Magnakayo Babaen ti Pammati, Saan a Babaen ti Panagkita!
“Magmagnakami babaen ti pammati, saan a babaen ti panagkita.”—2 CORINTO 5:7.
1. Ania ti mangipakita a nagna ni apostol Pablo babaen ti pammati, saan a babaen ti panagkita?
TAWEN 55 K.P. idi. Agarup 20 a tawenen ti napalabas sipud idi nagbalin a Kristiano ti maysa a tao nga agnagan iti Saulo, maysa a manangidadanes kadagiti Kristiano. Isu ket pagaammo idi agangay kas ni apostol Pablo. Dina impalubos a maikkat wenno kumapuy ti pammatina iti Dios bayat ti panaglabas ti panawen. Nupay saan a nakakita kadagiti nailangitan a bambanag, natibker ti pammatina. Gapuna, idi nagsurat kadagiti napulotan a Kristiano nga addaan iti nailangitan a namnama, kinunana: “Magmagnakami babaen ti pammati, saan a babaen ti panagkita.”—2 Corinto 5:7.
2, 3. (a) Kasanotayo a maipakita a magmagnatayo babaen ti pammati? (b) Ania ti kayat a sawen ti magna babaen ti panagkita?
2 Ti pannagna babaen ti pammati kalikagumanna ti naan-anay a panagtalek iti abilidad ti Dios a mangiwanwan iti biagtayo. Nasken a naan-anay a kombinsidotayo nga ammona no ania ti kasayaatan para kadatayo. (Salmo 119:66) No agaramidtayo kadagiti desision ken itungpaltayo dagita, ikabilangantayo “dagiti bambanag a ditay makita.” (Hebreo 11:1, Ti Baro a Naimbag a Damag Biblia) Karaman kadagita ti naikari a “baro a langlangit ken baro a daga.” (2 Pedro 3:13) Iti sabali a bangir, makuna a magmagnatayo babaen ti panagkita no ti biagtayo ket agpampannuray laeng kadagiti bambanag a mabigbig dagiti pisikal a sentidotayo. Napeggad dayta yantangay mabalin nga agturong dayta iti naan-anay a panangyaleng-aleng iti pagayatan ti Dios.—Salmo 81:12; Eclesiastes 11:9.
3 Datayo man ket kameng ti “bassit nga ipastoran,” nga addaan iti nailangitan nga awis, wenno kameng ti “sabsabali a karnero,” nga addaan iti naindagaan a namnama, tunggal maysa kadatayo ti nasken a mangipapuso iti balakad a magna babaen ti pammati, saan a babaen ti panagkita. (Lucas 12:32; Juan 10:16) Kitaentayo no kasano a ti panangtungpal iti daytoy a naipaltiing a balakad ilikliknatayo a matnag iti “temporario a panangtagiragsak iti basol,” iti silo ti materialismo, ken iti pananglipattayo nga asidegen ti panungpalan daytoy sistema ti bambanag. Usigentayo met dagiti peggad nga iyeg ti pannagna babaen ti panagkita.—Hebreo 11:25.
Panangiwaksi “iti Temporario a Panangtagiragsak iti Basol”
4. Ania ti pinili ni Moises, ken apay?
4 Panunotenyo ti biag a natagiragsak koma ni Moises, ti anak ni Amram. Gapu ta dimmakkel iti naarian a pamilia iti nagkauna nga Egipto, nalaka laeng a magun-odna ti pannakabalin, kinabaknang, ken impluensia. Mabalin koma nga inrason ni Moises: ‘Nasursuruanak iti mararaem unay a sirib ti Egipto, ken nabileg ti sasao ken aramidko. No agtalinaedak a nasinged iti naarian a pamilia, mabalinko nga usaren ti posisionko a tumulong kadagiti mairurrurumen a Hebreo a kakabsatko!’ (Aramid 7:22) Nupay kasta, pinili ni Moises ti “dakes a pannakatrato a kadua ti ili ti Dios.” Apay? Ania ti nangtignay ken ni Moises a mangtallikud iti amin a maitukon ti Egipto? Sumungbat ti Biblia: “Babaen iti pammati pinanawan [ni Moises] ti Egipto, ngem saan a nagbuteng iti unget ti ari, ta isu nagtalinaed a natibker a kasla kitkitaenna daydiay Maysa a di makita.” (Hebreo 11:24-27) Gapu iti pammati ni Moises a sigurado a gunggonaan ni Jehova ti kinalinteg, natulongan a mangliklik iti basol, iti panaglablabes, ken iti temporario a ragsak nga itden dayta.
