Ti “Sasao” ni Jehova Saluadannaka Koma
IDI 490 K.K.P., iti nakalalagip a gubat idiay Maraton, 10 a ribu agingga 20 a ribu a taga-Atenas ti simmango iti nakabilbileg nga armada ti Persia. Ti maysa kadagiti kangrunaan a taktika dagiti Griego ket ti phalanx—dagiti agdedekket nga agmarmartsa a soldado. Dagiti kalasagda ket kasla di marpuog a pader, nga addaan kadagiti nakalayat a pika. Babaen ti phalanx, nagballigi dagiti taga-Atenas a nangparmek iti adayo nga ad-adu a soldado ti Persia.
Maipaspasango met dagiti pudno a Kristiano iti naespirituan a gubat. Makidangadangda kadagiti nabileg a kabusor—dagiti di makita nga agturay daytoy agdama a dakes a sistema, a nadeskribir iti Biblia kas dagiti “agturay iti lubong daytoy a kinasipnget, . . . dagiti nadangkes nga espiritu a puersa kadagiti nailangitan a disso.” (Efeso 6:12; 1 Juan 5:19) Agtultuloy nga agballigi ti ili ti Dios—ngem saan nga iti bukodda a pigsa. Ti mamagballigi kadakuada ket ni Jehova, daydiay mangsalsalaknib ken mangisursuro kadakuada, kas nailanad iti Salmo 18:30: “Ti sasao ni Jehova ket napasudi. Isu maysa a kalasag kadagidiay amin nga agkamang kenkuana.”
Wen, babaen ti napasudi a ‘sasaona,’ a linaon ti Sagrado a Kasuratan, salakniban ni Jehova dagiti nasungdo nga adipenna tapno saanda a madangran iti naespirituan. (Salmo 19:7-11; 119:93) Mainaig iti sirib a naiparangarang iti Sao ti Dios, insurat ni Solomon: “Saanmo a panawan dayta, ket aywanannakanto. Ayatem dayta, ket saluadannakanto.” (Proverbio 4:6; Eclesiastes 7:12) Kasano a ti sirib ti Dios saluadannatayo iti pannakadangran? Usigenyo ti napasamak iti nagkauna nga Israel.
Ili a Nasalakniban Babaen ti Sirib ti Dios
Ti Linteg ni Jehova sinalakniban ken inwanwanna dagiti Israelita iti amin nga aspeto ti biag. Kas pagarigan, dagiti pagannurotan maipapan iti dieta, kinadalus, ken panangiputong inliklikna ida iti adu a sakit a nangdidigra kadagiti sabali a nasion. Idi laeng nadiskobre dagiti bakteria idi maika-19 a siglo a nangrugi a suroten ti siensia ti pagalagadan ti Linteg ti Dios. Dagiti linteg iti panangtagikua iti daga, panangsaka, pannakawayawaya iti utang, ken am-am nangyeg kadagiti sosial a pagimbagan iti Israel babaen ti pannakaitandudo ti natalged a kagimongan ken di mangidumduma nga ekonomia. (Deuteronomio 7:12, 15; 15:4, 5) Ti Linteg ni Jehova timmulong pay a nangtaginayon iti kinadam-eg ti daga ti Israel! (Exodo 23:10, 11) Dagiti bilin maibusor iti palso a panagdayaw sinalaknibanda ti espiritualidad ti ili, a sinaluadanda ida manipud iti panangirurumen dagiti demonio, ken tapno saanda a makaaramid iti adu a kinadakes a kas iti panangisakripisio kadagiti annakda ken iti nakababain nga aramid a panagrukbab kadagiti awanan biag a didiosen.—Exodo 20:3-5; Salmo 115:4-8.
Nalawag, dagiti “sasao” ni Jehova talaga a ‘saan nga awanan pateg’ para iti Israel; imbes ketdi, kaipapananna dayta ti biag ken pannakapaatiddog ti al-aldaw dagiti amin a mangipangag iti dayta. (Deuteronomio 32:47) Pudno met dayta ita kadagidiay mangsalimetmet kadagiti nainsiriban a sasao ni Jehova, uray no dagiti Kristiano awandan iti sidong ti Linteg ti tulag. (Galacia 3:24, 25; Hebreo 8:8) Kinapudnona, imbes a linlinteg, addaan dagiti Kristiano kadagiti nabagas a prinsipio ti Biblia a mangiwanwan ken mangsaluad kadakuada.
