Ni Jehova ti Katulongantayo

“Ti tulongko aggapu ken Jehova, ti Nangaramid iti langit ken daga.”​—SALMO 121:2.

1, 2. (a) Apay a makuna a kasapulantayo amin ti tulong? (b) Ania a kita a Katulongan ni Jehova?

SIASINO kadatayo ti saan nga agkasapulan iti tulong? Kinapudnona, kasapulantayo amin ti tulong tapno madaeran ti nadagsen a parikut, maibturan ti maysa a nasaem a pukaw, wenno maanduran ti narigat a pannubok. No agkasapulanda iti tulong, masansan nga umasideg dagiti tattao iti maysa a naayat a gayyem. Makapabang-ar no ti maysa a parikut ket maipeksa iti kasta a gayyem. Ngem limitado ti maitulong ti pada a tao. Maysa pay, adda dagiti gundaway a saan a kabaelan dagiti dadduma ti tumulong.

² Ngem adda maysa a Katulongan nga awan limitasion ti pannakabalin ken ik-ikutanna. Maysa pay, impanamnamana kadatayo a dinatay pulos baybay-an. Isu Daydiay tinukoy ti salmista idi kinunana buyogen ti naan-anay a kompiansa: “Ti tulongko aggapu ken Jehova.” (Salmo 121:2) Apay a kombinsido daytoy a salmista nga isu ket tulongan ni Jehova? Tapno masungbatan dayta a saludsod, usigentayo ti Salmo 121. Tumulong dayta tapno mabigbigtayo a mapagpannurayantayo met ni Jehova kas Katulongantayo.

Mapangnamnamaan a Gubuayan ti Tulong

3. Kadagiti ania a bambantay ti mabalin a kinita ti salmista, ken apay?

³ Nangrugi ti salmista babaen ti panangipakitana a mapagpannurayan ni Jehova agsipud ta isu ti Namarsua: “Itangadkonto dagiti matak kadagiti bantay. Sadino ti paggapuanto ti tulongko? Ti tulongko aggapu ken Jehova, ti Nangaramid iti langit ken daga.” (Salmo 121:1, 2) Saan a gagangay a bambantay ti kinita ti salmista. Idi nairekord dagita a sasao, idiay Jerusalem ti ayan ti templo ni Jehova. Dayta a lugar, a masarakan iti nangato a bantay ti Juda, ti nagserbi a piguratibo a pagnaedan ni Jehova. (Salmo 135:21) Mabalin a kimmita ti salmista kadagiti bambantay ti Jerusalem a nagsaadan ti templo ni Jehova, a sikokompiansa nga agpannuray iti tulong ti Dios. Apay a natalged ti rikna ti salmista a tumulong ni Jehova? Gapu ta Isu “ti Nangaramid iti langit ken daga.” No an-anagen, ibagbaga ti salmista, ‘Sigurado nga awan ti makalapped iti mannakabalin-amin a Namarsua a tumulong kaniak!’​—Isaias 40:26.

4. Kasano nga impakita ti salmista a kanayon a sisisiput ni Jehova kadagiti kasapulan dagiti adipenna, ken apay a makaliwliwa dayta a kapanunotan?

⁴ Simmaruno nga inlawlawag ti salmista a kanayon a sisisiput ni Jehova kadagiti kasapulan dagiti adipenna: “Saanna a mabalin nga itulok nga agdiwengdiweng ti sakam. Daydiay mangay-aywan kenka saanna a mabalin ti agsaguyepyep. Adtoy! Isu saanto a saguyepyepen wenno uray mapan maturog, daydiay a mangbambantay iti Israel.” (Salmo 121:3, 4) Imposible nga ipalubos ti Dios nga “agdiwengdiweng” wenno saan a makalung-aw manipud iti didigra dagidiay agtaltalek kenkuana. (Proverbio 24:16) Apay a saan? Gapu ta mayarig ni Jehova iti maysa a siririing a pastor a mangsalsalaknib iti karnerona. Saan kadi a makaliwliwa dayta a kapanunotan? Saanna a pulos nga ikidem ti matana kadagiti kasapulan dagiti adipenna. Iti aldaw ken rabii, bambantayanna ida.

