No ti Maysa nga Ing-ingungoten Panawanna ni Jehova

DA Mark ken Louise ket Saksi ni Jehova.a Buyogen ti ayat ken pannakaseknan, insuroda ti Kasuratan kadagiti annakda, kas indagadag ti Biblia nga aramiden dagiti Kristiano a nagannak. (Proverbio 22:6; 2 Timoteo 3:15) Makapaladingit, saan nga amin nga annakda ket nagtultuloy a nagserbi ken ni Jehova idi dadakkeldan. “Kasla agkuppit ti barukongko no malagipko dagiti annakko a naiwawa,” kuna ni Louise. “Kasano koma a mailimedko dayta iti inaldaw? No saritaen dagiti dadduma ti maipapan kadagiti annakda, kasla agsullat ti karabukobko ket kasapulan a medmedak ti panagluak.”

Wen, no ti maysa panawannan ni Jehova ken saanen nga agbiag maitunos iti Kasuratan, gagangay a nakaro ti panagleddaang dagiti matalek a kapamiliana. “Ipatpategko unay ni manangko,” kuna ni Irene. “Aramidek ti amin tapno agsubli ken ni Jehova!” Kastoy met ti nakuna ni Maria, a ti adingna a lalaki ket timmallikud ken ni Jehova agturong iti imoral a panagbiag: “Nagrigat daytoy, nangruna ta nakasaysayaat kaniak ni adingko. Ad-adda a mailiwak kenkuana kabayatan dagiti dadakkel a panaglalangen ti pamiliami.”

Apay a Nakarigrigat?

Apay a nakasasaem kadagiti Kristiano no agsardeng nga agserbi ken ni Jehova ti maysa nga anak wenno ing-ingungotenda? Agsipud ta ammoda nga ikarkari ti Kasuratan ti biag nga agnanayon iti paraiso a daga kadagidiay agtalinaed a nasungdo ken ni Jehova. (Salmo 37:29; 2 Pedro 3:13; Apocalipsis 21:3-5) Mangnamnamada a tagiragsakenda dagitoy a bendision a kaduada dagiti assawa, annak, nagannak, kakabsat, ken appoda. Nakasasaem kadakuada a panunoten a dagita a bendision ket nalabit a saan a sagrapen dagiti ing-ingungotenda a nagsardeng nga agserbi ken ni Jehova! Maawatan dagiti Kristiano nga uray iti agdama, pagimbaganda dagiti linteg ken prinsipio ni Jehova. Makalpay ngarud kadagiti Kristiano no makitkitada dagiti ing-ingungotenda nga arigna nga agimulmula iti wagas nga agapitdanto a sipapait.​—Isaias 48:17, 18; Galacia 6:7, 8.

Dagiti dadduma nga awan ti kapamiliada nga immadayo ken ni Jehova mabalin a saanda a maawatan no kasano karigat dayta. Apektado ti dandani amin nga aspeto ti biag. “Nagrigat la ketdi ti agtugaw kadagiti Nakristianuan a gimong bayat a makitkitam dagiti nagannak a siraragsak a makipatpatang kadagiti annakda,” kuna ni Louise. “Iti aniaman a naragsak nga okasion, ad-adda a mariknak ti ladingit gapu iti kaawan ti maysa nga ing-ingungoten.” Ti maysa a Kristiano a panglakayen nadakamatna ti uppat a tawen a di pannakitimpuyog kadakuada ti siumanna. Kunana: “Masansan a makapaliday pay ketdi uray dagiti naragsak nga okasion. No regaluak ni baketko wenno no ipasiarko iti ngudo ti lawas, aganug-og no mapanunotna a saan a karaman ti balasangna iti kinaragsakmi.”

Nalabes kadi ti kasta a reaksion dagiti Kristiano? Saan met. Kinapudnona, mabalin nga iyan-anninawda laeng dagiti galad ni Jehova, nga iti ladawanna a naparsua ti tao. (Genesis 1:26, 27) Ania ti kaipapananna dayta? Bueno, ania ti rikna ni Jehova idi nagrebelde kenkuana ti ilina nga Israel? Iti Salmo 78:38-41, maammuantayo a nasaktan ni Jehova. Kaskasdi, siaanus a binallaagan ken dinisiplinana ida, a naulit-ulit a pinakawanna ida no mangipakitada iti panagbabawi. Nalawag a nasinged ni Jehova kadagiti parsuana, ‘ti aramid dagiti imana,’ ket saanna a kaskarina a baybay-an ida. (Job 14:15; Jonas 4:10, 11) Immulana met kadagiti tattao ti abilidad a makisinninged a sisusungdo, isu nga adda dagiti agkakapamilia a talaga a naisangsangayan ti kinasingedda. Saan ngarud a pagsiddaawan a lumdaang dagiti tattao no adda ipatpategda a kabagian nga agsardeng nga agserbi iti Dios.

