Ni Noe ken ti Layus—Agpaypayso, Saan a Sarsarita
IL-ILIWEM kadi ti agnaed iti nasaysayaat a lubong—a sadiay dagiti tattao ket agbibiagda a sitatalna? Maysa a lubong nga awan ti gubat, krimen, ken panangirurumen? No kasta, maliwliwaka manipud iti maysa a nagkauna a salaysay a mabalin a pagaammomon. Dayta ket maipapan ken Noe, maysa a naimbag a tao a nangbangon iti daong a nakaisalakananna ken ti pamiliana idi dimteng ti sangalubongan a layus a nangikisap kadagiti nadangkes.
Manmano ti estoria a nalatlatak ngem iti dayta. Ti salaysay maipapan iti napasamak ken Noe ket masarakan iti libro ti Biblia a Genesis, kapitulo 6 agingga iti 9, ken naulit a naisalaysay iti Koran ken kadagiti sarsarita ti nagadu a tattao iti intero a daga. Napasamak kadi a talaga ti Layus, wenno simboliko a sarsarita laeng dayta tapno maparegta dagiti tattao nga agaramid iti umiso? Dayta a saludsod ket sinigsiglon a pagdedebatean dagiti teologo ken sientista. Nupay kasta, ti Biblia a Sao ti Dios ibatadna nga agpaypayso dayta a salaysay, saan ket a sarsarita. Usigem daytoy:
Ti salaysay ti Genesis ibagana kadatayo ti eksakto a tawen, bulan, ken aldaw a nangrugi ti Delubio, no kaano a naisadsad ti daong ken no sadino ti nakaisadsadanna, ken no kaano a nagmaga ti rabaw ti daga. Eksakto met dagiti naibinsabinsa a detalye maipapan iti daong—ti diseniona, rukodna, ken material a nausar iti dayta. Maisupadi iti dayta, dagiti sarsarita ket kadawyanna a saan unay a nalawag ti detalye ti pannakadeskribirda.
Ti nadakamat iti Biblia a dua a salaysay maipapan iti kapuonan paneknekanda nga agpaypayso a nagbiag idi ni Noe. (1 Cronicas 1:4; Lucas 3:36) Da Esdras ken Lucas—a nangurnos kadagita a listaan dagiti kapuonan ket agpadpada a naannad a managsirarak. Natunton ni Lucas a ni Jesu-Kristo ket nagtaud iti kapuonan ni Noe.
Ni Noe wenno ti Layus ket dinakamat da propeta Isaias ken Ezequiel agraman dagiti Kristiano nga apostol a da Pablo ken Pedro.—Isaias 54:9; Ezequiel 14:14, 20; Hebreo 11:7; 1 Pedro 3:19, 20; 2 Pedro 2:5.
Ti Layus ket dinakamat ni Jesu-Kristo idi kinunana: “Kas iti napasamak idi kaaldawan ni Noe, kastanto met iti kaaldawan ti Anak ti tao: mangmanganda, umin-inumda, mangas-asawa dagiti lallaki, mayas-asawa dagiti babbai, agingga iti daydi aldaw a simrek ni Noe iti daong, ket dimteng ti layus ket dinadaelna ida amin.” (Lucas 17:26, 27) No saan koma a napasamak ti Delubio, awan koma ti serserbi ti imbaga ni Jesus maipapan iti “kaaldawan ti Anak ti tao.”
Impakpakauna ni apostol Pedro a dumtengto “dagiti managuy-uyaw” a di mangikankano iti ibagbaga ti Biblia. Insurat ni Pedro: “Maitunos iti kayatda, malibasan ida daytoy a kinapudno, . . . [a] nagpasar iti pannakadadael ti lubong iti daydi a tiempo [ni Noe] idi nalayus iti danum.” Maiparbeng kadi a ditay met ikankano “daytoy a kinapudno”? Saan! Intuloy ni Pedro: “Naidulin ti langlangit ken ti daga nga adda ita maipaay iti apuy ket maisagsaganada iti aldaw ti panangukom ken ti pannakadadael dagiti di nadiosan a tattao.”—2 Pedro 3:3-7.
Addanto manen tiempo a dagiti nadangkes ket dadaelen ti Dios, ken addanto manen dagiti makalasat. No tuladentayo ti ulidan ni Noe, mabalin a karamantayto kadagiti maisalakan nga agtaeng iti nasaysayaat a lubong.