Ania ti sumagmamano a pamay-an a maus-usar ti dara kas medisina, a mangpataud iti ania a saludsod?
10 Gagangay ita ti panangusar iti dara kas medisina. Puro a dara ti mayalison idi un-unana—a naala manipud iti maysa a tao, naidulin, sa nayalison iti maysa a pasiente, nalabit maysa a nasugatan iti paggugubatan. Idi agangay, nasursuro dagiti managsirarak no kasanoda a pagsisinaen dagiti kangrunaan a paset ti dara. Mabalinen nga iyalison dagiti doktor dagiti nadumaduma a paset ti naidonar a dara kadagiti ad-adu a pasiente, nalabit plasma iti maysa a nasugatan a tao ken nalabaga a selula iti sabali a tao. Ipakita ti agtultuloy a panagsirarak a ti maysa a paset ti dara, kas iti plasma, ket mabalin a maproseso tapno mangpataud iti nadumaduma a fraction (dagiti substansia a naggapu kadagiti kangrunaan a paset ti dara) a mausar iti ad-adu pay a pasiente. Agtultuloy ti kasta a panagsirarak, ket naipadamag dagiti baro a pakausaran dagiti fraction. Ania koma ti panangmatmat ti Kristiano kadagiti fraction? Natibker ti determinasionna a di pulos agpayalison iti dara, ngem mabalin nga idagadag ti doktorna nga awatenna ti maysa a kangrunaan a paset ti dara, nalabit ti puro a nalabaga a selula. Wenno ti pannakaagas ket agkalikagum iti maysa a bassit a fraction a naala iti maysa a kangrunaan a paset ti dara. Ania koma ti pangngeddeng ti maysa nga adipen ti Dios mainaig kadagiti kasta a saludsod, a laglagipenna a sagrado ti dara, ken ti dara ni Jesus ti pudpudno a mangispal iti biag?
11. Ania a takder maitunos iti medisina ti nabayagen a salsalimetmetan dagiti Saksi?
11 Adu a tawenen a nalawag ti takder dagiti Saksi ni Jehova. Kas pagarigan, nagsuratda iti maysa nga artikulo a naipablaak iti The Journal of the American Medical Association (Nobiembre 27, 1981; nayimprenta iti Kasano nga Ispalen ti Dara ti Biagyo? panid 27-9).a Iti dayta nga artikulo, naadaw ti Genesis, Levitico, ken Aramid. Kunana: “Nupay dagitoy a bersikulo saan a nailawlawag sigun iti medikal a termino, matmatan dagiti Saksi ni Jehova nga iparit dagitoy ti pannakayalison ti puro a dara, puro a nalabaga a selula ti dara, ken plasma, agraman ti pannakayalison ti puraw a selula ti dara ken platelet.” Ti 2001 a libro nga Emergency Care, iti sidong ti paulo a “Pakabuklan ti Dara,” kunana: “Ti dara ket buklen ti nagduduma a paset: plasma, nalabaga ken puraw a selula ti dara, ken platelet.” Gapuna, maitunos kadagita a nasirarak ti medisina, saan nga agpayalison dagiti Saksi iti puro a dara wenno aniaman kadagiti uppat a kangrunaan a pasetna.
12. (a) Ania a takder ti nailawlawag maipapan kadagiti fraction a naala kadagiti kangrunaan a paset ti dara? (b) Pakasarakan kadagiti kanayonan nga impormasion maipapan iti daytoy a banag?
12 Intuloy ti medikal nga artikulo: “Sigun iti patpatien dagiti Saksi, saanda a naan-anay a liklikan ti panangusar kadagiti [fraction] a kas iti albumin, immunoglobulin, ken agas para kadagiti nalaka nga agpadara; tunggal Saksi ti nasken a mangikeddeng iti bukodna no awatenna dagita wenno saan.” Sipud idi 1981, adu a fraction ti naala kadagiti kangrunaan a paset ti dara tapno mausar. Gapuna, Ti Pagwanawanan a Hunio 15, 2000 ket nangipaay iti makatulong nga impormasion iti dayta a suheto iti sidong ti artikulo a “Salsaludsod Dagiti Agbasbasa.” Agpaay iti pakagunggonaan ti minilion nga agbasbasa iti daytoy a magasin, nayimprenta manen ti sungbat iti panid 29-31 daytoy a magasin. Mangipaay dayta kadagiti detalye ken lohikal nga argumento, ket kaskasdi a maitunos dayta kadagiti kangrunaan a linaon ti 1981 nga artikulo.