Kinapudnona, dayta ti maysa kadagiti karigatan a pakasuotan dagiti pudno nga agdaydayaw. (Aramid 14:22) Kinuna ni Jesus a ti panangawat iti mensahena ket mangitunda iti pannakabingaybingay ti pamilia. (Mateo 10:34-38) Daytoy ket saan a gapu ta ti mensahe ti Biblia ti mismo a makagapu iti pannakabingaybingay ti pamilia. Imbes ketdi, ti di manamati wenno di matalek a kapamilia ti mamataud iti pannakabingaybingay babaen ti panangilaksid, panangtallikud, wenno panangbusorna pay ketdi iti Nakristianuan a dana. Nupay kasta, agyamantayo ta ni Jehova saanna a baybay-an dagiti matalek kenkuana gapu ta tulonganna ida a mangdaer kadagiti pakasuotanda. No maladladingitanka iti agdama gapu ta nagsardeng nga agserbi iti Dios ti maysa nga ing-ingungotem, ania dagiti prinsipio ti Biblia a makatulong tapno madaeram ti leddaang ken maaddaanka iti rag-o ken pannakapnek?

Panangdaer

“Babaen ti panangpabilegyo iti bagbagiyo . . . , pagtalinaedenyo ti bagbagiyo iti ayat ti Dios.” (Judas 20, 21) Gapu iti partikular a kasasaadmo, mabalin nga awan ti maaramidam iti agdama tapno matulongam ti maysa a kapamilia a nagsardeng nga agserbi ken ni Jehova. Nupay kasta, kabaelam ken rumbeng a pabilgem ti bagim agraman ti asinoman a kapamiliam a nagtalinaed a matalek. Kastoy ti kuna ni Veronica, a dua kadagiti tallo nga annakna ti nangpanaw iti kinapudno: “Nabalakadankami ken ni lakayko a no agtalinaedkami a nabileg iti naespirituan, addakaminto iti kasayaatan a kasasaad a mangabrasa kadagiti annakmi inton mapanunotda ti agsubli. Kasano pay koma a makapagsubli ti bayanggudaw nga anak no awan ni tatangna iti nasayaat a kasasaad a mangawat manen kenkuana?”

Tapno agtalinaed a nabileg ti kasasaadmo, agbalinka nga okupado kadagiti naespirituan nga aktibidad. Karaman iti dayta ti panangtaginayon iti eskediul para iti napasnek a panagadal iti Biblia ken itatabuno kadagiti Nakristianuan a gimong. Iwayaam ti tumulong kadagiti kakabsat iti kongregasion agingga nga ipalubos ti kasasaadmo. Pudno, mabalin a narigat dagita nga aramiden no damo. Kuna ni Veronica: “Ti damo a mapanunotko ket iputongko ti bagik a kas iti nasugatan nga animal. Ngem indagadag ni lakayko nga itultuloymi ti nasayaat a naespirituan a rutinami. Siniguradona a makigimongmi. No tiempo a tumabunokami iti kombension, kasapulak ti tured nga umasideg ken makisango kadagiti tattao. Ngem nayadanikami nga ad-adda ken ni Jehova gapu iti programa. Ti anakmi a nagtalinaed a matalek ti partikular a napabileg iti dayta a kombension.”

Ti nadakamat itay a ni Maria ket nangnangruna a natulongan babaen ti panagtultuloyna nga okupado iti ministerio ken tultulonganna iti agdama ti uppat a tao a mangadal iti Biblia. Umasping iti dayta, kuna ni Laura: “Nupay inaldaw pay latta nga agsangitak, agyamanak ken ni Jehova ta uray no saanak a kas kaballigi dagiti dadduma a nagannak no iti panangpadakkel kadagiti ubbing, naammuak ti perpekto a mensahe ti Biblia, a makatulong kadagiti pamilia kadagitoy maudi nga al-aldaw.” Da Ken ken Eleanor, nga addaan kadagiti adulto nga annak a nangpanaw iti kongregasion, nangaramidda kadagiti panagbalbaliw tapno mabalinanda ti umakar iti lugar a dakdakkel ti panagkasapulan kadagiti agibumbunannag iti Pagarian ket simrekda iti amin-tiempo a ministerio. Dayta ti nakatulong kadakuada tapno mataginayonda ti natimbeng a panangmatmatda kadagiti bambanag ken maliklikanda ti malapunos iti ladingit.

