Salsaludsod Dagiti Agbasbasa
Iti Mosaiko a Linteg, apay nga adda dagiti naikasigudan nga usar ti mabagbagi a namatmatan a ‘mamagrugit’ iti maysa a tao?
Pinarsua ti Dios ti sekso, agpadpada agpaay iti panagpaadu ti tattao ken mangnayon iti ragsak ti agassawa. (Genesis 1:28; Proverbio 5:15-18) Nupay kasta, iti kapitulo 12 ken 15 ti Levitico, adda dagiti espesipiko a linteg mainaig iti kinarugit a maigapu iti panagruar ti semilia, panagkadawyan, ken panaganak. (Levitico 12:1-6; 15:16-24) Dagiti kasta a linteg a naipaannurot iti nagkauna nga Israel ket nagresulta iti nasalun-at a panagbiag, pannakaitandudo dagiti nangato a moral a pagalagadan, ken pannakaipaganetget ti kinasagrado ti dara ken ti kinapateg ti panangabbong kadagiti basol.
Dagiti kalikaguman ti Mosaiko a Linteg mainaig kadagiti naikasigudan nga usar dagiti mabagbagi ket nangitandudo iti salun-at ken dadduma pay a pagimbagan dagiti Israelita. Kuna ti libro a The Bible and Modern Medicine: “Ti panangsurot iti pammilin a saan a panagdenna kabayatan ti panagkadawyan ket epektibo a pamay-an tapno maliklikan ti sumagmamano a sakit a mayakar babaen ti sekso . . . ken sigurado a manglapped iti itataud ti kanser iti matris.” Gapu kadagita a paglintegan, nasaluadan dagiti adipen ti Dios manipud kadagiti sakit a mabalin a dida pagaammo wenno dida kabaelan nga ammuen idi. Ti kinadalusda iti sekso ti nangparayray iti kinabunga ti nasion a nangikarian ti Dios iti panagadu ken panagrang-ay. (Genesis 15:5; 22:17) Nairaman met iti dayta ti emosional a salun-at dagiti adipen ti Dios. No pagtulnoganda dagitoy a linteg, masursuro a kontrolen dagiti agassawa ti kinarasukda iti sekso.
Ngem ti panagpadara isu ti kangrunaan nga isyu a nairaman kadagiti nagduduma a kinarugit a resulta dagiti seksual a bambanag. Dagiti linteg ni Jehova mainaig iti dara impasagepsepna kadagiti Israelita saan laeng a ti kinasagrado ti dara no di pay ket ti naisangsangayan nga usarna iti panagdayaw ken ni Jehova, kas kadagiti panagdaton ken panangabbong agpaay kadagiti basol.—Levitico 17:11; Deuteronomio 12:23, 24, 27.
No kasta, dagiti espesipiko a kalikaguman ti Linteg maipapan iti daytoy a banag ket nainaig unay iti kinaimperpekto ti tao. Ammo dagiti Israelita a saan a makapataud da Adan ken Eva iti perpekto nga annak kalpasan ti panagbasolda. Sagabaen ti amin a kaputotanda dagiti epekto ti natawid a basol―kinaimperpekto ken ipapatay. (Roma 5:12) Gapuna, imperpekto ken managbasol nga annak laeng ti kabaelan a patauden dagiti tattao, nupay naparsua dagiti organo ti panagpaadu tapno mangpataud koma kadagiti perpekto nga annak babaen ti urnos ti panagasawa.
No kasta, ti Linteg maipapan iti panaggugor impalagipna kadagiti Israelita saan laeng a ti natawidda a kinamanagbasol no di ket ti panagkasapulanda iti pangsubbot a daton a mangabbong kadagiti basol ken mangisubli iti perpekto a biag. Siempre, saan a naibanag dayta dagiti animal nga indatonda idi. (Hebreo 10:3, 4) Ti panggep ti Mosaiko a Linteg ket tapno iturongna ida ken ni Kristo ken tapno tulonganna ida a mangbigbig a babaen laeng ti perpekto a biag nga indaton ni Jesus a magun-od ti pudno a pannakapakawan, a manglukat iti dalan agturong iti biag nga agnanayon para kadagidiay matalek.—Galacia 3:24; Hebreo 9:13, 14.