“Ti Pirak Kukuak, ket ti Balitok Kukuak”

IDI maikanem a siglo K.K.P., ti ari ti Persia a ni Ciro winayawayaanna ti ili ti Dios manipud idiay Babilonia. Rinibu kadakuada ti nagsubli idiay Jerusalem tapno bangonenda manen ti nadadael a templo ni Jehova. Narigat idi ti biag dagiti nagsubli ken busoren dagiti kabangibangda a nasion ti panagibangonda manen. Gapuna, agduadua ti dadduma kadagiti agibangbangon no mairingpasda pay ti proyekto.

Babaen ken propeta Haggeo, impanamnama ni Jehova a saranayenna ida. “Yugayogekto dagiti amin a nasion, ket umayto dagiti matarigagayan a banag dagiti amin a nasion; ket daytoy a balay punnuekto iti dayag,” kinuna ti Dios. No maipapan iti material a pakaseknan dagiti agibangbangon, kastoy ti kuna ni Haggeo: “‘Ti pirak kukuak, ket ti balitok kukuak,’ kuna ni Jehova ti buybuyot.” (Haggeo 2:7-9) Lima a tawen kalpasan nga insawang ni Haggeo dagita a makapabileg a sasao, nairingpas ti proyekto.​—Esdras 6:13-15.

Makaparegta met kadagiti agdama nga adipen ti Dios dagiti sasao ni Haggeo no mangisayangkatda kadagiti dadakkel a proyekto mainaig iti panagdayaw ken Jehova. Idi 1879, idi impablaak ti klase matalek ken masirib nga adipen daytoy a pagbasaan, a maaw-awagan idi a Zion’s Watch Tower and Herald of Christ’s Presence, naglaon daytoy kadagiti sasao a: “Patienmi a supsuportaran ni JEHOVA ti ‘Zion’s Watch Tower.’ Gapuna, pulos a saanto a dumawat wenno umararaw maipaay iti tulong ti tao. No dinto mangipaay iti kasapulan a pondo Daydiay a nagkuna: ‘Amin a balitok ken pirak kadagiti bambantay kukuak,’ pagilasinan daytan nga isardengmi ti agipablaak.”

Ngem saan a pulos a simmardeng ti panagipablaak iti daytoy a magasin. Idi damo, 6,000 a kopia ti nayimprenta ken Ingles laeng. Ita, adda promedio a 28,578,000 a kopia ti mayim-imprenta iti kada ruar, ken magun-odan iti 161 a lenguahe.a Ti kakuyogna nga Agriingkayo! ket mayim-imprenta met iti promedio a 34,267,000 a kopia iti 80 a lenguahe.

Adu ti proyekto dagiti Saksi ni Jehova a kapada Ti Pagwanawanan ti panggepna​—ti pannakaitan-ok ni Jehova kas Soberano nga Apo iti uniberso ken ti pannakaiwaragawag ti naimbag a damag maipapan iti Pagarian. (Mateo 24:14; Apocalipsis 4:11) Patien dagiti Saksi ita ti kinuna daytoy a pagbasaan idi 1879 a supsuportaran ti Dios ti trabahoda. Ken ipaayna ti pondo kadagiti proyekto nga anamonganna. Kasano ngarud a masupsuportaran ti trabaho dagiti Saksi ni Jehova? Ken ania dagiti proyekto nga isaysayangkatda tapno maikasaba ti naimbag a damag iti intero a lubong?

Kasano a Masupsuportaran ti Trabaho?

No mangaskasaba dagiti Saksi ni Jehova, gagangay nga adda mangisaludsod kadakuada, “Masusuelduankayo kadi iti panangasabayo?” Saan. Boluntario nga ar-aramidenda dayta. Gapu iti panagyamanda, adu nga oras ti busbusbosen dagitoy nga ebanghelisador a mangisarita kadagiti sabsabali iti maipapan ken Jehova ken iti kari ti Biblia a nasaysayaat a masanguanan. Apresiarenda ti inaramid ti Dios agpaay kadakuada ken no kasano a ti naimbag a damag pinasayaatna ti biag ken panangmatmatda. Gapuna, kayatda met nga iranud dagitoy a naimbag a bambanag. Iti kasta, an-annurotenda ti prinsipio nga imbaga ni Jesus: “Inawatyo nga awan bayadna, itedyo nga awan bayadna.” (Mateo 10:8) Wen, gapu ta kayatda nga ipakaammo ti maipapan ken Jehova ken ni Jesus, usarenda ti kuartada a mangiranud kadagiti patpatienda uray kadagidiay agnanaed iti adayo.​—Isaias 43:10; Aramid 1:8.

