Ti Masursurotayo ken Jesus

Maipapan iti Pagarian ti Dios

Ania ti Pagarian ti Dios?

Ti Pagarian ti Dios ket maysa a gobierno a mangituray iti intero a daga. Kinuna ni Jesus: “Agkararagkayo, ngarud, a kastoy: . . . ‘Umay koma ti pagariam. Maaramid koma ti pagayatam, kas sadi langit, kasta met iti daga.’”​—Mateo 6:9, 10; Daniel 2:44.

Siasino dagiti agturay iti Pagarian ti Dios?

Nayanak ni Jesus tapno agbalin nga Agturay iti Pagarian ti Dios. Imbaga ti maysa nga anghel iti ina ni Jesus: “Ni Jehova a Dios itednanto kenkuana ti trono ni David nga amana, ket agturayto kas ari.” (Lucas 1:30-33) Kanayonanna, pinili ni Jesus ti dadduma kadagiti pasurotna tapno makipagturayda kenkuana. Kinunana kadagiti apostolna: “Dakayo dagidiay nagtalinaed kaniak kadagiti pannakasusuotko; ket mangaramidak iti tulag kadakayo, kas iti panangaramid ni Amak iti maysa a tulag kaniak, maipaay iti maysa a pagarian.” (Lucas 22:28, 29; Daniel 7:27) Agdagup iti 144,000 a pasurot ni Jesus ti makipagturay kenkuana.​—Apocalipsis 5:9, 10; 14:1.

Sadino ti pagturayan dayta a gobierno?

Ti Pagarian ti Dios ket agturay idiay langit. Kinuna ni Jesus kadagiti adalanna: “No mapanak ket mangisaganaak iti lugar a maipaay kadakayo [idiay langit], umayak manen ket awatenkayto nga ikuyog kaniak, tapno no sadino ti ayanko addakayo met koma. . . . Mapanak iti Ama.”​—Juan 14:2, 3, 12; Daniel 7:13, 14.

Ania ti aramidento ti Pagarian ti Dios maipapan iti kinadakes?

Talipuposento ni Jesus dagiti managdakdakes ditoy daga. Kinunana: “Inton ti Anak ti tao [ni Jesus] dumteng iti dayagna, ket amin dagiti anghel maikuyogda kenkuana, iti kasta agtugawto iti nadayag a tronona. Ket amin dagiti nasion maurnongdanto iti sanguananna, ket paglalasinennanto dagiti tattao iti maysa ken maysa . . . Ket agturongto dagitoy [nadangkes a tattao] iti agnanayon a pannakagessat, ngem dagiti nalinteg iti agnanayon a biag.”​—Mateo 25:31-34, 46.

Siasino dagiti agtalinaed ditoy daga nga iturayanto dayta a Pagarian?

Kinuna ni Jesus: “Naragsak dagiti naalumamay ti kababalinda, yantangay tawidendanto ti daga.” (Mateo 5:5; Salmo 37:29; 72:8) Mapnonto daytoy daga kadagiti tattao a mangikagkagumaan a mangayat iti padada a tao uray ita. Imbaga ni Jesus kadagiti pasurotna: “Mangtedak kadakayo iti baro a bilin, nga ayatenyo ti maysa ken maysa; kas iti panagayatko kadakayo, kasta met nga ayatenyo ti maysa ken maysa. Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”​—Juan 13:34, 35.

Ania ti aramidento ti Pagarian ti Dios agpaay iti sangatauan ditoy daga?

Paimbagento ni Jesus ti amin a sakit ti sangatauan. Idi adda ditoy daga, dinakamatna kadagiti bunggoy ti “maipapan iti pagarian ti Dios, ket pinaimbagna dagidiay agkasapulan iti pannakaagas.” (Lucas 9:11) Kalpasan a nasirmatana ni napagungar a Jesus, kinuna ni apostol Juan: “Nakitak ti maysa a baro a langit ken maysa a baro a daga . . . Nangngegko ti maysa a natbag a timek manipud iti trono a kunana: ‘Adtoy! Ti tolda ti Dios adda iti sangatauan . . . Ket punasennanto ti amin a lua kadagiti matada, ket awanton ni patay.’”​—Apocalipsis 21:1-4.

Ti Pagarian ti Dios pagbalinennanto a Paraiso daytoy daga. Kinuna daydi managdakdakes a kadua ni Jesus a napapatay: “Jesus, laglagipennak inton makagtengka iti pagariam.” Ket kinuna ni Jesus kenkuana: “Pudno ibagak kenka ita nga aldaw, Makikaduakanto kaniak idiay Paraiso.”​—Lucas 23:42, 43; Isaias 11:4-9.

Para iti kanayonan nga impormasion, kitaenyo ti kapitulo 8 ti libro nga Ania a Talaga ti Isursuro ti Biblia?a

[Footnote]