Ni Jehova “Ipakatnanto ti Hustisia”

“Saan aya a sigurado a ti Dios ipakatnanto ti hustisia kadagiti pinilina nga umaw-awag kenkuana iti aldaw ken rabii?”​—LUCAS 18:7.

1. Siasino dagiti pakaparparegtaam, ken apay?

ITI intero a lubong, naitimpuyog kadagiti Saksi ni Jehova dagiti Kristiano a lallaki ken babbai nga adun a tawen a simamatalek nga agserserbi ken Jehova. Personal kadi nga am-ammoyo ti dadduma kadagitoy a patpatgentayo a kakabsat? Nalabit a malagipyo ti maysa a baketen a kabsat, a nabautisaran adun a tawen ti napalabas ken manmano a maliwayanna ti makigimong iti Kingdom Hall. Wenno malagipyo ti maysa a lakayen a kabsat a sisusungdo a makiramraman iti panangasaba ti kongregasion iti linawas iti unos ti adun a tawen. Kinapudnona, adu kadagitoy a matalek a kakabsat ti nangipagarup idi a nalpas koma itan ti Armagedon. Nupay kaskasdi nga adda pay laeng ita daytoy nadangkes a lubong, saan a kimmapuy ti panagtalekda kadagiti kari ni Jehova wenno ti determinasionda nga ‘agibtur agingga iti panungpalan.’ (Mateo 24:13) Ti kabileg ti pammati dagitoy a nasungdo nga adipen ni Jehova ket pudno a makaparegta iti intero a kongregasion.​—Salmo 147:11.

2. Ania a kasasaad ti makapaladingit kadatayo?

² Ngem no dadduma, mabalin a naiduma ti mapaliiwtayo. Adda dagiti Saksi a nabayagen a makiramraman iti ministerio, ngem kimmapuy ti pammatida ken Jehova idi agangay, ken insardengdan ti makitimpuyog iti kongregasion Kristiano. Maladingitantayo ta adda dagiti dati a kakaduatayo a nangpanaw ken Jehova, ket tarigagayantayo unay nga itultuloy a tulongan ti tunggal “karnero a napukaw” tapno agsubli iti arban. (Salmo 119:176; Roma 15:1) Nupay kasta, mamataud kadagiti saludsod daytoy a panagsupadi​—a dadduma ti agtultuloy ti pammatida idinto ta napukaw dayta ti dadduma. Ania ti nakatulong iti adu a Saksi a mangtaginayon iti pammatida kadagiti kari ni Jehova idinto ta napukaw dayta ti dadduma? Ania ti personal a maaramidtayo tapno masigurado nga agtultuloy a natibker ti pammatitayo nga umas-asidegen “ti dakkel nga aldaw ni Jehova”? (Sofonias 1:14) Usigentayo ti pangngarig a naisalaysay iti Ebanghelio ni Lucas.

Pakdaar Kadagiti Sibibiag “Inton Dumteng ti Anak ti Tao”

3. Siasino ti nangnangruna a pagaplikaran ti pangngarig maipapan ti balo ken ti ukom, ken apay?

³ Iti Lucas kapitulo 18, naisalaysay ti pangngarig ni Jesus maipapan iti maysa a balo a babai ken maysa nga ukom. Umasping dayta iti pangngarig maipapan iti napinget nga agsangaili, nga inusigtayo iti napalabas nga artikulo. (Lucas 11:5-13) Ngem ti konteksto ti pangngarig iti Biblia maipapan iti balo ken iti ukom ipakitana a nangnangruna nga agaplikar daytoy kadagiti sibibiag “inton dumteng ti Anak ti tao” iti pannakabalin ti Pagarian, iti tiempo a nangrugi idi 1914.​—Lucas 18:8.a

