Isuroyo ti Talaga nga Isursuro ti Biblia
‘Mangaramidkayo iti ad-adalan kadagiti tattao iti amin a nasion, . . . nga isuroyo ida.’—MATEO 28:19, 20.
1. Ania ti makunatayo maipapan iti pannakaiwaras ti Biblia?
TI SAO NI JEHOVA, ti Nasantuan a Biblia ket maysa kadagiti kadaanan ken kasaknapan ti pannakaiwarasna a libro ditoy lubong. Ti dadduma a pasetna ket naipatarusen iti nasurok a 2,300 a lenguahe. Nasurok a 90 a porsiento kadagiti agnanaed ditoy daga ti mabalinen a maaddaan iti Biblia iti nakayanakanda a lenguahe.
2, 3. (a) Apay a mariro dagiti tattao maipapan kadagiti pannursuro ti Biblia? (b) Ania a salsaludsod ti usigentayo?
2 Minilion ti inaldaw nga agbasbasa iti Biblia. Dadduma ti namin-adun a nakaungpot iti dayta. Ibagbaga ti rinibu a narelihiosuan a grupo a naibatay iti Biblia ti isursuroda, ngem saanda nga agtutunos kadagiti isursuroda. Malaksid pay iti kasta a panagsusupadi, adda nakaro a di panagkikinnaawatan dagiti agkakarelihion. Dagiti dadduma adda panagduaduada maipapan iti nagtaudan ken pateg ti Biblia. Adu ti mangibilang iti dayta kas sagrado a libro a mausar laeng kadagiti seremonia a kas iti panagsapata wenno bayat ti panagkarida nga agsaoda iti pudno iti sanguanan ti korte.
3 Kinapudnona, ti Biblia ket aglaon iti nabileg a sao, wenno mensahe ti Dios, agpaay iti sangatauan. (Hebreo 4:12) Kas Saksi ni Jehova, kayattayo ngarud a maammuan dagiti tattao ti isursuro ti Biblia. Maragsakantayo a mangitungpal iti imbilin ni Jesu-Kristo kadagiti pasurotna idi kinunana: ‘Inkayo . . . mangaramidkayo iti ad-adalan kadagiti tattao iti amin a nasion, . . . nga isuroyo ida.’ (Mateo 28:19, 20) Iti panangasabatayo, makasaraktayo kadagiti napudno ti panagpuspusoda a tattao a marirriribukan kadagiti narelihiosuan a panagsusupadi a nasaknap iti lubong. Kayatda a maammuan ti kinapudno maipapan iti Namarsua kadatayo ken iti isursuro ti Biblia maipapan iti panggep ti biag. Usigentayo ti tallo a saludsod nga iyim-imtuod ti adu a tattao. Iti tunggal saludsod, usigentayo ti di umiso nga ibagbaga dagiti panguluen ti relihion sa repasuentayo no ania a talaga ti isursuro ti Biblia. Dagiti saludsod ket: (1) Maseknan kadi ti Dios kadatayo? (2) Apay nga addatayo ditoy? (3) Ania ti mapasamak kadatayo no mataytayo?
Maseknan Kadi ti Dios?
4, 5. Apay a pagarupen dagiti tattao a saan a maseknan ti Dios kadatayo?
4 Unaentayo ti saludsod a, Maseknan kadi ti Dios kadatayo? Nakalkaldaang ta ti sungbat ti adu a tattao ket saan. Apay a kasta ti sungbatda? Ti maysa a makagapu ket agbibiagda iti lubong a napno iti guranggura, gubat, ken panagsagaba. ‘No talaga a maseknan ti Dios,’ kunada, ‘sigurado a lapdanna koma dagita a dakes a kasasaad.’
5 Adda sabali pay a makagapu no apay nga ipagarup ti tattao a saan a maseknan ti Dios kadatayo—kasta ngamin ti ipappapati kadakuada dagiti panguluen ti relihionda. Ania ti masansan nga ibagbaga dagiti klero no adda mapasamak a trahedia? Idi a ti dua a babassit pay nga annak ti maysa a babai ket natay iti aksidente iti lugan, kinuna ti ministro iti relihionna: “Nakem ti Dios dayta. Kasapulanna ngamin ti dua pay nga anghel.” No kasta ti ibaga dagiti klero, dagiti dakes a mapaspasamak ket aktual nga ipabpabasolda iti Dios. Nupay kasta, kastoy ti insurat ni adalan a Santiago: “No adda iti sidong ti pannakasuot, awan koma ti agkuna: ‘Susuotennak ti Dios.’ Ta iti dakes a bambanag saan a mabalin a suoten ti Dios ket isu saanna met a suoten ti asinoman.” (Santiago 1:13) Ni Jehova a Dios saanna a pulos a patauden ti kinadakes. Kinapudnona, ‘adayo nga agtignay a sidadangkes ti pudno a Dios.’—Job 34:10.
