Salsaludsod Dagiti Agbasbasa

Kasanotay nga ammo a ti sirib a nadeskribir iti Proverbio 8:22-31 iladladawanna ni Jesu-Kristo sakbay ti iyaayna ditoy daga?

Kastoy ti mabasa iti naipaltiing a pannakailadawan ti sirib iti libro dagiti Proverbio: “Ni met laeng Jehova pinataudnak kas ti punganay ti dalanna, ti kauunaan kadagiti gapuananna iti nabayagen a tiempo. . . . Sakbay a naisaad dagiti mismo a bantay, nga immun-una ngem kadagiti turod, naipasngayak a kasla nabuyogan kadagiti panagpasikal . . . Addaak sadiay idi insaganana ti langlangit; . . . iti kasta addaak idi iti sibayna kas nasigo a managobra, ket siak daydiay pakaay-ayatanna unay iti inaldaw, yantangay maragragsakanak iti sanguananna iti isuamin a tiempo, . . . ket ti bambanag a pakaay-ayatak mainaig iti annak ti tattao.”

Saan a ti sirib ti Dios wenno basta kinasaririt ti tuktukoyen daytoy a teksto. Apay a saan? Gapu ta ti sirib a mailadladawan ditoy ket ‘napataud,’ wenno naparsua, kas ti pamunganayan ti dalan ni Jehova. Addan a sigud ni Jehova a Dios ken kanayon a masirib. (Salmo 90:1, 2) Awan ti punganay ti siribna; saan met a naparsua dayta wenno napataud. Saan a ‘naipasngay a kasla nabuyogan kadagiti panagpasikal.’ Maysa pay, nakuna nga agsao ken agtignay daytoy a sirib, a mangiladawan iti maysa a persona.​—Proverbio 8:1.

Kuna ti libro dagiti Proverbio nga iti nabayagen a tiempo adda ti sirib iti denna ni Jehova, ti Namarsua, kas “nasigo a managobra.” Sigurado nga agaplikar dayta ken ni Jesus. Nabayagen sakbay nga immay ditoy daga, sisisinged a nakipagtrabaho ni Jesus ken ni Jehova isu a kinuna ti Biblia: “Isu addan kasakbayan ti amin a sabsabali pay a bambanag ket babaen kenkuana napaadda ti amin a sabsabali pay a bambanag.”​—Colosas 1:17; Apocalipsis 3:14.

Maitutop a nailadawan ti Anak ti Dios kas maysa a sirib, yantangay isu ti nangipalgak kadagiti nainsiriban a panggep ken bilbilin ni Jehova. Sakbay ti iyaayna ditoy daga kas tao, ni Jesus ti Sao, wenno Pannakangiwat, ti Dios. (Juan 1:1) Isu ket nadeskribir kas “ti pannakabalin ti Dios ken ti sirib ti Dios.” (1 Corinto 1:24, 30) Anian a nagsayaat a pannakailadawan ti Anak ti Dios, a ti pannakaay-ayona kadagiti tattao ti nangtignay kenkuana a mangidatag iti biagna kas pangsubbot kadatayo!​—Juan 3:16.

[Ladawan iti panid 31]

‘Sakbay dagiti bantay . . . naipasngayak’