Malagipyo Kadi?

Naragsakankayo kadi a nangbasa kadagiti nabiit pay a ruar Ti Pagwanawanan? No kasta, kitaentayo no masungbatanyo dagitoy a saludsod:

• Kaano a simmarungkar dagiti astrologo kenni Jesus?

Kuna ti maysa nga edision ti Biblia: “Dagiti Mago saanda a simmarungkar ken Jesus iti kulluong iti karabiyan ti pannakaipasngayna kas inaramid dagiti papastor. Simmarungkarda sumagmamano a bulan kalpasanna.” Ni Jesus ket maysa idin nga “ubing” ken agnanaeden iti maysa a balay. (Mat. 2:7-11) No adda balitok ken agkakapateg a regalo a naited ken Jesus idi karabiyan ti pannakaipasngayna, saan la koma a dua a tumatayab ti indaton ni Maria idiay templo 40 nga aldaw kalpasanna.​—1/1, panid 31.

• Ania ti mabalin nga aramiden ti adu a tattao tapno ad-adda a makapnek ti biagda?

Mabalin nga imtuoden ti maysa, ‘Mabalinko kadi a balbaliwan ti kasasaadko ken pasimplien ti panagbiagko?’ Kasta ti inaramid ni Amy. Isu ket nabaknang ngem saan a naragsak. Nabigbigna a ti panangitultuloyna iti karerana iti daytoy a lubong ti dandani nangiwawa kenkuana iti pammati. Gapuna, inkeddengna nga ipangpangruna ti Pagarian ket nagpayunir iti sumagmamano a panawen. Kinuna ni Amy, “Mariknak itan ti pannakapnek a diak napasaran” idi ragragpatek pay dagiti kalat iti lubong.​—1/15, panid 19.

• Ania ti mabalin a makatulong iti dadduma nga inna a maaddaan iti pannakapnek?

Adu nga inna ti mangmangged. Kayat ngamin ti dadduma kadakuada a maipaay ti kasapulan ti pamiliada, idinto a ti dadduma, tapno maaddaanda iti bukodda a kuarta wenno tapno mataginayonda ti naluho a panagbiagda. Dadduma ti agtrabaho gapu ta maragragsakanda iti dayta. Dagiti Kristiano nga inna dakkel ti rebbengenda iti pagtaengan​—nangnangruna no maladaga pay ti anakda. Dadduma ti agtrabaho laeng iti paset tiempo wenno nagikkat pay ketdi kadagiti trabahoda tapno ad-adu ti tiempoda iti pamiliada, banag a nangyeg iti dakkel a pannakapnek.​—2/1, panid 28-31.

• Ania a “kaputotan” ti tuktukoyen ni Jesus kadagiti sasaona iti Mateo 24:34?

Masansan nga inusar ni Jesus ti sao a “kaputotan” iti negatibo a pamay-an no makisarsarita kadagiti nadangkes wenno sarsaritaenna ti maipapan kadakuada. Ngem saan a dayta ti tuktukoyenna idi kasarsaritana dagiti adalanna, a dandani idi mapulotan iti nasantuan nga espiritu. Isuda ti nangnangruna a makaawat iti kaipapanan ti nadakamat idiay Mateo 24:32, 33. Maikunatayo ngarud a ti tuktukoyen ni Jesus ket dagiti napulotan a pasurotna, agpadpada idi umuna a siglo ken iti moderno a kaitungpalan dagiti sasaona.​—2/15, panid 23-4.

• Kasano a ti Linteg nagbalin a mannursuro kadatayo, kas nadakamat iti Galacia 3:24?

Masansan a ti nagkauna a mannursuro ket daydiay mapagtalkan nga adipen a mangsigurado iti kinatalged ti ubing ken kitaenna a matungpal ti pagayatan ti ama. Kasta met, ti Linteg salaknibanna dagiti Judio manipud kadagiti makadangran nga impluensia, kas iti panangasawa wenno pannakiasawa kadagiti pagano. Ngem kas iti mannursuro ti ubing, ti Linteg ket temporario, nga agserbi laeng agingga a dumteng ti Kristo.​—3/1, panid 18-21.

• Sigun iti Santiago 3:17, ania dagiti galad a rumbeng nga iparangarangtayo?

Tapno nadalustayo, masapul a laksidentayo a dagus dagiti dakes a bambanag. (Gen. 39:7-9) Masapul met a mannakikappiatayo, a liklikantayo ti mangriribuk wenno dagiti tigtignay a mangdadael iti talna. Isu a saludsodan koma ti tunggal maysa ti bagina: ‘Maysaak kadi a pagaammo kas mannakikappia wenno kas manangdadael iti kappia? Masansan kadi a makisupiatak kadagiti sabsabali? Nalakaak kadi a masaktan, wenno masansan a masairko ti sabsabali? Wenno sidadaanak kadi a mamakawan ken saan a mangipapilit iti bukodko a pagayatan?’​—3/15, panid 24-5.

• Apay nga in-inut ti panangpaimbag ni Jesus iti bulsek a lalaki? (Mar. 8:22-26)

Awan ti eksakto a sungbat ti Biblia. Ngem mabalin nga iti daytoy a gundaway, saan a kayat ni Jesus a mabigla daytoy a bulsek iti pannakaisubli ti panagkitana isu nga in-inut ti panangpaimbagna. Daytoy ti mangiparangarang iti naayat a pannakaseknan ni Jesus iti bulsek a lalaki.​—4/1, panid 30.