Malagipyo Pay?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Apay a ti kaunaan a basol​—ti panagsukir ni Adan​—mayarig iti maysa a matawid a sakit?

Mayarig dayta iti sakit agsipud ta ti kaputotan ni Adan naakaranda iti basolna. Tinawidtayo ngarud ti depekto a resulta ti basol, no kasano a ti dadduma nga annak tawidenda ti sakit dagiti dadakkelda.​—8/15, panid 5.

• Ania dagiti kangrunaan a makagapu iti ikakaro ti kinaranggas ita?

Ikagkagumaan ni Satanas nga iyadayo dagiti tattao manipud ken ni Jehova babaen ti panangimulana iti naranggas a kababalin kadagiti pusotayo, babaen dagiti pelikula, musika, ken ay-ayam iti kompiuter a manggargari iti tao a tumulad iti kinaulpit ken panangpapatay. Ti kinaranggas nga ipabpabuya ti media ti maysa a pakaigapuan dagiti adu a kinaranggas.​—9/1, panid 29.

• Siasino ni Poncio Pilato?

Isu ket maysa a Romano a nangato bassit ti saadna ken posible a nagbalin a kameng ti armada. Ni Romano nga Emperador Tiberio dinutokanna ni Pilato kas gobernador iti probinsia ti Judea idi 26 K.P. Bayat ti pannakabista ni Jesus, nangngeg ni Pilato dagiti darum dagiti Judio a lider. Tapno maay-ayona dagiti tattao, inanamonganna ti pannakapapatay ni Jesus.​—9/15, panid 10-12.

• Ania “ti pagilasinan” a nadakamat iti Mateo 24:3?

Daytoy a pagilasinan ket addaan iti nagduduma nga aspeto a mangbukel iti maysa a ragup a tanda. Ti pagilasinan iramanna ti gubat, bisin, angol, ken ginggined, ket tumulong dayta kadagiti pasurot ni Jesus tapno mabigbigda ti ‘kaaddana’ ken ti “panungpalan ti sistema ti bambanag.”​—10/1, panid 4-5.

• Ania ti Diaspora, ken ania dagiti lugar a saklawenna?

Tumukoy daytoy a sao kadagiti Judio nga agnanaed iti ruar ti Palestina. Idi umuna a siglo, dagiti kangrunaan a sentro dagiti Judio ket masarakan idiay Siria, Asia Menor, Babilonia, ken Egipto, ken addaanda kadagiti babbabassit a komunidad iti paset ti Europa a masakupan ti Imperio ti Roma.​—10/15, panid 12.

• Ti kadi Kristiano mataginayonna ti nadalus a konsiensia no awatenna ti trabaho nga agkalikagum iti panagawit iti armas?

Ti iseserrek iti trabaho nga agkalikagum iti panangawit iti paltog wenno aniaman nga armas ket personal a desision. Ngem ti kasta a trabaho isarangna ti maysa iti posibilidad nga agbalin a manungsungbat iti dara no makalikaguman nga usarenna dayta nga armas, wenno iti pannakadangran wenno pannakapapatay manipud iti maysa a mangraut wenno manangibales. Ti Kristiano nga agaw-awit iti kasta nga armas ket saan a makualipikar kadagiti naisangsangayan a pribilehio iti kongregasion. (1 Timoteo 3:3, 10)​—11/1, panid 31.

• Yantangay naadaw ti sao nga “Armagedon” manipud iti sasao a “Bantay ti Megiddo,” ti kadi gubat ti Armagedon mapasamak iti bantay idiay Makintengnga a Daya?

Saan. Awan ti Bantay ti Megiddo, no di maysa laeng a munturod iti katanapan ti Israel. Dayta a lugar saanna a malaon ti amin nga “ar-ari ti daga ken dagiti buyotda.” Ti naindaklan a gubat ti Dios ket maysa a sangalubongan a pasamak, ken pagpatinggaenna ti amin a gubgubat. (Apocalipsis 16:14, 16; 19:19; Salmo 46:8, 9)​—12/1, panid 4-7.