Magunggonaan Manipud iti Kasayaatan nga Edukasion!

TI Biblia tukoyenna ni Jehova a Dios kas ti Namarsua iti amin a banag, agraman kadagiti tattao. (Genesis 1:27; Apocalipsis 4:11) Kas ti Naindaklan nga Instruktor, sinursuruanna ti immuna nga agassawa, da Adan ken Eva, ken insaganana ida nga agbiag iti nangayed a minuyongan ti Eden. Panggepna nga itultuloy ti panangedukar ken panangaywan kadakuada iti agnanayon. (Genesis 1:28, 29; 2:15-17; Isaias 30:20, 21) Panunoten laengen dayta a namnama!

Ngem makapaladingit ta ti umuna a pagassawaan sinayangda ti nagsayaat a namnamada. Gapu iti panagsukirda, nangrugi a nagrakaya ti moralidad dagiti tattao ken kimmapuy ti bagida. (Genesis 3:17-19; Roma 5:12) Iti panangtukoyna kadagidiay nagbiag sumagmamano laeng a kaputotan kalpasan ti panangparsuana iti tao, kuna ti Biblia: “Nakita ni Jehova a ti kinadakes ti tao naruay iti daga ken tunggal pagannayasan ti pampanunot ti pusona dakes laeng iti amin a tiempo.”​—Genesis 6:5.

Dandani 4,500 a tawenen ti napalabas sipud idi kinuna ni Jehova nga agtultuloy nga agannayas ti tao nga agaramid iti kinadakes. No idilig iti naglabas, nadakdakes ita ti kasasaad ti sangatauan. Adu ti di mabain nga agulbod, agtakaw, wenno mangdangran kadagiti sabsabali. Inaldaw nga umad-adu ti parikut, ngem bumasbassit met ti pannakaseknan iti pada a tao. Saan kadi a nariribuk ita ti kaaduan a relasion iti nagbabaetan dagiti tattao, agraman dagiti agkakapamilia? Ngem saan a ti Dios ti mapabasol iti agdama a kasasaad, ken saan met a naikkat ti pannakaseknanna mainaig kadagiti parikut ita. Kanayon nga interesado ni Jehova iti pagimbagan ti tao, ken nakasagana a mangedukar kadagidiay agpaiwanwan kenkuana tapno maaddaanda iti naragsak a biag. Agarup 2,000 a tawen ti napalabasen, imbaonna ditoy daga ti Anakna, ni Jesu-Kristo, ken impakitana ti interesna a mangedukar kadagiti tattao nga agtarigagay iti naballigi a biag. Nangibati ni Jesus iti pagsurotan nga edukasion. Perpekto dayta nga edukasion agsipud ta ti Naindaklan nga Instruktor ti nangisuro kenkuana iti di mabilang a panawen.

Pudno a Kristianidad​—Maysa nga Edukasion

Impasdek ni Jesu-Kristo ti pudno a Kristianidad, maysa a wagas ti panagbiag a naibatay iti ayat. Iti pudno a Kristianidad, amin a pampanunot ken aramid ket maitunos iti pagayatan ti Dios, iti panggep a mapadayawan ken maipadayag ti naganna. (Mateo 22:37-39; Hebreo 10:7) Dagiti pannursuro ni Jesus mainaig iti daytoy a wagas ti panagbiag ket nagtaud ken ni Jehova nga Amana. Mabasatayo iti Juan 8:29 ti maipapan iti tulong a naawatna iti Dios: “Daydiay nangibaon kaniak adda kaniak; saannak a binaybay-an nga agmaymaysa, agsipud ta kankanayon nga aramidek ti bambanag a makaay-ayo kenkuana.” Wen, ni Jesus ket tinulongan ken inwanwan ni Amana iti intero a ministeriona. No maipasango kadagiti pakarigatan dagiti nagkauna a pasurot ni Jesus, manamnamada ti panangiwanwan ti Dios. Sinuruan ida ni Jehova babaen ti Anakna. Nagbalinda a nasaysayaat a tao idi sinurotda dagiti pannursuro ken ulidan ni Jesus. Pudno met dayta kadagiti adalanna ita.​—Kitaenyo ti kahon a “Ti Impluensia ni Jesus ken Dagiti Pannursurona,” iti panid 6.

Ti maysa a nagpaiduma nga aspeto ti pudno a Kristianidad ket addaan daytoy iti edukasion a mangapektar iti panunot ken puso a mamagbalbaliw iti katatao. (Efeso 4:23, 24) Kas maysa laeng a pagarigan, usigenyo ti insuro ni Jesus maipapan iti panagbalin a matalek iti asawa: “Nangngegyo a naikuna, ‘Dika makikamalala.’ Ngem kunak kadakayo a ti tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.” (Mateo 5:27, 28) Babaen dagitoy a sasao, isursuro ni Jesus kadagiti adalanna a masapul ti panangtaginayonda iti nadalus a puso ta napeggad dagiti resulta ti narugit a pampanunot ken tarigagay, uray saan pay a naibanag dagitoy. Saan kadi a pudno a dagiti dakes a pampanunot mabalin a mangituggod kadagiti ar-aramid a kagura ti Dios ken makadangran kadagiti sabsabali?

