Panangibaga iti Pudno—Manamnama Laeng Kadagiti Sabsabali?
“DIAK kayat ti naulbod, ken diak kayat ti mapagulbodan!” kinuna ti maysa a balasang nga agtawen iti 16. Kasta met ti rikna ti kaaduan kadatayo. Kayattayo a pudno ti impormasion a maited kadatayo, naisao man dayta wenno naisurat. Ngem ibagbagatayo kadi ti pudno kadagiti sabsabali?
Iti maysa a surbey a naaramid idiay Alemania, kaaduan ti nagkuna a “mabalin ti agulbod kadagiti babassit a banag tapno masalakniban ti maysa ti bagina ken ti sabsabali. Kasapulan pay ketdi dayta tapno mataginayon ti kappia.” Maysa a periodista ti nagkuna: “Iti amin a tiempo, nasayaat no ibagatayo ti pudno, ngem kasla saan a makaparagsak dayta iti biag.”
Kayattayo kadi nga agsao koma iti pudno dagiti tattao ngem datayo a mismo agulbodtayo no dadduma gapu ta mariknatayo a nainkalintegan ti panagaramidtayo iti kasta? Napateg kadi no ibagatayo ti pudno wenno agulbodtayo? Ania dagiti pagbanagan ti panagulbod?
Dakes a Resulta ti Panagulbod
Usigem ti dakes a resulta ti panagulbod. Mapukaw ti panagtalek dagiti agassawa ken kameng ti pamilia gapu iti panagulbod. Ti awan nakaibatayanna a tsismis mabalin a dadaelenna ti reputasion ti maysa a tao. Dumakkel ti gastos ti negosio gapu iti panagkusit dagiti empleado isu a ngumina dagiti tagilako. Bassit ti buis a makolekta no di umiso dagiti maideklara a buis isu a di maipaay ti gobierno dagiti serbisio publiko. Madadael wenno mamulitan ti reputasion dagiti mararaem nga institusion gapu iti palso nga impormasion dagiti managsirarak. Mapukaw ti adu a tawen nga urnong dagiti nalaka a mamatpati nga agipuonan wenno mabalin a nakarkaro pay ti pagbanaganna gapu kadagiti gakat a napartak a panguartaan a naibatay iti kinaulbod. Awan duadua nga ibaga ti Biblia kadatayo a karaman kadagiti bambanag a karimon ni Jehova a Dios dagiti “ulbod a dila” ken “ulbod a saksi nga agyesngaw kadagiti kinaulbod”!— Proverbio 6:16-19.
Makadangran agpadpada kadagiti tattao ken iti intero a kagimongan ti nasaknap a panagulbod. Mabalin nga awan ti siasinoman a sumupiat iti dayta. Apay ngarud nga igagara dagiti tattao ti agulbod? Amin kadi a saan a panangted iti di umiso nga impormasion ket panagulbod? Usigentayo ti sungbat dagitoy ken ti dadduma pay a saludsod iti sumaganad nga artikulo.
[Ladawan iti panid 3]
Mapukaw ti panagtalek dagiti agassawa iti maysa ken maysa gapu iti panagulbod