Malagipyo Pay?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Apay a ti Disiembre 25 ti napili a petsa a pannakarambak ti pannakaipasngay ni Jesus?

Ti Sao ti Dios awan ti dakamatenna a petsa ti pannakaipasngay ni Jesus. Kuna ti Enciclopedia Hispánica: “Ti panangrambak iti Krismas iti Disiembre 25 ket saan a resulta ti umiso a kronolohia ti kasangay ni Jesus no di ket resulta dayta ti panangaramid a Nakristianuan dagiti piesta ti winter solstice.” Rinambakan dagiti nagkauna a Romano ti isisingising ti init bayat ti tiempo ti lam-ek babaen ti padaya, panagraragsak, ken panagsisinnagut.​—12/15, panid 4-5.

• Ti kadi Aramid 7:59 kaipapananna a nagkararag ni Esteban ken ni Jesus?

Saan. Ipakita ti Biblia a ni laeng Jehova a Dios ti rumbeng a pakaiturongan ti kararag. Gapu ta nasirmatana ni Jesus iti dayta a kanito, agparang a narikna ni Esteban a mabalinna ti direkta nga agapelar kenkuana, a kunkunana: “Apo Jesus, awatem ti espirituk.” Ammo ni Esteban a naikkan ni Jesus iti autoridad a mangpagungar kadagiti natay. (Juan 5:27-29) Isu a ni Esteban kiniddaw wenno impakaasina ken ni Jesus a saluadanna ti puersa ti biagna agingga iti panagungar.​—1/1, panid 31.

• Kasanotayo nga ammo a saan a naikeddeng a nasaksakbay ti pagtungpalan ti maysa a tao?

Gapu ta ti Dios impaayanna ti tao iti wayawaya a mangikeddeng, saanna ngarud nga inkeddeng a nasaksakbay ti pagtungpalantayo. Saan a kinamanagayat ken kinahustisia iti biang ni Jehova no nasakbay nga inkeddengna ti pagtungpalan ti biagtayo sa kalpasanna datayo ti pabasolenna kadagiti tignaytayo. (Deuteronomio 32:4; 1 Juan 4:8)​—1/15, panid 4-5.

• Apay a kinadursok no ibaga nga imposible dagiti milagro?

Gapu ta mabigbigda a bassit laeng ti pannakaammoda kadagiti nasientipikuan a pagsidsiddaawan a masarakan kadagiti pinarsua ti Dios, admitiren ti dadduma a sientista a saandan a masigurado no adda banag nga imposible. Ti laeng maibagada ita ket nalabit saan pay a posible dayta.​—2/15, panid 5-6.

• Apay a ni Ukom a Samson imbagana kadagiti dadakkelna a ti tarigagayanna a maasawa ket maysa a babai nga anak dagiti Filisteo? (Uk-ukom 14:2)

Maisalungasing iti linteg ti Dios ti pannakiasawa kadagiti ulbod a managdaydayaw. (Exodo 34:11-16) Kaskasdi, ti Filisteo a babai ket “maitutop” iti panangmatmat ni Samson. “Mangsapsapul idi [ni Samson] iti gundaway maibusor kadagiti Filisteo,” ket nakitana a maitutop unay ti babai iti dayta a panggep. Ti Dios tinulonganna ni Samson babaen ti espirituna. (Uk-Ukom 13:25; 14:3, 4, 6)​—3/15, panid 26.

• Maiparbeng kadi a ti maysa a Kristiano mangted iti tip wenno maysa a kita ti regalo iti empleado ti gobierno a mangipaay kenkuana iti serbisio?

Dakes ti panangpasuksok iti maysa nga opisial, ti panangted kenkuana iti napateg a banag tapno agaramid iti ilegal, mangballikug iti hustisia, wenno mangipaay iti espesial a serbisio. Ngem saan a panagpasuksok ti panangted iti tip wenno regalo iti empleado ti gobierno tapno aramidenna ti pagrebbenganna wenno tapno makagun-od iti legal a serbisio wenno tapno maliklikan ti di nainkalintegan a pannakatrato.​—4/1, panid 29.