Malagipyo Pay?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Ania ti sumagmamano a makagapu no apay a nagadu ti kinadakes ita?

Ti maysa a makagapu no apay a kasta unay ti kinadakes isu ti pagannayasan ti tao nga agaramid iti dakes. (Genesis 8:21) Ti sabali pay a makagapu isu ti kinaawan ti umiso a pannakaammo dagiti tattao no maipapan iti pagayatan ti Dios. Kanayonanna, ni Satanas a namunganay iti kinadakes, agtultuloy a makibibiang kadagiti aktibidad dagiti tattao.​—1/1, panid 4-6.

• Ania dagiti positibo nga epekto ti nasayaat a sao iti umiso a tiempo? (Proverbio 12:25)

Daydiay umawat iti dayta maparayray ti kompiansana, maparegta ken matignay, ken mariknana nga isu ket maakseptar. Kasta met, no iyugalitayo ti mangkomendar, matulongantayo a mangbirok iti naimbag kadagiti sabsabali.​—1/1, panid 16-17.

• Ania ti linaon ti lakasa ti tulag?

Naglaon dayta iti dua a tapi ti Linteg agraman ti dadduma a manna. Kalpasan ti iyaalsa ni Kore, naikabil iti lakasa ti sarukod ni Aaron tapno agserbi a pangsaksi maibusor iti dayta a kaputotan. (Hebreo 9:4) Mabalin a naikkat ti sarukod ken manna manipud iti Lakasa sakbay a naidedikar ti templo ni Solomon.​—1/15, panid 31.

• Apay a dagiti Judio idi kaaldawan ni Nehemias masapul a mangyegda kadagiti kayo iti templo?

Ti Mosaiko a Linteg saanna nga ibilbilin ti panangidaton iti kayo. Ngem idi kaaldawan ni Nehemias, kasapulan ti agtultuloy nga abasto iti kayo a pangpuor kadagiti daton iti altar.​—2/1, panid 11.

• Ania ti Muratorian Fragment?

Paset dayta ti Latin a manuskrito. Dayta a teksto ket damo a naputar iti Griego idi agarup agngudo ti maikadua a siglo K.P. Naglaon dayta iti kadaanan a listaan dagiti libro ti Kristiano a Griego a Kasuratan a naibilang nga autentiko, agraman kadagiti komento maipapan kadagiti libro ken dagiti mannuratna.​—2/15, panid 13-14.

• Apay a ni Persiano a Reyna Vasti nagtultuloy a nagkedked a mapan iti ari? (Ester 1:10-12)

Saan nga ibaga ti Biblia no ania ti rasonna. Kuna ti dadduma nga eskolar a nagkedked gapu ta saanna a kayat ti maibabain iti timpuyog dagiti nabartek a sangaili ti ari. Wenno mabalin a saan a talaga a managpasakup daytoy a napintas a reyna, banag a saan a nasayaat nga ulidan kadagiti assawa a babbai iti Imperio ti Persia.​—3/1, panid 9.

• Kasano a mangispal ti subbot?

Ti daton ni Jesus maispalnatayo manipud iti natawid a basol ken mawayawayaannatayo manipud kadagiti makapapatay nga epekto ti basol. (Roma 6:23) Daytoy a daton wayawayaanna dagiti pudno a Kristiano manipud iti masidsidir a konsiensia. Ken babaen ti panangipakita iti pammati iti subbot, saantayo a pakadanagan no ania ti takdertayo iti imatang ti Dios. (1 Juan 2:1)​—3/15, panid 8.

• Ania ti maadaltayo iti panangibilin ti Linteg a ti urbon a kalding saan a mailambong iti gatas ti inana? (Exodo 23:19)

Ti kasta a panangilambong ket nalabit a maysa idi a pagano a ritual tapno agtudo. (Levitico 20:23) Ti gatas ti ina a kalding ket impaay ti Dios a pagtaraon ken tumulong iti panagdakkel ti urbon. Ti panangluto iti urbon iti dayta a gatas ket panangipakita iti di panagraem iti relasion nga impasdek ti Dios iti nagbaetan ti ina ken ti urbon. Ti linteg maibusor iti dayta ipakitana ti kinamanangngaasi ti Dios.​—4/1, panid 31.