4. Ania ti inlawlawag ni Jesus sakbay nga insalaysayna ti pangngarig iti Lucas kapitulo 18?

⁴ Sakbay a sinalaysayna ti pangngarig, kinuna ni Jesus a ti pammaneknek ti kaaddana iti pannakabalin ti Pagarian ket nakalawlawagto a kas iti “kimat” nga “agsilnag manipud iti maysa a paset iti baba ti langit agingga iti sabali a paset iti baba ti langit.” (Lucas 17:24; 21:10, 29-33) Nupay kasta, kaaduan a tattao nga agbibiag iti “panawen ti panungpalan” ti mangyaleng-aleng iti dayta a nalawag a pammaneknek. (Daniel 12:4) Apay? Gapu iti isu met la a rason nga inyaleng-aleng ti tattao idi kaaldawan da Noe ken Lot dagiti pakdaar ni Jehova. Dagiti tattao kadagidi a tiempo ‘mangmangan, umin-inum, gumatgatang, aglaklako, agmulmula, ken agibangbangonda agingga iti aldaw a nadadaelda.’ (Lucas 17:26-29) Napukawda ti biagda gapu ta makumikomda unay kadagita a gagangay nga aramid isu a dida naaramid ti pagayatan ti Dios. (Mateo 24:39) Iti kaaldawantayo, naigamer met dagiti tattao kadagiti inaldaw nga aramid isu a dida makita dagiti pammaneknek nga asidegen ti panungpalan daytoy dakes a lubong.​—Lucas 17:30.

5. (a) Siasino ti pinakdaaran ni Jesus, ken apay? (b) Apay a ti dadduma napukawda ti pammatida?

⁵ Nalawag a madanagan idi ni Jesus di la ket ta dagiti pasurotna ket iyaw-awan ti lubong ni Satanas, agingga nga agsublida pay ketdin “iti bambanag a nalikudan.” (Lucas 17:22, 31) Kinapudnona, kasta ti napasamak iti dadduma a Kristiano. Adu a tawen a nangnamnamada iti aldaw a pagpatinggaen ni Jehova daytoy dakes a lubong. Ngem idi saan a dimteng ti Armagedon iti tiempo a ninamnamada, naupayda. Kimmapuy ti panagtalekda nga asidegen ti aldaw a panangukom ni Jehova. Gimminadda iti ministerioda ken in-inut a naigamerda kadagiti kadawyan nga aramid iti biag ket bimmassit ti tiempoda kadagiti naespirituan a banag. (Lucas 8:11, 13, 14) Idi agangay, ‘nagsublida iti bambanag a nalikudan’​—anian a nakalkaldaang!

Ti Kinapateg ti ‘Kanayon a Panagkararag’

6-8. (a) Isalaysayyo ti pangngarig maipapan ti babai a balo ken ti ukom. (b) Kasano nga inyaplikar ni Jesus daytoy a pangngarig?

⁶ Ania ti maaramidtayo tapno masiguradotayo a saan a kumapuy ti natibker a panagtalektayo iti kaitungpalan dagiti kari ni Jehova? (Hebreo 3:14) Sinungbatan ni Jesus dayta a saludsod kalpasan unay a pinakdaaranna dagiti adalanna a dida agsubli iti dakes a lubong ni Satanas.

⁷ Kuna ni Lucas a ni Jesus “imbagana kadakuada ti maysa a pangngarig maipapan iti pannakasapul ti kanayon a panagkararagda ken saanda nga isusuko.” Kinuna ni Jesus: “Iti maysa a siudad adda idi maysa nga ukom nga awan panagbutengna iti Dios ken awan panagraemna iti tao. Ngem adda idi maysa a babai a balo iti dayta a siudad ket nagtultuloy a napan kenkuana, a kunkunana, ‘Siguraduem a magun-odak ti hustisia manipud iti kabusorko iti linteg.’ Ala ket, iti sumagmamano a tiempo saan a situtulok, ngem kalpasanna kinunana iti bagina, ‘Uray no diak kabuteng ti Dios wenno raemen ti tao, nupay no kasta, gapu iti agtultuloy a panangriribuk kaniak daytoy a balo, siguraduekto a magun-odanna ti hustisia, tapno saanto nga agtultuloy nga umay ket dudogennak agingga iti kanibusanan.’”

⁸ Kalpasan dayta a salaysayna, kastoy ti panangyaplikar ni Jesus: “Denggenyo ti ukom, nupay nakillo, no ania ti kinunana! Ngarud, saan aya a sigurado a ti Dios ipakatnanto ti hustisia kadagiti pinilina nga umaw-awag kenkuana iti aldaw ken rabii, uray no mabayag-panagituredna kadakuada? Ibagak kadakayo, sipapartak nga ipakatnanto kadakuada ti hustisia. Nupay kasta, inton dumteng ti Anak ti tao, pudno aya a masarakannanto ti pammati ditoy daga?”​—Lucas 18:1-8.