Gapuna, ibalakad ti Biblia: “Dikay agpaisukogen iti daytoy a sistema ti bambanag, no di ket agbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios.” (Roma 12:2) ‘Posible kadi a talaga a mapabaro ti panunot babaen ti edukasion?’ nalabit iyimtuodyo. Ti panangpabaro iti panunot iramanna ti pananggutugot iti dayta iti naiduma a direksion babaen ti panangpunno iti dayta kadagiti prinsipio ken pannursuro a naidatag iti Sao ti Dios. Maitungpal dayta babaen ti panangawat iti edukasion nga ipapaay ti Dios babaen ti Saona.

Nagutugot nga Agbalbaliw

“Ti Sao ti Dios nabiag ken adda bilegna.” (Hebreo 4:12) Nabileg nga im-impluensiaanna dagiti indibidual, a mangpaneknek nga epektibo dayta agingga ita. Matignayna ti maysa a tao a mangbalbaliw iti panagbiagna, mangawat iti pudno a Kristianidad, ken agbalin a nasaysayaat a tao. Dagiti sumaganad a pagarigan ipakitada ti pateg ti edukasion a naibatay iti Biblia.

Ni Emilia, a nadakamat iti immuna nga artikulo, kunana: “Saan nga umdas ti agbukbukod a panangikagumaak a mangpasayaat iti kasasaad ti pamiliak. Idi nakipagadalak iti Biblia kadagiti Saksi ni Jehova, naammuak nga adda namnama ket binalbaliwak ti panangmatmatko. Naadalko ti aganus ken mangmedmed iti pungtotko. Idi agangay, nakipagadal met ni lakayko. Saan a nalaka kenkuana ti mangisardeng iti panaginum, ngem naaramidna dayta. Nangted dayta iti baro a gundaway tapno agballigi ti relasionmi kas agassawa. Ita, naragsakkami a Kristiano ket ituktukitmi kadagiti annakmi dagiti agkakaimbag a prinsipio ti Biblia.”​—Deuteronomio 6:7.

Ti edukasion nga ipapaay ti pudno a Kristianidad mawayawayaanna ti tao manipud kadagiti bisio ken imoral a panagbiag. Napaneknekan dayta ni Manuel.a Idi agtawen iti 13, pinanawanna ti pagtaenganda ket rinugianna ti agusar iti marijuana. Idi agangay, nagusar iti heroin. Nakidenna kadagiti lallaki ken babbai kasukat ti pagdagusan ken kuarta. No dadduma, sinuportaran met ni Manuel ti bagina babaen ti panagtakaw. Dandani kanayon a nakadroga. Ti kinaranggasna ti makagapu a masansan a maibalud. Naminsan, uppat a tawen a naibalud, ket dita a nakiraman iti panagipuslit kadagiti igam. Uray idi nakiasawa, nagtultuloy a sinagaba ni Manuel dagiti bunga ti dakes a panagbiagna. Kunana: “Nagnaedkami iti dati a pagtaraknan iti manok. Malagipko pay ni baketko a ladrilio payen ti paglutuanna. Nakapimpiman ti kasasaadmi isu a dagiti mismo a kabagiak pinaregtada ni baketko a panawannak.”

Ania ti namagbalbaliw iti biagna? Insungbat ni Manuel: “Adda am-ammok nga immay iti pagtaengak a nakisarita maipapan iti Biblia. Pinatgak ti panagbisitana tapno laeng ipakitak kenkuana nga awan ti Dios a maseknan kadagiti tattao. Imbilangko ti bagik kas sibibiag a pammaneknek iti dayta. Nasdaawak ta naganus ken nadayaw ti Saksi, isu nga immanamongak a tumabuno kadagiti gimong iti Kingdom Hall. Nupay dadduma sadiay ti makaammo iti maipapan kaniak, nainggayyeman a kinablaawandak. Impariknada a saanak a sabsabali kadakuada. Makaliwliwa unay dayta. Natignayak agingga nga inkeddengko a panawan ti lubong ti droga tapno makasapulak iti nadalus a trabaho. Kalpasan ti uppat a bulan a pannakipagadalko iti Biblia, nakualipikarak a makipaset iti trabaho a panangasaba, ket uppat a bulan kalpasan dayta, nabautisaranak kas maysa kadagiti Saksi ni Jehova.”

Kasano a minatmatan ni Manuel ken ti pamiliana ti pudno a Kristianidad? “Nabayagak koman a natay no saanak a nagadal iti Biblia. Naikaykaysaak manen iti pamiliak gapu ta nagbiagak maitunos iti wagas nga insuro ni Jesus. Saan a rumbeng a mapasaran dagiti dua nga annakko ti napasarak kas agtutubo. Naragsakak ken pagyamanak unay ni Jehova gapu iti nasayaat itan a relasionko ken ni baketko. Dadduma nga am-ammok ti nangapresiar kaniak ken kinunada a kasayaatan ti wagas ti panagbiag a sursurotek ita.”

