Umiso Kadi nga Usaren ti Nagan ti Dios?
ITI orihinal a Hebreo a Kasuratan, a masansan a maaw-awagan iti “Daan a Tulag,” nagparang ti nagan ti Dios iti agarup 7,000 a daras iti porma a יהוה (manipud kannawan nga agpakannigid ti pannakabasana). No kasta, ti nagan ti Dios ket irepresentar ti uppat a Hebreo a letra a Yohdh, He, Waw, ken He, a gagangay a naipaulog kas YHWH.
Patien idi dagiti Judio a di umiso nga usaren ti nagan ti Dios. Kas resultana, pinagkedkedanda nga isawang ken isurat dayta, ket nagusarda iti pangsandi para iti nagan ti Dios. Nupay kasta, adu nga agipatpatarus iti Biblia ti nangipaulog iti dayta a nagan kas “Yahweh,” wenno “Jehova.” Maysa kadagiti nagipatarus iti kasta ket Ti Baro a Naimbag a Damag Biblia. Sigun iti dayta a patarus, idi sinaludsod ni Moises iti Dios no ania ti rumbeng nga isungbatna kadagiti Israelita no damagenda no siasino ti nangibaon kenkuana, kinuna ti Dios kenni Moises: “Ibagamto kadagiti Israelita, a siak ni Yahweh a Dios dagiti kapuonanyo, ti Dios da Abraham, Isaac, ken Jacob, imbaonka kadakuada. Daytoy ti naganko iti agnanayon. Isunto ti pangawag kaniak dagiti amin a kaputotan.”—Exodo 3:15.
Idi nagkararag ni Jesus, kastoy ti kinunana maipapan iti panangusarna iti nagan ti Dios: “Impakaammoka kadakuada, ket diak mamingga a mangipakaammo.” Ken iti kararag a gagangay a maaw-awagan iti Amami, kinuna ni Jesus: “Amami sadi langit: madaydayaw koma ti nasantuan a naganmo.”—Juan 17:26; Mateo 6:9, Ti Baro a Naimbag a Damag Biblia.
Maisupadi ngarud dayta iti kinuna ni Papa Benedict XVI iti baro a librona a Jesus of Nazareth mainaig iti panangusar iti nagan ti Dios: “Umiso la unay ti . . . panagkedked dagiti Israelita a mangisawang iti daytoy a nagan nga inyawag ti Dios iti bagina, nga irepresentar dagiti letra a YHWH, tapno maliklikan a maipatas laengen dayta iti nagan dagiti pagano a didiosen. Isu a kamali met laeng dagiti kabbaro a patarus ti Biblia a nangusar iti dayta a nagan—a kanayon nga ibilang dagiti Israelita kas misterioso ken di mabalin a baliksen—a kasla maysa laeng dayta kadagita nagkauna a nagan.”
Ania ti panagkunam? Umiso kadi nga usaren ti nagan ti Dios? No kinuna a mismo ni Jehova: “Daytoy ti naganko agingga iti tiempo a di nakedngan, ket daytoy ti pakalaglagipan kaniak iti kinapkaputotan,” adda kadi karbengan ti asinoman a komontra kenkuana?
[Ladawan iti panid 30]
Inusar ni Jesus ti nagan ti Dios iti kararagna