Ipamaysayo ti Atensionyo iti Kinaimbag ti Organisasion ni Jehova
“Pudno unay a mapnekkaminto iti kinaimbag ti balaymo.”—SALMO 65:4.
1, 2. (a) Ania ti epektona kadagiti adipen ti Dios dagiti urnos mainaig iti templo? (b) Kasano a sinuportaran ni David ti pannakaibangon ti templo?
NI David iti nagkauna nga Israel ti maysa kadagiti naisangsangayan a tattao a nadakamat iti Hebreo a Kasuratan. Kas maysa a pastor, musikero, propeta, ken ari, naan-anay a nagtalek ken ni Jehova a Dios. Gapu iti nasinged a relasionna ken ni Jehova, tinarigagayanna ti mangbangon iti maysa a balay agpaay iti Dios. Dayta a balay, wenno templo, ti agbalin a sentro ti pudno a panagdayaw idiay Israel. Ammo ni David a dagiti urnos mainaig iti templo ket mangyeg iti rag-o ken bendision kadagiti adipen ti Dios. Gapuna, inkanta ni David: “Naragsak daydiay piliem ken paasitgem [Jehova], tapno isu makapagtaeng kadagiti paraanganmo. Pudno unay a mapnekkaminto iti kinaimbag ti balaymo, ti nasantuan a disso ti templom.”―Salmo 65:4.
2 Ngem saan a napalubosan ni David a mangimaton iti pannakabangon ti balay ni Jehova. Imbes ketdi, nairanta dayta a pribilehio iti anakna a ni Solomon. Saan a nagtanabutob ni David gapu ta adda sabali a nakaitedan dayta a pribilehio a tinartarigagayanna unay. Ti napateg kenkuana ket maibangon ti templo. Naimpusuan a sinuportaranna ti proyekto babaen ti panangipasana ken ni Solomon ti disenio ti templo nga inawatna manipud ken ni Jehova. Malaksid iti dayta, inorganisar ni David ti rinibu a Levita agpaay iti nagduduma a benneg ti serbisio ken nangidonar iti adu a balitok ken pirak a mausar iti pannakaibangon ti templo.—1 Cronicas 17:1, 4, 11, 12; 23:3-6; 28:11, 12; 29:1-5.
3. Ania ti kababalin dagiti adipen ti Dios kadagiti urnos mainaig iti pudno a panagdayaw?
3 Sinuportaran dagiti matalek nga Israelita dagiti urnos a naipasdek agpaay iti pudno a panagdayaw iti balay ti Dios. Kas agdama nga ad-adipen ni Jehova, supsuportarantayo met dagiti urnos ti panagdayaw iti uneg ti naindagaan a paset ti organisasion ni Jehova. Iti kasta, ipakpakitatayo a tultuladentayo ti kababalin ni David. Saantayo a managtanabutob. Imbes ketdi, ipampamaysatayo ti atensiontayo iti kinaimbag ti organisasion ti Dios. Pampanunotenyo kadi ti adu a naimbag a bambanag a panggapuantayo nga agyaman? Usigentayo ti dadduma kadagita.
Agyaman Maigapu Kadagidiay Mangidadaulo
4, 5. (a) Kasano nga itungtungpal “ti matalek ken masirib nga adipen” ti annongenna? (b) Ania ti panagrikna ti dadduma a Saksi maipapan iti maaw-awatda a naespirituan a taraon?
4 Adda naimbag a rasontayo nga agyaman gapu iti “matalek ken masirib nga adipen” a nangipabiangan ni Jesus kadagiti sanikuana ditoy daga. Daytoy a klase adipen a buklen dagiti Kristiano a napulotan iti espiritu idadauluanda ti panangikasaba iti naimbag a damag, iyur-urnosda dagiti panaggigimong, ken agipabpablaakda kadagiti naibatay-Biblia a publikasion iti nasurok nga 400 a lenguahe. Minilion a tattao iti intero a lubong ti siyayaman a mangmangan iti dayta a naespirituan a ‘taraon iti umiso a tiempo.’ (Mateo 24:45-47) Sigurado nga awan ti rason nga agtanabutob maipapan iti dayta.