Itultuloyyo ti mangnamnama. Ti ayat “inanamaenna ti amin a bambanag.” (1 Corinto 13:7) Kuna ni Ken a nadakamat itay: “Idi simiasi dagiti annakmi manipud iti dalan ti kinapudno, kaslada met la natay iti panagkunak. Ngem nagbalbaliw ti panangmatmatko idi natay ti kabsatko. Agyamyamanak ta saan a literal a natay dagiti annakko ken sidadaan ni Jehova a mangawat manen kadakuada no agsublida.” Kinapudnona, ipakita dagiti kapadasan nga adu a nangpanaw iti kinapudno ti nagsubli kamaudiananna.​—Lucas 15:11-24.

Liklikanyo a babalawen ti bagiyo. Dagiti nagannak, kangrunaanna, adda pagannayasanda a sublianan ti napalabas ket panunotenda a no la koma ta tinamingda dagiti bambanag iti sabali a pamay-an. Ngem ti kangrunaan a kapanunotan a nayallatiw iti Ezequiel 18:20 ipakitana a ti nagbasol, saan ket a dagiti nagannakna, ti panungsungbaten ni Jehova gapu iti di umiso nga aramidna. Makapainteres ta nupay adu ti komento ti libro a Proverbio maipapan iti obligasion dagiti nagannak a mangpadakkel kadagiti annakda iti umiso a wagas, nasurok nga uppat a daras nga ad-adu ti balakadna kadagiti agtutubo a masapul nga umimdeng ken agtulnogda kadagiti nagannak kadakuada. Wen, responsabilidad dagiti annak ti agtulnog iti naibatay-Biblia a panangsanay dagiti imperpekto a dadakkelda. Nalabit nga inaramidyon ti amin a kabaelanyo iti daydi a tiempo. Ngem no mariknayo latta nga adda nagkuranganyo idi, saanna a kaipapanan dayta a dagiti nagkuranganyo ti makagapu a pinanawan dagiti ing-ingungotenyo ti kinapudno. Aniaman ti kasasaad, awan ti pagimbaganna no kanayon a panunotenyo ti “no la koma.” Makasursurokayo koman kadagiti kamaliyo, determinadokayo a di mangulit kadagita, ken ikararagyo ti pammakawan ni Jehova. (Salmo 103:8-14; Isaias 55:7) Kalpasanna, kumitakayo iti masanguanan, saan nga iti napalabas.

Anusanyo dagiti sabsabali. Mabalin a narigat kadagiti dadduma no kasano ti umno a panangparegta wenno panangliwliwada kadakayo, nangruna no dida pulos naaddaan iti umasping a kapadasan. Maysa pay, agduduma dagiti tattao no maipapan iti matmatanda a makaparegta ken makaliwliwa. Isu a no adda makaisawang iti maysa a banag a pakaupayanyo, iyaplikaryo ti balakad ni apostol Pablo a masarakan iti Colosas 3:13: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali.”

Raemenyo ti urnos ni Jehova agpaay iti disiplina. No ti kabagianyo ket nadisiplina iti kongregasion, laglagipenyo a paset dayta ti urnos ni Jehova ken pagimbagan ti amin, agraman ti nagbasol. (Hebreo 12:11) Gapuna, sarangtenyo ti aniaman a pagannayasan a mangbabalaw kadagiti panglakayen a nagdesision wenno mangkuestion kadagiti natinongda a desision. Laglagipenyo, mangyeg iti kasayaatan a resulta ti panangaramid kadagiti bambanag sigun iti wagas ni Jehova, idinto ta mangnayon iti pakarigatan ti panangbusor kadagiti urnos ni Jehova.

Kalpasan ti pannakaispal ti Israel manipud Egipto, regular a nagserbi ni Moises kas ukom. (Exodo 18:13-16) Yantangay ti maysa a pangngeddeng a pabor iti maysa a tao ket nalabit a maibusor kadagiti dadduma, saan a narigat a panunoten nga adda dagiti naupay kadagiti pangngeddeng ni Moises. Dadduma a panagrebelde maibusor iti panangidaulo ni Moises ket nalabit a resulta ti panangbabalaw kadagiti pangngeddengna. Ngem us-usaren ni Jehova ni Moises a mangiturong iti ilina, ken dinusana saan a ni Moises no di ket dagiti rebelde ken dagiti kapamiliada a simmuporta kadakuada. (Numeros 16:31-35) Makasursurotayo iti daytoy babaen ti panangikagumaantayo a mangraem ken makitunos kadagiti pangngeddeng dagiti addaan iti nateokratikuan nga autoridad ita.