5. Apay a nakuna nga adda ni Jehova iti ‘makannawan’?

⁵ Gapu ta agtalek a kanayon a salakniban ni Jehova dagiti adipenna, insurat ti salmista: “Ni Jehova ay-aywanannaka. Ni Jehova ti linongmo iti makannawanmo. Iti aldaw saannakanto a kabilen ti mismo nga init, wenno uray ti bulan iti rabii.” (Salmo 121:5, 6) Para iti maysa a magmagna nga agdaliasat iti Makintengnga a Daya, mangprotektar manipud iti dumardarang nga init ti maysa a nalinong a lugar. Ni Jehova ket kasla maysa a linong iti ilina, a salaknibanna ida manipud iti makasinit a pudot ti kalamidad. Imutektekanyo ta nakuna nga adda ni Jehova iti ‘makannawan.’ Kadagiti nagkauna a gubgubat, ti kannawan nga ima ti soldado ket saan unay a masalakniban ti kalasag, a tengtenglen ti kannigid nga imana. Mabalin a makasalaknib ti maysa a nasungdo a gayyem no agpuesto iti kannawan ti soldado bayat a makiranget. Umasping iti dayta, sisusungdo a saranayen ni Jehova dagiti agdaydayaw kenkuana, a kanayon a sidadaan a tumulong kadakuada.

6, 7. (a) Kasano nga impasigurado ti salmista a di pulos agsardeng ni Jehova a tumulong kadagiti adipenna? (b) Apay a makapagtalektayo a kas iti salmista?

⁶ Agsardengto ngata ni Jehova a tumulong kadagiti adipenna? Pulos a saan. Inngudo ti salmista: “Ni met laeng Jehova saluadannakanto iti isuamin a didigra. Saluadannanto ta kararuam. Ni met laeng Jehova saluadannanto ti iruruarmo ken iseserrekmo manipuden ita ken agingga iti tiempo a di nakedngan.” (Salmo 121:7, 8) Imutektekanyo ta iti bersikulo 5 a nadakamat itay, kinuna ti salmista: “Ni Jehova ay-aywanannaka,” a mangipakita iti agdama a tignay. Ngem kadagitoy a bersikulo, insurat ti salmista: “Ni met laeng Jehova saluadannakanto,” a mangipamatmat iti masanguanan a tignay. No kasta, manamnama dagiti pudno nga agdaydayaw a tulongan ida ni Jehova agingga iti masanguanan. Sadinoman ti ayanda, aniaman a kalamidad ti pakaipasanguanda, kanayon a sidadaan ni Jehova a tumulong kadakuada.​—Proverbio 12:21.

⁷ Kinapudnona, agtalek ti nagsurat iti Salmo 121 a ti mannakabalin-amin a Namarsua tarabayenna dagiti adipenna buyogen ti kinadungngo ti maysa a naayat a pastor ken ti kinaridam ti maysa nga alerto a guardia. Adda rasontayo nga agtalek kas iti salmista, yantangay saan nga agbalbaliw ni Jehova. (Malakias 3:6) Kayatna kadi a sawen a kanayon a matagiragsaktayo ti pisikal a pannalaknibna? Saan, ngem agingga a mangnamnamatayo kenkuana kas Katulongantayo, saluadannatayo maibusor iti amin a banag a mamagpeggad kadatayo iti naespirituan. Natural laeng nga iyimtuod, ‘Kasano ti panangtulong kadatayo ni Jehova?’ Usigentayo ti uppat a wagas no kasanona nga ar-aramiden dayta. Iti daytoy nga artikulo, pagsasaritaantayo no kasano a tinulonganna dagiti adipenna idi panawen ti Biblia. Iti sumaganad nga artikulo, usigentayo no kasano ti panangtulongna kadagiti adipenna iti agdama.

