Dagiti Kadi Planom Maitunosda iti Panggep ti Dios?
TI Clark’s nutcracker ket maysa nga agkanta a billit a dapuen a puraw ti kolorna ken makitkita nga agtayabtayab kadagiti kabakiran ti makinlaud a paset ti Amianan nga America. Iti tinawen, agurnong ken agikali dayta iti agarup 33,000 a bukbukel, nga idulinna dagita iti agarup 2,500 a nagduduma a disso kas panagsagana para kadagiti bulan ti nakaro a lam-ek. Talaga a ‘nainkasigudan a masirib’ dayta a billit gapu iti pamay-anna nga agidulin iti taraon agpaay iti masanguanan.—Proverbio 30:24.
Ngem ad-adda pay a naisangsangayan ti abilidad dagiti tattao. Kadagiti amin a parsua ni Jehova ditoy daga, awan makaartap iti abilidad dagiti tattao a makasursuro kadagiti kapadasanda iti biag ken agpaimpluensia kadagita iti panagaramidda kadagiti plano iti masanguanan. Kinuna ni masirib nga Ari Solomon: “Adu dagiti gakat iti puso ti maysa a tao.”—Proverbio 19:21.
Nupay kasta, kaaduanna nga awan pagpilian dagiti tattao no di ibasar dagiti planoda kadagiti pagarupda maipapan iti masanguanan. Kas pagarigan, iplanom dagiti aktibidadmo inton bigat gapu ta ipagarupmo nga aginitto ken sibibiagkanto pay. Ti umuna a pagarupmo ket naibasar kadagiti kinapudno, ngem ti maikadua ket medio di sigurado. Dayta a realidad ket dinakamat ni Santiago a mannurat iti Biblia idi kinunana: “Saanyo nga ammo no anianto ti biagyo inton bigat.”—Santiago 4:13, 14.
Saan a kasta ni Jehova a Dios. Ammona ti ‘pagnguduan manipud punganay.’ Sigurado a matungpal dagiti impakaammona a panggepna. Kinunana: “Ti pammatigmaanko agtalinaedto, ket isuamin a pakaragsakak aramidekto.” (Isaias 46:10) Ngem ania ti mapasamak no dagiti plano ti sangatauan ket maikontra iti panggep ti Dios?
No Dagiti Plano ti Tao ket Maikontra iti Panggep ti Dios
Agarup 4,000 a tawen ti napalabasen, implano dagiti nangibangon iti Torre ti Babel a lapdan ti panagwaras dagiti tattao. “Umaykayo!” kinunada. “Ibangonantayo ti bagbagitayo ti maysa a siudad ken kasta met ti maysa a torre a ti tuktokna dumanon iti langlangit, ket mangaramidtayo iti agdindinamag a nagan maipaay iti bagbagitayo, ta amangan no maiwarawaratayo iti isuamin a rabaw ti daga.”—Genesis 11:4.
Ngem maikontra dayta iti panggep ti Dios. Imbilinna ken Noe ken kadagiti annakna: “Agbungakayo ken agadukayo ket punnuenyo ti daga.” (Genesis 9:1) Ania ti inaramid ti Dios iti gakat dagiti rebelioso a tattao iti Babel? Riniribukna ti lenguaheda tapno dida agkikinnaawatan. Ania ti resulta dayta? “Iti kasta inwarawara ida ni Jehova manipud sadiay iti isuamin a rabaw ti daga.” (Genesis 11:5-8) Adda napateg a leksion a masapul a bigbigen idi dagiti nangibangon iti Babel. No dagiti plano ti tao ket naiduma iti panggep ti Dios, “ti pammatigmaan ni Jehova isunto ti agtalinaed.” (Proverbio 19:21) Agbibiagka kadi a maitunos iti dayta a leksion?
Ti Kinamaag ti Nabaknang a Tao
Mabalin nga awan planom a mangibangon iti torre, ngem adu ita ti agpalplano nga “agibangon” iti dakkel a deposito iti banko ken agurnong iti material a sansanikua tapno nanam-ayto ti biagda inton agretiroda. Natural laeng a kayat ti maysa a tao a tagiragsaken dagiti bunga ti nagbannoganna. Insurat ni Solomon: “Ti tunggal tao mangan ken pudno nga uminum ken makakita iti imbag iti isuamin a napinget a panagtrabahona. Dayta ti sagut ti Dios.”—Eclesiastes 3:13.
