Di Nainsiriban a Pangngeddeng
NAPALUNGDO, natulnog iti linteg, ken relihioso ti maysa a nabaknang nga agturay. Idi immasideg ken Jesus, nagparintumeng ket inyimtuodna: “Naimbag a Mannursuro, ania ti masapul nga aramidek tapno agtawidak iti agnanayon a biag?”
Kas sungbat, impasimudaag ni Jesus a masapul a tungpalenna dagiti bilin ti Dios tapno magun-odna ti biag. Idi dinamag ti agturay no ania a talaga ti kayatna a sawen, kinuna ni Jesus: “Dika mamapatay, Dika makikamalala, Dika agtakaw, Dika mangsaksi iti ulbod, Dayawem ni amam ken ni inam, ken, Masapul nga ayatem ti padam a tao a kas iti bagim.” Agkakapateg dagitoy a bilin a sagudayen ti Linteg a naited ken Moises. Kinuna ngarud ti agturay: “Sinalimetmetakon amin dagitoy; ania pay ti pagkurangak?”—Mateo 19:16-20.
Sidudungngo a kinuna kenkuana ni Jesus: “Maysa a banag ti agkurang kenka: Inka, ilakom no ania a bambanag ti adda kenka ket itedmo kadagiti napanglaw, ket maaddaankanto iti gameng idiay langit, ket umayka agbalinka a pasurotko.”—Marcos 10:17-21.
Iti kasta, naipasango ti agkabannuag nga agturay iti maysa a nadagsen a desision. Ania ti aramidenna? Sidadaan kadi a mangtallikud kadagiti kinabaknangna ket agbalin a pasurot ni Jesus, wenno salimetmetanna ketdi dagita a sanikuana? Agurnong ngata kadagiti gameng ditoy daga, wenno agurnong kadagiti gameng idiay langit? Narigatna la ketdi a desisionan dayta. Awan duadua nga interesado a mangpasayaat iti relasionna iti Dios, yantangay an-annurotenna ti Linteg ken nagimtuod no ania pay ti rumbeng nga aramidenna tapno magun-odna ti anamong ti Dios. Ania ti inaramidna? “Pimmanaw a sileleddaang, ta agik-ikut idi iti adu a sanikua.”—Marcos 10:22.
Di nainsiriban ti desisionna. No nagbalin a matalek a pasurot ni Jesus, mabalin a nagun-odna koma ti birbirokenna—ti biag nga agnanayon. Saan a naibaga kadatayo no ania ti napasamak kenkuana. Ngem ammotayo nga agarup uppat a dekada kalpasanna, dagiti buyot ti Roma dinadaelda ti Jerusalem ken ti dakkel a paset ti Judea. Adu a Judio ti natay ken napukawda dagiti kinabaknangda.
Maisupadi iti agkabannuag nga agturay, nainsiriban ti desision ni apostol Pedro ken ti dadduma pay nga adalan. ‘Pinanawanda ti amin a bambanag’ ket sinurotda ni Jesus. Pudno a nagunggonaanda iti dayta a desisionda! Kinuna ni Jesus nga ad-adu nga amang ti masagrapda a bendision ngem iti bambanag a tinallikudanda. Malaksid iti dayta, tawidenda ti biag nga agnanayon. Saanda a nagbabawyan dayta a desisionda.—Mateo 19:27-29.
Maipasangotayo amin agpadpada iti nalaka ken narigat a desision. Ania ti balakad ni Jesus maipapan iti dayta? Ipangagyo kadi ti balakadna? Sibabaknang a magunggonaankayo no aramidenyo dayta. Usigentayo itan no kasanotayo a matulad ni Jesus tapno magunggonaantayo kadagiti balakadna.