6. Siasino ti adda iti likudan ti kinadakes ken panagsagaba iti daytoy a lubong?
6 Apay ngarud a nagkaro ti kinadakes ken panagsagaba? Ti maysa a makagapu ket kaaduan iti sangatauan linaksidda ti Dios kas Agturay, dida kayat ti agbiag maitunos kadagiti nalinteg a paglintegan ken prinsipiona. Di mapupuotan dagiti tattao nga agpaspasakupda gayamen ken Satanas, ti Kabusor ti Dios, ta “ti intero a lubong adda iti pannakabalin daydiay nadangkes.” (1 Juan 5:19) Gapu ta ammotayo daytoy a kinapudno, nalaklakatayo a maawatan no apay nga adda dagiti dakes a kasasaad. Ni Satanas ket dakes, mananggura, ken naulpit. Namnamaentayo ngarud a ti lubong tuladenna ti personalidad ti agturay kenkuana. Di pakasdaawan a nagkaro ti kinadakes!
7. Ania ti dadduma a makagapu iti panagsagabatayo?
7 Ti maysa pay a makagapu iti panagsagabatayo ket ti kinaimperpekto ti tao. Adda pagannayasan dagiti managbasol a tattao a mangdominar, ket masansan nga agresulta dayta kadagiti gubat, panangirurumen, ken panagsagaba. Maitutop ti kuna ti Eclesiastes 8:9: “Ti tao dinominaranna ti tao iti pakadangrananna.” Ti maysa pay a makagapu iti panagsagaba ket “ti tiempo ken ti di mapakpakadaan a pasamak.” (Eclesiastes 9:11) Masansan a mapasaran dagiti tattao ti kalamidad gapu ta addada iti di umiso a lugar iti di umiso a tiempo.
8, 9. Kasanotay nga ammo a talaga a maseknan ni Jehova kadatayo?
8 Makaliwliwa a maammuan a saan a ti Dios ti mangpatpataud iti panagsagaba. Ngem talaga kadi a maseknan ti Dios iti mapaspasamak iti biagtayo? Makaparagsak ta ti sungbat ket wen! Ammotayo a maseknan ni Jehova agsipud ta impakaammona iti naipaltiing a Saona no apay a pinalubosanna dagiti tattao nga agaramid iti dakes. Maigapu dayta iti dua nga isyu: ti kinasoberanona ken ti kinatarnaw ti tattao. Kas ti mannakabalin-amin a Namarsua, saan nga obligado ni Jehova a mangilawlawag kadatayo no apay nga ipalpalubosna ti panagsagaba. Nupay kasta, ipakpakaammona kadatayo agsipud ta isu ket maseknan kadatayo.
9 Usigenyo ti kanayonan pay nga ebidensia a ti Dios ket maseknan kadatayo. “Nasaktan ti pusona” idi napno ti daga iti kinadakes idi kaaldawan ni Noe. (Genesis 6:5, 6) Naiduma kadin ti rikna ti Dios ita? Saan, agsipud ta isu ket saan nga agbalbaliw. (Malakias 3:6) Kagurana ti kinaawan hustisia ken saan a maragsakan a makakita nga agsagsagaba dagiti tattao. Isursuro ti Biblia a ti Dios asidegen nga aturenna ti amin a dakes a kasasaad nga imbunga ti panagturay ti tao ken ti impluensia ti Diablo. Saan kadi a nalawag nga ebidensia dayta a maseknan ti Dios kadatayo?
10. Ania ti rikna ni Jehova maipapan iti panagsagaba ti tao?
10 Dagiti panguluen ti relihion saan nga umiso ti isursuroda maipapan iti Dios no ibagbagada a nakemna dagiti trahedia a mapaspasarantayo. Maisupadi iti dayta, il-iliwen ni Jehova a gibusan ti panagsagaba ti tao. “Isu maseknan kadakayo,” kuna ti 1 Pedro 5:7. Dayta ti talaga nga isursuro ti Biblia!
Apay nga Addatayo Ditoy?
