Job​—Managibtur ken Natarnaw

“Insaadmo kadi ta pusom ken adipenko a Job, nga awan asinoman a kas kenkuana iti daga, maysa a lalaki nga awan pakababalawanna ken nalinteg, agbuteng iti Dios ken sumiasi iti dakes?”​—JOB 1:8.

1, 2. (a) Ania dagiti di ninamnama a trahedia a napasaran ni Job? (b) Iladawanyo ti biag ni Job sakbay a dimteng kenkuana dagiti trahedia.

ADDA kenkuana ti dandani amin a banag―kinabaknang, dayaw, nasayaat a salun-at, ken naragsak a pamilia. Ngem dimteng ti tallo nga agsasaruno a trahedia. Kellaat a napukawna ti kinabaknangna. Kalpasanna, maysa a karkarna a bagio ti nangpapatay kadagiti amin nga annakna. Di nagbayag kalpasanna, nagpasar iti nakaro a sakit a nanglapunos iti intero a bagina kadagiti naut-ot a busbusali. Nalabit nga ammoyo no siasino daytoy a tao. Isu ni Job, maysa a nalatak a karakter iti libro ti Biblia a naipanagan kenkuana.―Job, kapitulo 1 ken 2.

² “O no addaak koma a kasla iti kaadda kadagiti lunar a bulan ti nabayagen a tiempo,” inyasugna. (Job 3:3; 29:2) No sumangbay ti trahedia, siasino ti saan a mayat a maisubli koma ti napalabas? Iti kasasaad ni Job, awanen ti makiddawna pay iti biagna idi, nga agparang a nasalakniban manipud iti didigra. Raraemen ken agpabalakad kenkuana dagiti natan-ok a tattao. (Job 29:5-11) Isu ket nabaknang, ngem natimbeng ti panangmatmatna iti kuarta. (Job 31:24, 25, 28) No makakita kadagiti balo wenno ulila, tulonganna ida. (Job 29:12-16) Malaksid iti dayta, matalek ni Job iti asawana.―Job 31:1, 9, 11.

3. Ania ti panangmatmat ni Jehova ken ni Job?

³ Awan ti pakapilawan ti panagbiag ni Job gapu ta isu ket agdaydayaw iti Dios. “Awan asinoman a kas kenkuana iti daga,” kinuna ni Jehova, “maysa a lalaki nga awan pakababalawanna ken nalinteg, agbuteng iti Dios ken sumiasi iti dakes.” (Job 1:1, 8) Ngem iti laksid ti kinatarnaw ni Job, nagpatingga ti nanam-ay a biagna gapu kadagiti nagsasaruno a trahedia. Napukaw ti amin a nagbannoganna, ket nasubok ti pudno a kinataona babaen kadagiti napasaranna a saem, leddaang, ken pannakapaay.

4. Apay a makatulong ti panangusig iti napasaran ni Job?

⁴ Siempre, saan laeng a ni Job ti adipen ti Dios a nagsagaba iti trahedia. Adu a Kristiano ita ti agpaspasar kadagiti banag a sinagabana. Gapuna, dua a saludsod ti nasayaat nga usigentayo: Kasano a ti panangusig iti napasaran ni Job matulongannatayo no maipasangotayo iti trahedia? Ken kasano a masursuruannatayo nga agbalin nga ad-adda a naasi kadagidiay agsagsagaba?

Isyu ti Kinasungdo ken Pannakasubok ti Kinatarnaw

5. Sigun ken ni Satanas, apay nga agserserbi ni Job iti Dios?

⁵ Saan a gagangay ti situasion ni Job. Saanna nga ammo a kinuestion ni Satanas dagiti motibo ti panagserbina iti Dios. Kabayatan ti maysa a panagtataripnong idiay langit, intampok ni Jehova dagiti agkakaimbag a galad ni Job. Simmungbat ni Satanas: “Saan aya a sika nangikabilka iti alad iti aglikmutna ken iti aglikmut ti balayna ken iti aglikmut ti tunggal banag nga adda kenkuana iti intero nga aglawlaw?” Gapuna, pinagparang ni Satanas nga agdaydayaw ni Job gapu iti inaagum a motibo―ken impasimudaagna a kasta met laeng ti motibo ti amin nga adipen ti Dios. “Iyunnatmo ta imam, pangngaasim, ket sagidem ti isuamin nga adda kenkuana ket kitaem no saannakanto nga ilunod ita mismo a rupam,” kinuna ni Satanas ken ni Jehova.​—Job 1:8-11.