Sungsungbatantayo ken Jehova ti pamay-an a panangusartayo iti dayta a sagut. Agarup 2,000 a tawenen ti napalabas, impaganetget ni Jesus dayta a punto kadagiti adalanna babaen ti maysa a pangngarig. Kinunana: “Ti daga ti maysa a nabaknang a tao nagbunga a naimbag. Gapu itoy nangrugi a mangirason iti bagina, a kunkunana, ‘Ania ti aramidek, ita ta awanen lugar a pangurnongak kadagiti apitko?’ Gapuna kinunana, ‘Aramidekto daytoy: Rakrakekto dagiti kamaligko ket mangbangonak iti daddadakkel, ket sadiay urnongekto ti amin a bukbukelko ken ti amin a naimbag a bambanagko; ket kunaekto iti kararuak: “Kararua, addaanka iti adu a naimbag a banag a naidulin maipaay iti adu a tawen; agnam-ayka, manganka, uminumka, agragragsakka.”’” (Lucas 12:16-19) Kasla rasonable ti ambision ti nabaknang a tao, saan aya? Kas iti billit a Clark’s nutcracker a nadakamat itayen, dayta a lalaki iti pangngarig ket agparang nga agsagsagana para kadagiti kasapulanna iti masanguanan.
Ngem adda di umiso iti panagpampanunot daytoy a tao. Intuloy ni Jesus: “Ngem kinuna kenkuana ti Dios, ‘Maysa a di nainkalintegan, iti daytoy a rabii kalikagumanda kenka ti kararuam. Asino, ngarud, ti agtagikua iti bambanag nga impempenmo?’” (Lucas 12:20) Konkontraen kadi ni Jesus ti kinuna ni Solomon a ti trabaho ken dagiti ibungana a naimbag a banag ket sagut manipud iti Dios? Saan. Ania ti punto ni Jesus? Kinuna ni Jesus: “Kasta ti mapasamak iti tao nga agurnong iti gameng maipaay iti bagina ngem saan a nabaknang iti Dios.”—Lucas 12:21.
Isursuro ni Jesus kadagiti agdengdengngeg kenkuana a no agplanotayo, kayat ni Jehova nga ikabilangantayo dagiti panggepna. Ti nabaknang a tao ket nabaknang koma iti Dios no nangaramid kadagiti pamay-an tapno rumang-ay iti nadiosan a debosion, sirib, ken ayat. Ngem ipakita ti sasao dayta a tao nga isu ket saan nga interesado kadagita a banag, uray iti panangibati iti dadduma nga apit tapno adda adasen dagiti napanglaw, wenno iti panangidaton kadagiti sagut ken Jehova. Dagiti kasta a di agimbubukodan nga aramid maitunos iti pagayatan ti Dios ket saan a paset ti biag dayta a nabaknang a tao. Ti laeng planona ket tapno mapennek dagiti tarigagayna ken agbalin a nanam-ay.
Napaliiwmo kadi nga adu a tattao ita ti addaan kadagiti prioridad iti biag nga umasping kadagiti prioridad ti nabaknang a tao a dineskribir ni Jesus? Nabaknangtayo man wenno napanglaw, nakalaklaka ti matnag iti silo ti kinamaterialistiko ken naglaka a mabaybay-antayo ti relasiontayo iti Dios gapu iti pannakasingatayo kadagiti inaldaw a kasapulan ken tarigagay iti biag. Ania ti mabalin nga aramidem tapno saanka a masiluan?
Panangiplano iti “Normal” a Biag
Saan a kas iti nabaknang a tao iti pangngarig ni Jesus, mabalin nga adda dagiti pinansial a pakarigatam. Kaskasdi, no addaanka iti asawa, awan duadua a planom nga ipaay dagiti kasapulan ti pamiliam ken, no posible, ti nasayaat a kangrunaan nga edukasion para kadagiti annakmo. No awananka pay iti asawa, dagiti planom ket mabalin nga iramanna ti panagsapulmo iti trabaho wenno panagtultuloymo nga agtrabaho, tapno saanka nga agbalin a makapadagsen iti sabsabali. Nasayaat dagita a kalat.—2 Tesalonica 3:10-12; 1 Timoteo 5:8.