Ti Paset ti Konsiensiayo
13, 14. (a) Ania ti konsiensia, ket ania ti pasetna mainaig iti dara? (b) Ania ti imbilin ti Dios iti Israel no maipapan iti pannangan iti karne, ngem ania a salsaludsod ti mabalin a tumaud?
13 Maibatay kadagita nga impormasion, nasken nga usaren ti maysa ti konsiensiana. Apay? Umanamong dagiti Kristiano a masapul a surotenda ti panangiwanwan ti Dios, ngem adda dagiti bambanag a nasken a desisionanda maibatay iti konsiensiada. Ti konsiensia ket maysa a naisigud nga abilidad a mangtinong ken mangikeddeng kadagiti bambanag, a masansan a mainaig kadagiti moral nga isyu. (Roma 2:14, 15) Ngem ammoyo a nagduduma ti konsiensia.b Kuna ti Biblia a ‘nakapuy ti konsiensia’ ti dadduma, a mangipasimudaag a napigsa ti konsiensia ti dadduma. (1 Corinto 8:12) Nadumaduma ti panagrang-ay ti pannakaammo dagiti Kristiano maipapan iti pagayatan ti Dios, iti panangtulad iti panagpampanunotna, ken iti panangyaplikar iti dayta no agdesisionda. Alaentayo a pagarigan dagiti Judio ken iti pannangan iti karne.
14 Nalawag ti kuna ti Biblia a ti tao a natulnog iti Dios dina kanen ti karne ti saan a napadara nga animal. Nagpateg dayta ta uray iti maysa nga emerhensia a nangan dagiti Israelita iti karne ti di napadara nga animal, nakabasolda iti nadagsen. (Deuteronomio 12:15, 16; 1 Samuel 14:31-35) Ngem mabalin a tumaud latta dagiti saludsod. No adda karnero a pinatay ti maysa nga Israelita, kasano kapartak a nasken a padaraenna dayta? Masapul kadi a ngurungorenna ti animal? Kasapulan kadi a maibitin ti karnero babaen ti makinlikud a sakana? Kasano kabayag? Ania ngay ti aramidenna no dakkel a baka ti ngurungorenna, yantangay agbalay ti dadduma a dara iti karne? Mabalinna kadi a kanen dayta a karne? Siasino ti nasken a mangikeddeng?
15. Ania ti tignay ti dadduma a Judio maipapan iti pannangan iti karne, ngem ania ti imbilin ti Dios?
15 Darepdepenyo ti maysa a naregta a Judio a naipasango kadagiti kasta nga isyu. Mabalin a panunotenna a nasaysayaat no liklikanna dagiti karne a nailako iti tiendaan, no kasano a ti maysa a tao liklikanna ti mangan iti karne no adda posibilidadna a naidaton dayta iti idolo. Sa la mangan iti karne dagiti dadduma a Judio kalpasan a maaramidda ti sumagmamano a ritual a mangikkat iti dara ti animal.c (Mateo 23:23, 24) Ania ti makunayo maipapan iti kasta a nagduduma a reaksion? Maysa pay, yantangay saan a ti Dios ti makinkalikagum kadagita, maiparbeng kadi a mangipatulod dagiti Judio iti nakaad-adu a saludsod iti maysa a konsilio dagiti rabbi tapno masungbatan ti tunggal saludsod? Nagtaud iti Judaismo ti kasta a kaugalian ket maragsakantayo ta saan a kasta ti panangiwanwan ni Jehova kadagiti pudno nga agdaydayaw kenkuana no maipapan iti panagdesision mainaig iti dara. Inted ti Dios ti pamunganayan nga instruksion maipapan iti panangparti ken panangpadara kadagiti nadalus nga animal, ngem saanen a limbes iti dayta.—Juan 8:32.
16. Apay a mabalin nga agduduma ti panangmatmat dagiti Kristiano maipapan iti panagpaineksion iti maysa a fraction a naala iti kangrunaan a paset ti dara?
