Saludsod Dagiti Agbasbasa
No Perpekto ni Adan, Apay a Nagbasol?
Nupay perpekto ni Adan posible nga agbasol gapu ta isu ket pinarsua ti Dios nga addaan iti wayawaya nga agpili. Ti laeng ngamin Dios ti naan-anay a perpekto. (Deuteronomio 32:3, 4; Salmo 18:30; Marcos 10:18) Limitado ti kinaperpekto ti asinoman wenno ti aniaman a banag. Kas pagarigan, ti kutsilio ket perpekto wenno maitutop unay a pagiwa iti karne, ngem mabalinmo kadi nga usaren dayta a pangkutsara iti sopas? Perpekto ti maysa a banag mainaig laeng iti nakairantaanna.
Ania ngarud ti panggep ti Dios a nangparsua ken Adan? Panggepna a babaen ken Adan, tumaud ti kaputotan dagiti tattao nga addaan iti wayawaya nga agpili. Dagidiay mangpatanor iti panagayatda iti Dios ken kadagiti daldalanna mabalin nga iparangarangda daytoy babaen ti panangtungpalda kadagiti lintegna. No kasta, ti panagtulnog ket saan a nainkasigudan iti panunot ti tao. Aggubuay dayta iti puso. (Deuteronomio 10:12, 13; 30:19, 20) Gapuna, no naparsua ni Adan nga awanan iti abilidad nga agsukir, isu ket maibilang nga imperpekto a tao. No maipapan iti panangusar ni Adan iti wayawayana nga agpili, ibaga ti Biblia a tinuladna ni baketna a nanglabsing iti linteg ti Dios mainaig “iti kayo ti pannakaammo iti naimbag ken dakes.”—Genesis 2:17; 3:1-6.
Ngarud, ti Dios pinarsuana kadi ni Adan nga awanan iti kapasidad nga agpili iti naimbag ken dakes, isu a di umiso ti inaramidna a desision wenno dina nasaranget dagiti pannulisog? Sakbay a nagbasol ni Adan, sinukimat ni Jehova a Dios dagiti amin a naindagaan a parsuana, agraman ti umuna a pagassawaan, ket inkeddengna a ‘nasayaatda unay.’ (Genesis 1:31) No kasta, idi nagbasol ni Adan, dina kayat a sawen nga adda depekto ti pannakaparsuana no di ket isu a mismo ti sipapakinakem a nagaramid iti basol. (Genesis 3:17-19) Awan ti panagayat ni Adan iti Dios ken iti nalinteg a prinsipio isu a saanna a naipangpangruna ti panagtulnog iti Dios.
Usigenyo met nga idi adda ditoy daga ni Jesus, isu ket maysa a perpekto a tao a kas ken Adan. Ngem naiduma ni Jesus kadagiti dadduma a kaputotan ni Adan ta nayinaw babaen ti nasantuan nga espiritu ket awan ti natawidna a pagkapuyan isu a kabaelanna a sarangten ti sulisog. (Lucas 1:30, 31; 2:21; 3:23, 38) Pinili ni Jesus ti agtalinaed a nasungdo iti Amana iti sidong ti nakaro a rigat. Iti panangusarna iti wayawayana nga agpili, sungsungbatan ni Adan ti panagsukirna iti bilin ni Jehova.
Ngem apay a pinili ni Adan ti agsukir iti Dios? Patienna kadi a mabalin a sumayaat ti kasasaadna? Saan, ta insurat ni apostol Pablo a “ni Adan saan a naallilaw.” (1 Timoteo 2:14) Nupay kasta, timmulok ni Adan iti pagayatan ni Eva kalpasan a nangan daytoy iti bunga ti maiparit a kayo. Dakdakkel ti tarigagayna a mangay-ayo iti asawana ngem ti panagtulnogna iti Namarsua kenkuana. Idi naitukon ken Adan ti maiparit a bunga, mabalin a pinanunotna koma ti epekto ti panagsukirna iti relasionna iti Dios. Gapu ta saan a nasged ken saan a naan-anay ti panagayatna iti Dios, nalaka laeng a tumulok ni Adan iti panangpilit ti asinoman agraman ti asawana.
Nagbasol ni Adan sakbay a naaddaan iti annak, isu nga amin a kaputotanna naipasngayda nga imperpekto. Kaskasdi, addaantayo iti wayawaya nga agpili a kas ken Adan. Sapay koma ta sipapanunottayo buyogen ti panangapresiar iti kinaimbag ni Jehova ken patanorentayo ti nasged nga ayat iti Dios, a maikari a pagtulnogan ken pagdayawantayo.—Salmo 63:6; Mateo 22:36, 37.