Nupay kasta, posible nga agbibiag ti maysa a tao a maikontra iti pagayatan ti Dios gapu iti panangsurotna iti maibilang a normal a biag, a pakairamanan ti panagtrabaho, pannangan, ken panaginum. Kasano? Kinuna ni Jesus: “Kas idi kaaldawan ni Noe, kastanto ti kaadda ti Anak ti tao. Ta kas kadakuada kadagidi nga aldaw kasakbayan ti layus, a mangmangan ken umin-inumda, mangas-asawa dagiti lallaki ken mayas-asawa dagiti babbai, agingga iti aldaw a simrek ni Noe iti daong; ket saanda a nangikankano agingga nga immay ti layus ket inyanudna amin ida, kastanto ti kaadda ti Anak ti tao.”—Mateo 24:37-39.
Sakbay ti Layus, tagtagiragsaken ti kaaduan a tattao ti nalabit naibilang idi a normal a biag. Ngem ti parikut ket ‘saanda nga inkankano’ ti panggep ti Dios a panangdadaelna iti nadangkes a lubong babaen ti sangalubongan a delubio. Awan duadua a napanunotda a saan a normal ti estilo ti panagbiag ni Noe. Ngem idi dimteng ti Layus, ti estilo ti panagbiag ni Noe ken ti pamiliana ti napaneknekan a pudno a nainsiriban.
Ita, ipakita ti amin a naited a pammaneknek nga agbibiagtayon iti tiempo ti panungpalan. (Mateo 24:3-12; 2 Timoteo 3:1-5) Iti din agbayag, ti Pagarian ti Dios “rumekennanto ken pagpatinggaenna” ti agdama a sistema ti bambanag. (Daniel 2:44) Babaen dayta a Pagarian, mapagbalin a paraiso ti daga ken mapukawto ti amin a sakit ken ti ipapatay. (Isaias 33:24; Apocalipsis 21:3-5) Agbiagto a sangsangkatunos dagiti amin a parsua ditoy daga ken didanto pulos mapasaranen ti agbisin.—Salmo 72:16; Isaias 11:6-9.
Ngem sakbay nga agtignay ni Jehova, panggepna a ti naimbag a damag ti Pagarianna ket ‘maikasaba iti intero a mapagnaedan a daga maipaay a pangsaksi kadagiti amin a nasion.’ (Mateo 24:14) Maitunos iti panggep ti Dios, agarup pito a milion a Saksi ni Jehova ti mangikaskasaba iti daytoy a naimbag a damag iti 236 a pagilian ken iti nasurok nga uppat a gasut a lenguahe.
Iti panangmatmat ti lubong, ti estilo ti panagbiag dagiti Saksi ni Jehova ket mabalin a karkarna iti sumagmamano a wagas ken nakakatkatawa pay ketdi. (2 Pedro 3:3, 4) Kas kadagidi agbibiag sakbay ti Layus, makumikom ita ti kaaduan a tattao iti inaldaw nga aktibidadda. Mabalin a matmatanda a saan a balanse ti siasinoman a saan a sumurot iti estilo ti panagbiag nga ibilang ti kagimongan a normal. Ngem iti panangmatmat dagiti addaan pammati iti karkari ti Dios, ti talaga a balanse ket ti biag a naipamaysa iti panagserbi iti Dios.
Gapuna, nabaknangka man wenno napanglaw wenno kalkalainganna ti panagbiagmo, nainsiriban no pasaray repasuem dagiti planom iti asideg a masanguanan. Bayat nga ar-aramidem dayta, iyimtuodmo iti bagim, ‘Dagiti kadi planok maitunosda iti panggep ti Dios?’
[Ladawan iti panid 11]
No agkontra dagiti plano ti sangatauan ken ti panggep ti Dios, ti pammatigmaan ni Jehova ti agtalinaed
[Ladawan iti panid 12]
Iti panagplano ti nabaknang a tao iti pangngarig ni Jesus, saanna nga inkabilangan ti panggep ti Dios