“Masapul nga Agtulnogkami iti Dios kas Agturay Imbes a Kadagiti Tattao”

Naan-anay a Panangsaksi Buyogen ti Kinatured

MAYSA a naranggas a bunggoy ti sisasagana a mangkabil iti natulnog nga adipen ti Dios. Iti apag-isu unay a tiempo, dagiti soldado a Romano rinabsutda ti lalaki manipud kadagiti rimmaut ket imbaludda. Daytoy ti nangrugian ti agsasaruno a pasamak iti las-ud iti agarup lima a tawen. Kas resultana, adu a nangangato nga opisial a Romano ti nakangngeg maipapan ken Jesu-Kristo.

Dayta a lalaki isu ni apostol Pablo. Idi agarup 34 K.P., impalgak ni Jesus a ni Pablo (Saulo) ipanna ti nagan ni Jesus kadagiti “ar-ari.” (Aramid 9:15) Idi tawen 56 K.P., saan pay a natungpal daytoy. Ngem idi dandanin maturpos ti apostol ti maikatlo a panagdaliasatna kas misionero, dandanin agbaliw dagiti bambanag.

Naraut Ngem Di Naupay

Intultuloy ni Pablo ti panagdaliasatna nga agturong iti Jerusalem, ket “babaen ti espiritu” pinakdaaran ti sumagmamano a Kristiano nga adda nakaro a panangidadanes nga agur-uray kenkuana iti dayta a siudad. Situtured a kinuna ni Pablo: “Sisasaganaak saan laeng a maparautan no di ket kasta met a matay idiay Jerusalem maigapu iti nagan ni Apo Jesus.” (Aramid 21:4-14) Apaman a bimmisita ni Pablo iti templo idiay Jerusalem, dagiti Judio a taga-Asia a makaammo iti balligi ti panagebanghelio ti apostol iti lugarda ginargarida ti maysa a bunggoy tapno papatayenda ni Pablo. Ngem dagus a tinulongan dagiti soldado a Romano. (Aramid 21:27-32) Dayta a panangispal ti nangted ken Pablo kadagiti manmano a gundaway a mangiwaragawag iti kinapudno maipapan ken Kristo kadagiti nauyong a managdengngeg ken natatan-ok a tattao.

Panangasaba Kadagiti Narigat a Makasarita a Tattao

Ni Pablo nayuli iti natalged a lugar kadagiti tukad ti sarikedked a naawagan iti Torre ni Antonia.a Manipud kadagitoy a tukad, nangted ti apostol iti nabileg a pammaneknek iti nagderraaw a relihioso a bunggoy. (Aramid 21:33–22:21) Ngem apaman a dinakamatna ti nakaibaonanna a mangasaba kadagiti Gentil, nangrugi manen ti kinaranggas. Imbilin ti komandante iti militar a ni Lisias a mapalutpot ni Pablo buyogen ti pannakababaut tapno maammuan no apay nga ak-akusaran dagiti Judio. Ngem nalapdan ti pannakababaut idi imbagana nga isu ket maysa nga umili iti Roma. Iti simmaganad nga aldaw, ni Lisias insaklangna ni Pablo iti Sanhedrin tapno maammuan no apay nga ak-akusaren dagiti Judio.​—Aramid 22:22-30.

Idi timmakder iti saklang daytoy nangato a korte, adda manen nagsayaat a gundaway ni Pablo a mangipaay iti pammaneknek kadagiti padana a Judio. Ti natured nga ebanghelisador inwaragawagna ti pammatina iti panagungar. (Aramid 23:1-8) Nakaro pay laeng ti gandat dagiti Judio a mangpapatay ken Pablo isu a naipan iti kuartel dagiti soldado. Iti simmaganad a rabii, makapabileg ti impanamnama kenkuana ti Apo: “Agtalgedka [wenno, agturedka]! Ta no kasano a nangipapaayka iti naan-anay a pangsaksi iti bambanag maipapan kaniak ditoy Jerusalem, kasta met a masapul a mangsaksika idiay Roma.”​—Aramid 23:9-11.

