Ania a Kita ti Edukasion ti Mamagballigi iti Biagmo?

NAPASARAM kadin ti malapunos kadagiti parikut, a kaslaka malmalmes iti naapres nga alikuno? Panunotem laengen ti mabalin a sagabaem no agkamalika iti panangdaer iti maysa wenno ad-adu pay kadagita a parikutmo! Awan ti nayanak nga addaan iti abilidad a mangsolbar a sibaballigi kadagiti amin a parikut, a kanayon a makaaramid kadagiti nainsiriban a pangngeddeng. Dayta ti makagapu a napateg ti edukasion. Pakagun-odam iti edukasion a tumulongto kenka a mangdaer kadagiti parikut iti biag?

Adu nga agtutubo ken natataengan ti mangipatpateg iti panageskuela. Adda pay dagiti eksperto a mangibaga a “naan-anay a patienda a saankanto pulos a makasarak iti [nasayaat] a trabaho no dika nagturpos iti kolehio.” Ngem adda dagiti kasapulan ti tao a saan a kabaelan a penken dagiti material a gapuanan. Kas pagarigan, ti kadi panagbalin a de adal matulongannaka nga agbalin a naimbag a nagannak, asawa, wenno gayyem? Kinapudnona, dagiti tattao a mararaem gapu iti natun-oyda a nangato nga edukasion ti mabalin a makapatanor kadagiti di nasayaat a personalidad, saan a naballigi ti pamiliada, wenno agpakamatayda pay ketdi.

Adda dagiti nagpaiwanwan iti relihion, kas maysa a gubuayan ti edukasion, ngem naupayda gapu ta saan a nakaipaay daytoy iti praktikal a tulong tapno mapagballigianda dagiti pakarigatan iti biag. Kas pagarigan, kuna ni Emiliaa a taga-Mexico: “Sangapulo ket lima a tawenen ti napalabas idi mariknak nga awanen namnama pay a mataginayon ti relasionko ken ni lakayko. Kanayon nga agsupiatkami. Diak mapasardeng iti panagin-inumna. Masansan a kasapulan a panawak dagiti babassit nga annakko gapu iti panangbirbirokko ken lakayko. Nagsagaba ti riknak. Pasaray makimisaak idi, a mangnamnama a makasarakak iti solusion. Nupay mausar sagpaminsan ti Biblia, diak pulos nakangngeg iti aniaman a balakad nga adda direkta a pakainaiganna iti kasasaadko; awan man la ti immasideg a mangibaga no ania ti aramidek. Diak napnek iti basta panagtugaw iti simbaan ken panangulit-ulit iti sumagmamano a kararag.” Nalabit a maupay ti dadduma no makitada a saan pulos a mapagwadan ti panagbiag dagiti mismo a lider ti relihionda. Kas resultana, adu ti saanen nga agtalek iti relihion kas gubuayan ti pannakasanay wenno edukasion a mamagballigi iti biag.

Gapuna, mabalin nga iyimtuodmo iti bagim, ‘Ania a kita ti edukasion ti kasapulan a gun-odek tapno agballigi ti biagko?’ Ti kadi pudno a Kristianidad masungbatanna daytoy a napateg a saludsod? Mausig daytoy iti sumaganad nga artikulo.

[Footnote]