Tulong Babaen Dagiti Anghel

8. Apay a saan a pakasdaawan a maseknan unay dagiti anghel iti pagimbagan dagiti adipen ti Dios ditoy daga?

⁸ Minilion dagiti anghel ni Jehova. (Daniel 7:9, 10) Dagitoy nga espiritu nga annak simamatalek a tungtungpalenda ti pagayatanna. (Salmo 103:20) Pagaammoda unay ti dakkel a panagayat ni Jehova kadagiti tattao nga agdaydayaw kenkuana ken ti tarigagayna a tumulong kadakuada. Saan a pakasdaawan a pudno a maseknan dagiti anghel iti pagimbagan dagiti adipen ti Dios ditoy daga. (Lucas 15:10) Sigurado ngarud a maragsakan dagiti anghel ta us-usaren ida ni Jehova a mangsaranay kadagiti tattao. Kadagiti ania a wagas nga inusar ni Jehova dagiti anghel a timmulong kadagiti adipenna ditoy daga idi umuna a panawen?

9. Mangdakamat iti pagarigan no kasano a ti Dios inikkanna dagiti anghel iti pannakabalin a mangsalaknib kadagiti matalek a tattao.

⁹ Ti Dios inikkanna dagiti anghel iti pannakabalin a mangsalaknib ken mangispal kadagiti matalek a tattao. Dua nga anghel ti timmulong ken ni Lot ken kadagiti babbalasangna tapno malasatanda ti pannakadadael ti Sodoma ken Gomorra. (Genesis 19:1, 15-17) Maysa laeng nga anghel ti nangikisap iti 185,000 nga Asiriano a soldado a mangpangpangta idi iti Jerusalem. (2 Ar-ari 19:35) Idi naitapuak ni Daniel iti abut dagiti leon, ni Jehova “imbaonna ti anghelna ket kinaemna ti ngiwat dagiti leon.” (Daniel 6:21, 22) Maysa nga anghel ti nangruk-at ken apostol Pedro iti pagbaludan. (Aramid 12:6-11) Adu pay a pagarigan ti dakamaten ti Biblia maipapan iti panangsalaknib dagiti anghel, a mangpatalged iti kuna ti Salmo 34:7: “Ti anghel ni Jehova agpakpakarso iti intero nga aglikmut dagidiay agbuteng kenkuana, ket alawenna ida.”

10. Kasano nga inusar ni Jehova ti maysa nga anghel a mangparegta ken ni propeta Daniel?

¹⁰ No dadduma, usaren ni Jehova dagiti anghel a mangparegta ken mangpabileg kadagiti matalek a tattao. Masarakan iti Daniel kapitulo 10 ti maysa a makatukay iti rikna a pagarigan. Iti daydi a tiempo, nalabit dandani 100 ti tawen idin ni Daniel. Nakaro ti panagleddaang ti mammadto, a nalabit a gapu iti pannakalangalang ti Jerusalem ken ti pannakaitantan ti pannakaibangon manen ti templo. Maburiboran met iti nakitana a nakaam-amak a sirmata. (Daniel 10:2, 3, 8) Siaayat a nangibaon ti Dios iti maysa nga anghel a mangparegta kenkuana. Saan la a naminsan nga impalagip ti anghel ken ni Daniel nga isu ket “makaay-ayo unay” iti imatang ti Dios. Ti resultana? Ti lakayen a mammadto kinunana iti anghel: “Pinapigsanak.”​—Daniel 10:11, 19.

11. Ania ti maysa a pagarigan no kasano a nausar dagiti anghel a mangiwanwan iti trabaho a panangikasaba iti naimbag a damag?

¹¹ Inusar met ni Jehova dagiti anghel a mangiwanwan iti trabaho a panangikasaba iti naimbag a damag. Maysa nga anghel ti nangiturong ken ni Felipe a mangikasaba iti maipapan ken ni Kristo iti maysa nga Etiope a eunuko, a nabautisaran kalpasanna. (Aramid 8:26, 27, 36, 38) Di nagbayag, pagayatan ti Dios a maikasaba ti naimbag a damag kadagiti di nakugit a Gentil. Iti maysa a sirmata, nagparang ti maysa nga anghel ken ni Cornelio, maysa a managbuteng iti Dios a Gentil, ket binilin ti anghel a paayabanna ni apostol Pedro. Idi a dagiti mensahero ni Cornelio nasarakanda ni Pedro, kinunada: “Ni Cornelio . . . naipaayan kadagiti nadibinuan a pammilin babaen ti maysa a nasantuan nga anghel tapno paayabannaka nga umay iti balayna ken tapno denggenna ti bambanag a sawem.” Pinatgan dayta ni Pedro, ket nagbalin a paset ti kongregasion Kristiano ti umuna a di nakugit a Gentil. (Aramid 10:22, 44-48) Panunotenyo ti mariknayo no ammoyo a maysa nga anghel ti timmulong kadakayo tapno makasaritayo ti maysa a tao nga umiso ti pagannayasanna!