Agkasapulan iti dakkel a pondo ti trabaho a panangasaba gapu iti kasaknapna ken kadagiti pamay-an ti pannakaibanagna a kas kadagiti pagimprentaan, opisina, Assembly Hall, pagtaengan dagiti misionero, ken dadduma pay. Paggappuan ngay ti pondo? Manipud iti boluntario a kontribusion. Saan nga obligaren dagiti Saksi ni Jehova ti tunggal miembro ti kongregasion a mangted iti kuarta a mangsuportar iti trabaho ti organisasionda, ken dida met pabayadan dagiti iwarwarasda a publikasion. No adda mayat nga agdonar tapno masuportaran ti trabahoda a panangisuro, maragsakan dagiti Saksi nga umawat iti dayta. Usigentayo no ania ti ramanen ti maysa laeng a benneg ti panangikasaba iti naimbag a damag iti intero a lubong​—ti panagipatarus.

Dagiti Publikasion a Maipatpatarus iti 437 a Lenguahe

Iti adu a tawen, dagiti publikasion dagiti Saksi ni Jehova ti maysa kadagiti kasaknapan a maipatpatarus iti intero a lubong. Maipatpatarus iti 437 a lenguahe dagiti tract, broshur, magasin, ken libro. Dakkel ti magasto iti panagipatarus a kas met laeng kadagiti dadduma a trabaho a mainaig iti pannakaikasaba ti naimbag a damag. Ania ti ramanen ti panagipatarus?

No mabukel dagiti editor ti linaon dagiti Ingles a publikasion dagiti Saksi ni Jehova, maipatulod dagita babaen ti Internet kadagiti grupo dagiti nasanay nga agipatpatarus iti intero a lubong. Kada grupo ipatarusna dagiti publikasion iti lenguahe a pakaipablaakanna. Dagitoy a grupo ket buklen ti 5 agingga iti 25 a miembro depende iti kaadu ti proyekto ken karigat ti lenguahe nga ipatpatarusda.

Mabasa a naimbag ken maatur dagiti naipatarus tapno nalawag ken siuumiso a mayallatiw dagiti kapanunotan nga adda iti orihinal. Mangyeg daytoy iti nagduduma a karit. No adda dagiti narigat a termino a nausar iti artikulo nga ipatarusda, masapul nga agsukimat a naimbag dagiti agipatpatarus agpadpada iti lenguahe a maipatpatarus (Ingles wenno dadduma pay a lenguahe a kas iti Pranses, Ruso, wenno Espaniol) ken iti lenguahe a pakaipatarusanna tapno masigurado nga umiso. Kas pagarigan, no salaysayen ti Agriingkayo! ti artikulo maipapan iti siensia wenno historia, masapul nga agsukimatda a naimbag.

Adu nga amin-tiempo wenno paset-tiempo nga agipatpatarus ti agtartrabaho kadagiti sanga nga opisina dagiti Saksi ni Jehova. Dadduma ti adda a mismo kadagiti lugar a mangus-usar iti lenguahe nga ipatpatarusda. Awan sueldo dagitoy nga agipatpatarus. Dagiti amin-tiempo nga agipatpatarus ket maipaayanda laeng iti kuarto, taraon, ken bassit a gastuen. Adda agarup 2,800 a Saksi nga agipatpatarus iti intero a lubong. Iti agdama, 98 a sanga nga opisina dagiti Saksi ni Jehova ti addaan kadagiti grupo dagiti agipatpatarus wenno mangimatmaton kadagiti grupo nga adda iti sabali a lugar. Kas pagarigan, ti sanga nga opisina ti Russia imatmatonanna ti nasurok a 230 nga amin-tiempo wenno paset-tiempo nga agipatpatarus iti nasurok a 30 a lenguahe, a pakairamanan ti dadduma a saan unay a pagaammo a lenguahe iti lugarda a kas iti Chuvash, Ossetian, ken Uighur.

