Maysa nga Isyu a Pakairamanam

ADDA kadi gayyemmo wenno miembro ti pamiliam a kasingedmo unay? Kasano ngay no adda mangakusar kenka a nasingedka laeng kenkuana gapu ta adda inaagum a panggepmo? Saanka kadi a masaktan, wenno makapungtot pay ketdi? Kasta ti akusasion ni Satanas a Diablo kadagiti amin a nasinged ken ni Jehova a Dios.

Panunotem ti napasamak idi naallukoy ni Satanas ti immuna nga agassawa a da Adan ken Eva tapno salungasingenda ti linteg ti Dios ken makikadua kenkuana nga umalsa maibusor iti Dios. Ipakita kadi dayta a napasamak nga agtulnog laeng dagiti tattao ken Jehova no adda magunggonada? (Genesis 3:1-6) Agarup 2,500 a tawen kalpasan nga immalsa ni Adan, imbangon manen ni Satanas daytoy nga isyu mainaig iti maysa a lalaki nga agnagan iti Job. Nangparbo ti Diablo iti akusasion a nangibatad iti dayta nga isyu. Gapuna, usigentayo a naimbag dayta a salaysay ti Biblia.

“Saankonto nga Ikkaten Kaniak ti Kinatarnawko”

Ni Job ket “maysa a lalaki nga awan pakababalawanna ken nalinteg, agbuteng iti Dios ken sumiasi iti dakes.” Nupay kasta, inumsi ni Satanas ti kinalinteg ni Job. Inimtuodna ken Jehova, “Agpaay aya iti awan kapapay-anna a ni Job nagbuteng iti Dios?” Kalpasanna, ti Diablo pinardayana agpadpada ti Dios ken ni Job babaen ti akusasionna a salsalimetmetan kano ni Job ti kinasungdona gapu ta salsalakniban ken bembendisionan ni Jehova. “Kas pamaliwan,” inkarit ni Satanas, “iyunnatmo ta imam, pangngaasim, ket sagidem ti isuamin nga adda kenkuana ket kitaem no saannakanto nga ilunod ita mismo a rupam.”​—Job 1:8-11.

Ni Jehova impalubosna a ni Satanas subokenna ni Job tapno masungbatan dayta a pammabasol. Agsasaruno a rigat ti impalak-am ti Diablo iti dayta a matalek a lalaki tapno isardengna ti agserbi iti Dios. Natakaw wenno nadadael ti amin a dinguen ni Job, napapatay dagiti katulongan, ken dagiti annakna. (Job 1:12-19) Ngem nagballigi kadi ni Satanas? Talaga a saan! Nupay saan nga ammo ni Job a ti Diablo ti pakaigapuan ti amin a pakasuotanna, kinuna ni Job: “Ni Jehova a mismo ti nangted, ket ni Jehova a mismo ti nangala. Ti nagan ni Jehova agtultuloy koma a mabendito.”​—Job 1:21.

Kalpasanna, dimmatag ni Satanas ken Jehova, a nagkuna kenkuana: “[Ni Job] salsalimetmetanna pay laeng a sititibker ti kinatarnawna, nupay sika gargariennak maibusor kenkuana a mangalun-on kenkuana nga awan gapgapuna.” (Job 2:1-3) Ti kinatarnaw ni Job ti kangrunaan nga isyu​—maysa a galad nga agkalikagum iti naan-anay a kinasungdo iti Dios ken ti panangannurot iti kinalinteg. Nagballigi ni Job mainaig iti isyu ti kinatarnaw. Ngem saan a simmardeng ti Diablo.

Simmaganad a nangidatag ni Satanas iti pammabasol a pakairamanan ti intero a sangatauan. “Kudil maigapu iti kudil,” kinunana ken Jehova, “ken isuamin nga adda iti maysa a tao itednanto maigapu iti kararuana. Kas pamaliwan, iyunnatmo ta imam, pangngaasim, ket sagidem agingga iti tulangna ken lasagna ket kitaem no saannakanto nga ilunod ita mismo a rupam.” (Job 2:4, 5) Iti panangusarna iti sasao a “maysa a tao” imbes a tukoyenna ni Job, kinuestion ti Diablo ti kinatarnaw ti amin a tao. Kayariganna, kinunana: ‘Aramiden ti maysa a tao ti aniaman tapno maispal ti biagna. Ikkannak ti gundaway, ket pagbaw-ingek ti siasinoman manipud iti Dios.’ Iti kaanoman, awan kadi ti tao nga agtalinaed a nasungdo iti Dios iti sidong ti aniaman a kasasaad?

