Ti Kinadayag Dagiti Parsua ni Jehova

“Anian a Nagadu ti Aramidmo, O Jehova!”

AGNANAEDTAYO man iti probinsia wenno iti siudad, iti kabambantayan wenno kadagiti asideg ti baybay, nalikmuttayo kadagiti makapaamanga a kinadayag ti nakaparsuaan. Maitutop nga iti 2004 Calendar of Jehovah’s Witnesses, nailadawan dagiti pagsidsiddaawan nga aramid ni Jehova a Dios.

Dagiti manangapresiar a tattao kanayon nga interesadoda kadagiti aramid ti Dios. Kas pagarigan, panunotenyo ni Solomon, nga addaan iti sirib a “dakdakkel unay ngem ti sirib dagiti amin a taga Daya.” Kuna ti Biblia: “Isu agsao maipapan kadagiti kayo, manipud iti sedro nga adda idiay Libano agingga iti hisopo a tumpuar iti pader; ket isu agsao maipapan kadagiti animal ken maipapan kadagiti agtaytayab a parsua ken maipapan iti aggargaraw a bambanag ken maipapan kadagiti ikan.” (1 Ar-ari 4:30, 33) Ni Ari David, nga ama ni Solomon, masansan idi a mennamennaenna dagiti obra maestra ti Dios. Nagutugot a mangyebkas iti Namarsua kenkuana: “Anian a nagadu ti aramidmo, O Jehova! Isuda amin inaramidmo buyogen ti kinasirib. Ti daga napno kadagiti pinataudmo.”​—Salmo 104:24.a

Rumbeng met a paliiwen ken utobentayo ti nakaparsuaan. Kas pagarigan, mabalin nga ‘itangadtayo dagiti matatayo sadi langit’ ket iyimtuodtayo: “Siasino ti namarsua kadagitoy a banag?” Pinarsua ida ni Jehova a Dios, a ‘naruay iti dinamiko nga enerhia’ ken talaga a “nakired iti pannakabalin”!​—Isaias 40:26.

Ania ti epektona koma kadatayo no mennamennaentayo dagiti pinarsua ni Jehova? Di kumurang a tallo ti epektona: (1) Ipalagipna nga ipategtayo koma ti biagtayo, (2) tignayennatayo a tumulong kadagiti sabsabali tapno makasursuroda iti nakaparsuaan, ken (3) tignayennatayo a mangam-ammo ken mangapresiar nga ad-adda iti Namarsua kadatayo.

Kas tattao, nga adayo a natantan-ok ngem kadagiti “awanan nakem nga an-animal,” kabaelantayo a paliiwen ken ipateg dagiti nakaskasdaaw a parsua. (2 Pedro 2:12) Makita ti matatayo ti naimnas a buya ti daga. Mangngeg dagiti lapayagtayo dagiti nakaay-ayat a samiweng dagiti tumatayab. Ken gapu ta mailasintayo ti paniempo ken ti lugar, kabaelantayo a lagipen a siraragsak dagiti kapadasantayo. Nupay saan a perpekto ti agdama a biagtayo, nakasaysayaat la ketdi dayta!

Matagiragsak dagiti nagannak ti kadawyan a pannakakayaw dagiti annakda iti nakaparsuaan. Anian a ragsak dagiti ubbing no makasarakda kadagiti shell iti aplaya, makiay-ayam iti naamo nga animal, ken kumalay-at iti kayo! Tarigagayan dagiti nagannak a tulongan dagiti annakda a mangtarus no ania ti nakainaigan ti nakaparsuaan iti Namarsua. Ti panagamanga ken panagraem a masukay dagiti ubbing mainaig kadagiti parsua ni Jehova mabalin a mataginayonda iti intero a panagbiagda.​—Salmo 111:2, 10.

Narabaw ti pannakaawattayo no apresiarentayo ti nakaparsuaan ngem ditay met padayawan ti Namarsua. Ti padto ni Isaias tulongannatayo a mangamiris iti dayta a partikular a banag idi kunana: “Saanmo aya a naammuan wenno saanmo aya a nangngeg? Ni Jehova, ti Namarsua kadagiti ungto ti daga, ket Dios agingga iti tiempo a di nakedngan. Isu saan a mabannog wenno mapakil. Awan pannakasukimat ti pannakaawatna.”​—Isaias 40:28.

Wen, dagiti ar-aramid ni Jehova paneknekanda ti di maartapan a siribna, di maringbawan a pannakabalinna, ken ti nasged nga ayatna kadatayo. No makitatayo ti kinaimnas ti aglawlawtayo ken matarusantayo dagiti galad Daydiay nangaramid kadagita amin, matignaytayo koma a kas ken ni David a nagkuna: “Awan ti kas kenka . . . , O Jehova, awan uray aniaman nga ar-aramid a kas iti ar-aramidmo.”​—Salmo 86:8.

Masiguradotayo a dagiti natulnog a tattao agtultuloy a makayawanda kadagiti parsua ni Jehova. Iti kinaagnanayon, saantay a maibusan kadagiti gundaway a makasursuro iti maipapan ken ni Jehova. (Eclesiastes 3:11) Ken no ad-adda nga adalentayo ti maipapan iti Namarsua, ad-adda a dumakkel ti ayattayo kenkuana.

[Footnote]

[Kahon iti panid 9]

Dayaw Maipaay iti Namarsua

Bigbigen ti adu a manangapresiar a sientista nga adda Dios a Namarsua. Kastoy ti kunaen ti sumagmamano kadakuada:

“Iti tay-ak ti siensia nga ayanko, nakapatpateg ken nakaragragsak no adda madiskobrek sagpaminsan a baro a banag ket kunak iti bagik, ‘Kasta gayam ti pinamay-an ti Dios.’ Kayatko a tarusan ti bassit a paset ti plano ti Dios.”​—Henry Schaefer, propesor ti kemistria.

“Adda iti agbasbasa no ania ti makunana maipapan iti namunganayan ti Uniberso, no kasano a limmawa, ngem no kadakami saanmi a naan-anay a maawatan dayta no awan [ti Dios].”​—Edward Milne, kosmologo ti Britania.

“Ammomi a nadeskribir ti nakaparsuaan babaen ti kasayaatan a posible a matematika gapu ta pinarsua dayta ti Dios.”​—Alexander Polyakov, matematiko ti Russia.

“Iti panangadalmi kadagiti nainkasigudan a banag, us-usigenmi dagiti pampanunot ti Namarsua, suksukimatenmi dagiti ideyana, ipakpakaawatmi ti sistemana saan ket a ti sistemami.”​—Louis Agassiz, biologo ti America.

[Ladawan iti panid 8, 9]

Gentoo penguins, Antarctic Peninsula

[Ladawan iti panid 9]

Grand Teton National Park, Wyoming, E.U.A

[Credit Line]

Jack Hoehn/Index Stock Photography