Disenio nga Awanan Diseniador?
AGARUP 150 a tawenen ti napalabas sipud idi insingasing ni Charles Darwin a ti natural selection (proseso a dagiti laeng kapigsaan ti matda) ti makagapu a komplikado ken nadumaduma dagiti sibibiag a banag. Ngem itay nabiit, ti teoriana nga ebolusion ken dagiti moderno nga interpretasion iti dayta ket kukuestionaran dagidiay mamati a naigagara ti nakaskasdaaw a disenio dagiti sibibiag nga organismo. Uray ti adu a mabigbigbig a sientista ket saanda a mamati nga ebolusion ti makagapu a nadumaduma ti kita dagiti sibibiag a banag ditoy daga.
Dadduma kadagita a sientista ket addaan iti naiduma nga argumento, a maawagan iti nainsiriban a pannakadisenio. Ikalinteganda a ti pannakadisenio ti sangaparsuaan ket sititibker a pasingkedan ti biolohia, matematika, ken sentido komon. Idagdagadagda kadagiti eskuelaan a maisuro dayta kadagiti estudiante. Nabara ti panagsusupiat maipapan iti ebolusion, nangnangruna idiay Estados Unidos. Ngem maipadpadamag a kasta met laeng ti mapaspasamak idiay England, Netherlands, Pakistan, Serbia, ken Turkey.
Makatikaw a Panangipuera
Nupay kasta, iti naannad pannakaisaona a panangdepensada iti ideya a nainsiriban a pannakadisenio, masansan nga adda nakadidillaw nga ipupuerada. Awan man la a pulos ti nadakamatda a diseniador. Mamatikayo aya a posible nga adda disenio ngem awan diseniador? Impadamag ti The New York Times Magazine a dagiti mangitantandudo iti nainsiriban a pannakadisenio “saanda nga espesipiko a dinakamat no asino wenno ania dayta a diseniador.” Kinuna ni mannurat a Claudia Wallis nga “agan-annad” dagiti promotor ti nainsiriban a pannakadisenio “tapno ti Dios ket saanda a madakamat iti diskusion.” Inkomento met ti magasin a Newsweek nga iti “ideya a nainsiriban a pannakadisenio, saan a nadakamat ti kaadda ken kinasiasino ti diseniador.”
Ngem nalabit maamirisyo a minamaag no ditay akseptaren ti kaadda ken kinasiasino ti diseniador. Kasano koma a naan-anay a maawatantayo ti pannakadisenio ti uniberso ken ti biag a mismo no mailimed wenno saan man la a mausig ti kaadda ken kinasiasino ti diseniador?
Dagiti sumaganad a saludsod ket adda pakainaiganda iti debate maipapan iti panamati iti kaadda wenno kaawan ti diseniador: Ti kadi panamati iti kaadda ti nabilbileg ngem tao a diseniador lapdanna ti irarang-ay iti panagadal iti siensia? Satay la aya akseptaren ti kaadda ti masirib a diseniador no awan sabalin a mabirokantayo nga eksplanasion? Ken talaga kadi a nainkalintegan a patien a no adda disenio adda ngarud diseniador? Dagitoy ken dagiti nainaig a saludsod ket masungbatan iti sumaganad nga artikulo.
[Dagiti Ladawan iti panid 3]
Namati ni Charles Darwin a ti natural selection ti makagapu a komplikado ti biag
[Credit Line]
Ni Darwin: Rinetrato ni Mrs. J. M. Cameron/Retrato a kukua ti U.S. National Archives