“Ti Tulongko Aggapu ken Jehova”

Awanan Asawa Ngem Kontento iti Panagserbi ken ni Jehova

“NAGADU kadakami ti naan-anay a naragsak uray awan asawami,” kinuna ti maysa a Kristiano a babai idiay Espania. Apay nga adda pannakakontentona? “Naragsakkami ta awan ti adu a pakaringgoranmi ket iti kasta, ad-adda a makapagserbikami iti Diosmi, ni Jehova.”

Ti kasta a rikna ket maitunos iti ibaga ti Sao ti Dios maipapan iti kinaawan asawa. Maipapan iti panagasawa, kastoy ti naipaltiing a panangilawlawag ni apostol Pablo: “Kunaek kadagiti awanan asawa a tattao ken kadagiti balo a babbai, naimbag kadakuada nga agtalinaedda a kas met laeng kaniak.” Ni Pablo a mismo ket di kasado. Ngem apay nga insingasingna ti di panagasawa? Kinunana a nabingay ti atension ti naasawaan a tao, idinto a ti saan a naasawaan a lalaki wenno babai ‘asikasuenna dagiti banag maipapan iti Apo.’ (1 Corinto 7:8, 32-34, Naimbag a Damag Biblia) Ti panagserbi ken ni Jehova isu ti kangrunaan a banag a mangted iti kinaragsak ken pannakapnek iti maysa nga awanan asawa.

Panagtalinaed nga Awanan iti Asawa Gapu iti Natan-ok a Panggep

Kadagiti kultura a napateg ti panagasawa ken panagpamilia, mabalin a mamagpanunot ti komento ni Pablo. Nupay kasta, ni Jesu-Kristo​—a di met kasado ngem naragsak ken kontento​—dinakamatna ti maysa a natan-ok a panggep ti kinaawan asawa dagiti Kristiano. Kinunana: “Adda dagiti eunuko a nayanak a kasta manipud iti aanakan ti inada, ket adda dagiti eunuko a napagbalin a eunuko babaen kadagiti tattao, ket adda dagiti eunuko a namagbalin iti bagbagida a eunuko maigapu iti pagarian ti langlangit. Ti makaiwaya iti dayta iwayaanna koma dayta.”​—Mateo 19:12.

Maitunos kadagita a sasao, adu ti mangibaga a gapu ta dida kasado, makapagserbida iti Dios nga awanan iti pakasingaan a gagangay kadagiti naasawaan. (1 Corinto 7:35) Rinibribu a di kasado a Kristiano ti siraragsak nga agdaydayaw ken ni Jehova, ket naaddaanda iti rag-o iti panangtulongda kadagiti sabsabali.a

Mabigbig ti adu a di kasado a Kristiano a saan laeng a dagiti naasawaan ti naragsak ken saan nga amin nga awanan asawa ket naladingit. Adda dagiti gundaway nga agpada a makapasar dagitoy iti ragsak ken ladingit. Kinapudnona, realistiko a kinuna ti Biblia a ti mismo a panagasawa mangyeg iti ‘rigat iti lasag.’​—1 Corinto 7:28.

Awanan Asawa Gapu iti Kasasaad

Adu ti awanan asawa gapu iti kasasaadda, saan ket a gapu ta pinilida dayta. Mabalin a tarigagayanda ti lailo, katakunaynay, ken dungngo a matagiragsak ti maysa a naasawaan. Ngem para kadagiti dadduma, dida pay makiasawa gapu iti kinaawan ti kuarta wenno dadduma pay a makagapu. Dadduma a Kristiano​—adu kadakuada ket dagiti dungdunguentayo a kakabsat a babbai​—nagtalinaedda nga awanan asawa agsipud ta determinadoda nga agtulnog iti balakad ti Biblia a makiasawa “isuna laeng ta iti Apo.” (1 Corinto 7:39) Kadagiti laeng dedikado, bautisado nga agdaydayaw ken ni Jehova ti kayatda a pakiasawaan.