6. Ania a napateg nga isyu ti pinataud ni Satanas?

⁶ Napateg dayta nga isyu. Kinuestion ni Satanas ti wagas ti panangusar ni Jehova iti kinasoberanona. Talaga kadi a mabalin nga iturayan ti Dios ti uniberso buyogen ti ayat? Wenno, kas impasimudaag ni Satanas, kanayon a managimbubukodan ti motibo dagiti tattao? Tapno masungbatan dayta, impalubos ni Jehova a suboken ti Diablo ni Job, nga agtalek iti kinatarnaw ken kinasungdo ti adipenna. Iti kasta, agsasaganad nga impalak-am ni Satanas dagiti trahedia ken ni Job. Idi napaay ni Satanas kadagiti immuna a panagreggetna, pinagsagabana ni Job iti naut-ot a sakit. “Kudil maigapu iti kudil, ken isuamin nga adda iti maysa a tao itednanto maigapu iti kararuana,” kinuna ti Diablo.​—Job 2:4.

7. Kadagiti ania a pamay-an a maipaspasango dagiti adipen ti Dios ita kadagiti pakasuotan nga umasping kadagiti nakaipasanguan idi ni Job?

⁷ Nupay kaaduan a Kristiano ti saan nga agsagsagaba iti kas iti kakaro ti napasaran ni Job, agpaspasarda iti nadumaduma a pakarigatan. Adu ti maipaspasango kadagiti pannakaidadanes wenno parikut iti pamilia. Mangpakapuy met ti rigat ti biag wenno saksakit. Dadduma ti nangisakripisio iti biagda maigapu iti pammatida. Siempre, saantay koma a panunoten a ni Satanas ti kanayon a pakaigapuan ti tunggal trahedia a sagsagabaentayo. Kinapudnona, dadduma a parikut ket mabalin a maigapu iti mismo a nagkamaliantayo wenno babaen ti natawid a pisikal a kasasaad. (Galacia 6:7) Malaksid iti dayta, mapasarantayo amin ti makadadael nga epekto ti panaglakay ken natural a didigra. Nalawag nga ibaga ti Biblia nga iti agdama, saan a simimilagro a salakniban ni Jehova dagiti adipenna kadagiti pakarigatan.―Eclesiastes 9:11.

8. Kasano a mabalin a gundawayan ni Satanas dagiti rigat a sagsagabaentayo?

⁸ Nupay kasta, mabalin a gundawayan ni Satanas dagiti rigat a sagsagabaentayo tapno pakapuyenna ti pammatitayo. Kinuna ni apostol Pablo nga isu ket parparigaten ti “siit iti lasag, maysa nga anghel ni Satanas,” nga agtultuloy a ‘mangtungtungpa’ kenkuana. (2 Corinto 12:7) Dayta man ket parikut iti pisikal, kas iti nakapuy a panagkita, wenno sabali a banag, ammo ni Pablo a mabalin a gundawayan ni Satanas dayta a parikut ken ti resultana a pannakaupay tapno mapukaw ti rag-o ken kinatarnaw ni Pablo. (Proverbio 24:10) Iti kaaldawantayo, mabalin nga isungsong ni Satanas dagiti kapamilia, kaeskuelaan, wenno uray pay ketdi dagiti diktador a gobierno tapno idadanesda dagiti adipen ti Dios iti sumagmamano a pamay-an.

9. Apay a ditay koma masdaaw no sumangbay ti ibubusor wenno pannakaidadanes?

⁹ Kasanotay a mapagballigian dagitoy a parikut? Babaen ti panangibilangtayo kadagita kas gundawaytayo a mapaneknekan a saan nga agkupas ti panagayattayo ken ni Jehova ken agpaspasakuptayo iti autoridadna. (Santiago 1:2-4) Aniaman ti pakaigapuan ti pakadukotantayo, mataginayontayo ti naespirituan a kinatimbengtayo no bigbigentayo a napateg ti panagtalinaedtayo a nasungdo iti Dios. Insurat ni apostol Pedro kadagiti Kristiano: “Dungdungnguen, saankayo koma a mariribukan kadagiti panangur-uram iti nagtetengngaanyo, a mapaspasamak kadakayo kas pakasuotan, a kasla mapagpagteng kadakayo ti karkarna a banag.” (1 Pedro 4:12) Kasta met, inlawlawag ni Pablo: “Amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.” (2 Timoteo 3:12) Agingga ita, pagduaduaan ni Satanas ti kinatarnaw dagiti Saksi ni Jehova, kas inaramidna idi ken ni Job. Kinapudnona, ipamatmat ti Biblia a pinakaro ni Satanas ti panangrautna kadagiti adipen ti Dios kadagitoy maudi nga al-aldaw.―Apocalipsis 12:9, 17.

