Tagiragsakentayo ti Napintas a Dagatayo
NAKITAN dagiti astronomo a ti pagnanaedan ti sangatauan ket maysa laeng a nagbassit a tinukel iti awan beddengna ken nakalawlawa nga uniberso. Awanen ti sabali a paset ti uniberso a pakasarakan iti biag. Ti laeng planeta a Daga ti addaan kadagiti maitutop a kasasaad a mamagbalin a posible iti biag.
Kanayonanna, mabalintayo a tagiragsaken ti biag iti daytoy napintas a globo. Anian a makaparagsak ti mainitan no nalamiis ti aldaw! Asino kadatayo ti di masdaaw iti makapaamanga nga isisingising wenno ilelennek ti init? Siempre, ti inittayo ket saan laeng a mangparagsak kadagiti sentidotayo. Napateg dayta iti mismo a panagbiagtayo.
Iti din mabilang a minilion a tawen, ti puersa ti grabidad ti init ti mangkonkontrol iti Daga ken iti dadduma pay a planeta kadagiti permanente a pagrikusanda. Kasta met, kas iti ad-adalen dagiti estudiante iti eskuelaan, ti intero a sistema solar ket agrikrikus iti aglikmut ti tengnga ti galaksitayo a Milky Way. Ngem ti init ket maysa laeng iti nasurok a 100 a bilion a bituen nga agrikrikus iti tengnga ti galaksitayo.
Ti galaksi a Milky Way ket tengtenglen ti grabidad iti rimmuok ti agarup 35 a galaksi. Dagiti dakdakkel a rimmuok ket aglaon iti rinibu a galaksi. Saan la ketdi a natalged unay ti sistema solartayo no adda dayta iti dakdakkel ken napusek a rimmuok dagiti galaksi. Ngem kas iti agdama a kasasaadna, manmano a paset ti uniberso “ti maitutop iti komplikado a biag a kas iti biagtayo,” kinuna da Guillermo Gonzalez ken Jay W. Richards iti libroda a The Privileged Planet.
Ti kadi kaadda ti biag iti daytoy a planeta ket naiparparna laeng a resulta ti dadduma a paset ti “big bang” wenno nakapigpigsa a panagbettak idi un-unana a nakaigapuan ti itataud ti uniberso? Wenno adda kadi nakasaysayaat a panggep ti biag iti daytoy napintas a planeta a Daga?
Napanunot ti adu a tattao a ti pagtaengantayo a daga ket espesipiko a nadisenio tapno mangsustiner iti biag.a Sinigsiglon ti napalabas, maysa a Hebreo a dumadaniw ti nangitampok iti Daga ken ti langit. Insuratna: “No makitak ti langlangitmo, dagiti aramid ti ramramaymo, ti bulan ken dagiti bituen nga insaganam, ania ti mortal a tao?” (Salmo 8:3, 4) Pinati daytoy a dumadaniw nga adda la ketdi ti maysa a Namarsua. Nainkalintegan kadi dayta a konklusion iti nasientipikuan a panawentayo?
[Footnote]
[Kahon/Ladawan iti panid 3]
“Manipud iti adayo, ti Daga ket kas iti asul a saniata nga aggilapgilap iti nasipnget a law-ang,” kinuna ti The Illustrated Science Encyclopedia—Amazing Planet Earth.
[Credit Line]
Globo: U.S. Fish & Wildlife Service, Washington, D.C./NASA