5 Iti adun a tawen, maysa a baket a Saksi ni Jehova nga agnagan iti Elfi ti naliwliwa ken natulongan babaen ti panangyaplikarna iti balakad ti Kasuratan a masarakan kadagiti publikasion a naggapu iti klase adipen. Ti dakkel nga apresasionna ti nangtignay ken ni Elfi a mangisurat: “Diak la ammo ti aramidek no awan ti organisasion ni Jehova.” Agserserbi met iti Dios iti adun a dekada da Peter ken Irmgard. Inyebkas ni Irmgard ti panagyamanna kadagiti amin a probision nga ipapaay ti “naayat ken manangipateg nga organisasion ni Jehova.” Karaman kadagitoy a publikasion dagidiay nadisenio para kadagiti tattao nga addaan iti naisangsangayan a kasapulan, kas kadagiti indibidual a nakapuy ti panagkitada wenno panagdengngegda.
6, 7. (a) Kasano a maimatmatonan ti aktibidad dagiti kongregasion iti intero a daga? (b) Ania ti nakuna maipapan iti naindagaan a paset ti organisasion ni Jehova?
6 Ti Bagi a Manarawidwid dagiti Saksi ni Jehova ti agserserbi kas pannakabagi ti ‘matalek nga adipen.’ Dayta ket maysa a bassit a grupo dagiti lallaki a napulotan iti espiritu nga agserserbi iti sangalubongan a hedkuarter dagiti Saksi ni Jehova idiay Brooklyn, New York. Ti Bagi a Manarawidwid ti mangdutok kadagiti aduan iti kapadasan nga adipen ni Jehova tapno agserbi kadagiti sanga nga opisina a mangimatmaton kadagiti aktibidad iti nasurok a 98,000 a kongregasion iti intero a daga. Dagiti lallaki a makaragpat kadagiti kualipikasion ti Biblia madutokanda kas papanglakayen ken ministerial nga adipen kadagita a kongregasion. (1 Timoteo 3:1-9, 12, 13) Dagiti papanglakayen ti mangidaulo ken siaayat a mangipastor iti arban ti Dios a naitalek kadakuada. Anian a bendision ti agbalin a paset dayta nga arban ket tagiragsaken ti ayat ken panagkaykaysa nga agraraira “iti intero a timpuyog dagiti kakabsat”!—1 Pedro 2:17; 5:2, 3.
7 Imbes nga agreklamo, masansan nga iyebkas dagiti indibidual ti apresasionda gapu iti naayat a naespirituan a panangiwanwan dagiti panglakayen. Kas pagarigan, usigenyo ni Birgit, maysa a Kristiano nga asawa a babai nga agtawen iti nasurok a 30. Idi tin-edyer pay, naibarkada kadagiti dakes a kakadua ken dandani natnag iti basol. Ngem ti nalawag ken naibatay iti Biblia a balakad dagiti papanglakayen ken suporta dagiti kapammatianna ti timmulong a nangalaw kenkuana manipud iti napeggad a kasasaad. Ania ti panagrikna ita ni Birgit? Kunana: “Agyamanak unay ta addaak pay laeng iti nagsayaat nga organisasion ni Jehova.” Kuna ti agtawen iti 17 a ni Andreas: “Daytoy a talaga ti organisasion ni Jehova, ti kasayaatan nga organisasion iti lubong.” Saantay kadi nga agyaman iti kinaimbag ti naindagaan a paset ti organisasion ni Jehova?
Imperpekto Dagidiay Mangidadaulo
8, 9. Kasano ti tignay ti dadduma idi kaaldawan ni David, ken ania ti reaksionna?
8 Siempre, imperpekto dagidiay nadutokan a mangidaulo iti pudno a panagdayaw. Makaaramidda amin iti kamali, ken dadduma ti addaan kadagiti agtultuloy a pagkapuyan nga ikagkagumaanda a parmeken. Maupaytayo kadi gapu iti dayta? Saan. Uray dagiti tattao a nakaitalkan ti dakkel a responsabilidad idi panawen ti Israel nakaaramidda met kadagiti nadagsen a basol. Idi agtutubo pay ni David, kas pagarigan, isu ket naayaban nga agserbi kas tumutokar tapno liwliwaenna ti maburburiboran a ni Ari Saul. Idi agangay, napilitan a nagtalaw ni David gapu iti pananggandat ni Saul iti biagna.—1 Samuel 16:14-23; 18:10-12; 19:18; 20:32, 33; 22:1-5.