11. Ania ti masansan nga ibagbaga dagiti relihion ditoy lubong maipapan iti biag ti tao ditoy daga?
11 Ita, usigentayo ti maikadua a saludsod nga iyim-imtuod ti adu a tattao, Apay nga addatayo ditoy? Masansan nga isungbat dagiti relihion ditoy lubong a temporario laeng ti panagbiag ti tao ditoy daga. Maysa laeng kano ti daga a pagrubbuatan, wenno pagtalaytayan, nga agturong iti sabali a biag. Siuulbod nga isursuro ti dadduma a klero nga addanto aldaw a dadaelen ti Dios daytoy planeta a daga. Gapu kadagita a pannursuro, adu ti mangipagarup a nasaysayaat laengen nga ipapasda ti agbiag, total, mataydanto met laeng inton agangay. Ania a talaga ti isursuro ti Biblia no apay nga addatayo ditoy?
12-14. Ania ti isursuro ti Biblia maipapan iti panggep ti Dios agpaay iti daga ken iti sangatauan?
12 Adda nakaskasdaaw a panggep ti Dios agpaay iti daga ken iti sangatauan. “Saanna a pinarsua [ti daga] a maipaay laeng iti awan kapapay-anna” no di ket ‘binukelna dayta tapno mapagnaedan a mismo.’ (Isaias 45:18) Kanayonanna, ni Jehova “imbangonna ti daga kadagiti naipasdek a dissona; saanto a mapagdiwengdiweng dayta agingga iti tiempo a di nakedngan, wenno iti agnanayon.” (Salmo 104:5) Ti panangammo kadagitoy a banag maipapan iti panggep ti Dios iti daga ken iti sangatauan matulongannatayo a mangtarus no apay nga addatayo ditoy.
13 Ipakita ti Genesis kapitulo 1 ken 2 a ni Jehova insaganana a naimbag ti daga tapno pagnaedan ti tao. Idi arinunos ti tiempo ti panamarsuana, a pakairamanan ti pannakaparsua ti dagatayo, amin ket “nasayaat unay.” (Genesis 1:31) Ti Dios inkabilna ti immuna a lalaki ken babai a da Adan ken Eva iti napintas a minuyongan ti Eden ken impaayanna ida iti aglaplapusanan nga agkakaimbag a taraon. Kastoy ti naibilin iti immuna a tao nga agassawa: “Agbungakayo ken agadukayo ket punnuenyo ti daga ken parukmaenyo.” Maaddaanda kadagiti perpekto nga annak, palawaenda ti minuyongan a pagtaenganda agingga nga agsaknap dayta iti intero a daga. Naibilin met a siaayat nga iturayanda dagiti animal.—Genesis 1:26-28.
14 Panggep ni Jehova a ti daga ket pagtaengan ti perpekto a pamilia ti tao iti agnanayon. Kuna ti Sao ti Dios: “Dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) Wen, nairanta a sagrapen ti sangatauan ti agnanayon a biag iti Paraiso a daga. Dayta ti panggep ti Dios, ket dayta ti talaga nga isursuro ti Biblia!
Ania ti Mapasamak Kadatayo no Mataytayo?
15. Ania ti isursuro ti kaaduan a relihion ditoy lubong maipapan iti mapasamak kadatayo no mataytayo?
15 Pagsasaritaantayo ita ti maikatlo a saludsod nga iyim-imtuod ti adu: Ania ti mapasamak kadatayo no mataytayo? Isursuro ti kaaduan a relihion iti lubong nga adda banag iti uneg ti maysa a tao nga agtultuloy nga agbiag no matay ti bagi. Patien pay laeng ti dadduma a relihion a ti Dios dusaenna dagiti managdakdakes babaen ti panangtutuokna kadakuada nga agnanayon iti umap-apuy nga impierno. Ngem pudno kadi dayta? Ania a talaga ti isursuro ti Biblia maipapan iti ipapatay?
16, 17. Sigun iti Biblia, ania ti kasasaad dagiti natay?
16 Kuna ti Sao ti Dios: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman, awananda metten a pulos kadagiti tangdan.” Yantangay dagiti natay “saanda a pulos sipapanunot iti aniaman,” saanda a makangngeg, makakita, makasao, makarikna, wenno makapanunot. Saanda metten a makategged iti aniaman a tangdan. Kasano koma a kasta? Awan ngaminen ti kabaelanda nga aramiden! Kanayonanna, “ti ayatda ken ti gurada ken ti imonda napukawen,” ta saandan a makayebkas iti aniaman a rikna.—Eclesiastes 9:5, 6, 10.