Di Umiso a Pagarup ken Balbalakad

10. Ania ti saan nga ammo ni Job idi?

¹⁰ Adda ammotayo ita a saan nga ammo ni Job idi. Saanna nga ammo no apay a dimteng kenkuana dagidiay a kalamidad. Sibibiddut nga impagarupna a “ni Jehova a mismo ti nangted, ket ni Jehova a mismo ti nangala.” (Job 1:21) Posible a pinanggep ni Satanas a pagparangen ken ni Job a ti Dios ti pakaigapuan ti panagrigatna.

11. Ilawlawagyo ti reaksion ni Job kadagiti kalamidad a napasaranna.

¹¹ Kasta unay ti pannakaupay ni Job, ngem kaskasdi a dina inlunod ti Dios uray no dayta ti indagadag ti asawana nga aramidenna. (Job 2:9, 10) ‘Kasla nasaysayaat pay ketdi ti kasasaad dagiti nadangkes ngem iti kasasaadko,’ kinunana. (Job 21:7-9) ‘Apay a dusdusaennak ti Dios?’ nalabit a pinanunotna. Adda dagiti gundaway a kayatnan ti matay. “O italimengnak koma iti Sheol, tapno aywanannak a sililimed agingga nga agbaw-ing ti ungetmo!” inyasugna.​—Job 14:13.

12, 13. Ania ti epektona ken ni Job ti komento dagiti tallo a kakaduana?

¹² Adda tallo a kakadua ni Job a simmarungkar kenkuana, a kunam no “makipagriknada kenkuana ken liwliwaenda.” (Job 2:11) Ta gayam, ‘makariribukda a manangliwliwa.’ (Job 16:2) Imbes a pakabang-aran koma ni Job ti kaadda dagiti gagayyem a mabalin a pangyesngawanna kadagiti parikutna, dagitoy a tallo a kakaduana ad-adda a pinakaroda ti pannakariro ken pannakaupay a nariknana.―Job 19:2; 26:2.

¹³ Maawatantayo no kas pagarigan ta inyimtuod ni Job iti bagina: ‘Apay a siak? Ania aya ti inaramidko tapno agsagabaak iti kastoy?’ Naan-anay a makaallilaw dagiti sungbat dagiti kakaduana. Imbagada nga agsagsagaba kano ni Job gapu ta nakaaramid kadagiti nadagsen a basol. “Siasino nga awanan basol ti napukawen?” inyimtuod ni Elifaz. “Sigun iti nakitakon, dagidiay mangigakgakat iti makapasakit ken dagidiay agimulmula iti riribuk apitendanto a mismo dayta.”​—Job 4:7, 8.

14. Apay a ditay koma dagus a panunoten nga agsagsagaba ti maysa gapu ta adda dakes nga aramidna?

¹⁴ Pudno, mabalin a tumaud dagiti parikut no mangimulatayo sigun iti lasag imbes nga iti espiritu. (Galacia 6:7, 8) Ngem iti daytoy agdama a sistema, mabalin a tumaud ti parikut uray ania ti aramidentayo. Malaksid iti dayta, imposible a di pulos makapasar dagiti inosente iti aniaman a kalamidad. Ni Jesu-Kristo, a “di natulawan, naisina kadagiti managbasol,” nagsagaba met iti nasaem nga ipapatay iti pagtutuokan a kayo, ken natay ni apostol Santiago kas maysa a martir. (Hebreo 7:26; Aramid 12:1, 2) Ti ballikug a panagrasrason ni Elifaz ken ti dua a kakaduana ti nangtignay ken ni Job a mangidepensa iti nasayaat a naganna ken mangipetteng nga isu ket inosente. Kaskasdi, ti panangipilitda a basol ni Job ti sagsagabaenna ti nalabit nangapektar iti panangmatmatna iti kinahustisia ti Dios.―Job 34:5; 35:2.