Ni Jehova pinalubosanna ti Diablo a mangparigat ken Job babaen iti nakaro a sakit. Kasta unay ti panagsagaba ni Job nga uray la inkararagna a matay koman. (Job 2:7; 14:13) Kaskasdi, kinuna ni Job: “Agingga a mauyos ti biagko saankonto nga ikkaten kaniak ti kinatarnawko!” (Job 27:5) Kastoy ti imbaga ni Job gapu ta ay-ayatenna ti Dios, ket awan ti mabalin a mangbalbaliw iti dayta. Pinaneknekan ni Job nga isu ket maysa a natarnaw a lalaki. “No maipapan ken Jehova,” kuna ti Biblia “binendisionanna ti naud-udi a tungpal ni Job nga ad-adda ngem iti punganayna.” (Job 42:10-17) Adda kadi dadduma pay a kas ken Job? Ania ti impalgak dagiti naglabas a tiempo?

No Kasano a Nasungbatan ti Karit

Iti kapitulo 11 iti libro ti Biblia a Hebreo, innaganan ni apostol Pablo ti adu a matalek a lallaki ken babbai sakbay ti panawen Kristiano, a pakairamanan da Noe, Abraham, Sara, ken Moises. Kalpasanna, kinuna ti apostol: “Agkurangakto iti tiempo no itultuloyko a salaysayen ti maipapan [iti sabsabali].” (Hebreo 11:32) Nakaad-adu dagitoy a matalek nga ad-adipen ti Dios ta tinukoy ida ni Pablo a ‘dakkel nga ulep dagiti saksi,’ nga inyarigna ida iti nagdakkel nga ulep a nangpusek iti langit. (Hebreo 12:1) Wen, bayat ti adu a siglo, di mabilang nga umariwekwek a tattao ti nangaramat iti wayawayada a mangikeddeng ket pinilida ti agbalin a nasungdo ken Jehova a Dios.​—Josue 24:15.

Ti mismo nga anak ti Dios, ni Jesu-Kristo, ti kangrunaan a sungbat iti karit ni Satanas a kabaelanna kano a pagtallikuden dagiti tattao manipud ken Jehova. Uray pay ti nasaem nga ipapatay iti kayo a pagtutuokan dina dinadael ti kinatarnawna iti Dios. Idi mauyosen ti biag ni Jesus, impukkawna: “Ama, kadagita imam italekko ti espirituk.”​—Lucas 23:46.

Nalawag nga ipakita ti panaglabas ti tiempo a ti Diablo dina napagtallikud ti amin a tao manipud iti panagserbida iti pudno a Dios. Adun ti nakaam-ammo ken Jehova ken ‘nagayat kenkuana iti intero a puso ken iti intero a kararua ken iti intero nga isip.’ (Mateo 22:37) Ti naan-anay a kinasungdoda ken Jehova pinaneknekanna nga ulbod ni Satanas no maipapan iti isyu ti kinatarnaw ti tao. Mapaneknekam met nga ulbod ti Diablo no agbalinka a nasungdo.

Ania ti Aramidem?

Pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:4) Kasano a maaramidmo dayta? Mangyeskediulka iti panagadalmo iti Biblia ken ‘manggun-odka iti pannakaammo iti maymaysa a pudno a Dios ken iti daydiay imbaonna, ni Jesu-Kristo.’​—Juan 17:3.

Kinarit ni Satanas ti kinatarnaw ti tao idi kinuestionna ti motibo ti tao nga agserserbi iti Dios. Masapul a ti pannakaammo mayukuok iti pusom tapno magutugotka nga agserbi. Isu a saanka laeng a manggun-od iti pannakaammo manipud iti Biblia. Iyugalim a mennamennaen ti nasursurom. (Salmo 143:5) No basaem ti Biblia wenno dagiti publikasion a naibatay iti Biblia, siguraduem nga adda tiempom a mangutob kadagitoy a saludsod: ‘Ania ti isuro daytoy kaniak maipapan ken ni Jehova? Ania dagiti galad ti Dios nga agminar ditoy? Kadagiti ania a benneg ti biagko a masapul a maiparangarangko daytoy? Ania dagiti anamongan wenno di anamongan ti Dios? Kasano nga apektaran daytoy ti panangmatmatko iti Dios?’ Ti kasta a panangutob ti mangpunno iti pusom iti panagayat ken panangapresiar iti Namarsua.

