Report Dagiti Manangiwaragawag Iti Pagarian
Ti Napudno a Tao Maidaydayawna ni Jehova
ITI sangalubongan, agdindinamag dagiti agtutubo ken nataengan a Saksi ni Jehova gapu ta napudnoda. Usigenyo dagiti pagarigan manipud kadagiti tallo a kontinente.
Iti panagawidna manipud eskuelaan, maysa a supot ti kuarta ti napidut ti agtawen iti 17 a ni Olusola a taga-Nigeria. Impanna dayta iti prinsipal, a nangbilang iti kuarta, ket naammuan nga agdagup dayta iti 6,200 a naira (agarup $45, U.S.). Ti prinsipal insublina ti supot ti kuarta iti mannursuro a nakapukaw iti dayta. Kas panangapresiar, ti mannursuro inikkanna ni Olusola iti 1,000 a naira (agarup $7, U.S.) para kadagiti gastosna iti eskuelaan. Idi nangngeg dagiti dadduma nga estudiante ti napasamak, inumsida ni Olusola. Sumagmamano a lawas kalpasanna, maysa nga estudiante ti nangipakaammo a natakaw ti kuartana, isu a nakiddaw kadagiti mannursuro a sukimatenda dagiti estudiante. “Agtakderka la ditoy,” kinuna ti mannursuro ken ni Olusola. “Ammok a kas maysa kadagiti Saksi ni Jehova, dimo maaramid ti agtakaw.” Nasarakan ti kuarta iti dua kadagiti lallaki a nanguyaw ken ni Olusola, ket nadisiplinada iti nadagsen. Insurat ni Olusola: “Maragsakanak unay ta naibilangak kas maysa kadagiti Saksi ni Jehova, a di pulos agtakaw, iti kasta maipadayagko ni Jehova.”
Maysa nga aldaw, iti arubayan ti pagtaenganda, maysa a taga-Argentina nga agnagan Marcelo ti nakasarak iti portpolio. Inyawidna ti portpolio, ket siaannad a linuktanna a kadua ni baketna. Naklaatda iti linaonna—dakkel a kantidad ti kuarta, dagiti credit card, ken sumagmamano a napirmaan a tseke, a ti maysa iti dayta ket maysa a milion a peso ti kantidadna. Iti uneg ti portpolio, adda nakitada a numero ti telepono. Inawaganda ti akinkukua ket nayurnos ti panagkikitada iti pagtartrabahuan ni Marcelo tapno maisubli ti portpolio ken dagiti linaonna. Simmangpet ti makinkukua a kasla madandanagan. Kinuna ti amo ni Marcelo iti makinkukua nga awan pagdanaganna agsipud ta ni Marcelo ket maysa kadagiti Saksi ni Jehova. Kas gunggona iti panangisublina iti portpolio, ti makinkukua inikkanna ni Marcelo iti 20 a peso laeng (agarup $6, U.S.). Nakapungtot ti amo agsipud ta apresiarenna unay ti kinamapagtalkan ni Marcelo. Dayta ti nangted ken ni Marcelo iti gundaway tapno ilawlawagna a kas maysa kadagiti Saksi ni Jehova, kayatna ti agbalin a napudno iti amin a gundaway.
Kastoy met ti kapadasan idiay Kyrgyzstan. Ni Rinat, maysa nga ubing a lalaki nga agtawen iti innem, nakasarak iti supot ti kuarta a kukua ti maysa a babai nga agnanaed iti asideg. Naglaon ti supot iti 1,100 a som (agarup $25, U.S.). Idi insubli dayta ni Rinat, binilang ti babai ti kuarta ket kalpasanna imbagana iti ina ni Rinat nga agkurang dayta iti 200 a som. Kinuna ni Rinat a saanna nga innala ti kuarta. Gapuna, napanda amin sinapul ti mapukpukaw a kuarta ket nakitada dayta iti asideg ti lugar a nakasarakan ni Rinat iti supot ti kuarta. Nasdaaw ti babai. Inyebkasna ti panagyamanna ken ni Rinat ken iti nanangna, umuna gapu iti pannakaisubli ti napukaw a kuarta ken maikadua, gapu iti Nakristianuan a pannakaisuro ni Rinat.