Dagiti Kontribusion a Mangparagsak iti Puso ni Jehova

SAAN a makaay-ayo ti pakasaritaanna. Ni Reyna Athalia ginamgamna ti trono ti Juda babaen ti panangsikap ken panangpapatay. Sibibiddut nga impagarupna a natayen ti amin a nainkalintegan nga agtawid isu nga insaadna ti bagina kas reyna. Ni prinsesa Jehoseba, nga addaan dakkel a panagayat ken ni Jehova ken iti Lintegna, situtured nga inlemmengna ti agtawid a maladaga a ni Jehoas. Ni Jehoseba ken ti asawana a Nangato a Padi a ni Jehoiada intalimengda ti ubing iti innem a tawen iti siledda idiay templo.​—2 Ar-ari 11:1-3.

Idi agtawen ni Jehoas iti pito, nakasaganan ni Nangato a Padi a Jehoiada tapno igakatna ti planona a mangikkat iti reyna manipud iti ginamgamna a trono. Inruarna ti inlemmengna nga ubing ket insaadna daytoy kas ti nainkalintegan nga agtawid iti pagarian. Iti kasta, dagiti guardia inruarda manipud templo ti dakes a Reyna Athalia ket pinapatayda, a nakabang-aran ken nagragsakan dagiti tattao. Babaen kadagiti inaramidda, dakkel ti naitulong da Jehoiada ken Jehoseba no iti pannakaisubli ti pudno a panagdayaw iti daga ti Juda. Napatpateg pay, nakatulongda iti panagtultuloy ti naarian a kapuonan ni David, a nagtaudan ti Mesias.​—2 Ar-ari 11:4-21.

Ti kaisasaad nga ari masapul a mangaramid met iti napateg a tignay a mangparagsak iti puso ni Jehova. Dakkel ngamin ti masapul a matarimaan iti balay ni Jehova. Gapu iti di mamedmedan nga ambision ni Athalia a bukodanna ti panagturay iti Juda, saan laeng a nabaybay-an ti templo no di ket nasamsaman pay dayta. Gapuna, inkeddeng ni Jehoas a matarimaan ti templo. Di nagtaktak a nangipaulog iti bilin a panagur-or iti kasapulan a pondo agpaay iti pannakatarimaan ti balay ni Jehova. Kinunana: “Isuamin a kuarta nga agpaay kadagiti nasantuan a daton a maiyeg iti balay ni Jehova, ti kuarta a pakagatadan ti tunggal maysa, ti kuarta nga agpaay kadagiti kararua sigun iti pateg ti tunggal maysa, isuamin a kuarta nga aggubuay iti puso ti tunggal maysa nga iyegna iti balay ni Jehova, alaen koma ti papadi maipaay iti bagbagida, tunggal maysa manipud iti am-ammona; ket isuda, iti biangda, tarimaanenda koma dagiti rekka ti balay sadinoman a pakasarakan iti aniaman a rekka.”​—2 Ar-ari 12:4, 5.

Sidadaan a nangted iti kontribusion dagiti tattao. Ngem saan a naimpusuan dagiti papadi iti panangitungpalda iti annongenda a mangtarimaan iti templo. Gapuna, inkeddeng ti ari a personal nga iwanwanna ti bambanag ket imbilinna a direkta a maikabil iti maysa nga espesial a baul ti amin a kontribusion. Ni Jehoiada ti dinutokanna a mangasikaso iti dayta, ket kuna ti salaysay: “Ni Jehoiada a padi nangala ita iti maysa a baul ket nangbutbot iti abut iti kalubna ket inkabilna dayta iti abay ti altar iti makannawan no ti maysa a tao sumrek iti balay ni Jehova, ket sadiay ti papadi, dagiti agay-aywan iti ruangan, ikabilda ti isuamin a kuarta a maiserserrek idi iti balay ni Jehova. Ket naaramid nga apaman a makitada idi nga adda adu a kuarta iti baul, umasideg ti sekretario ti ari ken ti nangato a padi, ket bungonenda dayta ket bilangenda ti kuarta a nasarakan iti balay ni Jehova. Ket ti kuarta a nabilang inyawatda iti im-ima dagiti managaramid iti trabaho a nadutokan iti balay ni Jehova. Kalpasanna imbayadda kadagiti trabahador iti kayo ken kadagiti managibangon nga agtartrabaho idi iti balay ni Jehova, ken kadagiti kantero ken kadagiti agtiktikap iti bato, ken tapno panggatang iti kaykayo ken tinikapan a batbato a pangtarimaan kadagiti rekka ti balay ni Jehova ken maipaay iti isuamin a nabusbos iti balay a pangtarimaan iti dayta.”​—2 Ar-ari 12:9-12.