16 Kas nadakamat iti parapo 11 ken 12, dagiti Saksi ni Jehova ket saan nga agpayalison iti puro a dara wenno aniaman kadagiti uppat a kangrunaan a pasetna—ti plasma, nalabaga a selula, puraw a selula, ken platelet. Ngem komusta ngay dagiti fraction a naala kadagiti kangrunaan a paset, kas koma iti serum a naglaon kadagiti antibodies a panglaban kadagiti sakit wenno pangsumang iti gita ti uleg? (Kitaenyo ti panid 30, parapo 4) Para kadagiti dadduma, saanda nga ibilang a dara ti kasta a babassit a fraction isu a saan a karaman dagita iti bilin nga ‘adaywanyo ti dara.’ (Aramid 15:29; 21:25; panid 31, parapo 1) Bueno, desisionda dayta. Adda met dagidiay sigun iti konsiensiada, liklikanda ti aniaman a naala iti dara (ti animal wenno tao), uray nagbassit a fraction ti maysa a kangrunaan a paset ti dara.d Dadduma ti agpaineksion iti plasma protein a panglaban iti sakit wenno pangsumang iti gita ti uleg ngem liklikanda ti dadduma a babassit a fraction. Kanayonna, dadduma a produkto a naala manipud iti maysa kadagiti kangrunaan a paset ti dara ti mabalin nga addaan iti isu met laeng nga epekto a kas iti epekto ti maysa a kangrunaan a paset ti dara a makasustener iti biag ngem saan a maawat ti konsiensia ti kaaduan a Kristiano.
17. (a) Kasano a makatulong ti konsiensiatayo iti panangtaming kadagiti saludsod maipapan kadagiti fraction ti dara? (b) Apay a napateg dagiti aramidentayo a desision maipapan iti daytoy a banag?
17 Makatulong ti ibaga ti Biblia maipapan iti konsiensia no mangaramidtayo kadagiti desision. Ti umuna nga addang isu ti panangadal iti ibaga ti Sao ti Dios ken panangsanay iti konsiensia maitunos iti dayta. Dayta ti tumulong kadakayo nga agdesision maitunos iti panangiwanwan ti Dios imbes a sabali a tao ti pagdesisionenyo. (Salmo 25:4, 5) No maipapan iti panangawat kadagiti fraction ti dara, adda dagiti nagkuna, ‘Bassit la a banag dayta yantangay mainaig dayta iti konsiensia.’ Saan nga umiso dayta a panagrasrason. Saan a gapu ta mainaig iti konsiensia, saanen a napateg dayta. Mabalin a dakkel ti epekto ti desisiontayo. Maysa a rason ket gapu ta mabalin a maapektaranna dagidiay addaan iti konsiensia a naiduma kadatayo. Nabatad dayta iti balakad ni Pablo maipapan iti karne a nalabit naidaton kadagiti didiosen sa nailako idiay tiendaan. Masapul nga ikagumaan ti Kristiano a dina ‘masugatan dagiti nakapuy a konsiensia.’ No maitibkolna dagiti dadduma, mabalin a ‘madadaelna ti kabsatna a maigapu kenkuana natay ni Kristo.’ Iti kasta, isu ket makabasol ken ni Kristo. Gapuna, nupay ti isyu maipapan kadagiti babassit a fraction ti dara ket personal a desision ti indibidual, matinong koma a naimbag dagita a desision.—1 Corinto 8:8, 11-13; 10:25-31.
18. Kasano a maliklikan ti Kristiano a mabibineg ti konsiensiana no agaramid kadagiti desision mainaig iti dara?
18 Adda sabali pay nga ikabilangan a mangipaganetget iti kinaserioso dagiti desision mainaig iti dara. Isu ti epekto dagita a desision iti mismo a bagiyo. No ti panangawatyo iti bassit a fraction ti dara buriborenna ti konsiensiayo a sinanay ti Biblia, diyo koma tagtagibassiten dayta. Wenno diyo koma iyaleng-aleng ti ibaga ti konsiensiayo gapu laeng ta adda nangibaga kadakayo, “Awan dakesna no awatem dayta a fraction ti dara; adu met ti nangawat iti dayta.” Laglagipenyo a minilion a tattao ita ti nangyaleng-aleng iti konsiensiada agingga a nabibineg dayta, isu a kabaelanda ti agulbod wenno agaramid iti dakes a dida man la makarikna iti panagbabawi. Sigurado a di kayat dagiti Kristiano nga agbalin a kasta.—2 Samuel 24:10; 1 Timoteo 4:1, 2.