Iti Nakristianuan a wagas ti panagbiag, kasapulan ti pisikal a kinadalus malaksid pay iti moral a kinadalus. Nasursuro dayta ni John, nga agnanaed iti napanglaw a lugar idiay Abagatan nga Africa. Inlawlawagna: “No dadduma, makalawas a saan nga agdigus ti anakmi a babai, ngem saanmi a pakaseknan dayta.” Bigbigen ni baketna a saan a nadalimanek ti pagtaenganda. Ngem babaen ti Nakristianuan nga edukasion, nagbaliw ti bambanag. Insardeng ni John ti makikadua kadagiti agtaktakaw iti lugan ken impaayanna iti ad-adu a tiempo ti pamiliana. “Naadalmi a kas Kristiano, masapul a kanayon a nadalus ti bagi ken kawesmi. Magustuak dagiti sasao iti 1 Pedro 1:16, a mangidagdagadag nga agbalintayo a nasantuan agsipud ta ni Jehova a Dios nasantuan. Ita, inaramidmi met a desente ti simple a pagtaenganmi.”

Magun-odanyo ti Kasayaatan nga Edukasion

Saan a manmano a pasamak dagiti nadakamat a kapadasan. Kas resulta ti edukasion a naibatay iti Biblia, simmayaat ti biag ti rinibu a tattao. Rinaem ida dagiti amoda gapu iti kinamapagtalkan ken kinagagetda. Nagbalinda a nasayaat a kaarruba ken gagayyem, a maseknanda iti pagimbagan ti padada a tao. Determinadoda a mangliklik kadagiti bisio ken nainlasagan a pagannayasan, isu a maaywananda ti pisikal, mental, ken emosional a salun-atda. Imbes a sayangenda dagiti ik-ikutanda babaen kadagiti bisio, inusarda dagita para iti pagimbaganda ken pagimbagan ti pamiliada. (1 Corinto 6:9-11; Colosas 3:18-23) Awan duadua a dagiti resulta ti panangannurot kadagiti pagalagadan ni Jehova a nailanad iti Biblia paneknekanda a ti panagbiag maitunos iti pudno a Kristianidad isu ti kasayaatan a wagas ti panagbiag, a mangipaay iti kasayaatan nga edukasion a mabalin a magun-odan. Mainaig iti tao nga agbibiag maitunos kadagiti linlinteg ti Dios, kuna ti Biblia: “Isuamin nga aramidenna agballiginto.”​—Salmo 1:3.

Makaparegta a maammuan a sidadaan a mangisuro kadatayo ti Mannakabalin-amin a Dios, ni Jehova. Kunana maipapan kenkuana: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam.” (Isaias 48:17) Wen, impakita ni Jehova ti dalan babaen ti ulidan ken sursuro ti Anakna, ni Jesu-Kristo. Dagiti pannursuro ni Jesus ti dakkel a nangbalbaliw iti biag ti adu a tattao a nakalangenna bayat ti kaaddana ditoy daga, ket pudno met dayta kadagiti adu a tattao ita nga agbibiag maitunos kadagiti pannursurona. Apay a diyo iwayaan ti ad-adda pay a panangadal iti maipapan kadagitoy a pannursuro? Dagiti Saksi ni Jehova iti lugaryo maragsakanda a tumulong kadakayo a gumun-od iti kasta a nagpateg nga edukasion.

[Footnote]

[Kahon/Ladawan iti panid 6]

Ti Impluensia ni Jesus ken Dagiti Pannursurona

Iti pananggundawayna iti saadna kas panguluen dagiti agsingsingir iti buis, bimmaknang ni Zaqueo babaen ti panagkikilna kadagiti ordinario a tattao. Ngem binalbaliwanna ti wagas ti panagbiagna babaen ti panangyaplikarna kadagiti pannursuro ni Jesus.​—Lucas 19:1-10.

Ni Saulo ti Tarso insardengna ti panangidadanesna kadagiti Kristiano ken inawatna ti Kristianidad, ket nagbalin a ni apostol Pablo.​—Aramid 22:6-21; Filipos 3:4-9.

Dadduma kadagiti Kristiano iti Corinto ket dati a ‘mannakiabig, idolatroso, mannakikamalala, homoseksual, mannanakaw, naagum, managbarbartek, manangrabngis, ken manangkikil.’ Ngem idi maammuanda ti pudno a Kristianidad, ‘naugasanda, nasantipikarda, ken naideklarada a nalinteg iti nagan ti Apoda a ni Jesu-Kristo.’​—1 Corinto 6:9-11.

[Ladawan iti panid 7]

Isuro kadakayo ti Biblia no kasano nga agballigikayo