Naimpusuan a nakitinnulong dagiti tattao. Natarimaan ti balay ni Jehova a pagdayawan tapno agtultuloy ti organisado a panagdayaw kenkuana. Iti kasta, umiso ti pannakausar dagiti amin a kontribusion. Sinigurado dayta ni Ari Jehoas!

Iti kaaldawantayo, siguraduen ti makitkita nga organisasion ni Jehova nga amin a naidonar a pondo ket siuumiso a mausar iti pannakayadelantar ti panagdayaw ken ni Jehova. Naimpusuan a sinuportaran dayta dagiti pudno a Kristiano, a kas iti inaramid dagidi nagkauna nga Israelita. Nalabit a maysakayo kadagidiay nangted iti kontribusion agpaay iti pannakayadelantar dagiti interes ti Pagarian iti naglabas a tawen ti serbisio. Kitaentayo ti sumagmamano a pamay-an no kasano a nabusbos dagiti kontribusionyo.

PANAGIPABLAAK

Iti intero a lubong, dagiti sumaganad a publikasion ket nayimprenta tapno maadal ken maipaima:

• Libro: 47,490,247

• Bokleta: 6,834,740

• Broshur: 167,854,462

• Kalendario: 5,405,955

• Magasin: 1,179,266,348

• Polieto: 440,995,740

• Video: 3,168,611

Ti panagimprenta ket naaramid idiay Africa, Amianan, Central, ken Abagatan nga America, Asia, Europa, ken kadagiti isla a nasion iti Pacifico​—nga agdagup iti 19 a pagilian.

“Katelyn May ti naganko. Agtawenak iti walo. Addaanak iti $28, ket kayatko nga ited kadakayo kas tulong iti magastos iti panagimprenta. Ti ubing a kabsatyo, Katelyn.”

“Nagsasaritaanmi a pamilia ti maipapan iti baro a pagimprentaan. Dagiti annakmi nga agtawen iti 11 ken 9 inkeddengda ti mangted iti kontribusionda manipud iti urnongda. Maragsakankami a mangipatulod iti kontribusionda, agraman ti kontribusionmi.”

KONSTRUKSION

Dagiti sumaganad ket karaman kadagiti proyekto a naibangon kas pangsuporta kadagiti aktibidad dagiti Saksi ni Jehova:

• Kingdom Hall kadagiti lugar a napanglaw: 2,180

• Assembly Hall: 15

• Sanga nga Opisina: 10

• International volunteer nga adda iti amin-tiempo a panagserbi: 2,342

“Itay napan a ngudo ti lawas, damo a naggigimongkami iti baro a Kingdom Hall-mi. Nakaragragsakkami a maaddaan iti umiso a lugar a pagdayawan iti Amatayo, ni Jehova a Dios. Agyamankami ken ni Jehova ken kadakayo gapu ta inikkanyo iti atension dagiti kasapulanmi babaen ti panangbangonyo iti ad-adu pay a Kingdom Hall. Kinapudnona, ti Kingdom Hall-mi ket pudno a maysa a gameng iti komunidadmi.”​—Chile.

“Apresiaren unay dagiti kakabsat ti tulong nga ipapaay ti organisasion ni Jehova. Agingga ita, pagsasaritaanmi pay laeng ti naragsak a tiempo a binusbosmi a kadua dagiti trabahador iti konstruksion.”​—Moldova.

“Nabiit pay a rinambakanmi ken ni baketko ti maika-35 nga anibersario ti panagasawami. Pampanunotenmi no ania ti iregalomi iti maysa ken maysa, ket inkeddengmi a mangisagutkami ken ni Jehova ken iti organisasionna ta no saan a gapu iti tulongda, nalabit a di nagballigi ti panagasawami. Kayatmi a ti inragpinmi a kuarta ket mausar a tumulong iti panangibangon iti Kingdom Hall iti maysa kadagiti napanglaw a pagilian.”

“Adda naawatko a tawid itay nabiit, ngem yantangay manmano laeng ti ‘kayatko’ ken ad-adda a manmano ti ‘kasapulak,’ kayatko nga ited kadakayo ti nairagpin a kuarta tapno tumulong iti panangibangon kadagiti Kingdom Hall, a kasapulan unay ti adu a pagilian.”

