Mapasamak ti Trahedia

ITI banio ti maysa a balay, agay-ayam ni Owen nga agtawen iti dua ket kagudua. Kinalay-atna ti estante ti agas nga impagarup dagiti dadakkelna a saanna a magaw-at. Iti estante, naginteresanna ti maysa a botelia. Linuktan ken ininumna ti linaon dayta. Napasamak ti trahedia.

Naglaon ti botelia iti makasabidong nga asido, ket makapaladingit ta natay ti ubing a ni Owen. Nadudog ti puso dagiti dadakkelna. Ti amana a ni Percy nagsapul iti liwliwa iti relihionna. “Apay a napasamak daytoy?” inyimtuodna. Insungbat ti klero, “Tarigagayan ti Dios ti maysa pay nga ubing nga anghel idiay langit.” Nagladingit ti ama, ket nariknana a di pulos nainkalintegan ti napasamak. Talaga kadi a pinanggep ti Dios a mapasamak ti kasta a trahedia? Gapu iti pannakaupayna, inkeddeng ni Percy a gupden ti pannakitimpuyogna iti relihionna.

Bayat a pinampanunotna ti napasamak, inyimtuod ni Percy: ‘Agsagsagaba pay laeng ngata ti anakko? Makitakto pay ngata?’

Mabalin a mapampanunotyo met no ania ti mapasamak no matay ti maysa ken no posible a makitatayto pay dagiti ing-ingungotentayo a natay. Ti Sao ti Dios, ti Biblia, lawaganna dagitoy a saludsod. Naglaon dayta kadagiti nalawag ken makaliwliwa a sungbat agpaay kadagiti amin a nakapasar kadagiti umasping a trahedia. Kangrunaanna, ipalgakna ti inkari ti Dios a nadayag a namnama​—ti panagungar.

Pangngaasiyo ta basaenyo ti sumaganad nga artikulo tapno maammuanyo ti ad-adu pay maipapan iti dayta a nakaskasdaaw a namnama.