Malagipyo Kadi?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Ania ti makatulong kadakayo no ti maysa nga ing-ingungotenyo ket pinanawanna ni Jehova?

Pabilgenyo ti bagiyo agraman ti dadduma pay a miembro ti pamiliayo. Agbalinkayo nga okupado kadagiti naespirituan nga aktibidad. Iwayaanyo ti tumulong kadagiti sabsabali. Itultuloyyo nga inanamaen ti panagsublinto met laeng ti ing-ingungotenyo. Saanyo a pabasolen ti bagiyo. Raemenyo ti urnos ti Dios iti panangdisiplina, ken ipeksayo ti riknayo kadagiti gagayyemyo.​—9/1, panid 18-21.

• Ania ti dua a kasasaad a tultulongannatayo ti Biblia a mangilasin “kadagiti maudi nga aldaw”?

Impadto ti Biblia dagiti mapasamak bayat “ti panungpalan ti sistema ti bambanag.” (Mateo 24:3, 7, 8; Lucas 21:11) Dinakamatna met dagiti panagbalbaliw ti kababalin ken tigtignay ti tattao nga agbibiag “kadagiti maudi nga aldaw.” (2 Timoteo 3:1-5) Nasaknap ti pannakaikasaba ti naimbag a damag ti pagarian bayat daytoy a tiempo.​—9/15, panid 4-6.

• Ania ti responsabilidad ti kongregasion no ti agmanmaneho a Kristiano ket nakaaksidente a nagtungpal iti ipapatay ti sabsabali?

Mabalin nga ikeddeng dagiti panglakayen nga agim-imbestigar iti dayta nga awan ti biag a sungsungbatan ti drayber agsipud ta bassit wenno awan ti kontrolna kadagiti pasamak a nagresulta iti ipapatay ti maysa a tao. Ngem no isu ket adda sungsungbatanna a biag ken agbabbabawi, maipaayan iti Nainkasuratan a pannubngar ken maikkat ti aniaman a pribilehiona iti kongregasion.​—9/15, panid 30.

• Apay a ti biag nga agnanayon ket saan nga agpannuray kadagiti nasientipikuan nga irarang-ay?

Pagregreggetan dagiti sientista a paatiddogen ti biag ti tao, kas iti panangikagumaanda a manglapped iti panagsardeng dagiti selula a mangpataud kadagiti baro a selula wenno babaen iti therapeutic cloning tapno maipaayan dagiti pasiente iti baro ken maitutop unay a paset ti bagi. Ngem isursuro ti Biblia a ti subbot ni Jesus ti kakaisuna a pamuspusan tapno masagrap dagiti tattao ti biag nga agnanayon.​—10/1, panid 3-5.

• Ti kadi ritual dagiti Judio iti panagdigus ti nangrugian ti Nakristianuan a bautismo?

Saan. Inannurot dagiti Judio dagiti ritual a mangdalus iti bagbagida, a naiduma iti bautismo nga insuro ni Juan. Masapul a maulit-ulit ti panagdalus nga impakalikagum ti Linteg Mosaiko, ngem maminsan la a maaramid ti Nakristianuan a bautismo.​—10/15, panid 12-13.

• Ania ti Ministerial Training School?

Dayta ket walo a lawas a kurso para kadagiti panglakayen ken ministerial nga adipen iti kongregasion a saan a kasado ken makabael a maibaon nga agserbi kadagiti lugar nga addaan iti dakkel a panagkasapulan. Mabalin a maibaonda iti kongregasion a naggapuanda, iti sabali pay a paset ti pagilianda, wenno iti sabali a pagilian.​—11/15, panid 10-11.

• Ania wenno siasino ti antikristo a nadakamat iti 1 Juan 2:18; 4:3?

Kaaduanna, ti “antikristo” ket agaplikar iti amin a bumusbusor wenno siuulbod nga agkunkuna nga isuda ni Kristo wenno dagiti pannakabagina. Ipamatmat dagiti sasao da Jesus ken ni Juan a saan a maymaysa a tao ti antikristo no di ket buklen ti adu nga indibidual nga antikristo a mangisaksaknap iti narelihiosuan a panangallilaw ken manglaklaksid iti Pagarian ti Dios.​—12/1, panid 4-6.