Naatipa ti plano a mangpapatay ken Pablo idi a ti apostol dagus a naipan a sililimed idiay Cesarea, ti kabesera ti turay a Romano idiay Judea. (Aramid 23:12-24) Idiay Cesarea, adda manen dagiti nagpateg a gundaway ni Pablo a mangipaay iti pammaneknek kadagiti “ar-ari.” Ngem umuna pay nga impakaammo ti apostol ken Gobernador Felix nga awan pammaneknek kadagiti ipabpabasolda kenkuana. Idi agangay, isu ken ti baketna a ni Drusila ti kinasabaan ni Pablo maipapan ken Jesus, maipapan iti panagteppel, kinalinteg, ken ti umad-adani a panangukom. Ngem nagtalinaed a sibabalud ni Pablo iti dua a tawen, ta namnamaen ni Felix nga umawat iti pasuksok, ngem saan a pulos a naipaay.​—Aramid 23:33–24:27.

Idi ni Festus, sinukatanna ni Felix, intuloy manen dagiti Judio ti panangikagumaanda a mangkondenar ken mangpapatay ken Pablo. Nabista manen ti kaso idiay Cesarea, ken tapno malapdan ti pannakabista idiay Jerusalem, kinuna ni Pablo: “Sitatakderak iti sanguanan ti tugaw iti panangukom ni Cesar . . . Agapelarak ken Cesar.” (Aramid 25:1-11, 20, 21) Sumagmamano nga aldaw kalpasanna, idi indatag ti apostol ti kasona iti saklang ni Ari Herodes Agripa II, kinuna dayta nga ari: “Iti apagbiit a tiempo maguyugoynak nga agbalin a Kristiano.” (Aramid 26:1-28) Idi agarup 58 K.P., naibaon ni Pablo idiay Roma. Kas maysa a balud sadiay, ti manangipamuspusan nga apostol intultuloyna ti nangbirok kadagiti gundaway a mangasaba maipapan ken Kristo. (Aramid 28:16-31) Agparang nga idi agangay simmaklang ni Pablo iti sanguanan ni Emperador Nero, naipakaammo nga awan basolna, ket kamaudiananna siwayawaya a nangitultuloy iti panagmisionerona. Awan ti rekord a mangipakita nga adda asinoman a sabali nga apostol a naaddaan iti gundaway a nangdanon kadagita a natatan-ok a tattao babaen ti naimbag a damag.

Kas nadakamaten, nagbiag ni apostol Pablo a maitunos iti nagpateg a prinsipio nga inyebkas dagiti padana a Kristiano iti sanguanan ti korte dagiti Judio: “Masapul nga agtulnogkami iti Dios kas agturay imbes a kadagiti tattao.” (Aramid 5:29) Nagsayaat la ketdin dayta a pagwadan para kadatayo! Nupay awan sarday ti panangikagumaan ti tao a mangpasardeng kenkuana, naan-anay a nagtulnog ti apostol iti bilin a mangipaay iti naan-anay a pammaneknek. Kas resulta ti situtured a panagtulnogna iti Dios, naibanag ni Pablo ti annongenna kas “napili a basehas” a mangipan iti nagan ni Jesus “kadagiti nasion kasta met iti ar-ari ken iti annak ti Israel.”​—Aramid 9:15.

[Footnote]

[Kahon/Dagiti Ladawan iti panid 9]

INTERESADO KADI LAENG NI PABLO A MANGIKALINTEGAN ITI BAGINA?

Iti komentona maipapan iti daytoy a saludsod, insurat ti autor a ni Ben Witherington, III: “Iti panangmatmat ni Pablo . . . ti napateg ket saan a ti panangikalinteganna iti bagina, no di ket ti panangipakaammona maipapan iti ebanghelio kadagiti agtuturay, agpadpada kadagiti Judio ken Gentil. . . . No an-anagen, ti ebanghelio ti talaga a mabisbista.”