TULONG KADAGITI NADIDIGRA

Kadagitoy maudi nga al-aldaw, masansan a di mapakpakadaan a dumteng dagiti didigra. Adu a Saksi ni Jehova ti mangmangted iti kanayonan a kontribusion tapno matulongan dagiti kakabsatda nga agnanaed kadagiti nadidigra a lugar. Kas palagip, dagiti kontribusion a pangsaranay kadagiti nadidigra ket mausar kas paset ti sangalubongan a trabaho. Dagiti Saksi ni Jehova natulonganda dagiti biktima ti didigra kadagiti luglugar a kas kadagiti sumaganad:

• Africa

• Asia

• Rehion ti Caribe

• Dagiti isla iti Pacifico

“Kayatmi ken ni lakayko ti agyaman unay kadakayo gapu kadagiti impatulodyo a suplay a nausar iti panangtarimaan kadagiti dinadael dagiti allawig. Naatepanmi manen ti balaymi. Pudno nga apresiarenmi ti kinaalibtakyo a nagtignay.”

“Connor ti naganko, ket agtawenak iti 11. Idi nakitak ti napasamak kalpasan a nangdadael ti tsunami, kayatko ti tumulong. Sapay koma ta makatulong daytoy kadagiti kapammatiak.”

DAGITI SPECIAL FULL-TIME SERVANT

Adu a Kristiano ti amin-tiempo nga agserserbi iti trabaho a panagebanghelio wenno kadagiti pagtaengan a Bethel. Dadduma kadagiti amin-tiempo a boluntario ket masupsuportaran babaen kadagiti boluntario a kontribusion. Karaman kadagitoy dagiti sumaganad:

• Misionero: 2,635

• Agdaldaliasat a Manangaywan: 5,325

• Bethelite: 20,092

“Gapu ta diak pay mabalin nga agserbi iti Bethel ita [lalaki nga agtawen iti lima], kayatko nga ipatulod daytoy a kontribusion buyogen ti dakkel a panagayat. Inton dumakkelak, mapanakto dita Bethel tapno agtrabahoak a sigagaget.”

Panangisaknap iti Naimbibliaan nga Edukasion

Binilin ni Jesu-Kristo dagiti pasurotna a ‘mangaramidda iti ad-adalan kadagiti tattao iti amin a nasion.’ (Mateo 28:19) Kas panangtungpal iti bilinna, okupado dagiti Saksi ni Jehova a mangikaskasaba ken mangisursuro iti mensahe ti Biblia kadagiti 235 a dagdaga. Mangipabpablaak ken mangiwarwarasda kadagiti literatura ti Biblia iti 413 a lenguahe.

Kinapudnona, ti tiempo nga ik-ikutan ti maysa a Kristiano ti kapatgan a kontribusion a maipaayna tapno ad-adu pay ti matulongan a mangammo iti Dios ken kadagiti panggepna. Dagiti Saksi ni Jehova impaayda ti adu a tiempo ken pigsada tapno matulonganda dagiti kaarrubada. Nakatulong ti nagduduma a kontribusionda, agraman ti naparabur a pinansial a tulongda, tapno maipakaammo iti intero a daga ti nagan ken pangpanggep ni Jehova. Sapay koma ta itultuloy a bendisionan ni Jehova dagitoy a panagregget a panangtulong kadagiti sabsabali a mangammo iti ad-adu pay maipapan kenkuana. (Proverbio 19:17) Makaparagsak iti puso ni Jehova ti kasta a kinamasindadaan a tumulong!​—Hebreo 13:15, 16.

[Kahon iti panid 28-30]

Dagiti Pamay-an ti Dadduma a Mangted

DAGITI KONTRIBUSION ITI SANGALUBONGAN A TRABAHO

Adu ti mangilasin, wenno mangibadyet, iti kantidad nga itinnagda kadagiti kahon ti kontribusion a namarkaan iti “Contributions for the Worldwide Work​—Matthew 24:14.”

Dagiti kongregasion binulan nga ipatulodda dagitoy a kantidad kadagiti opisina dagiti Saksi ni Jehova nga agserserbi iti pagilianda. Mabalin met nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, Inc., P.O. Box 2044, 1060 Manila, wenno iti sanga nga opisina dagiti Saksi ni Jehova nga agserserbi iti pagilianyo. Dagiti tseke a maipatulod iti nadakamat nga adres ket nasken a maipanagan iti “Watch Tower.” Mabalin met nga idonar dagiti alahas wenno dadduma pay a napapateg a banag. Masapul a mapakuyogan dagitoy a kontribusion iti ababa a surat a mangibagbaga a dayta ket direkta a sagut.

