Kayatmo Kadi ti Agbiag nga Agnanayon?
“DIAK mabuteng a matay,” kinuna ti maysa a baket idiay Japan. “Ngem maladingitanak ta diakton makita dagitoy a sabong.” Maawatan dayta ti bimmisita kenkuana a maysa a Kristiano a ministro, agsipud ta napintas ti minuyongan ti baket. Adu a tattao a mangibaga a saanda a mabuteng a matay ti mangapresiar unay iti nakaskasdaaw a sangaparsuaan ken kinaagpaysuanna tarigagayanda ti agbiag nga agnanayon.
Panagbiag nga agnanayon? Adu ti mangiwaksi iti dayta a kapanunotan. Mabalin nga adda pay mangibaga a saanda nga interesado nga agbiag nga agnanayon. Apay koma a kasta ti marikna ti asinoman?
Agnanayon a Biag—Makapasikor?
Ipapan ti dadduma a makapasikor ti agbiag nga agnanayon. Mabalin a tukoyenda ti makauma a biag ti adu a retirado nga awan ti ar-aramidenda no di agtugaw ken agbuya iti telebision. No kasta ti riknam, usigem ti kinuna ti astronomo a ni Robert Jastrow idi mayimtuod kenkuana no ti biag nga agnanayon ket maysa a bendision wenno lunod. Insungbat ni Jastrow: “Bendision dayta kadagidiay managpanunot ken kanayon nga agtarigagay a makasursuro. Makaliwliwa unay kadakuada ti kapanunotan a makapagbiagda nga agnanayon tapno gumun-od iti pannakaammo. Ngem kadagiti dadduma a mangipapan nga awanen ti saanda pay a naadal ken nakarikep ti panunotda, matmatanda dayta kas nakaal-alingget a lunod. Saanda nga ammo no kasanoda nga usaren ti panawenda.”
Agpannuray iti kababalinmo no ti biag nga agnanayon ket makauma wenno saan. No ‘managpanunot ken kanayon a tarigagayam ti makasursuro,’ panunotem no ania ti magapuanam iti tay-ak ti arte, musika, arkitektura, panagmula, wenno aniaman a makagunggona a paginteresam nga aramiden. No agbiagka nga agnanayon ditoy daga, addaanka iti nakaskasdaaw a namnama a mangpatanor iti paglaingam iti nagduduma a tay-ak.
Talaga a makapnek ti biag nga agnanayon no awan inggana a mangipaay ken umawattayo iti ayat. Naparsuatayo nga addaan iti kapasidad a mangipakita iti ayat, ken sumalibukagtayo no mariknatayo nga adda mangay-ayat kadatayo. Ti pudno a panagiinnayat ket mangyeg iti dakkel a pannakapnek a saan nga agkupas iti panaglabas ti tiempo. Ti panagbiag nga agnanayon ket mangipaay iti awan inggana a gundaway a mangsukay iti ayat saan laeng a kadagiti pada a tao no di ket kangrunaanna iti Dios. “No ti asinoman ayatenna ti Dios,” kinuna ni apostol Pablo, “am-ammona daytoy a tao.” (1 Corinto 8:3) Anian a nakasaysayaat a namnama—a maam-ammo ken am-ammuen ti Soberano iti uniberso! Kanayonanna, dinto agpatingga ti masursurotayo maipapan iti naayat a Namarsua kadatayo. No kasta, kasano koma a makauma ken di makagunggona ti biag nga agnanayon?
Ti Biag—Ababa ken Napateg
Kuna ti dadduma a nakapatpateg ti biag gapu ta ababa. Idiligda ti biag iti maysa a balitok, a limitado laeng ti kaaduna. Ilawlawagda a mapukaw ti pateg ti balitok no masarakan dayta iti sadinoman. Kaskasdi, makaay-ayo latta ti balitok. Sigurado a kasta met ti biag.
Ti panangtagiragsak iti agnanayon a biag ket mabalintayo nga idilig iti kaadda ti nawadwad nga angin. Nangnangruna a napateg ti angin kadagiti tripulante iti submarino a nadadaelan iti uneg ti baybay. Kalpasan a maispalda, panagkunam agreklamoda ngata no makalang-abda manen iti nawadwad nga angin? Sigurado a saan!
Kas kadagita a tripulante, maispaltayo buyogen ti namnama nga agbiag saan laeng nga iti ababa a tiempo no di ket iti agnanayon. “Dagiti isupapak ti basol isu ti ipapatay,” insurat ni apostol Pablo, “ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” (Roma 6:23) Babaen ti daton a pangsubbot ni Jesus, ikkaten ti Dios ti kinaimperpekto ken ipapatay ti tao ket itdenna iti natulnog a sangatauan ti sagut a biag nga agnanayon. Rumbeng nga agyamantayo unay gapu iti kasta a naayat nga urnos!
Komusta met Dagiti Ing-ingungotem?
Nalabit a panunoten ti dadduma: ‘Dagiti ngay ing-ingungotek? Awan unay ti kaipapananna kaniak ti biag nga agnanayon no diak kadua ida.’ Nalabit a nagadalka iti Biblia ket naammuam a mabalin a tagiragsaken ti biag nga agnanayon iti paraiso a daga. (Lucas 23:43; Juan 3:16; 17:3) Natural a tarigagayam a makadua sadiay dagiti kapamiliam, dadduma pay nga ing-ingungotem, ken ipatpategmo a gagayyem, tapno matagiragsakyo a padapada ti rag-o iti naikari a nalinteg a baro a lubong ti Dios.—2 Pedro 3:13.
