Makagunggona Kadi ti Panagbalin a Nasungdo?
“DAKKEL unay ti baybayadam iti insurance para iti salun-atmo,” kinuna ni Karl, maysa a pannakabagi ti insurance.a “No iti kompaniami ti pagalaam iti insurance, makamenoska iti 20 a doliar (U.S.) kada bulan, ket dakkel a gatad dayta.”
“Mabalin a pudno dayta,” insungbat ni Jens. “Ngem sumagmamanon a tawen a daytoy a kompania ti pagbaybayadak. Dakkel ti naitulongda iti naglabas, ket kayatko ti agtalinaed a nasungdo kadakuada.”
“Nasayaat a galad ti kinasungdo,” insungbat ni Karl. “Ngem dakkel ti baybayadam gapu iti panagbalinmo a nasungdo!”
Husto ni Karl. Gapu iti kinasungdo wenno kinamatalek, masansan nga adda kuarta a mabusbos.b Agkasapulan met dayta iti tiempo, pigsa, ken emosional a pannakaikumit. Adda kadi pagimbaganna ti agbalin a nasungdo?
Maap-apresiar Ngem Di Unay Maiparparangarang
Iti maysa a surbey idiay Alemania babaen ti Allensbach Opinion Research Institute, 96 porsiento kadagiti napagsaludsodan ti mangmatmat iti kinamatalek kas matarigagayan a galad. Iti maikadua a surbey nga impatungpal ti Allensbach kadagiti agtawen iti 18 agingga iti 24, ipakitana a 2 iti kada 3 a napagsaludsodan ti mangibilang iti kinamatalek kas nasayaat a galad.
Nupay nasaknap a maapresiar ti kinasungdo, wenno kinamatalek, manmano a mayap-aplikar dayta. Iti sumagmamano a pagilian iti Europa, kas pagarigan, dagiti agassawa wenno agkakapamilia manmano a mangipakitada iti kinasungdo iti maysa ken maysa. Adda dagiti aggagayyem a masansan a saan a nasungdo iti maysa ken maysa. Kasla naan-anay a napukaw payen ti kinasungdo a sigud a namagsinggalut kadagiti amo ken empleado wenno iti maysa a negosio ken dagiti kostumerna. Apay?
No dadduma, gapu iti okupado a panagbiag, awanen ti tiempo ken pigsa a mangitungpal a sisusungdo kadagiti banag a rumbeng nga aramiden. Dagiti tattao a napaay kadagiti relasionda nalabit a bumdengdan nga agbalin a matalek iti siasinoman. Dadduma ti basta agbiag lattan iti wagas a saan nga agkalikagum iti kinasungdo.
Aniaman ti rason, ti kinasungdo ket maysa a galad a maap-apresiar ngem di unay maiparparangarang. Gapuna, usigentayo dagitoy a saludsod: Makagunggona kadi ti panagbalin a nasungdo? No wen, siasino ti rumbeng a pakitaantayo iti kinasungdo, ken kadagiti ania a pamay-an? Ania dagiti pagimbagan ti panagbalin a nasungdo?
[Footnotes]
a Nabaliwan ti dadduma a nagan iti daytoy nga artikulo ken iti sumaganad.
b Nupay adda dagiti konteksto nga agduma ti kaipapanan ti sao a “kinasungdo” ken “kinamatalek,” maymaysa ti kaipapananda no dadduma iti daytoy nga artikulo.
[Blurb iti panid 3]
Ti kinasungdo ket maysa a galad a maap-apresiar ngem di unay maiparparangarang