KONDISIONAL A DONASION

Ti kuarta ket mabalin a maitalek iti Watch Tower tapno mausar iti sangalubongan. Ngem maisubli dayta no kiddawen ti nangitalek. Para iti kanayonan nga impormasion, pangngaasiyo ta agsuratkayo iti Treasurer’s Office iti nadakamat a direksion.

NAIPLANO A PANAGIDONAR

Malaksid kadagiti direkta a sagut ken kondisional a donasion a kuarta, adda dagiti sabali pay a pamay-an ti panagidonar nga agpaay iti panagserbi iti Pagarian iti intero a lubong. Karaman ditoy ti:

Insurance: Mabalin a ti Watch Tower ti agserbi a benepisario ti life insurance policy wenno ti retirement/pension plan.

Deposito iti Banko: Dagiti deposito iti banko, sertipiko ti deposito, wenno indibidual a deposito iti panagretiro ket mabalin nga italek wenno maibayad iti Watch Tower Society inton matay ti nagidonar, a mayannurot kadagiti paglintegan ti lokal a banko.

Stock ken Bond: Mabalin nga idonar dagiti stock ken bond iti Watch Tower kas direkta a sagut.

Lote ken Pasdek: Mabalin nga idonar ti lote wenno pasdek kas direkta a sagut wenno, iti kaso ti maysa a balay, babaen ti panangireserba iti pagtaengan ti nagidonar, a makapagtultuloy nga agnaed sadiay bayat a sibibiag. Makiumankayo iti sanga nga opisina iti pagilianyo sakbay a legal nga iyallatiwyo dagiti papeles ti aniaman a lote, balay, wenno pasdek.

Gift Annuity: Iti daytoy nga urnos, ti nagidonar iyallatiwna ti kuarta wenno dagiti security iti maysa a natudingan a korporasion nga us-usaren dagiti Saksi ni Jehova. Ti nagidonar, wenno daydiay tinudinganna, ket makaawat met iti espesipiko a kantidad kada tawen bayat a sibibiag. Makissayan ti income tax a bayadan ti nagidonar iti tawen a mapatalgedan ti gift annuity.

Testamento ken Bambanag a Maitalek (Trusts): Mabalin nga ipatawid ti sanikua wenno kuarta iti Watch Tower babaen ti legal ti pannakapatalgedna a testamento, wenno ti Watch Tower ti agserbi a benepisario ti katulagan mainaig kadagiti bambanag a maitalek. Mabalin nga addada bentahana iti buis no relihioso nga organisasion ti benepisario ti trust.

Kas ipasimudaag ti termino a “naiplano a panagidonar,” kalikaguman dagitoy a kita ti donasion ti panagplano daydiay agidonar. Tapno matulongan dagiti indibidual nga agtarigagay a tumulong iti sangalubongan a trabaho dagiti Saksi ni Jehova babaen ti maysa a kita ti naiplano a panagidonar, naisagana ti Ingles ken Espaniol a broshur a napauluan iti Charitable Planning to Benefit Kingdom Service Worldwide. Naisurat daytoy a broshur tapno maipakaammo no ania dagiti nadumaduma a wagas a dagiti sagut ket mabalin nga ited ita wenno ipatawid inton pumusayda. Kalpasan a nabasada ti broshur ken nakiumanda kadagiti bukodda a mammagbaga mainaig iti linteg wenno buis, adu dagidiay nakatulong iti narelihiosuan ken pangsaranay a trabaho dagiti Saksi ni Jehova iti sangalubongan ken naaprobetsarda dagiti benepisio mainaig iti panagbuis gapu iti panangaramidda iti kasta. Magun-od daytoy a broshur manipud iti Charitable Planning Office.

Para iti kanayonan nga impormasion, makiumankayo iti Charitable Planning Office, babaen ti surat wenno telepono, iti adres a nailista iti baba wenno makiuman iti opisina dagiti Saksi ni Jehova iti pagilianyo.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte

1105 Quezon City

Telepono: 411-6090

[Picture Credit Line iti panid 27]

Video a napauluan Faithful: Stalin: rinetrato ti U.S. Army