Mainaig iti daytoy, malagip pay ni Delores no kasano karigat ti panangtaginayonna iti natimbeng a panangmatmat idi a ti balasangna ket nadisiplina iti kongregasion. “Ti nakatulong kaniak,” kunana, “isu ti maulit-ulit a panangbasak kadagiti artikulo mainaig iti kinarasonable dagiti urnos ni Jehova. Nangaramidak iti espesial a kuaderno a pangisuratak kadagiti punto kadagiti palawag ken artikulo a tumulong kaniak nga agibtur ken agtultuloy nga agserbi.” Daytoy ti mangiturong iti sabali pay a wagas ti panangdaer.

Iyebkasyo ti riknayo. Mabalin a makatulong kadakayo no ti riknayo ket iyesngawyo iti maysa wenno dua a mannakaawat a gayyem a pagtaltalkanyo. Iti panangaramid iti dayta, mangpilikayo kadagiti gagayyem a tumulong kadakayo a mangtaginayon iti positibo a kababalin. Kaepektibuan la ketdi no “iparukpokyo ti pusoyo” ken ni Jehova babaen ti kararag.b (Salmo 62:7, 8) Apay? Agsipud ta naan-anay a maawatanna ti kakaro ti marikriknayo. Kas pagarigan, nalabit a mariknayo a saan a nainkalintegan a mapasaranyo ti kasta a pannakatuok ti rikna. Total, saan a sika ti nangpanaw ken ni Jehova. Ikararagmo ken ni Jehova ti marikriknam, ken kiddawem kenkuana a tulongannaka tapno nalaklakam a maakseptar ti kasasaad.​—Salmo 37:5.

Bayat ti panaglabas ti tiempo, nalaklakayonton a daeran ti riknayo. Kabayatanna, saankayo a sumuko iti panangikagumaanyo a mangay-ayo iti nailangitan nga Amayo, ken diyo pulos matmatan nga awan mamaayna dayta. (Galacia 6:9) Laglagipenyo, no panawantayo ni Jehova, addanto latta dagiti parikuttayo. Iti sabali a bangir, babaen ti panagtalinaed a nasungdo kenkuana, tulongannatayo a mangsango kadagiti pakasuotantayo. Mangnamnamakayo, ngarud, a maawatan ni Jehova ti kakaro ti kasasaadyo ken itultuloyna nga ipaay kadakayo dagiti kasapulanyo a bileg iti umiso a tiempo.​—2 Corinto 4:7; Filipos 4:13; Hebreo 4:16.

[Footnotes]

[Kahon iti panid 19]

No Kasano a Daeran

◆ “Babaen ti panangpabilegyo iti bagbagiyo . . . , pagtalinaedenyo ti bagbagiyo iti ayat ti Dios.”​—Judas 20, 21.

◆ Itultuloyyo ti mangnamnama.​—1 Corinto 13:7.

◆ Liklikanyo a babalawen ti bagiyo.​—Ezequiel 18:20.

◆ Anusanyo dagiti sabsabali.​—Colosas 3:13.

◆ Raemenyo ti urnos ni Jehova agpaay iti disiplina.​—Hebreo 12:11.

◆ Iyebkasyo ti riknayo.​—Salmo 62:7, 8.

[Kahon/Ladawan iti panid 21]

Pinanawam Kadi ni Jehova?

No kasta, aniaman ti rason, agpegpeggad ti relasionmo ken ni Jehova ken ti namnamam a biag nga agnanayon. Nalabit a panggepmo ti agserbi ken ni Jehova. Determinadoka kadi ita a mangaramid iti dayta? Wenno itantantanmo dayta agingga iti “umiso a tiempo”? Laglagipem, napartak nga umad-adani ti Armagedon kas ipakita dagiti paspasamak. Kanayonanna, ababa ken saan a natalged ti biag iti daytoy a sistema. Dimo pay ketdi ammo no sibibiagkanto pay inton bigat. (Salmo 102:3; Santiago 4:13, 14) Maysa a lalaki a naammuan nga addaan iti makapapatay a sakit ti nagkuna: “Timmaud daytoy a sakitko bayat ti amin-tiempo a panagserbik ken ni Jehova, nga awan ti aniaman nga ilimlimedko a nakababain. Ket nagsayaat ti maaddaan iti kasta a rikna ita.” Panunotenyo laengen no ania ti nariknana no timmaud dayta a sakit bayat nga ibagbagana, “Addanto aldaw nga agsubliakto ken ni Jehova!” No pinanawanyo ni Jehova, itan ti kasayaatan a tiempo tapno agsublikayo.

[Dagiti Ladawan iti panid 18]

Ti panagtultuloy nga okupado kadagiti naespirituan nga aktibidad tulongannakayo a mangsalimetmet iti umiso a panangmatmat