Salsaludsod Dagiti Agbasbasa
No rirriribuken dagiti sairo ti maysa a tao, ania ti mabalinna nga aramiden tapno makalapsut iti dayta?
Ipakita ti Sao ti Dios a dagidiay rirriribuken dagiti sairo mabalinda ti makalapsut iti kasta a pammarigat. Dakkel ti maaramidan ti kararag. (Marcos 9:25-29) Ngem adda dagiti kanayonan a tignay a nalabit nasken nga aramiden ti maysa a rirriribuken dagiti sairo. Dagiti pasamak mainaig kadagiti Kristiano idi umuna a siglo ipakitada no ania ti sabali pay a mabalin nga aramiden.
Makipaspaset iti demonismo ti dadduma nga indibidual iti nagkauna nga Efeso sakbay a nagbalinda a Kristiano. Ngem idi inkeddengdan ti agserbi iti Dios, ‘dagidiay nangan-annurot kadagiti arte ti panagsalamangka inyegda a pinagkaykaysa dagiti libroda ket pinuoranda ida iti sanguanan ti isuamin.’ (Aramid 19:19) Babaen ti panangpuorda kadagiti libroda mainaig iti panagpadles, dagidi a kabbaro a manamati idiay Efeso nangipakitada iti nasayaat nga ulidan iti asinoman ita nga agtarigagay a makalapsut iti panangriribuk dagiti sairo. Nasken a naan-anay a dadaelenda ti amin a banag mainaig iti espiritismo, a pakairamanan dagiti libro, magasin, pelikula, impormasion iti Internet, ken musika a mainaig iti espiritismo, agraman dagiti anting-anting wenno dadduma a banag a maisuot tapno agserbi a “proteksion” wenno mainaig kadagiti espiritistiko nga aramid.―Deuteronomio 7:25, 26; 1 Corinto 10:21.
Sumagmamano a tawen kalpasan a dagidi a Kristiano idiay Efeso dinadaelda dagiti libroda mainaig iti mahika, insurat ni apostol Pablo: “Addaantayo iti pannakigubal . . . maibusor kadagiti nadangkes nga espiritu a puersa.” (Efeso 6:12) Indagadag ni Pablo kadagiti Kristiano: “Ikapetyo ti naan-anay a kabal manipud iti Dios tapno mabalinanyo ti agtakder a sititibker maibusor kadagiti pangallilaw a pamuspusan ti Diablo.” (Efeso 6:11) Agaplikar dayta a balakad agingga ita. Masapul a patibkeren dagiti Kristiano ti espiritualidadda tapno masarangetda dagiti dakes nga espiritu. Inyunay-unay ni Pablo: “Kangrunaan iti amin, alaenyo ti dakkel a kalasag ti pammati, a babaen iti dayta mabalinanyonto a depdepen amin dagiti sumsumged a gayang daydiay nadangkes.” (Efeso 6:16) Mapabileg ti tao ti pammatina babaen ti panagadalna iti Biblia. (Roma 10:17; Colosas 2:6, 7) Gapuna, ti regular a panagadal iti Biblia tulongannatayo a mangpatanor iti pammati nga agserbi a sarikedkedtayo maibusor kadagiti impluensia dagiti dakes nga espiritu.―Salmo 91:4; 1 Juan 5:5.
Adda sabali pay a nasken nga aramiden dagidi a Kristiano sadi Efeso. Kinuna kadakuada ni Pablo: “Iti amin a langa ti kararag ken araraw itultuloyyo ti agkararag iti espiritu iti amin a gundaway.” (Efeso 6:18) Wen, dagidiay agtarigagay a makalapsut iti panangraut dagiti sairo nasken a sipapasnek nga ikararagda ti pannalaknib ni Jehova. (Proverbio 18:10; Mateo 6:13; 1 Juan 5:18, 19) Maitutop ti kuna ti Biblia: “Ngarud, agpasakupkayo iti Dios; ngem busorenyo ti Diablo, ket isu agtalawto kadakayo.”—Santiago 4:7.
Nupay daydiay rirriribuken ti sairo masapul a sipapasnek nga agkararag tapno makalapsut iti dayta, dagiti dadduma a pudno a Kristiano mabalinda met nga ikararagan ti indibidual nga addaan iti nasged a tarigagay nga agserbi ken ni Jehova ken mangikagkagumaan a mangsaranget kadagiti dakes nga espiritu. Mabalin a kiddawenda iti Dios a pabilgenna dayta a tao tapno maaddaan iti naespirituan a kired a mangsaranget kadagiti panangriribuk dagiti sairo. Yantangay ibaga ti Sao ti Dios a “ti araraw ti nalinteg a tao, no agtigtignay dayta, aduan iti puersa,” dagiti kararag dagiti adipen ti Dios sigurado a makatulongda kadagidiay rirriribuken ti sairo ken mangar-aramid iti amin a kabaelanda a ‘mangbusor iti Diablo.’—Santiago 5:16.
[Ladawan iti panid 31]
Dagiti manamati idiay Efeso dinadaelda dagiti libroda mainaig iti mahika