Ngem kasanon no dagiti gagayyem ken ing-ingungotem saanda nga interesado iti agnanayon a biag iti maysa a paraiso a daga? Saanmo koma a pakaupayan dayta. Itultuloymo ti gumun-od iti umiso a pannakaammo iti Kasuratan ken agtignayka maitunos iti dayta. Insurat ni apostol Pablo: “Ta, asawa a babai, kasano ti pannakaammom no maisalakanmonto ti asawam? Wenno, asawa a lalaki, kasano ti pannakaammom no maisalakanmonto ti asawam?” (1 Corinto 7:16) Mabalin nga agbalbaliw dagiti tattao. Kas pagarigan, nagbalbaliw ti maysa a dati a bumusbusor iti Kristianidad ket nagbalin a panglakayen iti kongregasion Kristiano. Kunana: “Agyamanak unay ta ti ing-ingungotek a pamilia sisusungdo nga inannurotda dagiti prinsipio ti Biblia bayat ti ibubusorko.”
Maseknan unay ti Dios maipapan iti biagmo ken iti biag dagiti ing-ingungotem. Kinapudnona, “Ni Jehova . . . saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.” (2 Pedro 3:9) Tarigagayan ni Jehova a Dios nga agbiagka nga agnanayon ken dagiti ing-ingungotem. Natantan-ok ti panagayatna ngem dagiti imperpekto a tattao. (Isaias 49:15) Isu nga apay a dimo sukayen ti nasinged a relasion iti Dios? Iti kasta, matulongam dagiti ing-ingungotem a mangaramid met iti kasta. Nupay awananda ita iti namnama a biag nga agnanayon, mabalin nga agbalbaliw ti kababalinda no makitada nga agtigtignayka maitunos iti umiso a pannakaammo iti Biblia.
Komusta met ngay dagiti pimmusay nga ing-ingungotem? Ipakita met ti Biblia a minilion a pimmusay ti addaan iti nakaskasdaaw a namnama nga agungar—nga agriingda manipud ken patay ket agnaedda iti Paraiso a daga. Inkari ni Jesu-Kristo: “Um-umayen ti oras nga amin dagidiay adda kadagiti pakalaglagipan a tanem . . . rummuarda.” (Juan 5:28, 29) Mapagungarto uray dagidiay pimmusay a di nakaam-ammo iti Dios, ta kuna ti Biblia: “Addanto panagungar agpadpada dagiti nalinteg ken dagiti nakillo.” (Aramid 24:15) Nakaragragsak la ketdi nga abrasaen dagita a mapagungar!
Agnanayon a Biag—Naragsak a Namnama
No naragsak ken kontentoka ita iti laksid dagiti parikut ditoy lubong, sigurado a pagragsakamto ti agnanayon a biag iti paraiso a daga. Ngem idi dinakamat ti maysa a Saksi ni Jehova dagiti bendision nga iyeg ti agnanayon a biag, kinuna ti maysa a babai: “Diak kayat ti agbiag nga agnanayon. Umdasen kaniak daytoy biag a 70 wenno 80 a tawen.” Inyimtuod ti Kristiano a panglakayen a nakangngeg iti imbagana: “Napanunotmo kadin no anianto ti rikna dagiti annakmo no matayka?” Nagarubos ti luana idi mapanunotna ti panagleddaang dagiti annakna no matay ti inada. “Iti kaunaan a gundaway, naamirisko a bagik la ti pinanunotko,” inaklonna, “ket nabigbigko a saan a managimbubukodan a namnama ti biag nga agnanayon no di ket kaipapananna met ti panagbiag maigapu kadagiti sabsabali.”
Kuna ti dadduma a saanda a pakaseknan no agtultuloyda nga agbiag wenno matayda. Ngem pakaseknan dayta ti Namarsua kadatayo, a kunana: “Kas sibibiagak, . . . maragsakanak, saan nga iti ipapatay ti nadangkes, no di ket iti daydiay itatallikud ti maysa a nadangkes manipud iti dalanna ket pudno nga agtultuloy nga agbiag.” (Ezequiel 33:11) Yantangay maseknan unay ti Dios uray iti biag ti nadangkes, sigurado a maseknan unay kadagidiay agayat kenkuana.
Ni David nga ari iti nagkauna nga Israel nagtalek iti naayat a panangaywan ni Jehova. Kinuna idi ni David: “Nalabit a baybay-andak dagiti dadakkelko, ngem aywanannak [ni Jehova].” (Salmo 27:10 Naimbag a Damag Biblia) Natalged la ketdi ni David iti panagayat dagiti dadakkelna. Ngem uray panawan dagiti dadakkelna—a kasingedan kenkuana—ammona a saanto a baybay-an ti Dios. Gapu iti ayat ken pannakaseknanna, ididiaya kadatayo ni Jehova ti agnanayon a biag ken ti panagbalin a gayyemna. (Santiago 2:23) Saan kadi a rumbeng a siyayaman nga awatentayo dagita a nakasaysayaat a sagutna?
[Ladawan iti panid 7]
Ti ayat iti Dios ken kadagiti pada a tao pagbalinenna a nakasaysayaat ti biag nga agnanayon