5. Ania ti iparegta kadatayo ti ulidan ni Moises?
5 Masansan met a maipasangotayo kadagiti narigat a desision a mainaig kadagiti isyu a kas iti: ‘Rumbeng kadi nga isardengkon ti dadduma nga aramid wenno kaugalian a saan a naan-anay a maitunos kadagiti prinsipio ti Biblia? Rumbeng kadi nga awatek ti maysa a trabaho a mangyeg kadagiti material a pagnam-ayan ngem manglapped iti naespirituan a panagrang-ayko?’ Ti ulidan ni Moises paregtaennatayo a di mangaramid kadagiti desision a mangiparangarang iti kinaakikid ti panangmatmat daytoy a lubong; imbes ketdi, nasken nga ipakitatayo ti pammatitayo iti kinalawa ti sirib “Daydiay saan a makita”—ni Jehova a Dios. Kas ken Moises, napatpateg koma kadatayo ti pannakigayyem ken ni Jehova ngem iti aniaman a mabalin nga itukon daytoy a lubong.
6, 7. (a) Kasano nga impakita ni Esau a kinaykayatna ti magna babaen ti panagkita? (b) Iti ania a ballaagannatayo ti napasamak ken ni Esau?
6 Idiligyo ni Moises ken ni Esau, ti anak ni patriarka nga Isaac. Pinili ni Esau ti madagdagus a panangpennek iti bagina. (Genesis 25:30-34) Gapu ta ‘dina tinagipateg ti sagrado a bambanag,’ impadawat ni Esau ti kalinteganna kas inauna “kasukat ti maysa a pannangan.” (Hebreo 12:16) Dina pinanunot no kasano a ti desisionna a mangilako iti kalinteganna kas inauna ket makaapektar iti relasionna ken ni Jehova wenno kadagiti agbalinto nga annakna. Awan ti naespirituan a panangmatmatna. Inkidem ni Esau ti matana kadagiti agkakaimbag a kari ti Dios, a tinagibassitna dagita. Nagna babaen ti panagkita, saan a babaen ti pammati.
7 Agserbi a pakaballaagantayo ti napasamak ken ni Esau. (1 Corinto 10:11) No maipasangotay kadagiti narikut wenno simple a panagdesision, rumbeng a ditay pagargari iti propaganda ti lubong ni Satanas, nga agkuna a masapul a magun-odmo ita met laeng ti aniaman a kayatmo. Nasken nga imtuodentayo ti bagitayo: ‘No agdesdesisionak, iparparangarangko kadi dagiti pagannayasan a kas iti impakita ni Esau? Ti kadi panangragpat iti kayatko aramidenna a segundario laengen dagiti naespirituan a bambanag? Dagiti kadi panagpili nga ar-aramidek pagpeggadenna ti pannakigayyemko iti Dios ken ti gunggonak iti masanguanan? Ania a klase nga ulidan ti ipakpakitak kadagiti sabsabali?’ No dagiti panagpili nga aramidentayo iparangarangda nga ipatpategtayo dagiti naespirituan a bambanag, bendisionannatayo ni Jehova.—Proverbio 10:22.
Liklikan ti Silo ti Materialismo
8. Ania ti pakdaar kadagiti Kristiano idiay Laodicea, ken apay a maseknantayo iti dayta?
8 Iti maysa a palgak ken ni apostol Juan idi arinunos ti umuna a siglo, adda mensahe ni naipadayag a Jesu-Kristo iti kongregasion sadi Laodicea, Asia Menor. Maysa dayta a mangballaag a mensahe maibusor iti materialismo. Nupay nabaknangda iti material, napanglaw iti naespirituan dagiti Kristiano idiay Laodicea. Imbes nga itultuloyda ti magna babaen ti pammati, binaybay-anda a dagiti material nga ik-ikutan ti nangbulsek iti naespirituan a panagkitada. (Apocalipsis 3:14-18) Kasta met laeng ti epekto ita ti materialismo. Pakapuyenna ti pammatitayo ken pasardengennatayo nga ‘agtaray buyogen ti panagibtur iti lumba’ ti biag. (Hebreo 12:1) No saantay nga agannad, ti “ragragsak daytoy a biag” ti mabalin a maipangpangruna agingga a ‘naan-anay a leppesenda’ dagiti naespirituan nga aktibidad.—Lucas 8:14.