Maysa nga Ili a Salsalakniban Dagiti Prinsipio
Mabalin nga addaan dagiti linteg ti tao iti limitado nga aplikasion ken mabalin a temporario laeng. Ngem dagiti prinsipio iti Biblia, yantangay pamunganayan a kinapudno dagitoy, masansan nga addaanda iti nabagas ken manayon nga aplikasion. Usigenyo, kas pagarigan, ti prinsipio a nailanad iti Santiago 3:17, a kuna ti pasetna: “Ti sirib manipud ngato umuna iti amin nadalus, kalpasanna natalna.” Kasano a dayta a pamunganayan a kinapudno agserbi kas kalasag ti ili ti Dios ita?
Ti maysa nga adipen ti Dios ket masapul a nadalus iti moral. Gapuna, dagidiay mangipateg iti kinadalus ikagumaanda a liklikan saan laeng a ti imoralidad no di ket uray dagiti banag a mangituggod iti panangaramid iti dayta, agraman ti seksual a panagdarepdep ken pornograpia. (Mateo 5:28) Kasta met, ti agnobio a mangipappapuso iti prinsipio ti Santiago 3:17 liklikanda ti kinasinged a mabalin a mangpukaw iti panagteppelda. Kas managayat iti prinsipio, saanda a mulitan ti kinasin-awda, a nalabit pampanunotenda nga anamongan ti Dios ti konduktada no la ketdi ta saanda nga aktual a masalungasing ti linteg ti Dios. Ammoda a ‘kitkitaen ni Jehova no ania ti puso’ ken agtignay maitunos iti dayta. (1 Samuel 16:7; 2 Cronicas 16:9) Dagiti kasta a masirib saluadanda ti bagbagida maibusor iti adu a nasaknap a sakit a mayakar babaen ti sekso ken taginayonenda ti mental ken emosional a salun-atda.
Dakamaten pay ti Santiago 3:17 a ti nadiosan a sirib ket “natalna.” Ammotayo a ni Satanas ikagkagumaannatayo nga iyadayo ken ni Jehova babaen ti panangimulana iti naranggas a kababalin kadagiti pusotayo, a no dadduma ket babaen ti kuestionable a literatura, pelikula, musika, ken ay-ayam iti kompiuter. Dadduma nga ay-ayam iti kompiuter gargarienda dagiti agay-ayam a mangtulad iti nakaam-ames a kinaulpit ken panangpapatay! (Salmo 11:5) Nabatad nga agbalballigi ni Satanas kas ipakita ti umad-adu a naranggas a krimen. Mainaig iti kasta a krimen, sumagmamano a tawen ti napalabasen, ti pagiwarnak ti Australia a The Sydney Morning Herald inadawna ti kinuna ni Robert Ressler, ti nangputar iti sao a “serial killer.” Kinuna ni Ressler a dagiti mammapatay a nainterbiuna idi dekada 1970 ket nagargari babaen ti pornograpiko a material nga “inartapanen ti kinalulok ti pornograpia ita.” Gapuna, inyebkas ni Ressler ti “posible a nalidem a masakbayan—maysa a baro a siglo nga ad-adunto pay ti mammapatay.”
Iti kinapudnona, bulbulan kalpasan ti pannakaipadamag dayta, maysa a lalaki ti nangpaltog iti 16 nga ubbing ken iti mannursuroda iti maysa a kindergarten idiay Dunblane, Scotland, sakbay a nagpakamatay. Iti simmaganad a bulan, maysa pay nga agmauyong ken nakapaltog a lalaki ti nangmasaker iti 32 a tattao idiay Port Arthur, maysa a natalna nga ili ti Tasmania, Australia. Kadagiti nabiit pay a tawtawen, ti Estados Unidos ket dinidigra ti sumagmamano a masaker iti eskuelaan, a makagapu nga iyimtuod dagiti Amerikano, Apay? Idi Hunio 2001, nagdinamag ti Japan iti sangalubongan idi maysa nga agmauyong a lalaki ti simrek iti maysa nga eskuelaan ket nangbagsol a nakatayan ti 8 nga ubbing nga adda iti umuna ken maikadua a grado ken nakasugatan ti 15 a dadduma pay a tattao. Siempre, narikut dagiti rason no apay a naaramid ti kasta a kinadakes, ngem umad-adu ti mamati a ti maysa a makagapu isu ti kinaranggas a maipabpabuya iti media. “No ti maysa nga 60-segundo a patalastas kabaelanna a gutugoten ti ad-adu a panaggatang,” insurat ti Australiano a kolumnista a ni Philip Adams, “dimo ibaga a ti dua oras a mega milion a pelikula saanna a maimpluensiaan ti kababalin ti tattao.” Makapainteres, iti pagtaengan ti pimmaltog idiay Port Arthur, nakompiskar ti polisia ti 2,000 a videotape ti kinaranggas ken pornograpia.