9 Adda dagiti Israelita a sigugulib a nagtignay. Kas pagarigan, ti komandante ti buyot ni David a ni Joab pinapatayna ni Abner a kabagian ni Saul. Gapu ta gamgamgamen ni Absalom ti kinaari, isu ket nakikomplot maibusor ken ni David nga amana. Ni Ahitofel, ti mapagtalkan a mamalbalakad ni David, liniputanna met ti ari. (2 Samuel 3:22-30; 15:1-17, 31; 16:15, 21) Iti laksid dagita, saan a nagbalin a managreklamo ni David, ken dina met tinallikudan ti pudno a panagdayaw. Kinapudnona, ti kasunganina ti inaramidna. Dagiti ketdi narigat a situasion ti nangtignay ken ni David nga agpannuray ken ni Jehova ken mangtaginayon iti nasayaat a kababalin nga impakitana idi isu ket nagtalaw gapu ken ni Saul. Iti daydi a tiempo, inkanta ni David: “Ipaayannak iti parabur, O Dios, ipaayannak iti parabur, ta kenka nagkamang ti kararuak; ket iti salinong dagiti payakmo agkamangak agingga a mapalabas dagiti panagrigat.”—Salmo 57:1.
10, 11. Ania ti napasaran ti Kristiano nga agnagan iti Gertrud idi isu ket agtutubo pay, ken ania ti kunana maipapan kadagiti kinaimperpekto dagiti kapammatian?
10 Awan ti maireklamotayo a panangallilaw iti uneg ti organisasion ti Dios ita. Saan ngamin a palubosan ni Jehova wenno dagiti anghel wenno dagiti naespirituan a papastor nga agtalinaed iti uneg ti kongregasion Kristiano dagiti manangallilaw, dakes a tattao. Nupay kasta, maipaspasangotayo amin iti kinaimperpekto ti tao―ti kinaimperpektotayo ken ti kinaimperpekto ti dadduma nga adipen ti Dios.
11 Ni Gertrud a maysa a nabayagen nga agdaydayaw ken ni Jehova, ti siuulbod a naakusar idi kas maysa nga impostor ken saan a naan-anay a manangiwaragawag iti Pagarian idi isu ket agtutubo pay. Ania ti reaksionna? Nagtanabutob kadi ni Gertrud gapu iti kasta a pannakatrato? Saan. Sakbay a pimmusay idi 2003 iti edad a 91, kinunana maipapan iti biagna: “Dagita ken dagiti simmaruno a kapadasak ti nangisuro kaniak a nupay agkamali dagiti indibidual, iturturong ni Jehova ti naindaklan a trabahona, ket datayo nga imperpekto a tattao ti us-usarenna iti dayta.” No maipasango idi kadagiti kinaimperpekto ti dadduma nga adipen ti Dios, sipapasnek nga agkararag ni Gertrud ken ni Jehova.
12. (a) Ania ti saan a nasayaat nga ulidan ti dadduma a Kristiano idi umuna a siglo? (b) Iti ania a rumbeng nga ipamaysatayo ti panunottayo?
12 Yantangay imperpekto uray ti kasungduan ken kapasnekan a Kristiano, itultuloytayo koma nga aramiden ti “amin a bambanag nga awan panagtantanabutob” uray no makaaramid iti kamali ti maysa a nadutokan nga adipen. (Filipos 2:14) Anian a nakalkaldaang no tuladentayo ti dakes nga ulidan ti sumagmamano a kameng ti kongregasion Kristiano idi umuna a siglo! Sigun ken ni adalan a Judas, dagiti ulbod a mannursuro kadagidi a panawen “saanda nga ikankano ti kinaapo ken agsasaoda a sibabassawang kadagidiay nadayag.” Maysa pay, dagidi a managbasol ket ‘managtanabutob, managreklamo maipapan iti kasasaadda iti biag.’ (Judas 8, 16) Ditay koma tultuladen ti ar-aramiden dagiti managtanabutob. Imbes ketdi, ipamaysatayo ti panunottayo kadagiti agkakaimbag a banag nga ipapaay ti ‘matalek nga adipen.’ Ipategtayo ti kinaimbag ti organisasion ni Jehova ken ‘itultuloytayo nga aramiden ti amin a bambanag nga awan panagtanabutob.’