9. Kasano a masaluadannatayo ti pannakapnek ken panangipateg kadagiti naespirituan a taraon?
9 Mangsaluad iti espiritualidadtayo ti panagbalin a kontento, saan ket a ti panangusartayo a naan-anay iti daytoy a lubong tapno agpabaknang iti material. (1 Corinto 7:31; 1 Timoteo 6:6-8) No magmagnatayo babaen ti pammati ket saan a babaen ti panagkita, maragsakantayo iti agdama a naespirituan a paraiso. Bayat a mangmangantayo kadagiti makapasalun-at a naespirituan a taraon, saantay kadi a matignay nga ‘agdir-i a sirarag-o gapu iti nasayaat a kasasaad ti puso’? (Isaias 65:13, 14) Maysa pay, pakaragsakantayo ti makitimpuyog kadagidiay mangiparparangarang kadagiti bunga ti espiritu ti Dios. (Galacia 5:22, 23) Anian a nagpateg a mapnektayo ken pakabang-arantayo dagiti naespirituan a probision ni Jehova!
10. Ania a salsaludsod ti nasken nga iyimtuodtayo iti bagitayo?
10 Nasken nga iyimtuodtayo iti bagitayo dagitoy a saludsod: ‘Kasano kapateg iti biagko dagiti material a bambanag? Us-usarek kadi dagiti material nga ik-ikutak tapno agbiagak iti ragragsak wenno tapno maitandudok ti pudno a panagdayaw? Ania ti kangrunaan a mangyeg kaniak iti pannakapnek? Ti kadi panagadal iti Biblia ken pannakitimpuyog kadagiti kakabsat bayat dagiti Nakristianuan a gimong, wenno kadagiti ngudo ti lawas nga awan ti Nakristianuan nga annongek? Adu kadi a ngudo ti lawas ti busbusbosek iti panaglinglingay imbes nga usarek dagita iti panangasaba ken dadduma pay nga aktibidad mainaig iti nasin-aw a panagdayaw?’ Ti pannagna babaen ti pammati kalikagumanna ti panagbalin nga okupado iti trabaho ti Pagarian, buyogen ti naan-anay a panagtalek kadagiti kari ni Jehova.—1 Corinto 15:58.
Sipapanunot iti Panungpalan
11. Kasano a ti pannagna babaen ti pammati tulongannatayo nga agbalin a sipapanunot iti panungpalan?
11 Ti pannagna babaen ti pammati tulongannatayo a mangiwaksi kadagiti nainlasagan a panangmatmat a mabayag pay ti panungpalan wenno saan pay ketdin a dumteng. Saan a kas kadagiti managduadua a mangtagtagilag-an iti padto ti Biblia, ammotayo a dagiti pasamak iti lubong ket kaitungpalan ti padto ti Sao ti Dios a mapasamak iti kaaldawantayo. (2 Pedro 3:3, 4) Kas pagarigan, saan kadi a paneknekan dagiti panangmatmat ken kababalin ti kaaduan a tattao nga agbibiagtayon “kadagiti maudi nga aldaw”? (2 Timoteo 3:1-5) Babaen ti mata ti pammati, makitatayo a dagiti agdama a pasamak ditoy lubong ket saan laeng a pannakaulit dagiti naglabas a paspasamak. Imbes ketdi, buklenda “ti pagilasinan ti kaadda [ni Kristo] ken ti panungpalan ti sistema ti bambanag.”—Mateo 24:1-14.
12. Kasano a natungpal idi umuna a siglo ti sasao ni Jesus a nairekord iti Lucas 21:20, 21?
12 Usigentayo ti maysa a pasamak idi umuna a siglo iti Kadawyan a Panawen nga umasping iti kaaldawantayo. Idi adda ditoy daga, pinakdaaran ni Jesu-Kristo dagiti adalanna: “Inton makitayo ti Jerusalem a nalikmut kadagiti nagkampo a buyot, iti kasta ammuenyo a ti pannakalangalangna immasidegen. Iti kasta dagidiay adda idiay Judea rugianda koma ti agkamang iti bambantay, ket dagidiay adda iti tengngana pumanawda koma.” (Lucas 21:20, 21) Kas kaitungpalan dayta a padto, dagiti buyot ti Roma iti panangidaulo ni Cestius Gallus linakubda ti Jerusalem idi 66 K.P. Ngem bigla a nagsanud dagiti buyot, a nangted iti pagilasinan ken gundaway kadagiti Kristiano sadiay tapno ‘agkamangda iti bambantay.’ Idi 70 K.P., nagsubli dagiti buyot ti Roma, ket rinautda ti siudad ti Jerusalem ken dinadaelda ti templona. Sigun ken ni Josephus, nasurok a maysa a milion a Judio ti natay, ken 97,000 ti nakautibo. Impalak-am ti Dios ti panangukomna iti dayta a Judio a sistema ti bambanag. Dagidiay nagna babaen ti pammati ken nangipangag iti pakdaar ni Jesus nalasatanda dayta a kalamidad.