17 Nalaka a maawatan ken nalawag ti ibagbaga ti Biblia maipapan iti daytoy a banag—dagiti natay ket saan nga agtultuloy a sibibiag iti sadinoman a lugar. Awan ti banag iti unegtayo a sumina iti bagi no mataytayo ken agtultuloy nga agbiag tapno mayanak manen iti sabali a bagi, kas iti ibagbaga dagidiay mamati iti reinkarnasion. Mabalintay nga iyilustrar iti kastoy: Mayarig ti biagtayo iti apuy ti kandela. No maiddep ti apuy, saan a mapan iti sadinoman. Nagpukawen.
18. No maammuan ti maysa a mayad-adalan iti Biblia nga awan ti puot dagiti natay, ania ti mabalin a konklusionna?
18 Panunotenyo ti kaipapanan dayta nalaka a maawatan ngem nabileg a kinapudno. Apaman a maammuan ti maysa a tao nga agad-adal iti Biblia nga awan ti puot dagiti natay, dagus a maawatanna nga isu ket dinto maan-ano dagiti natayen nga inapona uray pay kasano ti gurada kenkuana idi sibibiagda pay laeng. Dagus met a maawatanna a saanen a makangngeg, makakita, makasao, makarikna, wenno makapanunot dagiti ay-ayatenna a pimmusay. Gapuna, saanda nga agrigrigat iti purgatorio wenno agtutuok iti umap-apuy a disso. Nupay kasta, isursuro ti Biblia a mapagungarto dagiti natay nga adda iti lagip ti Dios. Anian a nagsayaat a namnama!—Juan 5:28, 29.
Baro a Libro nga Usarentayo
19, 20. Kas Kristiano, ania ti rebbengentayo, ken ania a katulongan iti panagadal iti Biblia ti naisangsangayan a nadisenio nga usarentayo iti ministeriotayo?
19 Nausigtayo ti tallo laeng kadagiti saludsod nga iyim-imtuod ti adu a tattao. Iti tunggal saludsod, nalawag ken nalaka a maawatan ti isursuro ti Biblia. Anian a makaparagsak nga iranud dagita a kinapudno kadagidiay mayat a mangammo iti isursuro ti Biblia! Ngem para kadagiti tattao a napudno ti panagpuspusoda, adu pay a napapateg a saludsod ti nasken a masungbatan iti makapnek a wagas. Kas Kristiano, rebbengentayo a tulongan ida a mangbirok kadagiti sungbat dagita a saludsod.
20 Makakarit nga isuro dagiti kinapudno a linaon ti Biblia iti wagas a nalaka a maawatan, nalawag ken makaallukoy. Tapno matulongannatayo a mangparmek iti dayta a karit, “ti matalek ken masirib nga adipen” ket nangisagana iti libro a naisangsangayan a nadisenio a mausar iti Nakristianuan a ministeriotayo. (Mateo 24:45-47) Daytoy 224 ti panidna a libro ket napauluan iti Ania a Talaga ti Isursuro ti Biblia?
21, 22. Ania ti dadduma kadagiti nagsayaat a paset ti libro nga Ania a Talaga ti Isursuro ti Biblia?
21 Dayta a libro a nairuar kadagiti “Panagtulnog iti Dios” a Kombension Distrito dagiti Saksi ni Jehova iti 2005/06 ket addaan iti nadumaduma a naisangsangayan a paset. Kas pagarigan, adda lima ti panidna nga introduksion a makatulong unay kadatayo a mangirugi kadagiti panangyadal iti Biblia iti pagtaengan. Maamirisyo a nalakanto nga ilawlawag dagiti ladawan ken teksto a makitayo iti introduksion. Mabalinyo met nga usaren ti impormasion iti daytoy a benneg a mangilawlawag kadagiti iyad-adalanyo iti Biblia no kasano ti agbirok kadagiti kapitulo ken bersikulo iti Biblia.
22 Nalaka a maawatan ken nalawag ti estilo ti pannakaisurat daytoy a libro. Naaramid ti panagregget tapno madanon ti puso ti mayad-adalan babaen ti panangiraman kenkuana aginggat’ mabalin. Tunggal kapitulo ket addaan iti sumagmamano a pangiruangan a salsaludsod ken kahon a napauluan “No Ania ti Isursuro ti Biblia.” Ti kahon ket aglaon kadagiti Nainkasuratan a sungbat kadagiti pangiruangan a salsaludsod. Dagiti nagpipintas a ladawan ken kapsion agraman dagiti naisurat nga ilustrasion iti daytoy a publikasion ti makatulong iti mayad-adalan a mangtarus kadagiti baro nga impormasion. Nupay nakasimsimple dagiti kangrunaan a parapo daytoy a libro, adda apendise a makatulong kadakayo a mangilawlawag iti 14 a napapateg a topiko iti mas detalyado a wagas no kasapulan ti iyad-adalanyo ti kanayonan nga impormasion.