Tulong Babaen ti Nasantuan nga Espiritu

12, 13. (a) Apay a makapagtalek dagiti apostol ni Jesus a matulongan ida ti nasantuan nga espiritu? (b) Iti ania a wagas a ti nasantuan nga espiritu pinabilegna dagiti Kristiano idi umuna a siglo?

¹² Sakbay unay ti ipapatayna, impasigurado ni Jesus kadagiti apostolna a dina ibati ida nga awan ti katulonganda. Ipaayan ida ti Ama iti “katulongan, ti nasantuan nga espiritu.” (Juan 14:26) Makapagtalek dagiti apostol a matulongan ida ti nasantuan nga espiritu. Total, ti naipaltiing a Kasuratan ket napno kadagiti pagarigan no kasano nga inusar ni Jehova ti kabilgan a puersa, ti nasantuan nga espiritu, tapno tulonganna dagiti adipenna.

¹³ Iti adu a gundaway, nausar ti nasantuan nga espiritu a mangpabileg kadagiti tattao a mangaramid iti pagayatan ni Jehova. Ti nasantuan nga espiritu pinabilegna dagiti Ukom a mangispal iti Israel. (Uk-ukom 3:9, 10; 6:34) Dayta met laeng nga espiritu ti nangpabileg kadagiti Kristiano idi umuna a siglo tapno makapagtultuloyda a situtured a mangasaba iti laksid ti aniaman a kita ti ibubusor. (Aramid 1:8; 4:31) Ti naballigi a panangitungpalda iti ministerioda ket nabileg a pammaneknek nga agtigtignay ti nasantuan nga espiritu. Ania pay koma ti makailawlawag no apay a dagiti “awan adalna ken gagangay” nga indibidual nabaelanda nga insaknap ti mensahe ti Pagarian iti intero a pagaammo a lubong idi?​—Aramid 4:13; Colosas 1:23.

14. Kasano nga inusar ni Jehova ti nasantuan nga espirituna a manglawlawag kadagiti adipenna?

¹⁴ Inusar met ni Jehova ti nasantuan nga espirituna a manglawlawag kadagiti adipenna. Babaen ti tulong ti espiritu ti Dios, nabaelan ni Jose nga inlawlawag ti naimpadtuan a tagtagainep ni Faraon. (Genesis 41:16, 38, 39) Babaen ti espirituna, impalgak ni Jehova dagiti panggepna kadagiti napakumbaba a tattao ngem inlimedna dayta kadagiti napalangguad. (Mateo 11:25) Gapuna, no maipapan kadagiti bambanag nga ipaay ni Jehova “kadagidiay agayat kenkuana,” kinuna ni apostol Pablo: “Kadatayo nga impalgak ida ti Dios babaen ti espirituna.” (1 Corinto 2:7-10) Babaen laeng iti tulong ti nasantuan nga espiritu a pudpudno a matarusan ti maysa a tao ti pagayatan ti Dios.

Tulong Babaen ti Sao ti Dios

15, 16. Ania ti naibilin ken ni Josue nga aramidenna tapno makapagtignay a sisisirib?

¹⁵ Ti naipaltiing a Sao ni Jehova ket “makagunggona iti panangisuro,” ken pagbalinenna dagiti adipen ti Dios a “naan-anay a makabael, naan-anay a nakabalan maipaay iti tunggal naimbag nga aramid.” (2 Timoteo 3:16, 17) Naglaon ti Biblia iti adu a pagarigan no kasano a dagiti adipen ti Dios idi umuna a panawen ket natulongan babaen ti sumagmamano a paset ti Saona a naisurat idin.