13, 14. (a) Ania dagiti mapasamak iti masanguanan? (b) Apay a nasken nga agtalinaedtayo nga alerto iti pannakatungpal ti padto ti Biblia?
13 Adda umasping iti dayta nga asidegen a mapasamak iti kaaldawantayo. Adda dagiti elemento iti United Nations a makipaset iti pannakaibanag ti panangukom ti Dios. No kasano a dagiti buyot ti Roma idi umuna a siglo ket nadisenio a mangtaginayon iti Pax Romana (Talna ti Roma), ti United Nations ita ket nairanta nga instrumento a mangtaginayon iti talna. Nupay dagiti buyot ti Roma nangyegda iti limitado a kinatalged iti intero a pagaammo idi a lubong, isuda ti nangdadael iti Jerusalem. Uray met ita, ipasimudaag ti padto ti Biblia a dagiti namilitariaan a puersa iti United Nations matmatandanto ti relihion kas makarimon nga elemento ket agtignayto tapno dadaelenna ti moderno-aldaw a Jerusalem—ti Kakristianuan—agraman ti dadduma pay a kameng ti Babilonia a Dakkel. (Apocalipsis 17:12-17) Wen, agngangabiten a madadael ti sangalubongan nga imperio ti palso a relihion.
14 Ti pannakalangalang ti palso a relihion ti pangrugian ti dakkel a rigat. Iti maudi a paset ti dakkel a rigat, madadaelto ti nabatbati nga elemento daytoy dakes a sistema ti bambanag. (Mateo 24:29, 30; Apocalipsis 16:14, 16) Ti pannagna babaen ti pammati tulongannatayo nga agtalinaed nga alerto iti pannakatungpal ti padto ti Biblia. Saantay a paallilaw iti kapanunotan nga iyeg ti Dios ti pudno a talna ken talged babaen ti aniaman a binangon ti tao nga ahensia kas iti United Nations. Gapuna, saan kadi a rumbeng nga ipakita ti wagas ti panagbiagtayo a patientayo a “ti dakkel nga aldaw ni Jehova asidegen”?—Sofonias 1:14.
Pannagna Babaen ti Panagkita—Kasano Kapeggad?
15. Nupay tinagiragsakda ti tulong ti Dios, ania a silo ti nakatnagan ti nasion ti Israel?
15 Dagiti kapadasan ti nagkauna nga Israel ipakitada dagiti peggad ti panangipalubos a kumapuy ti pammati gapu iti pannagna babaen ti panagkita. Nupay nakitada ti sangapulo a saplit a nangibabain kadagiti didiosen ti Egipto ken nakaskasdaaw a naispalda manipud iti Nalabaga a Baybay, sisusukir a nangaramid dagiti Israelita iti maysa a balitok a sinan-urbon a baka ket nagdayawda iti dayta. Dida naanusan ti naguray ken ni Moises, a “nakabaybayag a sumalog iti bantay.” (Exodo 32:1-4) Gapu ta awan an-anusda, nagdayawda iti maysa nga idolo a makita ti mata. Insulto ken ni Jehova ti pannagnada babaen ti panagkita ket nagturong dayta iti pannakapapatay ti “agarup tallo ribu a lallaki.” (Exodo 32:25-29) Nakalkaldaang no ti maysa nga agdaydayaw ita ken ni Jehova ket mangaramid kadagiti desision a mangipakita iti saanna a panagtalek ken ni Jehova ken iti abilidad ti Dios a mangtungpal kadagiti karina!
16. Kasano a nagpaapektar dagiti Israelita kadagiti makinruar a langa?
16 Gapu ta ti makinruar a langa ti kitkitaen dagiti Israelita, naapektaranda iti dadduma pay a negatibo a pamay-an. Nagbutengda kadagiti kabusorda. (Numeros 13:28, 32; Deuteronomio 1:28) Kinaritda ti inted ti Dios nga autoridad ni Moises ken nagtanabutobda mainaig iti kasasaadda. Gapu iti kasta a kinakurang ti pammati, kinaykayatda ti Egipto nga adda iti kontrol dagiti demonio ngem iti Naikari a Daga. (Numeros 14:1-4; Salmo 106:24) Anian a pannakasair ni Jehova bayat a naimatanganna ti nakaro a kinaawan ti panagraem ti ilina iti saan a makita nga Arida!