Panagpatulong no Maipasango iti Rigat

15. Ania a panangmatmat ti tumulong kadatayo no maipasangotayo iti panagsagaba?

¹⁵ Adda kadi maadaltayo iti daytoy? Kasla mangidumduma dagiti trahedia, sakit, wenno pannakaidadanes. Agparang nga adda dagiti tattao a saan a nakapasar iti adu kadagiti kasta a parikut. (Salmo 73:3-12) No dadduma, nalabit a masapul nga imtuodentayo iti bagitayo dagitoy a napapateg a saludsod: ‘Ti kadi panagayatko iti Dios tignayennak nga agserbi kenkuana aniaman ti mapasamak? Tarigagayak kadi nga ipaayan ni Jehova iti “pangsungbatna iti daydiay mangrurrurod kenkuana?”’ (Proverbio 27:11; Mateo 22:37) Ditay koma pulos ipalubos a pagduaduaantayo ti nailangitan nga Amatayo gapu laeng kadagiti dinadarasudos a komento dagiti sabsabali. Maysa a matalek a Kristiano a nagsagaba iti nakaro a sakit iti adu a tawen ti naminsan a nagkuna: “Ammok a maibturak ti aniaman nga ipalubos ni Jehova. Ammok nga itdenna ti kasapulak a bileg, kas inaramidna kadagiti naglabas.”

16. Kasano a makatulong ti Sao ti Dios kadagidiay maipaspasango kadagiti pakarigatan?

¹⁶ No maipapan kadagiti taktika ni Satanas, addaantayo iti pannakaammo nga awan idi ken ni Job. “Saantayo nga ignorante kadagiti gakatna.” (2 Corinto 2:11) Maysa pay, aduantayo iti praktikal a sirib a mabalintayo nga usaren. Iti Biblia, mabasatayo dagiti salaysay maipapan kadagiti matalek a lallaki ken babbai a nangibtur iti amin a kita ti rigat. Ni apostol Pablo, a nakarkaro ti sinagabana ngem iti kaaduan a Kristiano, insuratna: “Amin a bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.” (Roma 15:4) Maysa a Saksi idiay Europa a naibalud gapu iti pammatina bayat ti maikadua a gubat sangalubongan ti nangted iti tallo-aldaw a rasionna kasukat ti maysa a Biblia. “Anian a nakagunggona kaniak dayta a pannakisinnukat!” kunana. “Nupay nagbisinak iti pisikal, nagun-odko ti naespirituan a taraon a timmulong a nangpabileg kaniak ken kadagiti dadduma kabayatan ti pannakasuotmi kadagidi a nariribuk a tiempo. Adda pay la kaniak dayta a Biblia agingga ita.”

17. Ania dagiti probision ti Dios a tumulong tapno makapagibturtayo?

¹⁷ Malaksid iti liwliwa nga ipaay ti Kasuratan, addaantayo iti adu a katulongan iti panagadal iti Biblia a makaipaay iti nasayaat a giya a mangdaer kadagiti parikut. No kitaenyo ti Watch Tower Publications Index, mabalin a makasarakkayo iti kapadasan ti maysa a kapammatian a naipasango iti pakasuotan a mapaspasaranyo. (1 Pedro 5:9) Mabalin met a makatulong no isaritayo ti kasasaadyo kadagiti mannakaawat a papanglakayen wenno dadduma a nataengan a Kristiano. Kangrunaan ti amin, babaen ti kararag, makapagtalekkayo iti tulong nga ipaay ni Jehova ken ti nasantuan nga espirituna. Kasano a naibturan ni Pablo ti ‘panangtungpa’ ni Satanas? Babaen ti panagpannurayna iti pannakabalin ti Dios. (2 Corinto 12:9, 10) “Ta iti amin a bambanag addaanak iti bileg gapu iti daydiay mangmangted kaniak iti pannakabalin,” insuratna.​—Filipos 4:13.

