Salsaludsod Dagiti Agbasbasa
Ania ti iladladawan ti urnos mainaig iti tawen ti Jubileo a nadakamat iti maika-25 a kapitulo ti Levitico?
Sagudayen ti Mosaiko a Linteg nga “iti maikapito a tawen rebbeng nga adda maaramid a sabbath ti naan-anay a panaginana maipaay iti daga.” No maipapan iti dayta a tawen, naibilin kadagiti Israelita: “Ti talonmo dika mulaan iti bin-i, ket ti kaubasam dika arbasan. Ti tumubo manipud naregreg a binukel ti anim dika apiten, ket dagiti ubas ti di naarbasan a puon ti ubasmo dika burasen. Rebbeng nga adda maaramid a maysa a tawen ti naan-anay a panaginana maipaay iti daga.” (Levitico 25:4, 5) Gapuna, iti kada maikapito a tawen, agbalin dayta a tawen ti Sabbath maipaay iti daga. Ken iti kada maika-50 a tawen, ti tawen kalpasan ti maikapito a tawen ti Sabbath, isu dayta ti tawen ti Jubileo. Ania ti mapasamak iti dayta a tawen?
Kinuna ni Jehova iti Israel babaen ken ni Moises: “Masapul a santipikarenyo ti maikalimapulo a tawen ket iwaragawagyo ti wayawaya iti daga kadagiti amin nga agnanaed iti dayta. Agbalinto a Jubileo maipaay kadakayo, ket masapul nga isubliyo tunggal maysa iti kukuana ken rebbeng nga isubliyo tunggal maysa iti pamiliana. Maysa a Jubileo ti pagbalinanto kadakayo dayta a maikalimapulo a tawen. Dikay agimula iti bin-i wenno apiten ti tumubo iti daga manipud iti naregreg a binukel wenno burasen dagiti ubas ti di naarbasan a lanlanotna.” (Levitico 25:10, 11) Ti tawen ti Jubileo ket kalpasan unay ti sabali pay a tawen ti Sabbath. Ngem kadagiti umili, nangyeg dayta iti pannakawayawaya. Mawayawayaan ti asinoman a Judio a nailako iti pannakaadipen. Maisubli iti pamiliana ti tawidna a kapilitan nga inlakona. Ti Jubileo ket tawen ti pannakaisubli ken pannakawayawaya para iti nagkauna nga Israel. Ania ti iladawanna para kadagiti Kristiano?
Gapu iti panagrebelde ti immuna a tao a ni Adan, naadipen ti sangatauan iti basol. Ti pangsubbot a daton ni Jesu-Kristo ti probision nga impaay ti Dios tapno mawayawayaan ti sangatauan manipud iti basol.a (Mateo 20:28; Juan 3:16; 1 Juan 2:1, 2) Kaano a mawayawayaan dagiti Kristiano manipud iti linteg ti basol? Kinuna ni apostol Pablo kadagiti napulotan a Kristiano: “Ti linteg dayta nga espiritu a mangted iti biag iti pannakikaykaysa ken Kristo Jesus winayawayaannakayo manipud iti linteg ti basol ken ti ipapatay.” (Roma 8:2) Daytoy a pannakawayawaya ket masagrap dagidiay mangnamnama nga agbiag idiay langit kalpasan a mapulotanda iti nasantuan nga espiritu. Nupay nainlasagan ken imperpekto ti bagida, ideklara ida ti Dios a nalinteg ken amponenna ida kas naespirituan nga annakna. (Roma 3:24; 8:16, 17) No kadagiti napulotan kas maysa a grupo, nangrugi ti Kristiano a Jubileo idi Pentecostes 33 K.P.
Komusta met ti “sabsabali a karnero,” nga addaan iti namnama a biag nga agnanayon ditoy daga? (Juan 10:16) Para iti sabsabali a karnero, ti Sangaribu a Tawen a Panagturay ni Kristo ket maysanto a panawen ti pannakaisubli ken pannakawayawaya. Kabayatan dayta a Milenio a Jubileo, ipaaynanto dagiti gunggona ti pangsubbot a datonna kadagiti manamati ken ikkatenna dagiti epekto ti basol. (Apocalipsis 21:3, 4) Iti ngudo ti Milenio a Panagturay ni Kristo, perpektonto ti sangatauan ken naan-anay a nawayawayaan manipud iti natawid a basol ken ipapatay. (Roma 8:21) Inton maibanag dagita, agpatingganton ti Kristiano a Jubileo.
[Footnote]
a Kinapudnona, naibaon ni Jesus “a mangiwaragawag iti wayawaya kadagidiay nakautibo.” (Isaias 61:1-7; Lucas 4:16-21) Impakaammona ti maysa a naespirituan a pannakawayawaya.
[Ladawan iti panid 26]
Ti Milenio a Jubileo—panawen ti pannakaisubli ken pannakawayawaya ti “sabsabali a karnero”