23. Ania dagiti singasing maipapan iti pannakausar ti libro nga Isursuro ti Biblia kadagiti iyad-adalantayo iti Biblia?
23 Ti libro nga Isursuro ti Biblia ket nairanta a tumulong kadatayo a mangisuro kadagiti tattao a nagduduma ti nagaw-atda nga adal ken naggapu iti nadumaduma a relihion. No ti mayad-adalan ket awanan iti aniaman a pannakaammo iti Biblia, mabalin a saan la a mammaminsan a maadal ti maysa a kapitulo. Dikay agapura a mangleppas iti material, no di ket ikagumaanyo a danonen ti puso ti iyad-adalanyo. No dina maawatan ti maysa nga ilustrasion a nadakamat iti libro, ilawlawagyo dayta wenno agusarkayo iti sabali nga ilustrasion. Agsaganakayo a naimbag, ikagumaanyo nga usaren a sieepektibo daytoy a libro, ken agpatulongkayo iti Dios tapno kabaelanyo nga ‘aramaten a siuumiso ti sao ti kinapudno.’—2 Timoteo 2:15.
Agyamankayo Kadagiti Di Magatadan a Pribilehioyo
24, 25. Ania dagiti di magatadan a pribilehio nga impaay ni Jehova kadagiti tattaona?
24 Adda dagiti di magatadan a pribilehio nga impaay ni Jehova iti ilina. Tinulongannatayo a mangammo iti kinapudno maipapan kenkuana. Pulos a ditay koma tagtagilag-anen dayta a pribilehio! Kinapudnona, impalgak ni Jehova dagiti panggepna kadagiti napakumbaba ket dina impakaammo dagita kadagiti napalangguad. Maipapan iti daytoy a banag, kinuna ni Jesus: “Idaydayawka iti publiko, Ama, Apo ti langit ken daga, agsipud ta inlemmengmo dagitoy a banag kadagiti mamasirib ken nasaririt ket impalgakmo ida kadagiti ubbing.” (Mateo 11:25) Naisangsangayan a pribilehio ti maibilang kadagiti napakumbaba nga agserserbi iti Soberano iti Uniberso a ni Jehova.
25 Impaayannatayo met ti Dios iti pribilehio a mangisuro iti sabsabali maipapan kenkuana. Laglagipenyo a di umiso ti ibagbaga dagidiay mangisursuro kadagiti kinaulbod maipapan ken Jehova. Dayta ti makagapu a di umiso ti pagarup ti adu a tattao maipapan ken Jehova, ta ibilangda a di maseknan ken awanan asi. Madadaankayo kadi, wenno magagaran pay ketdi, a tumulong a mangatur iti di umiso a pagarup dagiti tattao maipapan ken ni Jehova? Kayatyo kadi a ti kinapudno maipapan ken Jehova ket maammuan dagiti napudno ti panagpuspusoda a tattao iti sadinoman? No kasta, ipakitayo ti panagtulnogyo iti Dios babaen ti sireregta a panangikasaba ken panangisuroyo iti sabsabali maipapan iti isursuro ti Biblia kadagiti agkakapateg a suheto. Masapul a maammuan dagiti agbirbirok iti kinapudno ti talaga nga isursuro ti Biblia.
Ania Dagiti Sungbatyo?
• Kasanotay nga ammo a maseknan ti Dios kadatayo?
• Apay nga addatayo ditoy daga?
• Ania ti mapasamak kadatayo no mataytayo?
• Ania ti nangnangruna a magustuanyo kadagiti paset ti libro nga Isursuro ti Biblia?
[Dagiti Ladawan iti panid 22]
Isursuro ti Biblia nga agpatingganto ti panagsagaba
[Credit Lines]
Makinngato a kannawan, ubing a babai: © Bruno Morandi/age fotostock; kannigid, babai: AP Photo/Gemunu Amarasinghe; makimbaba a kannawan, dagiti nagbakuit: © Sven Torfinn/Panos Pictures
[Ladawan iti panid 23]
Dagiti nalinteg agbiagdanto nga agnanayon iti Paraiso