18. Kasano a makaipaay dagiti Kristiano iti makapabileg a balakad?

¹⁸ No kasta, mabalin a magun-od ti tulong isu a dikay koma agpangadua a mangaprobetsar iti dayta. “Impakitam kadi a naupayka iti aldaw ti rigat? Kurangto ti bilegmo,” kuna ti proverbio. (Proverbio 24:10) No kasano a dagiti anay mabalinda a rippuogen ti kayo a balay, ti pannakaupay mabalinna a pakapuyen ti kinatarnaw ti maysa a Kristiano. Tapno maliklikantayo dayta a peggad, ipapaayannatayo ni Jehova iti tulong babaen kadagiti padatayo nga adipen ti Dios. Maysa nga anghel ti nagparang ket pinabilegna ni Jesus idi rabii ti pannakaarestona. (Lucas 22:43) Bayat ti panagdaliasatna kas maysa a balud agturong idiay Roma, “nagyaman [ni Pablo] iti Dios ket bimmileg” apaman a nakitana dagiti kakabsat idiay Plasa ni Appio ken idiay Tallo a Taberna. (Aramid 28:15) Malagip pay ti maysa a Saksi nga Aleman ti tulong a naawatna apaman a simmangpet iti kampo konsentrasion idiay Ravensbrück idi isu ket maysa pay la a managdandanag a tin-edyer. “Maysa a kapammatian ti dagus a nakakita kaniak ket sibabara nga inabrasanak,” malagipna pay. “Maysa a kabsat a babai ti nangaywan kaniak, ket isu ti nagbalin a pannakainak iti naespirituan.”

‘Paneknekam a Matalekka’

19. Ania ti timmulong ken ni Job a mangdaer kadagiti panangikagumaan ni Satanas?

¹⁹ Ni Jehova dineskribirna ni Job kas maysa a ‘mangsalsalimetmet a sititibker iti kinatarnawna.’ (Job 2:3) Nupay nakarikna iti pannakaupay ken dina maawatan no apay nga agsagsagaba, saan pulos a nagbaliw ti takderna mainaig iti napateg nga isyu ti kinasungdo. Saanna nga impalubos a madadael ti kinatarnaw nga imparangarangna iti unos ti panagbiagna. Inyunay-unayna: “Agingga a mauyos ti biagko saankonto nga ikkaten kaniak ti kinatarnawko!”​—Job 27:5.

20. Apay a napateg ti panagibtur?

²⁰ Mataginayontayo ti kinatarnawtayo iti sidong ti aniaman a kasasaad no tuladentayo ti determinasion ni Job―iti sidong man ti pannakasulisog, ibubusor, wenno rigat. “Dika pagamkan ti bambanag a dandanimon sagabaen,” kinuna ni Jesus iti kongregasion ti Smirna. “Adtoy! Ti Diablo agtultuloyto a mangipisok iti sumagmamano kadakayo iti pagbaludan tapno naan-anay a masubokkayo, ken tapno maaddaankayo iti rigat [parikut, dukot, wenno pannakairurumen] iti sangapulo nga aldaw. Paneknekam ta bagim a matalek uray agingga ken patay, ket itedkonto kenka ti korona ti biag.”​—Apocalipsis 2:10.

21, 22. No adda sagsagabaentayo, ania a pannakaammo ti makaliwliwa kadatayo?

²¹ Iti daytoy a sistema nga iturturayan ni Satanas, masubok ti panagibtur ken kinatarnawtayo. Nupay kasta, ipanamnama kadatayo ni Jesus a bayat a kumitkitatayo iti masanguanan, awan ti rumbeng a pagbutngantayo. Ti napateg ket mapaneknekantayo a matalektayo. “Ti rigat ket apagkanito,” kinuna ni Pablo, idinto a ti “dayag,” wenno gunggona nga inkari ni Jehova kadatayo, “naringringbaw pay ti dagsenna ken agnanayon.” (2 Corinto 4:17, 18) Apagkanito met ti rigat a napasaran ni Job no idilig iti adu a naragsak a tawtawen a nasagrapna sakbay ken kalpasan ti pannakasuotna.―Job 42:16.

²² Kaskasdi, adu ti gundaway iti biagtayo a kasla di aggibus dagiti pakasuotantayo ken kasla ditay maibturanen ti sagsagabaentayo. Iti sumaganad nga artikulo, usigentayo ti kapadasan ni Job no ania dagiti kanayonan a masursurotayo maipapan iti panagibtur. Adalentayo met no ania dagiti pamay-an a mapabilegtayo dagiti sabsabali nga agsagsagaba iti rigat.

Ania ti Sungbatyo?

• Ania a napateg nga isyu ti pinataud ni Satanas mainaig iti kinatarnaw ni Job?

• Apay a ditay koma masdaaw no sumangbay ti rigat?

• Kasano a matulongannatayo ni Jehova nga agibtur?

[Dagiti Ladawan iti panid 23]

Makatulong kadatayo nga agibtur ti panagsirarak, pannakisarita kadagiti nataengan a Kristiano, ken panangyebkas iti riknatayo babaen ti kararag