“Siguraduem a Magun-odak ti Hustisia”

9. Ania ti nalawag a tema iti pangngarig maipapan ti balo a babai ken ti ukom?

⁹ Nakalawlawag ti kangrunaan a tema daytoy a pangngarig. Agpada a dinakamat dayta ti dua a karakter iti pangngarig ken dinakamat met dayta ni Jesus. Impakaasi ti balo: “Siguraduem a magun-odak ti hustisia.” Kinuna ti ukom: “Siguraduek a magun-odanna ti hustisia.” Inyimtuod ni Jesus: “Saan aya a sigurado a ti Dios ipakatnanto ti hustisia?” Ken maipapan ken Jehova, kinuna ni Jesus: “Sipapartak nga ipakatnanto kadakuada ti hustisia.” (Lucas 18:3, 5, 7, 8) Kaanonto ti partikular a tiempo nga ‘ipakat ti Dios ti hustisia’?

10. (a) Kaano a naipakat ti hustisia idi umuna a siglo? (b) Kaano ken kasano a maipakat ti hustisia kadagiti agdama nga adipen ti Dios?

¹⁰ Idi umuna a siglo, “dagiti aldaw a panangipakat iti kinahustisia” (wenno, “dagiti aldaw ti panagibales,” Kingdom Interlinear) ket dimteng idi 70 K.P., idi nadadael ti Jerusalem ken ti templona. (Lucas 21:22) Para kadagiti agdama nga adipen ti Dios, maipakat ti hustisia inton “dakkel nga aldaw ni Jehova.” (Sofonias 1:14; Mateo 24:21) Iti dayta a kanito, ni Jehova ‘supapakanna iti rigat dagidiay mangparigat’ kadagiti adipenna bayat a ni Jesus “iyegna ti pammales kadagidiay saan a makaammo iti Dios ken kadagidiay saan nga agtulnog iti naimbag a damag maipapan ken Apotayo a Jesus.”​—2 Tesalonica 1:6-8; Roma 12:19.

11. Iti ania nga anag a “sipapartak” a maipakat ti hustisia?

¹¹ Ngem kasanotayo a matarusan ti pammatalged ni Jesus a ni Jehova ipakatna ti hustisia a “sipapartak”? Ipakita ti Sao ti Dios nga “uray no [ni Jehova] mabayag-panagituredna kadakuada,” sipapartak nga ipakatna ti hustisia inton dumteng ti naituding a tiempo. (Lucas 18:7, 8; 2 Pedro 3:9, 10) Idi kaaldawan ni Noe, idi napasamak ti Layus, dagus a nadadael dagiti nadangkes. Umasping iti dayta, idi kaaldawan ni Lot, idi nagtudo iti apuy, naikisap dagiti nadangkes. Kinuna ni Jesus: “Kastanto met laeng iti dayta nga aldaw inton maipanayag ti Anak ti tao.” (Lucas 17:27-30) Mapasaranto manen dagiti nadangkes ti “kellaat a pannakadadael.” (1 Tesalonica 5:2, 3) Kinapudnona, naan-anay a makapagtalektayo a ni Jehova saanna nga ipalubos nga agbayag ti lubong ni Satanas iti maysa nga aldaw a napapaut ngem iti kalikaguman ti hustisia.

“Ipakatnanto ti Hustisia”

12, 13. (a) Ania ti masursurotayo iti pangngarig ni Jesus maipapan iti balo ken iti ukom? (b) Apay a masiguradotayo nga imdengan ni Jehova ti karkararagtayo ken ipakatna ti hustisia?

¹² Ti pangngarig ni Jesus maipapan ti balo a babai ken ti ukom itampokna ti dadduma pay a napateg a kinapudno. Iti panangyaplikarna iti pangngarig, kinuna ni Jesus: “Denggenyo ti ukom, nupay nakillo, no ania ti kinunana! Ngarud, saan aya a sigurado a ti Dios ipakatnanto ti hustisia kadagiti pinilina?” Siempre, ni Jesus saanna nga idildilig ni Jehova iti daydiay ukom a kasla ket tay kasta met laeng ti panangtrato ti Dios kadagiti manamati. Imbes ketdi, insuro ni Jesus kadagiti pasurotna ti maysa a leksion maipapan ken Jehova babaen ti panangitampokna iti nagdumaan ti ukom ken ti Dios. Ania ti dadduma a nagdumaanda?

