Dikay Sumuko nga Agaramid iti Nasayaat

“TAGINAYONENYO a nasayaat ti kababalinyo iti tengnga dagiti nasion,” imbalakad ni apostol Pedro. (1 Pedro 2:12) Ti Griego a sao a naipatarus kas “nasayaat” tukoyenna ti maysa a banag a “makaay-ayo, natan-ok, nadayaw, ekselente.” Iti daytoy a panawen, kasla saanen a realistiko a namnamaen a makaay-ayo wenno nadayaw ti kababalin ti kaaduan a tattao. Ngem dagiti adipen ni Jehova ita tungtungpalenda dayta a balakad ni Pedro. Kinapudnona, agdindinamagda iti intero a lubong gapu iti nasayaat a kababalinda.

Nangnangruna a nakaskasdaaw dayta no panunotentayo dagiti rigat ken parikut a nakaipasanguantayo kadagitoy “napeggad a tiempo a narigat a pakilangenan.” (2 Timoteo 3:1) Iti inaldaw a panagbiagtayo, gagangayen dagiti pakasuotan ken ibubusor iti Nakristianuan a takdertayo. Maysa pay, nupay apagbiit ti dadduma a pakasuotan, dadduma ti agpaut, kumarkaro pay ketdi. Kaskasdi nga imbalakad ni apostol Pablo: “Ditay koma sumuko nga agaramid iti nasayaat, ta iti naikeddeng a panawen agapittayto no ditay mabannog.” (Galacia 6:9) Ngem kasanotay a maaramid​—ken agtultuloy a maaramid​—no ania ti nasayaat iti laksid dagiti makapaupay a suot ken agtultuloy nga ibubusor?

Tulong Tapno Maaramid no Ania ti Nasayaat

Ti panagbalin a “natan-ok, nadayaw, ekselente” ket nalawag a paset ti katatao, maysa a kalidad ti puso. No kasta, ti panangsalimetmet iti nasayaat a kondukta iti laksid dagiti pakasuotan ken pakarigatan ket saan nga apagkanito a reaksion no di ket resulta ti inaldaw a panangsurot ken panangyaplikar kadagiti prinsipio ti Biblia iti amin nga aspeto ti biag. Ania ti sumagmamano a makatulong iti daytoy a banag? Usigentayo dagiti sumaganad.

Tuladenyo ti panagpampanunot ni Kristo. Masapul ti kinapakumbaba tapno maibturan ti kasla di nainkalintegan. Ti maysa a tao a natangsit dina maanusan ti di umiso a pannakatrato. Ngem ni Jesus “impakumbabana ti bagina ket nagtulnog agingga iti ipapatay.” (Filipos 2:5, 8) No tuladentayo ni Jesus, saantay a “mabannog ken agkapuy” iti sagrado a panagserbitayo. (Hebreo 12:2, 3) Sanayenyo ti napakumbaba a panagtulnog babaen ti sidadaan a pannakitunos kadagidiay mangidadaulo iti kongregasionyo. (Hebreo 13:17) Sursuruenyo a matmatan a ‘nangatngato’ dagiti sabsabali ngem kadakayo, nga iyun-unayo dagiti pagimbaganda ngem iti bukodyo a pagimbagan.​—Filipos 2:3, 4.

Laglagipenyo nga ay-ayatennakayo ni Jehova. Nasken a kombinsidotayo a ni Jehova “adda ken isu agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Pudno a maseknan kadatayo ken kayatna a magun-odtayo ti biag nga agnanayon. (1 Timoteo 2:4; 1 Pedro 5:7) No silalagiptayo nga awan ti mabalin a mangikkat iti panagayat ti Dios kadatayo, mapabilegtayo a di sumuko iti pakasuotan.​—Roma 8:38, 39.

Naan-anay nga agtalek ken Jehova. Napateg ti panagtalek ken ni Jehova, nangnangruna no kasla awan patingga wenno mamagpeggad iti biag dagiti suot. Nasken a naan-anay nga agtalektayo a di ipalubos ni Jehova ti aniaman a pannubok ‘iti labes ti kabaelantayo nga itured,’ a kanayon nga “aramidenna ti dalan a pagruaran.” (1 Corinto 10:13) No agtalektayo ken ni Jehova, kabaelantayo a sanguen a situtured uray ti pangta ti ipapatay.​—2 Corinto 1:8, 9.

Reggetanyo ti agkararag. Napateg ti naimpusuan a kararag. (Roma 12:12) Ti napasnek a kararag ti maysa kadagiti pamay-an a makaadanitayo ken ni Jehova. (Santiago 4:8) Maibatay iti personal a kapadasantayo, ammotayo nga “uray ania ti dawatentayo . . . , denggennatayo.” (1 Juan 5:14) No ipalubos ni Jehova nga agtultuloy ti pakasuotantayo kas pannubok iti kinatarnawtayo, ikararagtayo ti tulongna tapno makapagibturtayo. (Lucas 22:41-43) Babaen ti kararag, mariknatayo a ditay pulos agmaymaysa, a no adda ni Jehova iti dasigtayo, kanayon a makapagballigitayo.​—Roma 8:31, 37.

Dagiti Nasayaat nga Aramid​—‘Pakaidayawan ken Mangpadayag’

Amin a Kristiano ket pasaray ‘mapagleddaang babaen ti nadumaduma a pakasuotan.’ Ngem masapul a ‘ditay sumuko nga agaramid iti nasayaat.’ No adda iti sidong ti pakarigatan, makapabileg koma kadakayo ti pannakaammo a ti kinamatalekyo ket “pakaigapuan ti pannakaidayaw ken dayag ken dayaw.” (1 Pedro 1:6, 7) Naan-anay nga aprobetsarenyo ti amin a naespirituan a probision ni Jehova tapno bumileg ti pammatiyo. No kasapulanyo ti personal a pannakaasikaso, umasidegkayo kadagidiay agserserbi kas papastor, mannursuro, ken mamalbalakad iti uneg ti kongregasion Kristiano. (Aramid 20:28) Regular koma a tabunuan ti amin a gimong ti kongregasion, a ‘mangparegta kadatayo iti ayat ken nasayaat nga ar-aramid.’ (Hebreo 10:24) Ti maysa a programa ti inaldaw a panagbasa iti Biblia ken personal a panagadal ket tumulong kadakayo nga agtalinaed nga alerto ken nabileg iti naespirituan; kasta met ti regular a pannakiraman iti Nakristianuan a ministerio.​—Salmo 1:1-3; Mateo 24:14.

Bayat nga ad-adda a matagtagiragsakyo ti panagayat ken panangaywan ni Jehova, ad-adda a dumakkel ti tarigagayyo nga agbalin a “naregta iti nasayaat nga ar-aramid.” (Tito 2:14) Laglagipenyo a “ti nakapagibtur agingga iti panungpalan isunto ti maisalakan.” (Mateo 24:13) Wen, determinadokayo koma a ‘di sumuko nga agaramid iti nasayaat’!

[Blurb iti panid 29]

Nasken a naan-anay nga agtalektayo a saan nga ipalubos ni Jehova ti aniaman a pannubok ‘iti labes ti kabaelantayo nga itured,’ a kanayon nga “aramidenna ti dalan a pagruaran”

[Dagiti Ladawan iti panid 30]

Ti panagbalin nga okupado kadagiti nateokratikuan nga aktibidad ket makatulong kadatayo nga agsagana a sumango kadagiti pakasuotan