Dagiti mangannurot kadagiti prinsipio iti Biblia masalaknibanda ti isip ken pusoda iti amin a kita ti paglinglingayan a mangrubrob iti tarigagay nga agbalin a naranggas. Gapuna, “ti espiritu ti lubong” ket awan lugarna iti panagpampanunot ken tarigagayda. Imbes ketdi, ‘insuro ida ti espiritu ti Dios,’ ken ikagumaanda a sukayen ti panagayat kadagiti bungana, a pakaibilangan ti talna. (1 Corinto 2:12, 13; Galacia 5:22, 23) Aramidenda dayta babaen ti regular a panangadal iti Biblia, panagkararag, ken makapabileg a panagmennamenna. Liklikanda met ti makitimpuyog kadagiti tattao a naranggas ti kababalinda, a pilienda ketdi ti makitimpuyog kadagidiay kas kadakuada nga agtarigagay iti natalna a baro a lubong ni Jehova. (Salmo 1:1-3; Proverbio 16:29) Wen, anian a salaknib ti ipaay ti nadiosan a sirib!
Ti “Sasao” ni Jehova Saluadanna Koma ti Pusoyo
Idi naipasango ni Jesus iti pannulisog idiay let-ang, tinubngarna ni Satanas babaen ti siuumiso a panangadawna iti Sao ti Dios. (Lucas 4:1-13) Nupay kasta, saan a nakirinnason ni Jesus iti Diablo tapno laeng makita no siasino ti nalalaing. Babaen ti panangusarna iti Kasuratan kas pagibatayan iti argumentona, nagsao ni Jesus manipud iti pusona, isu a nadaeranna ti estratehia a sibaballigi nga ingganuat ti Diablo idiay Eden. No punnuentayo ti pusotayo kadagiti sasao ni Jehova, madaerantayo met dagiti gakat ni Satanas. Awanen ti napatpateg pay ngem dayta, agsipud ta ‘aggubuay iti puso dagiti ubbog ti biag.’—Proverbio 4:23.
Kanayonanna, masapul nga itultuloytayo a saluadan ti pusotayo. Kalpasan ti pannakapaayna idiay let-ang, saan a nagsardeng ni Satanas iti panangsubokna ken ni Jesus. (Lucas 4:13) Kasta met ti aramidenna kadatayo, a padasenna ti nagduduma a pamay-an tapno madadaelna ti kinatarnawtayo. (Apocalipsis 12:17) Gapuna, tuladentayo ni Jesus babaen ti panangsukay iti nasged a panagayat iti Sao ti Dios, kagiddan ti kanayon a panangikararagtayo iti nasantuan nga espiritu ken sirib. (1 Tesalonica 5:17; Hebreo 5:7) Iti biangna, ikarkari ni Jehova kadagiti isuamin nga agkamang kenkuana a saandanto nga aglak-am iti naespirituan a pannakadangran.—Salmo 91:1-10; Proverbio 1:33.
Ti Sao ti Dios Saluadanna ti Kongregasion
Saan a malapdan ni Satanas ti naipadto a “dakkel a bunggoy” a makalasat iti dakkel a rigat. (Apocalipsis 7:9, 14) Kaskasdi, sipipinget nga ikagumaanna latta a dadaelen ti kinatarnaw dagiti Kristiano tapno uray kaskasano adda dagiti indibidual a makapukaw iti anamong ni Jehova. Nagballigi dayta a pamay-an iti nagkauna nga Israel a nakaigapuan ti ipapatay ti 24,000 a tattao sakbay unay ti iseserrekda iti Naikari a Daga. (Numeros 25:1-9) Siempre, dagiti nakabasol a Kristiano a mangipakita iti pudno a panagbabawi makaawatda iti naayat a tulong tapno bumilegda manen iti naespirituan. Ngem dagiti di agbabawi a managbasol, kas ken ni Zimri iti panawen ti Biblia, pagpeggadenda ti moral ken naespirituan a kinatalged dagiti sabsabali. (Numeros 25:14) Kas kadagiti soldado ti maysa a phalanx a nangibelleng kadagiti kalasagda, insarangda ti bagbagida iti peggad agraman dagiti kakaduada.
