Kasano Kapaut ti Biag ti Tao?
IDI Marso 3, 1513, ti Espaniol nga eksplorador a ni Juan Ponce de León nangipatungpal iti maysa a naisangsangayan a panagdaliasat. Naglayag manipud Puerto Rico gapu ta kayatna a madanon ti isla ti Bimini. Sigun iti estoria, sinapulna ti namilagruan nga ubbog—ti Ubbog ti Kinaagtutubo. Ngem nakagteng ti eksplorador iti maawagan ita nga estado iti Florida, E.U.A. Siempre, saanna a nabirokan ti ubbog agsipud ta talaga nga awan.
Iti kaaldawantayo, agingga 70 wenno 80 a tawen laeng ti kapaut ti biag ti kaaduan a tattao. Nupay addada tattao idi nga adayo a napapaut ti biagda kas nailanad iti Biblia, ibaga ti 2002 Guinness Book of World Records a ti kapautan a nagbiag ita ket agedad iti 122 a tawen ken 164 nga aldaw. (Genesis 5:3-32) Ngem kinuna ti bioethicist a ni John Harris: “Ti baro a panagsirarak ipakitana a posiblento ti kagimongan nga awan ti panaglakay—ken uray ti ipapatay.” Adu a maika-21 a siglo a managsirarak ti mangdakamat iti “dandani nga imortalidad,” “di limitado a kapaut ti biag ti tao mangrugi inton 2099,” “ti kapasidad nga agpaadu iti selula nga awan patinggana,” ken dadduma pay nga umasping.
Iti librona a The Dream of Eternal Life, kinuna ni Mark Benecke: “Sumagmamano a daras a mapabaro ti dandani amin a selula ti bagi bayat ti panagbiag. . . . Kalpasan ti agarup pito a tawen, talaga nga addaantayon iti baro a bagi.” Ngem saan nga agnanayon dayta agsipud ta agpatingga ti panagadu ti selula kalpasan ti naikeddeng a bilang ti panagpaadu. Kuna ni Benecke a no saan koma a kasta “mapabaro manen ti intero a bagi ti tao iti napaut a tiempo—agnanayon pay ketdi.”
Usigenyo met ti nakaskasdaaw a kapasidad ti utek ti tao, a nagbassit a pasetna ti mausartayo bayat ti ababa a biagtayo. Sigun iti Encyclopædia Britannica, ti utek ti tao “ket adayo a dakdakkel ti potensialna ngem iti maus-usar ti tao bayat ti intero a biagna.” (1976 nga Edision, Tomo 12, panid 998) Ti libro ni David A. Sousa a How the Brain Learns, kunana: “Dandani awan limitasionna ti kapasidad ti utek nga agipempen iti impormasion.”—Panid 78, Second Edition, copyright 2001.
Apay a dagiti managsirarak awan ti makitada a rason iti bagitayo no apay a lumakay ken mataytayo? Ken apay a ti utek ti tao addaan iti kasta a nagdakkelan a kapasidad? Posible kadi a nadiseniotayo tapno agnanayon a gumun-od iti pannakaammo?Apay a mapampanunottayo ti biag nga agnanayon?
Kuna ti Biblia: “Uray ti tiempo a di nakedngan [ti Dios] insaadna iti pusoda, tapno ti sangatauan saanna a pulos masarakan ti aramid nga inaramid ti pudno a Dios manipud pangrugian agingga iti pagnguduan.” (Eclesiastes 3:11) Dagitoy a sasao ipasimudaagna nga immula kadatayo ti Dios ti kapanunotan a biag nga agnanayon. Gapuna, addanto a kanayon ti masursurotayo maipapan iti Dios ken kadagiti aramidna. No agbiagtayo iti di mabilang a binilion a tawen—wen, iti agnanayon—adunto latta ti masursurotayo maipapan kadagiti nakaskasdaaw a parsua ti Dios.
Dagiti sasao ni Jesu-Kristo ipakitana met a posible nga agbiag nga agnanayon ti tao. Kinunana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Dakayo ngay? Kayatyo kadi ti agbiag nga agnanayon?
[Dagiti Ladawan iti panid 3]
Ni Juan Ponce de León sinapulna ti ubbog ti kinaagtutubo
[Credit Line]
Ponce de León: Harper’s Encyclopædia of United States History