No dadduma, naladingit dagidiay awanan iti asawa. Aminen ti maysa a Kristiano a babai a nariknana met dayta, ngem kunana: “Ammomi ti linteg ni Jehova ket dimi kayat a mapagura ti Dios iti aniaman a makagapu. Mabalin a kayatmi ti maaddaan iti katakunaynay, ngem uray pay mamin-ano nga iyurnos dagiti taga lubong ti pannakiasawami, determinadokami nga agtalinaed nga awanan asawa. Dimi pay ketdi kayat ti makilangen kadagiti lallaki ken babbai a saan a kapammatian.” Makomendaran dagiti kasta a Kristiano gapu iti panangyaplikarda iti balakad ti Biblia ken iti panangsalimetmetda kadagiti nangato a moral a pagalagadan tapno maay-ayoda ni Jehova iti laksid ti aniaman nga emosional a pakarigatan a mabalin a mariknada.

Aglaplapusanan a Tulong ti Dios

Nasungdo ni Jehova kadagiti mangipakita iti kinasungdo kenkuana, kas iti di pannakiasawa iti saan nga agserserbi kenkuana. Maibatay iti personal a kapadasanna, pinasingkedan ni Ari David: “Iti daydiay nasungdo agtignay [ni Jehova] a sisusungdo.” (Salmo 18:25) Ken kadagidiay simamatalek nga agtulnog kenkuana, ikari ti Dios: “Saankanto a pulos panawan ket saankanto a pulos baybay-an.” (Hebreo 13:5) Kas panangtulad ken ni Jehova, mangipaaytayo iti narayray a komendasion kadagiti di kasado a Kristiano iti aniaman nga edad a simamatalek a mangan-annurot iti Sao ti Dios. Mabalintay met nga ikararag ken ni Jehova a pabilgenna ida tapno madaeranda dagiti pakarigatan.​—Uk-ukom 11:30-40.

Naragsak ti adu a di kasado a Kristiano gapu iti naan-anay a pannakipasetda iti trabaho a panangisuro iti Biblia. Ti maysa a pagarigan isu ti agtawen iti 35 a ni Patricia, maysa payunir wenno amin-tiempo nga ebanghelisador. Kunana: “Nupay adda dagiti pakasuotan nga iyeg ti kinaawan asawa, dayta ti nangipaay kaniak iti gundaway tapno agbalin a regular a payunir. Yantangay awananak iti asawa, saan a narikut ti eskediulko, isu nga ad-adu ti tiempok nga agadal. Naadalko met ti agpannuray nga ad-adda ken ni Jehova, nangruna kadagiti tiempo ti pannubok.”

Dagita a kapanunotan ket naibatay iti mangpatalged a kari ti Biblia: “Iyadanim ken Jehova ti dalanmo, ket agkammatalekka kenkuana, ket isu agtignayto.” (Salmo 37:5) Kinapudnona, amin a matalek nga agdaydayaw ken ni Jehova, naasawaan wenno saan, maliwliwa ken mapabilegda iti naipaltiing a sasao: “Ti tulongko aggapu ken Jehova.”​—Salmo 121:2.

[Footnote]

[Blurb iti panid 9]

“Ti awanan asawa a lalaki maringgoran iti bambanag ti Apo, no kasano a magun-odanna ti anamong ti Apo.”​—1 CORINTO 7:32

[Kahon iti panid 8]

PANANGARAMID A MAKAGUNGGONA TI KINAAWAN ASAWA

Ni Jesus, a di pulos nakiasawa, kinunana: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.”​—Juan 4:34.

Dagiti uppat a di kasado nga annak a babbai ni Felipe intultuloyda ti “nagipadpadto.”​—Aramid 21:8, 9.

Dagiti awanan asawa a Kristiano a babbai a mangideklara iti mensahe ti Pagarian ket paset ti ‘dakkel a buyot a mangibagbaga iti naimbag a damag.’​—Salmo 68:11.