Gapuna, ibilin ti Biblia: “Isardengyo ti makikadkadua iti asinoman a maaw-awagan kabsat a maysa a mannakiabig wenno naagum a tao wenno managrukbab iti idolo wenno manangrabngis wenno managbarbartek wenno manangkikil, saan uray makipangan iti kasta a tao. . . . Ikkatenyo ti nadangkes a tao iti tengngayo.” (1 Corinto 5:11, 13) Dikayo kadi umanamong a daytoy a nainsiriban a “sasao” tumulong a mangsaluad iti moral ken naespirituan a kinasin-aw ti kongregasion Kristiano?
Maisupadi unay iti dayta, adu kadagiti iglesia ti Kakristianuan ken apostata ti mangibilang a saanen a praktikal dagiti paset ti Biblia a maikontra iti moderno, napanuynoy a panangmatmat iti moralidad. Gapuna, ikalinteganda a maipalubos ti amin a kita ti nadagsen a basol, uray kadagiti klero. (2 Timoteo 4:3, 4) Ngem imutektekanyo ta ti Proverbio 30:5, a nangdakamat met iti arig kalasag a “sasao” ni Jehova, ket napakuyogan iti kastoy a bilin iti bersikulo 6: “Saanka a manginayon iti aniaman kadagiti sao [ti Dios], tapno saannaka a tubngaren, ket iti kasta saan a kasapulan a mapaneknekanka a naulbod.” Wen, dagidiay mangballikug iti Biblia ket talaga nga ulbod iti naespirituan—dagiti kadakkelan ti sungsungbatanda! (Mateo 15:6-9) Gapuna, anian a pudno a yamantayo ta pasetnatayo ti organisasion a mangraraem iti Sao ti Dios.
Masalsalakniban iti ‘Nabanglo a Sayamusom’
Yantangay sursuroten ti ili ti Dios ti Biblia ken iranranudda ti mangliwliwa a mensahena, mangisaksaknapda iti arig insenso a ‘nabanglo a sayamusom’ ti biag a makaay-ayo ken ni Jehova. Ngem para kadagiti saan a nalinteg nga indibidual, dagiti agaw-awit iti dayta a mensahe ket mangipugpug-aw iti “makapapatay a sayamusom ti pannakaukom.” Wen, ti piguratibo a panagangot dagiti nadangkes ket pinerdi ti sistema dagiti bambanag ni Satanas isu a dida komportable wenno gumurada iti kaadda dagidiay mangisaksaknap iti ‘nabanglo a sayamusom ni Kristo.’ Iti sabali a bangir, dagiti sireregta a mangisaksaknap iti naimbag a damag ‘nabangloda a sayamusom ni Kristo kadagidiay maisalsalakan.’ (2 Corinto 2:14-16) Dagiti kasta a napudno ti panagpuspusoda a tattao kagurada ti kinamanaginsisingpet ken narelihiosuan a kinaulbod a pakabigbigan ti palso a relihion. Gapuna, no luktantayo ti Sao ti Dios ket iranudtayo kadakuada ti mensahe ti Pagarian, mariknada a mayadanida ken Kristo ket tarigagayanda ti makasursuro iti adu pay.—Juan 6:44.
Gapuna, dikay koma maupay no adda dagiti agkedked a dumngeg iti mensahe ti Pagarian. Imbes ketdi, matmatanyo ti ‘nabanglo a sayamusom ni Kristo’ kas maysa a kita ti naespirituan a pannalaknib maibusor kadagidiay posible a mangdangran iti naespirituan a kasasaad ti ili ti Dios, bayat a guyugoyenna dagidiay naimbag ti panagpuspusoda.—Isaias 35:8, 9.
Gapu ta agdedekket a nagmartsa dagiti Griego a soldado idiay Marathon ken amin-pigsa a pinetpetanda dagiti kalasagda, nagballigida iti laksid ti kinabileg dagiti kabusor. Umasping iti dayta, naipanamnama kadagiti nasungdo a Saksi ni Jehova a naan-anay nga agballigida iti naespirituan a gubat, agsipud ta isu dayta ti ‘tawid a sanikuada.’ (Isaias 54:17) Gapuna, tunggal maysa kadatayo itultuloyna koma ti agkamang ken ni Jehova babaen ti agtultuloy a “nairut a panangpetpet iti sao ti biag.”—Filipos 2:16.
[Dagiti Ladawan iti panid 31]
‘Ti sirib manipud ngato ket nadalus, kalpasanna natalna’