“Makapakigtot Daytoy a Sasao”
13. Ania ti reaksion ti dadduma maipapan iti sursuro ni Jesu-Kristo?
13 Idi umuna a siglo, nagtanabutob ti dadduma maibusor kadagiti nadutokan nga adipen, bayat a ti dadduma nagtanabutobda maibusor kadagiti sursuro ni Jesus. Kas nailanad iti Juan 6:48-69, kinuna ni Jesus: “Ti agtaraon iti lasagko ken uminum iti darak addaan iti agnanayon a biag.” Apaman a nangngegda dagita a sasao, “adu kadagiti adalanna . . . kinunada: ‘Makapakigtot daytoy a sasao; siasino ti makapagimdeng iti dayta?’” Ammo ni Jesus “nga agtantanabutob dagiti adalanna maipapan itoy.” Kasta met, “maigapu itoy adu [kadakuada] ti napan iti bambanag a nalikudan ket saandan a makipagna kenkuana.” Ngem adda dagiti adalan a saan a nagtanabutob. Kitaenyo ti napasamak idi inimtuod ni Jesus kadagiti 12 nga apostol: “Kayatyo kadi met ti mapan?” Simmungbat ni apostol Pedro: “Apo, iti siasino ti papananminto? Addaanka iti sasao ti agnanayon a biag; ket namatikami ken naammuanmi a sika Daydiay Santo ti Dios.”
14, 15. (a) Apay nga adda dagidiay sumagmamano a di mapnek kadagiti dadduma nga aspeto ti Nakristianuan a sursuro? (b) Ania ti maadaltayo iti napasamak iti lalaki nga agnagan iti Emanuel?
14 Iti moderno a panawen, adda bassit a bilang dagiti adipen ti Dios a saan a mapnek iti sumagmamano nga aspeto ti Nakristianuan a sursuro ket nagtanabutobda maibusor iti naindagaan a paset ti organisasion ni Jehova. Apay a mapasamak ti kasta? Ti kasta a panagtanabutob ket masansan a maigapu iti kurang a pannakaawat maipapan iti wagas ti panangtaming ti Dios kadagiti bambanag. In-inut nga ipalgak ti Namarsua kadagiti adipenna no ania ti kinapudno. Gapuna, agtultuloy ti pannakagugor ti pannakaawattayo iti Kasuratan. Maragsakan ti kaaduan kadagiti adipen ni Jehova gapu kadagiti kasta a pannakagugor. Ngem adda ti sumagmamano a ‘nalabes ti kinalintegda’ a di maragsakan kadagita a panagbalbaliw. (Eclesiastes 7:16) Mabalin a gapu iti kinatangsit, dadduma ti natnag iti silo ti agwaywayas a panagpampanunot. Aniaman ti makagapu, napeggad ti kasta a panagtanabutob yantangay mabalin nga ituggodnatayo nga agsubli iti lubong ken kadagiti aramidna.
15 Ni Emanuel, kas pagarigan, ket maysa a Saksi a nangkuestion iti sumagmamano a banag a nabasana kadagiti publikasion manipud ‘iti matalek ken masirib nga adipen.’ (Mateo 24:45) Insardengna ti agbasa kadagiti Nakristianuan a publikasiontayo ken idi agangay imbagana kadagiti panglakayen ti kongregasion a kayatnan ti umikkat kas maysa kadagiti Saksi ni Jehova. Ngem di nagbayag, nabigbig ni Emanuel a talaga a husto dagiti sursuro ti organisasion ni Jehova. Kinasaritana dagiti Saksi, inadmitirna ti nagkamalianna, ket naisubli a Saksi ni Jehova. Kas resultana, nagbalin manen a naragsak ti biagna.
16. Ania ti tumulong a mangikkat kadagiti panagduaduatayo maipapan iti sumagmamano a Nakristianuan a sursuro?
16 Kasano ngay no agannayastayo nga agtanabutob gapu ta adda pagduaduaantayo a sursuro ti organisasion ni Jehova? Agan-anustayo latta koma. Mabalin nga addanto ipablaak ti ‘matalek nga adipen’ a mangsungbat kadagiti saludsodtayo ken manglawlawag kadagiti pagduaduaantayo. Nainsiriban ti agpatulong kadagiti Kristiano a papanglakayen. (Judas 22, 23) Ti kararag, personal a panagadal, ken pannakitimpuyog kadagiti naespirituan ti panagpampanunotda a kakabsat ti mabalin met a makatulong a mangikkat kadagiti panagduadua ken mangpauneg iti apresasiontayo kadagiti makapabileg iti pammati a kinapudno iti Biblia a naadaltayo manipud iti kalasugan nga us-usaren ni Jehova a makikomunikar kadatayo.