17. Ania ti rason nga inlaksid dagiti Israelita ti panangiwanwan ni Jehova idi kaaldawan ni Samuel?
17 Uray idi kaaldawan ni mammadto a Samuel, ti naparaburan a nasion ti Israel ket nagna manen babaen ti panagkita. Nangrugi nga agkiddaw dagiti tattao iti ari a makitada. Impakita ni Jehova nga isu ti Arida ngem saanda latta a natignay a magna babaen ti pammati. (1 Samuel 8:4-9) Simamaag nga inlaksidda ti perpekto a panangiwanwan ni Jehova, a kinaykayatda ti tumulad kadagiti kabangibangda a nasion.—1 Samuel 8:19, 20.
18. Ania dagiti maadaltayo maipapan kadagiti peggad ti pannagna babaen ti panagkita?
18 Kas moderno-aldaw nga ad-adipen ni Jehova, ipatpategtayo ti nasayaat a relasiontayo iti Dios. Magagarantayo a mangadal ken mangyaplikar kadagiti agkakapateg a leksion nga isuro dagiti naglabas a pasamak. (Roma 15:4) Idi nagna dagiti Israelita babaen ti panagkita, nalipatanda nga iwanwanwan ida ti Dios babaen ken ni Moises. No saantay nga agannad, mabalin a malipatantayo met a ti kongregasion Kristiano ita ket iwanwanwan ni Jehova a Dios ken ti Dakdakkel a Moises, ni Jesu-Kristo. (Apocalipsis 1:12-16) Nasken nga agannadtayo di la ket ta maaddaantayo iti natauan a panangmatmat iti naindagaan a paset ti organisasion ni Jehova. Mabalin nga agbanag dayta iti panagbalintayo a nareklamo ken di managraem kadagiti pannakabagi ni Jehova agraman kadagiti naespirituan a taraon nga ipapaay ti “matalek ken masirib nga adipen.”—Mateo 24:45.
Determinadokayo Koma a Magna Babaen ti Pammati
19, 20. Ania ti determinado nga aramidenyo, ken apay?
19 “Addaantayo iti pannakigubal,” kuna ti Biblia, “saan a maibusor iti dara ken lasag, no di ket maibusor kadagiti gobierno, maibusor kadagiti autoridad, maibusor kadagiti agturay iti lubong daytoy a kinasipnget, maibusor kadagiti nadangkes nga espiritu a puersa kadagiti nailangitan a disso.” (Efeso 6:12) Ti kangrunaan a kabusortayo isu ni Satanas a Diablo. Ti panggepna ket dadaelenna ti pammatitayo ken ni Jehova. Usarenna ti aniaman a pamay-an a mangisiasi kadatayo manipud iti panagserbi iti Dios. (1 Pedro 5:8) Ania ti mangsaluad kadatayo tapno ditay maallilaw iti makinruar a langa ti sistema ni Satanas? Ti pannagna babaen ti pammati, saan a babaen ti panagkita! No agtalektayo kadagiti kari ni Jehova, maliklikantayo a mapasaran ti ‘pannakarba maipapan iti pammatitayo.’ (1 Timoteo 1:19) Gapuna, aniaman ti mapasamak, determinadotayo koma nga agtultuloy a magna babaen ti pammati, a naan-anay nga agtalek iti pamendision ni Jehova. Ken itultuloytayo koma nga ikararag a malasatantayo ti amin a banag a sigurado a mapasamak iti asideg a masanguanan.—Lucas 21:36.
20 Adda nagsayaat a Pagwadantayo bayat a magmagnatayo babaen ti pammati, saan a babaen ti panagkita. “Ni Kristo nagsagaba a maipaay kadakayo,” kuna ti Biblia, “a nangibati kadakayo iti pagwadan tapno sisisinged a surotenyo dagiti addangna.” (1 Pedro 2:21) Ilawlawag ti sumaruno nga artikulo no kasano a matuladtayo ti pannagnana.
Malagipyo Kadi?
• Ania ti naadalyo kadagiti kapadasan da Moises ken Esau no maipapan iti pannagna babaen ti pammati, saan a babaen ti panagkita?
• Ania ti makatulong tapno maliklikan ti materialismo?
• Kasano a ti pannagna babaen ti pammati tulongannatayo a mangliklik iti panangmatmat nga adayo pay ti panungpalan?
• Apay a napeggad ti pannagna babaen ti panagkita?
[Ladawan iti panid 17]
Nagna ni Moises babaen ti pammati
[Ladawan iti panid 18]
Masansan kadi a ti panaglinglingay ti manglapped kadakayo a makipaset kadagiti teokratiko nga aktibidad?
[Ladawan iti panid 20]
Kasano a saluadannakayo ti panangipangag iti Sao ti Dios?