Panangpasayaat iti Kalidad ti Patarus

Kas pagaammo ti asinoman nga agsursuro iti sabali a lenguahe, saan a nalaka ti agipatarus kadagiti narikut nga ideya. Masapul nga ipatarusda a siuumiso dagiti impormasion ken ideya ti maipatpatarus nga artikulo ken masapul a naannayas a basaen a kas man la saan a patarus dayta. Agkalikagum dayta iti kinasigo nga agipatarus. Ti kabbaro kasapulanna ti adu a tawen a panagsanay sakbay nga agbalin a nasigo a managipatarus isu a dagiti Saksi ni Jehova ipapaayanda ida iti agtultuloy a panagsanay. No dadduma, sarungkaran ida dagiti instruktor tapno tulonganda dagitoy a grupo a mangpasayaat iti panagipatarusda ken iti panangusarda iti programa ti kompiuter.

Nasayaat ti resulta dagitoy a panagsanay. Kas pagarigan, impadamag ti sanga nga opisina dagiti Saksi ni Jehova idiay Nicaragua: “Iti umuna a gundaway, adda instruktor manipud iti sanga nga opisina ti Mexico a nangsanay kadagiti agipatpatarus iti lenguahe a Miskito mainaig kadagiti pamay-an ken estilo ti panagipatarus. Nagbalin a nasigsigo dagiti managipatarus. Simmayaat ti kalidad dagiti patarus.”

Dagiti Makatukay-puso a Sasao

Maipatpatarus ti Biblia ken dagiti naibatay iti Biblia a literatura iti lenguahe dagiti tattao tapno matukay ti pusoda, ket kasta ti mapaspasamak. Idi 2006, naragsakan dagiti Saksi ni Jehova idiay Bulgaria idi nairuar ti Baro a Lubong a Patarus ti Kristiano a Griego a Kasuratan iti lenguaheda. Impadamag ti sanga nga opisina ti Bulgaria a nakaawatda iti adu nga ebkas ti panagyaman. Kuna dagiti kakabsat a “ti Biblia tinukayna ti pusoda, saan laeng a ti isipda.” Maysa a lakay a taga-Sofia ti nagkuna: “Adun a tawen a nabasak ti Biblia, ngem ita laeng a nakabasaak iti patarus a nalaka a maawatan ken direkta a sumalput iti puso.” Kalpasan a naawatda idiay Albania ti kompleto a Baro a Lubong a Patarus iti lenguaheda, kastoy ti kinuna ti maysa a Saksi sadiay: “Nagmayat a denggen ti Sao ti Dios iti lenguahe ti Albania! Pudno a pribilehio a makasaritanatayo ni Jehova iti bukodtayo a lenguahe!”

Mabalin nga agkalikagum iti adu a tawen ti panangipatarus ti maysa a grupo iti intero a Biblia. Ngem makunayo kadi nga adda nasayang no agbalin a nalawlawag ti Sao ti Dios kadagiti minilion a tattao?

“Katrabahuannakami ti Dios”

Pudno, ti panagipatarus ket maysa laeng kadagiti adu a benneg ti epektibo a panangikasaba iti naimbag a damag. Agkalikagum iti dakkel a panagregget ken pondo ti panagsurat, panagimprenta, ken panagipatulod kadagiti naibatay iti Biblia a publikasion ken dadduma pay nga aktibidad ti sanga nga opisina, sirkito, ken kongregasion dagiti Saksi ni Jehova. Kaskasdi, dagiti adipen ti Dios ‘situtulok nga idatdatonda ti bagbagida’ a mangitungpal iti daytoy a trabaho. (Salmo 110:3) Ibilangda a pribilehio ti tumulong ken gapu iti dayta, matmatanda a dayaw ti panangibilang kadakuada ni Jehova kas ‘katrabahuanna.’​—1 Corinto 3:5-9.