Taginayonen ti Positibo a Kababalin
17, 18. Imbes nga agtanabutob, ania a kababalin ti rumbeng a taginayonentayo, ken apay?
17 Bigbigentayo a nainkasigudan kadagiti imperpekto a tattao ti pagannayasan nga agbasol, ken adda dagidiay natured a mangyebkas kadagiti saan a nainkalintegan a reklamo. (Genesis 8:21; Roma 5:12) Ngem no mayugalitayo ti agtanabutob, pagpegpeggadentayo ti relasiontayo ken ni Jehova a Dios. Gapuna, masapul a medmedantayo ti aniaman a pagannayasan nga agtanabutob.
18 Imbes nga agtanabutobtayo mainaig kadagiti bambanag iti kongregasion, nasayaat no taginayonentayo ti positibo a kababalin ket aramidentayo dagiti bambanag a mamagtalinaed kadatayo nga okupado, naragsak, napasnek, natimbeng, ken natibker iti pammati. (1 Corinto 15:58; Tito 2:1-5) Kontrolado ni Jehova ti amin a banag iti uneg ti organisasionna, ken ammo ni Jesus no ania dagiti mapaspasamak iti tunggal kongregasion, kas inaramidna idi umuna a siglo. (Apocalipsis 1:10, 11) Siaanus nga urayentayo ti Dios ken ni Kristo, ti Ulo ti kongregasion. Mabalin nga usarenda dagiti nadutokan a papastor tapno aturenda ti bambanag nga agkasapulan iti pannakailinteg.―Salmo 43:5; Colosas 1:18; Tito 1:5.
19. Bayat nga ur-urayentayo ti panawen inton ti Pagarian ti naan-anayto a mangiturong kadagiti aktibidad ti sangatauan, ania ti pangipamaysaantayo iti atensiontayo?
19 Iti din agbayag, manungpalto daytoy a dakes a sistema ti bambanag, ket ti Mesianiko a Pagarian ti naan-anayto a mangiturong kadagiti aktibidad ti sangatauan. Ngem bayat nga ur-urayentayo dayta, anian a nagpateg a taginayonentayo ti positibo a kababalin! Dayta ti tumulong kadatayo a mangbigbig kadagiti nasayaat a kababalin dagiti kapammatiantayo, imbes a dagiti pagkamalianda ti kitkitaentayo. Agbalintayo a naragsak no dagiti agkakaimbag nga aspeto ti personalidadda ti pangiturongantayo iti atensiontayo. Iti kasta, maparegta ken mapabileg ti espiritualidadtayo imbes nga agsaksakit ti nakemtayo gapu iti panagtanabutob.
20. Ania dagiti bendision a matagiragsaktayo no addaantayo iti positibo a kababalin?
20 Ti positibo a kababalin ti tumulong met kadatayo nga agbalin a silalagip kadagiti adu a bendision a tagtagiragsakentayo kas kameng ti naindagaan a paset ti organisasion ni Jehova. Daytoy laeng nga organisasion ditoy lubong ti nasungdo iti Soberano iti uniberso. Ania ti makunayo iti dayta a kinapudno ken iti pribilehiotayo a makipaset iti panagdayaw iti maymaysa a pudno a Dios, ni Jehova? Sapay koma ta tuladenyo ti kababalin ni David, a nangikanta: “O Managdengngeg iti kararag, kenka a mismo umayto dagiti tattao iti isuamin a lasag. Naragsak daydiay piliem ken paasitgem, tapno isu makapagtaeng kadagiti paraanganmo. Pudno unay a mapnekkaminto iti kinaimbag ti balaymo, ti nasantuan a disso ti templom.”—Salmo 65:2, 4.
Malagipyo Kadi?
• Apay nga agyamantayo koma iti kaadda dagidiay mangidadaulo iti kongregasion?
• Ania ti rumbeng a reaksiontayo no makaaramid iti kamali dagiti kakabsat a mangidadaulo?
• Ania ti rumbeng a panangmatmattayo kadagiti pannakagugor mainaig iti pannakaawattayo iti Kasuratan?
• Ania ti makatulong a mangikkat iti panagduadua ti maysa a Kristiano?
[Ladawan iti panid 20]
Ni David intedna ken ni Solomon ti plano ti templo ken naimpusuan a sinuportaranna ti pudno a panagdayaw
[Ladawan iti panid 23]
Siraragsak a mangipaay dagiti Kristiano a papanglakayen iti naespirituan a tulong