Ti kinatarnaw iti Dios saan laeng nga agaplikar iti panamatitayo iti Dios. (1 Ar-ari 9:4) Masapul a naimbag ti kababalintayo iti amin a benneg ti panagbiagtayo tapno mataginayon ti kinatarnawtayo ken Jehova a Dios. Awan ti aniaman a pakaikapisam no taginayonem ti kinatarnawmo. “Naragsak a Dios” ni Jehova, ket kayatna a tagiragsakem ti biag. (1 Timoteo 1:11) Itan, usigem dagiti sumagmamano nga aramid a masapul a liklikam tapno agtalinaedka a nadalus iti moral ken maaddaan iti naragragsak a biag ken magun-odam ti anamong ti Dios.

Liklikan ti Di Umiso nga Aramid iti Sekso

Iti Saona, ti Biblia, ni Jehova a mismo ti nangipasdek iti pagalagadan ti panagasawa, a kinunana: “Ti maysa a lalaki panawannanto ti amana ken ti inana ket masapul a makitipon iti asawana ket masapul nga agbalinda a maymaysa a lasag.” (Genesis 2:21-24) Agsipud ta “maymaysa a lasag” dagiti agassawa, dayawenda ti urnos ti panagasawa no makidennada laeng iti asawada. Kinuna ni apostol Pablo: “Ti panagasawa nadayaw koma iti tengnga dagiti isuamin, ket ti pagiddaan ti agassawa awan koma ti tulawna, ta ti Dios ukomennanto dagiti mannakiabig ken dagiti mannakikamalala.” (Hebreo 13:4) Ti ebkas a “pagiddaan ti agassawa” ipamatmatna ti panagdenna ti lalaki ken babai a legal a nagkasar. Makikamkamalala ti asinoman kadakuada a makidenna iti dina asawa, banag a mangyeg iti panangukom ti Dios.​—Malakias 3:5.

Ti ngay panagdenna sakbay ti kasar? Maibusor met dayta iti moral a pagalagadan nga impasdek ni Jehova. “Daytoy ti pagayatan ti Dios . . . nga adaywanyo ti pannakiabig,” kuna ti Biblia. (1 Tesalonica 4:3) Kagura met ti Dios ti homoseksualidad, insesto, ken bestialidad. (Levitico 18:6, 23; Roma 1:26, 27) Siasinoman a mayat a mangay-ayo iti Dios ken mayat a mangsagrap iti pudpudno a naragsak a biag masapul nga adaywanda dagiti imoral nga ar-aramid.

Ti ngay kinaderrep sakbay ti kasar? Saan a makaay-ayo daytoy ken ni Jehova. (Galacia 5:19) Masapul met a liklikan a panunoten dagiti imoral a bambanag. Kinuna ni Jesus: “Tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.” (Mateo 5:28) Agaplikar met daytoy iti panagbuya kadagiti pornograpiko a ladawan kadagiti warnakan, video, wenno Internet; agingga iti panagbasa kadagiti estoria ti ar-aramid iti sekso; ken panagimdeng kadagiti makagargari a kankanta. Maay-ayotayo ti Dios ken mapabilegtayo no liklikantayo dagita a material.

Ti ngay panagalembong? Madepinar ti panagalembong kas “makaallukoy wenno makagargari iti sekso” a kababalin. No ti maysa a lalaki wenno babai gartemanna ti dina asawa, maibusor dayta kadagiti prinsipio ti Biblia ken dayta ti mangipakita iti dina panagraem ken Jehova. (Efeso 5:28-33) Saan ngarud a maitutop para iti baro wenno balasang a mangipakita iti panaggartem iti sabali a maipaay laeng a pagraragsakan. No ngay seriosuen dayta ti gargartemam a tao nupay saan a dayta ti panggepmo? Panunotem a masaktam ti riknana. Mamagpanunot met ti kinapudno a ti panagalembong mangituggod iti pannakikamalala wenno pannakiabig. Maysa pay, ti nadalus a panangtrato iti sabali a sekso ad-adda a mangpataud iti panagraem ti maysa a tao iti bagina.​—1 Timoteo 5:1, 2.

Panangay-ayo iti Dios iti Dadduma Pay a Benneg ti Panagbiag

Iti adu a pagilian, nalaka a magun-od ti naingel nga inumen. Dakes kadi ti uminum kadagitoy? Saan nga iparit ti Kasuratan ti kalkalainganna a panaginum iti arak, serbesa, wenno dadduma a naingel nga inumen. (Salmo 104:15; 1 Timoteo 5:23) Nupay kasta, iti imatang ti Dios, dakes ti nalabes a panaginum ken ti panagbartek. (1 Corinto 5:11-13) Sigurado a dimo kayat a madadael ti salun-atmo ken ti biag ti pamiliam gapu iti nalabes a panaginum.​—Proverbio 23:20, 21, 29-35.