¹³ Ti ukom iti pangngarig ni Jesus ket “nakillo,” idinto ta ti “Dios ket maysa a nalinteg nga Ukom.” (Salmo 7:11; 33:5) Ti ukom ket awan ti aniaman a personal a pannakaseknanna iti babai a balo, idinto ta interesado ni Jehova iti tunggal tao. (2 Cronicas 6:29, 30) Saan a kayat ti ukom a tulongan ti balo, ngem sidadaan​—wen, sigagagar​—ni Jehova a tumulong kadagidiay agserserbi Kenkuana. (Isaias 30:18, 19) Ania ti masursurotayo? No patgan ti nakillo nga ukom dagiti kalikagum ti balo ken ipaayanna iti hustisia, nangnangruna pay nga imdengan ni Jehova ti karkararag dagiti adipenna ken sigurado nga ipakatna ti hustisia para kadakuada!​—Proverbio 15:29.

14. Apay a saan a rumbeng a mapukaw ti pammatitayo iti iyaay ti aldaw a panangukom ti Dios?

¹⁴ Gapuna, nagdakkel ti biddut dagidiay mapukaw ti pammatida iti iyaay ti aldaw a panangukom ti Dios. Apay? Gapu ta napukawen ti nabileg a pammatida nga asidegen “ti dakkel nga aldaw ni Jehova,” ipakpakitada babaen kadagiti aramidda a pagduaduaanda no tungpalen ni Jehova dagiti karina. Ngem awan ti siasinoman a rumbeng a mangkuestion iti kinamatalek ni Jehova. (Job 9:12) Ti nasken nga isaludsodtayo ket, Agtalinaed ngata a matalek ti tunggal maysa kadatayo? Dayta met ti eksakto a suheto a pinataud ni Jesus iti ngudo ti pangngarig maipapan ti balo ken ti ukom.

“Pudno Aya a Masarakannanto Daytoy a Pammati Ditoy Daga?”

15. (a) Ania ti inyimtuod ni Jesus, ken apay? (b) Ania ti rumbeng nga iyimtuodtayo iti bagbagitayo?

¹⁵ Inyimtuod ni Jesus daytoy makapainteres a saludsod: “Inton dumteng ti Anak ti tao, pudno aya a masarakannanto daytoy a pammati ditoy daga?” (Lucas 18:8) Ti sasao a “daytoy a pammati” ipasimudaagna a saan a tinukoy ni Jesus ti kaaduan nga anag ti pammati, no di ket ti maysa a partikular a pammati​—ti pammati a kas iti ik-ikutan ti balo. Saan a sinungbatan ni Jesus ti saludsodna. Inyimtuodna dayta tapno panunoten dagiti adalanna ti maipapan iti kalidad ti pammatida. In-inut kadi a kumapkapuy, isu nga agpegpeggadda nga agsubli kadagiti banag a pinanawanda? Wenno ti kadi pammatida ket kas iti pammati nga inyulidan ti balo? Rumbeng nga iyimtuodtayo met ita iti bagbagitayo, ‘Ania a kita ti pammati ti masarakan “ti Anak ti tao” iti pusok?’

16. Ania a kita ti pammati ti adda iti balo?

¹⁶ Tapno mairamantayo kadagidiay ipaayan ni Jehova iti hustisia, masapul a tuladentayo ti balo. Ania a kita ti pammati ti adda kenkuana? Kas panangipakita iti pammatina, sipipinget a “napan [iti ukom], a kunkunana, ‘Siguraduem a magun-odak ti hustisia.’” Sipipinget a nagtignay dayta a balo tapno makaawat iti hustisia manipud iti maysa a nakillo a tao. Umasping iti dayta, makapagtalek met dagiti agdama nga adipen ti Dios a makaawatda iti hustisia ni Jehova​—uray pay no kalikaguman dayta ti napapaut a tiempo ngem iti ninamnamada. Kasta met, ipakitada ti panagtalekda kadagiti kari ti Dios babaen ti sipipinget a panagkararagda​—wen, babaen ti ‘iyaawagda kenkuana iti aldaw ken rabii.’ (Lucas 18:7) Kinapudnona, no ti maysa a Kristiano saannan nga ikarkararag a maipakat ti hustisia, ipakpakitana a saanen nga agtalek nga agtignay ni Jehova para kadagiti adipenna.

17. Ania dagiti rasontayo nga agkararag a sipipinget ken mangtaginayon iti pammatitayo a sigurado ti iyaay ti aldaw a panangukom ni Jehova?

