Kasapulantayo ti Maispal!
ADDA pagminasan iti karbon idiay asideg ti Pittsburgh, Pennsylvania, E.U.A. a kellaat a nalayus iti minilion a litro a danum. Siam a minero ti napupok iti bassit nga espasio a 73 a metro ti kaunegna. Tallo nga aldaw kalpasanna, nakaruarda iti dayta a pagminasan a dida naan-ano. Kasano a naispal ti biagda?
Dagiti para alaw ket nagaramid iti abut nga 65 a sentimetro ti kaakabana babaen ti panangusarda kadagiti mapa ti pagminasan ken ti Global Positioning System. Kalpasanna, nangipauyaoyda iti kasla kapsula ti sukogna a tangkal agingga iti disso a nagdudupudopan dagita a minero. Saggaysa a simrekda iti dayta a tangkal sa naaonda iti dayta a pakaitanemanda koman. Naragsak, nabang-aran, ken agyamyamanda amin gapu iti pannakaispalda.
Mabalin a saan a pulos a mapadasan ti kaaduan kadatayo ti napasaran dagita a siam a minero wenno ditay pulos maipasango iti kasasaad a mamagpeligro iti biagtayo. Kaskasdi a kasapulantayo amin ti maispal, agsipud ta ditay maliklikan dagiti makadangran nga epekto ti panagsakit, panaglakay wenno panagbaket, ken ipapatay inton agangay. Kinuna ti matalek a patriarka a ni Job: “Ti tao, a nayanak manipud babai, ababa ti biagna ken namelmelan iti pannakariribuk. Kas iti sabong isu rimmuar ket makeltay, ket agtalaw a kas iti anniniwan ket saan nga agtalinaed.” (Job 14:1, 2) Nupay agarup 3,500 a tawenen ti napalabas, matungtungpal pay laeng dagita a sasao, ta siasino ngamin aya kadatayo ti makaliklik ken patay? Sadinoman ti pagnanaedantayo wenno kasano man ti panangsaluadtayo iti salun-attayo, masapul a maispaltayo manipud iti di maliklikan a panagsagaba, panaglakay wenno panagbaket, ken ipapatay.
Ikagkagumaan dagiti sientista ken ti dadduma pay a pagbalinen a napapaut ti biagtayo ngem iti ibilang dagiti tattao ita a gagangay a kapaut ti biag. Kinuna ti maysa nga organisasion a kalatna a “parmeken ti di magawidan nga ipapatay” ken “tulongan dagiti miembrona a mangragpat iti posibilidad a panagbiag nga awan inggana.” Ngem agingga ita, iti laksid ti idudur-as ti siensia ken nabileg a determinasion nga agballigi, ti gagangay latta a kapaut ti biag ket saan nga at-atiddog ngem iti 70 wenno 80 a tawen a dinakamat ni Moises 3,500 a tawenen ti napalabas.—Salmo 90:10.
Umanamongka man wenno saan iti kapanunotan ni Job maipapan iti biag ken ipapatay, saanmo a maliklikan ti tiempo nga ‘agtalawkanto met a kas iti anniniwan.’ Ngamin, gapu ken patay, mapanawamto dagiti gagayyemmo, pamiliam, pagtaengam, ken amin a nagapuanam. Insurat ni masirib nga Ari Solomon iti nagkauna nga Israel: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman, awananda metten a pulos kadagiti tangdan, agsipud ta ti pakalaglagipan kadakuada nalipatanen.”—Eclesiastes 9:5.
Ilawlawag ti Biblia ti nakalkaldaang a kinapudno a ni patay ket nabayagen nga ‘agturturay kas naulpit nga ari’ iti sangatauan. Wen, ni patay ti maudi a kabusor ti sangatauan, isu a kasapulan nga adda mangispal kadatayo. (Roma 5:14; 1 Corinto 15:26) Dagiti eksperto ken kalaingan iti daytoy a lubong no kanito ti emerhensia didaka maispal iti agnanayon. Nupay kasta, ni Jehova a Dios a Namarsua iti tao ket nangaramiden iti urnos tapno maipaay kenka ti kasta a pannakaispal.