19. No agdesision kadagiti medikal nga isyu mainaig iti dara, ania ti kangrunaan koma a panunotentayo?
19 Iti maudi a paset ti sungbat iti panid 29-31, kunana: “Gapu ngata ta agduduma dagiti kapanunotan ken pangngeddeng maibatay iti konsiensia, kayatna a sawen a di napateg ti isyu? Saan. Serioso dayta.” Ad-adda a serioso dayta gapu ta nairaman ti relasionyo iti “sibibiag a Dios.” Dayta a relasion ti kakaisuna a mangiturong iti biag nga agnanayon, a naibatay iti mangisalakan a pannakabalin ti dara nga imbukbok ni Jesus. Parayrayenyo ti dakkel a panagraem iti dara maigapu iti ar-aramiden ti Dios babaen iti dayta—ti panangisalakanna kadagiti biag. Maitutop ti insurat ni Pablo: “Awan ti namnamayo ken iti lubong awanankayo iti Dios. Ngem ita iti pannakikaykaysa ken Kristo Jesus dakayo nga adayo idi naminsan nayasidegkayo babaen ti dara ti Kristo.”—Efeso 2:12, 13.
[Footnotes]
a Impablaak dagiti Saksi ni Jehova.
b Naminsan, napan idiay templo da Pablo ken ti uppat pay a Kristiano tapno gugoranda ti bagida babaen ti maysa a seremonia. Nagpatingga idin ti Linteg, ngem sinurot ni Pablo ti balakad dagiti lallakay idiay Jerusalem. (Aramid 21:23-25) Kaskasdi, marikna ti dadduma a Kristiano idi a saanda a masapul a mapan idiay templo wenno aramiden ti kasta a seremonia. Nagduduma a talaga ti konsiensia idi, ket kasta met laeng ita.
c Ti Encyclopaedia Judaica ibalabalana dagiti “narikut ken detaliado” a pagannurotan maipapan iti “naidaton” a karne. Iramanna no mano a minuto a mayuper ti karne, no kasano a patedteden, no kasano a maasinan, ken no mano a daras a mabugguan iti nalamiis a danum.
d Umad-adu ti ineksion a ti kangrunaan wenno nasamay a laokna ket sintetiko a produkto a saan a nagtaud iti dara. Ngem iti dadduma a kasasaad, mabalin nga adda nailaok a bassit a fraction ti dara, kas iti albumin.—Kitaenyo ti “Salsaludsod Dagiti Agbasbasa” iti Ti Pagwanawanan nga Oktubre 1, 1994.
Malagipyo Kadi?
• Ania a mangiwanwan a bilin maipapan iti dara ti impaay ti Dios ken ni Noe, kadagiti Israelita, ken kadagiti Kristiano?
• No maipapan iti dara, ania ti naan-anay a liklikan dagiti Saksi ni Jehova?
• Iti ania nga anag a ti panangawat kadagiti babassit a fraction a naala kadagiti kangrunaan a paset ti dara ket agpannuray iti konsiensia ti indibidual, ngem ania ti dina kaipapanan dayta?
• No agaramid kadagiti desision, apay a nasken nga ipangpangrunatayo a panunoten ti relasiontayo iti Dios?
[Tsart iti panid 22]
(Para iti aktual a pannakaurnosna, kitaem ti publikasion)
TI TAKDER MAINAIG ITI DARA
PURO A DARA
▾ ▾ ▾ ▾
NAAN-ANAY A LIKLIKAN Dagiti nalabaga a selula Dagiti puraw a selula Dagiti platelet Plasma
TI KRISTIANO ▾ ▾ ▾ ▾
TI AGDESISION Fraction manipud Fraction manipud Fraction Fraction
kadagiti nalabaga kadagiti puraw manipud manipud iti
a selula a selula kadagiti platelet plasma
[Ladawan iti panid 20]
Inkeddeng ti bagi a manarawidwid a nasken nga ‘adaywan dagiti Kristiano ti dara’
[Ladawan iti panid 23]
Diyo iyaleng-aleng ti konsiensiayo no agaramidkayo iti desision mainaig iti fraction ti dara