Pudno a daydiay nagkuna, “ti pirak kukuak, ket ti balitok kukuak” ket saan nga agpannuray iti pinansial a tulongtayo tapno mairingpas ti trabahona. Kaskasdi, kayat ni Jehova a marikna dagiti adipenna nga adda pasetda iti pannakasantipikar ti naganna babaen ti panagdonarda maipaay iti pannakaikasaba dagiti mangispal-biag a kinapudno “kadagiti amin a nasion.” (Mateo 24:14; 28:19, 20) Saankayo kadi a matignay a mangsuportar a naan-anay iti daytoy dinton maulit a trabaho?

[Footnote]

[Kahon iti panid 18]

“PAGPANUNOTENNATAYO A NAIMBAG”

Maysa a balasitang nga agtawen iti 14 ti nagsurat iti sanga nga opisina dagiti Saksi ni Jehova idiay Cameroon: “Kalpasan a nagatangko dagiti makatawen a kasapulak idiay eskuelaan, nailakok iti U.S. $5 ti dua kadagiti libro a nausarko idi napan a tawen. Idonarko daytoy a gatad agraman ti kanayonan a U.S. $1.82 nga urnongko. Sapay koma ta itultuloyyo ti nagsayaat a trabahoyo. Agyamanak kadagiti ipabpablaakyo a Pagwanawanan ken Agriingkayo! Pagpanunotennatayo a naimbag dagitoy a magasin.”

[Kahon/Ladawan iti panid 18]

NAISANGSANGAYAN A DONASION

Naawat ti sanga nga opisina dagiti Saksi ni Jehova idiay Mexico ti surat ni Manuel, maysa a manangapresiar nga agtawen iti innem ken agnanaed iti Estado ti Chiapas. Gapu ta dina pay ammo ti agsurat, insuratan ti gayyemna. Kuna ni Manuel: “Inikkannak ni lelangko iti maysa a takong. Idi naaddaan kadagiti burias, pinilik ti kasayaatan ket tinarakenko babaen ti tulong dagiti kakabsat. Buyogen ti ayat, idonarko ti naglakuak. Agdagsen daytoy iti 100 a kilo ket nailakok iti U.S. $110. Usarenyo koma daytoy a gatad agpaay iti trabaho ni Jehova.”

[Kahon iti panid 19]

‘USARENYO DAYTOY A MANGIPATARUS ITI BIBLIA’

Kadagiti kombension distrito dagiti Saksi ni Jehova idi 2005 idiay Ukraine, nairuar ti Baro a Lubong a Patarus ti Kristiano a Griego a Kasuratan iti lenguaheda. Kabigatanna, nakitada daytoy a surat iti kahon ti kontribusion: “Siam ti tawenko. Pagyamanan unay iti panangiruaryo iti Griego a Kasuratan. Ik-ikkannakami ni Nanang iti pagpletemi a mapan ageskuela. Ngem no saan nga agtudo, magnakami ken adingko isu a nakaurnongkami iti U.S. $10. Kayatmi ken adingko nga usarenyo koma daytoy a gatad a mangipatarus iti intero a Biblia iti lenguahe nga Ukranio.”

[Kahon iti panid 20, 21]

DAGITI PAMAY-AN TI DADDUMA A MANGTED

DAGITI KONTRIBUSION ITI SANGALUBONGAN A TRABAHO

Adu ti mangilasin iti kantidad tapno itinnagda kadagiti kahon ti kontribusion a namarkaan iti “Contributions for the Worldwide Work​—Matthew 24:14.”

Dagiti kongregasion binulan nga ipatulodda dagitoy a kantidad iti opisina dagiti Saksi ni Jehova iti pagilianda. Mabalin met nga ipatulodyo a direkta dagiti donasion a kuarta iti Watch Tower Bible and Tract Society of the Philippines, Inc., P.O. Box 2044, 1060 Manila, wenno iti sanga nga opisina dagiti Saksi ni Jehova iti pagilianyo. Dagiti tseke a maipatulod iti nadakamat nga adres ket nasken a maipanagan iti “Watch Tower.” Mabalin met nga idonar dagiti alahas wenno dadduma pay a napapateg a bambanag. Masapul a mapakuyogan dagitoy a kontribusion iti ababa a surat a mangibagbaga a dayta ket direkta a sagut.