¹⁶ Nakatulong ti Kasuratan a mangipaay iti nasayaat a giya kadagiti agdaydayaw iti Dios. Idi naitalek ken ni Josue ti annongen a mangidaulo iti Israel, naibilin kenkuana: “Daytoy a libro ti linteg [nga inrekord ni Moises] saan koma a sumina iti ngiwatmo, ket masapul nga iti nababa a timek agbasaka iti dayta iti aldaw ken rabii, tapno maannadam nga aramiden ti maitunos iti isuamin a naisurat iti dayta; ta iti kasta pagballigiemto ti dalanmo ket iti kasta agtignaykanto a sisisirib.” Imutektekanyo ta saan nga inkari ti Dios ken ni Josue a milagro a magun-odna ti sirib. Imbes ketdi, makapagtignay a sisisirib ni Josue no basaen ken mennamennaenna ti “libro ti linteg.”​—Josue 1:8; Salmo 1:1-3.

17. Kasano a ni Daniel ken ni Ari Josias agpadpada a natulongan ida ti dadduma a paset ti Kasuratan nga addan idi?

¹⁷ Ti naisurat a Sao ti Dios ket nakatulong met a mangipalgak iti pagayatan ken panggepna. Ni Daniel, kas pagarigan, natarusanna manipud kadagiti surat ni Jeremias no kasano kapaut nga agtalinaed a langalang ti Jerusalem. (Jeremias 25:11; Daniel 9:2) Utobenyo met ti napasamak kabayatan ti panagturay ni Ari Josias iti Juda. Iti daydi a tiempo, simmiasi ti nasion manipud ken ni Jehova, ken nabatad a napaay dagiti ar-ari a mangaramid kadagiti kopia ti Linteg ken mangannurot iti dayta. (Deuteronomio 17:18-20) Ngem bayat a matartarimaan ti templo, nasarakanda “ti mismo a libro ti linteg,” a posible nga insurat a mismo ni Moises. Mabalin nga isu dayta daydiay orihinal a teksto, a nakompleto agarup 800 a tawen sakbayna. Kalpasan a nangngeg ni Josias ti pannakaibasa dagiti linaonna, nakitana no kasano kakaro ti isisiasi ti nasion manipud iti pagayatan ni Jehova, isu a nangaramid ti ari kadagiti nainget nga addang a mangannurot iti naisurat iti libro. (2 Ar-ari 22:8; 23:1-7) Saan kadi a nalawag a ti dadduma a paset ti Sagrado a Kasuratan nga addan idi ket nakatulong kadagiti adipen ti Dios idi umuna a panawen?

Tulong Babaen Kadagiti Kapammatian

18. Apay a maikunatayo a ni Jehova ti makinggapuanan no ti maysa a pudno nga agdaydayaw tulonganna ti padana?

¹⁸ Ti tulong nga ipapaay ni Jehova ket masansan nga aggapu kadagiti kapammatian. Kinapudnona, ti Dios ti makinggapuanan no tulongan ti maysa a pudno nga agdaydayaw ti padana. Apay a maikunatayo ti kasta? Gapu iti dua a rason. Umuna, nairaman ti nasantuan nga espiritu ti Dios. Dayta nga espiritu pataudenna dagiti bunga, agraman ti ayat ken kinaimbag, kadagidiay agpaiwanwan iti dayta. (Galacia 5:22, 23) Gapuna, no matignay ti maysa nga adipen ti Dios a tumulong iti kapammatianna, pammaneknek dayta nga agtigtignay ti espiritu ni Jehova. Maikadua, naparsuatayo iti ladawan ti Dios. (Genesis 1:26) Kaipapananna dayta a kabaelantayo nga iyanninaw dagiti galad ti Dios, agraman ti panagbalinna a naasi ken mannakipagrikna. Gapuna, no ti maysa nga adipen ni Jehova tulonganna ti kapammatianna, ti pudpudno a Gubuayan ti kasta a tulong ket daydiay mayan-anninaw ti personalidadna.

19. Sigun iti rekord ti Biblia, kasano a nangipaay ni Jehova iti tulong babaen kadagiti kapammatian?

¹⁹ Idi panawen ti Biblia, kasano nga impaay ni Jehova ti tulong babaen kadagiti kapammatian? Masansan a tignayen ni Jehova ti maysa nga adipenna a mangbalakad iti padana, kas idi nangipaay ni Jeremias iti mangispal-biag a balakad ken ni Baruc. (Jeremias 45:1-5) Naminsan, dagiti pudno nga agdaydayaw natignayda a mangipaay iti material a tulong kadagiti kapammatianda, kas kadagiti Kristiano idiay Macedonia ken Acaya a nangipakita iti gagarda a tumulong kadagiti agkasapulan a kakabsatda idiay Jerusalem. Kinuna ni apostol Pablo a ti kasta a kinaparabur ket sigurado a mangpataud iti “ebkas ti panagyaman iti Dios.”​—2 Corinto 9:11.