Ni Jehova isu ti “Dios ti kinapudno.” (Salmo 31:5) ‘Di mabalin nga agulbod ti Dios,’ kuna ti Biblia. (Hebreo 6:18) No kayatmo nga anamongannaka ti Dios, liklikam ti agulbod. (Proverbio 6:16-19; Colosas 3:9, 10) “Sawenyo ti kinapudno tunggal maysa kadakayo iti padana a tao,” ibalakad ti Biblia kadagiti Kristiano.​—Efeso 4:25.

Kasta met ti panagsugal. Nupay nayugalin dayta ti adu a tao, kinaagum ti panagsugal, ta dayta ti panangikagumaan a manggun-od iti kuarta babaen ti pannakaabak ti sabsabali. Saan nga anamongan ni Jehova dagidiay “naagum iti nakusit a gunggona.” (1 Timoteo 3:8) No kayatmo nga ay-ayuen ni Jehova, adaywam ngarud ti aniaman a kita ti panagsugal, agraman ti loteria, bingo, ken ti panagtayá kadagiti lumba ti kabalio. Ket mabalin a matakuatam nga ad-adunto ti kuarta a gastosem nga agpaay iti kasapulan ti pamiliam.

Ti sabali pay a kita ti kinaagum isu ti panagtakaw, ti panangala iti saanmo a kukua. “Dika agtakaw,” kuna ti Biblia. (Exodo 20:15) Dakes ti gumatang kadagiti bambanag nga ammom a tinakaw ken naala nga awan ti pammalubos. “Ti agtatakaw saan koma nga agtakawen,” kuna ti Biblia, “no di ket agtrabaho koma a sipipinget, nga aramidenna babaen kadagiti imana ti aramid a naimbag, tapno adda koma maibunongna iti asinoman nga agkasapulan.” (Efeso 4:28) Imbes a takawanda iti tiempo ti amoda, dagiti mangay-ayat ken Jehova sigagaget nga aramidenda ti trabahoda. ‘Kayatda ti agbiag a mapagtalkan iti amin a bambanag.’ (Hebreo 13:18) Ken talaga a ti nadalus a konsiensia mangipaay iti natalna nga isip.

Kasano a matmatan ti Dios ti maysa a managpungpungtot? Mamakdaar ti Biblia: “Dika makikadua iti asinoman a managunget; ket dika sumrek a kadua ti tao nga addaan kadagiti irarasuk ti pungtot.” (Proverbio 22:24) Ti di mapengdan nga unget masansan nga agbanag iti kinaranggas. (Genesis 4:5-8) No maipapan iti panagibales, kuna ti Biblia: “Dikay subadan ti dakes iti dakes iti asinoman. Mangipaaykayo iti nasayaat a bambanag iti imatang ti amin a tattao. No mabalin, agingga a makapagpannuray kadakayo, makikappiakayo iti amin a tattao. Dikay ibalesan ti bagbagiyo, dungdungnguen, no di ket ipaayanyo ti lugar ti pungtot; ta adda a naisurat: ‘Kukuak ti pammales; supapakakto, kuna ni Jehova.’” (Roma 12:17-19) No surotentayo ti kasta a balakad, nataltalna ti biagtayo, banag a mangparayray iti ragsaktayo.

Makapagballigika

Makapagballigika kadi a mangsalimetmet iti kinatarnawmo iti Dios iti laksid dagiti sulisog nga agaramid iti dakes? Wen. Panunotem a kayat ti Dios nga agballigika a mangpaneknek nga ulbod ti pammabasol ni Satanas mainaig iti isyu ti kinatarnaw, ta kuna ti Saona: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.”​—Proverbio 27:11.

Mabalin nga ikararagmo ken Jehova a pabilgennaka a mangaramid iti umiso iti imatangna. (Filipos 4:6, 7, 13) Isu nga ikagumaam a parang-ayen ti pannakaammom iti Sao ti Dios, ti Biblia. Maparayray ti ayatmo iti Dios ken matignayka a mangay-ayo kenkuana no utobem ken apresiarem dagiti masursurom iti Biblia. “Daytoy ti kaipapanan ti ayat iti Dios,” kuna ti 1 Juan 5:3, “a tungpalentayo dagiti bilinna; ket kaskasdi a dagiti bilinna saanda a makapadagsen.” Maragsakan dagiti Saksi ni Jehova iti lugaryo a tumulong kenka nga agadal iti Biblia. Makisaritaka kadakuada, wenno mabalinmo ti agsurat kadagiti agipabpablaak iti daytoy a magasin.

[Ladawan iti panid 4]

Nagtalinaed a matalek ni Job iti sidong ti pannakasuot

[Ladawan iti panid 7]

Mapabilegka nga agaramid iti naimbag no parang-ayem ti pannakaammom iti Sao ti Dios