KONDISIONAL A DONASION

Ti kuarta ket mabalin a maitalek iti Watch Tower tapno mausar iti sangalubongan. Ngem maisubli dayta no kiddawen ti nangitalek. Para iti kanayonan nga impormasion, agsuratkayo iti Treasurer’s Office iti nadakamat nga adres.

NAIPLANO A PANAGIDONAR

Malaksid kadagiti direkta a sagut ken kondisional a donasion a kuarta, adda dagiti sabali pay a pamay-an ti panagidonar a makatulong iti sangalubongan a panagserbi nga agpaay iti Pagarian. Karaman ditoy ti:

Insurance: Mabalin a ti Watch Tower ti agserbi a benepisario ti life insurance policy wenno ti retirement/pension plan.

Deposito iti Banko: Dagiti deposito iti banko, sertipiko ti deposito, wenno indibidual a deposito iti panagretiro ket mabalin nga italek wenno maipanagan iti Watch Tower Society inton matay ti nagidonar, a mayannurot kadagiti paglintegan ti lokal a banko.

Stock ken Bond: Mabalin nga idonar dagiti stock ken bond iti Watch Tower kas direkta a sagut.

Lote ken Pasdek: Mabalin nga idonar ti lote wenno pasdek kas direkta a sagut wenno, iti kaso ti maysa a balay, mapalubosan nga agnaed sadiay ti nagdonar bayat a sibibiag. Makiumankayo iti sanga nga opisina iti pagilianyo sakbay a legal nga iyallatiwyo dagiti papeles ti aniaman a lote, balay, wenno pasdek.

Gift Annuity: Iti daytoy nga urnos, ti nagidonar iyallatiwna ti kuarta wenno dagiti security iti maysa a natudingan a korporasion nga us-usaren dagiti Saksi ni Jehova. Ti nagidonar, wenno daydiay tinudinganna, ket makaawat met iti espesipiko a kantidad kada tawen bayat a sibibiag. Makissayan ti buis a bayadan ti nagidonar iti tawen a mapatalgedan ti gift annuity.

Testamento ken Bambanag a Maitalek (Trust Fund): Mabalin nga ipatawid ti sanikua wenno kuarta iti Watch Tower babaen ti legal a testamento, wenno ti Watch Tower ti agserbi a benepisario ti katulagan mainaig kadagiti bambanag a maitalek. Mabalin nga addada bentahana iti buis no narelihiosuan nga organisasion ti benepisario ti trust.

Kas ipasimudaag ti termino a “naiplano a panagidonar,” kalikaguman daytoy ti panagplano daydiay agidonar. Tapno matulongan dagidiay agtarigagay a tumulong iti sangalubongan a trabaho dagiti Saksi ni Jehova babaen ti maysa a kita ti naiplano a panagidonar, naisagana ti Ingles ken Espaniol a broshur a napauluan iti Charitable Planning to Benefit Kingdom Service Worldwide. Naisurat daytoy a broshur tapno maipakaammo no ania ti nadumaduma a wagas a mabalin a maited dagiti sagut wenno tawid inton pumusay ti nagdonar. Kalpasan a nabasada ti broshur ken nakiumanda kadagiti bukodda a mammagbaga mainaig iti linteg wenno buis, adu dagidiay nakatulong iti narelihiosuan ken pangsaranay a trabaho dagiti Saksi ni Jehova iti intero a lubong ken naaprobetsarda dagiti benepisio mainaig iti panagbuis gapu iti panangaramidda iti kasta. Magun-od daytoy a broshur manipud iti Charitable Planning Office.

Para iti kanayonan nga impormasion, agsurat wenno agteleponokayo iti Charitable Planning Office, iti adres a nailista iti baba, wenno makiumankayo iti sanga nga opisina dagiti Saksi ni Jehova iti pagilianyo.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte

1105 Quezon City

Telepono: (02) 411-6090

[Dagiti Ladawan iti panid 19]

Dagiti agipatpatarus iti Miskito iti sanga nga opisina ti Nicaragua