20, 21. Iti sidong dagiti ania a kasasaad a nakapabileg ken ni Pablo dagiti kakabsat manipud Roma?

²⁰ Ad-adda a makatukay iti rikna dagiti salaysay maipapan kadagiti panagregget dagiti adipen ni Jehova nga agpipinnabileg ken agpipinnaregta. Utobenyo ti maysa a pagarigan a pakairamanan ni apostol Pablo. Bayat ti panagturongna idiay Roma kas maysa a balud, nagdaliasat ni Pablo iti kangrunaan a kalsada ti Roma a pagaammo kas ti Dalan ni Appio. Narigat ti maudi a paset ti panagdaliasat yantangay masapul a lumasatda iti maysa a nababa ken naaluguog a lugar.a Ammo dagiti kakabsat iti kongregasion ti Roma a sumangpet ni Pablo. Ania ngay ti inaramidda? Nagurayda latta kadin kadagiti pagtaenganda ket sadanto la abrasaen ni Pablo no nakasangpeten?

²¹ Ti mannurat iti Biblia a ni Lucas, a kadua ni Pablo iti dayta a panagdaliasat, ibagana kadatayo no ania ti napasamak: “Manipud sadiay [Roma] dagiti kakabsat, idi nangngegda ti damag maipapan kadakami, immayda simmabat kadakami agingga idiay Plasa ni Appio ken idiay Tallo a Taberna.” Mailadawanyo kadi ti eksena? Gapu ta ammoda a sumangpet ni Pablo, maysa a grupo dagiti kakabsat idiay Roma ti nagdaliasat tapno sabtenda. Dadduma a paset ti grupo ti naguray iti Plasa ni Appio, ti nalatak a paginanaan nga agarup 74 a kilometro iti ruar ti Roma. Dadduma kadagiti kakabsat ti naguray iti Tallo a Taberna, maysa a paginanaan nga agarup 58 a kilometro iti ruar ti Roma. Ania ti reaksion ni Pablo? Impadamag ni Lucas: “Idi makitana ida, ni Pablo nagyaman iti Dios ket bimmileg.” (Aramid 28:15) Panunotenyo​—nakapabileg ken nakaliwliwa ken ni Pablo uray ti pannakakita laeng kadagidi a kakabsat a nangikagumaan nga agdaliasat iti kasta a kawatiwat! Ket iti siasino a nagyaman ni Pablo gapu iti dayta a mangsaranay a tulong? Nagyaman iti daydiay makinggapuanan, ni Jehova a Dios.

22. Ania ti tekstotayo para iti tawen 2005, ket ania ti usigen iti sumaruno nga artikulo?

²² Nalawag, ti naipaltiing a rekord ti pannakilangen ti Dios paneknekanna a ni Jehova ket maysa a Katulongan nga awan kapadana. Maitutop ngarud a ti teksto dagiti Saksi ni Jehova para iti tawen 2005 ket ti Salmo 121:2: “Ti tulongko aggapu ken Jehova.” Ngem kasano ti panangtulong kadatayo ni Jehova ita? Dayta ti usigen ti sumaruno nga artikulo.

[Footnote]

Malagipyo Pay?

Kadagiti ania a pamay-an a nangipaay ni Jehova iti tulong​—

• babaen dagiti anghel?

• babaen ti nasantuan nga espirituna?

• babaen ti naipaltiing a Saona?

• babaen dagiti kapammatian?

[Blurb iti panid 15]

Ti teksto para iti tawen 2005 ket: “Ti tulongko aggapu ken Jehova.”​— Salmo 121:2.

[Ladawan iti panid 16]

Nagyaman ni Pablo iti Dios gapu iti naawatna a tulong manipud kadagiti kakabsat idiay Roma