¹⁷ Dagiti partikular a situasion dayta a balo ipakitana kadatayo nga addaantayo kadagiti kanayonan a rason tapno itultuloytayo ti agkararag. Usigenyo ti sumagmamano a nakaidumaan ti situasionna iti kasasaadtayo. Ti balo intultuloyna ti immadani iti ukom uray no awan pulos ti nangparegta kenkuana a mangaramid iti dayta, ngem ti Sao ti Dios kasta unay ti panangparegtana kadatayo a ‘reggetantayo ti agkararag.’ (Roma 12:12) Awan ti naited iti balo a pammasiguro a mapatgan dagiti kalikagumna, ngem ni Jehova impatalgedna kadatayo a maipakat ti hustisia. Babaen ti propetana, kinuna ni Jehova: “Uray no agtaktak, agtultuloyka a manginanama iti dayta; ta di bumurong a pumudnonto. Saanto a maladaw.” (Habakuk 2:3; Salmo 97:10) Awan ti timmulong iti balo nga agpakaasi tapno nabilbileg ti panagkiddawna. Ngem addaantayo iti nabileg a katulongan, ni Jesus, “nga adda iti makannawan ti Dios, nga agdawat met maipaay kadatayo.” (Roma 8:34; Hebreo 7:25) Gapuna, no ti balo, nupay narigat ti kasasaadna, intultuloyna ti nagpakaasi iti ukom a siiinanama a maipakat ti hustisia, nangnangruna pay koma a taginayonentayo ti pammatitayo iti sigurado nga iyaay ti aldaw a panangukom ni Jehova!

18. Kasano a ti kararag pabilgenna ti pammatitayo ken tulongannatayo nga umawat iti hustisia?

¹⁸ Isursuro kadatayo ti pangngarig maipapan iti balo a ti kararag ket nainaig unay iti pammati ken ti napinget a karkararagtayo kabaelanna a sumraen dagiti impluensia a mabalin a mangpakapuy iti pammatitayo. Siempre, saan a kaipapanan daytoy a bumileg ti pammatitayo babaen laeng iti kararag a makaay-ayo a denggen. (Mateo 6:7, 8) No magutugottayo nga agkararag gapu ta ammotayo a masapul nga agpannuraytayo a naan-anay iti Dios, ti ngarud kararag iyadaninatayo iti Dios ken pabilgenna ti pammatitayo. Ken yantangay napateg ti pammati tapno maisalakantayo, di pakasdaawan nga imparegta ni Jesus kadagiti adalanna ti “kanayon a panagkararagda ken saanda nga isusuko”! (Lucas 18:1; 2 Tesalonica 3:13) Pudno a ti iyaay “ti dakkel nga aldaw ni Jehova” ket saan nga agpannuray kadagiti kararagtayo​—umay dayta ikararagtayo man wenno saan. Ngem maikaritayo man iti hustisia ken makalasattayo man iti gubat ti Dios wenno saan, dayta ket talaga nga agpannuray iti kita ti pammati nga adda kadatayo ken no nalinteg met laeng ti panagbiagtayo a maitunos kadagiti karkararagtayo.

19. Kasanotayo a paneknekan a sititibker a patientayo a ti Dios “ipakatnanto ti hustisia”?

¹⁹ Kas iti malagiptayo, kastoy ti inyimtuod ni Jesus: “Inton dumteng ti Anak ti tao, pudno aya a masarakannanto daytoy a pammati ditoy daga?” Ania ti sungbat iti daytoy makapainteres a saludsod? Maragsakantayo unay ta dayta a pammati ket iparparangarang ita ti minilion a matalek nga adipen ni Jehova iti intero lubong! Pampaneknekanda dayta babaen ti karkararag, panaganus, ken kinareggetda. Gapuna, maisungbattayo a talaga a masarakan ni Jesus ti pammati ditoy daga. Wen, nupay agsagsagabatayo iti kinaawan hustisia iti daytoy lubong ni Satanas, sititibker a patientayo a ti Dios “ipakatnanto ti hustisia kadagiti pinilina.”

[Footnote]

Malagipyo Kadi?

• Apay a napukaw ti pammati ti dadduma a Kristiano?

• Apay a sititibker a makapagtalektayo iti iyaay ti aldaw ti panangukom ni Jehova?

• Ania dagiti rason tapno reggetantayo ti agkararag?

• Kasano a makatulong ti napinget a kararag tapno ditay mapukaw ti pammatitayo?

[Ladawan iti panid 26]

Ania ti itampok ti pangngarig maipapan ti babai a balo ken ti ukom?

[Dagiti Ladawan iti panid 29]

Minilion ita ti sititibker a mamati a ti Dios “ipakatnanto ti hustisia”