Ni Jesus​—Ti Perpekto a Pagtuladantayo

KAYATYO kadi ti agbalin a naragragsak ken nasaysayaat a tao? Inlawlawag ni apostol Pedro no kasano nga agbalintayo a kasta. Insuratna: “Ni Kristo nagsagaba a maipaay kadakayo, a nangibati kadakayo iti pagwadan tapno sisisinged a surotenyo dagiti addangna.” (1 Pedro 2:21) Yantangay pudno a mapagwadan ti panagbiag ni Jesu-Kristo, adu ti masursurotayo kenkuana. Babaen ti panangadaltayo maipapan kenni Jesus ken panangtuladtayo kenkuana, agbalintayo a naragragsak ken nasaysayaat a tao. Usigentayo ti dadduma kadagiti galad a pakabigbigan daytoy a natan-ok a tao ken kitaentayo no kasano a magunggonaantayo iti ulidanna.

Natimbeng ni Jesus. Nupay kinuna ni Jesus nga “awan pangisaadanna iti ulona,” dina pinaidaman ti bagina kadagiti ragragsak wenno indagadag man dayta. (Mateo 8:20) Dimmar-ay kadagiti padaya. (Lucas 5:29) Ti immuna a nairekord a milagro nga inaramidna​—pinagbalinna ti danum a naimas nga arak iti maysa a padaya ti kasar​—ipakitana nga ammona ti makilangen ken saan a panatiko. (Juan 2:1-11) Nupay kasta, nalawag nga impakita ni Jesus no ania ti kapatgan kenkuana. Kinunana: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.”​—Juan 4:34.

□ Inusigyo kadin ti panagbiagyo tapno makitayo no kasanoyo a pagbalinen a balanse dagiti namaterialan ken naespirituan a kalatyo?

Nalaka a maas-asitgan ni Jesus. Ti Biblia inladawanna ni Jesus kas nadungngo ken mannakigayyem. Saan a masuron no adda mayuman kenkuana a parikut wenno narikut a saludsod. Naminsan, idi inaribungbongan dagiti tattao, maysa a babai nga agpadpadara iti 12 a tawen ti nangsagid iti pagan-anayna gapu ta mangnamnama a maimbagan. Saan a tinubngar ni Jesus ti agparang a nadarasudos a tignay ti babai no di ket siaasi a kinuna: “Anak, ti pammatim pinaimbagnaka.” (Marcos 5:25-34) Saan a maamak dagiti ubbing a makilangen ken Jesus gapu ta ammoda nga asikasuenna ida. (Marcos 10:13-16) Kanayon a nawaya ken naingayyeman ti pannakisaritana kadagiti adalanna. Saanda a bumdeng a makisinninged kenkuana.​—Marcos 6:30-32.

□ Nalakakayo kadi a maas-asitgan?

Naasi ken addaan iti empatia. Ti maysa kadagiti kangrunaan a galad ni Jesus isu ti empatia, kayatna a sawen mannakipagrikna, ammona nga isaad ti bagina iti lugar ti sabsabali, ken agtignay sigun iti kasapulanda. Insalaysay ni apostol Juan nga idi nakita ni Jesus nga agsangsangit ni Maria gapu iti ipapatay ti kabsatna a ni Lazaro, ‘nagsennaay ni Jesus ket nariribukan ken nagarubos dagiti luana.’ Dagiti nakaimatang nalakada laeng a madlaw ti nasged a panangipategna iti dayta a pamilia ket dina imbain nga impakita iti publiko. Ken anian a kinamanangngaasi ti impakitana idi pinagungarna ti gayyemna!​—Juan 11:33-44.

Iti sabali a gundaway, nagpakpakaasi ken Jesus ti lalaki nga addaan iti kukutel​—maysa a nakaar-ariek a sakit a nakaigapuan ti pannakaiputputongna: “Apo, no kayatmo laeng koma, kabaelannak a dalusan.” Pudno a makaliwliwa ti reaksion ni Jesus: “Inunnatna ti imana, isu sinagidna, a kunkunana: ‘Kayatko. Madalusanka koma.’” (Mateo 8:2, 3) Saan a pinaimbag ni Jesus dagiti tattao tapno laeng matungpal ti padto. Imbes ketdi, kayatna a bang-aran ida kadagiti sakitda. Amin nga inaramidna ket maitunos iti maysa kadagiti kalatakan a sasaona: “Kas iti kayatyo nga aramiden kadakayo dagiti tattao, isu met laeng ti aramidenyo kadakuada.”​—Lucas 6:31.

□ Ipakita kadi dagiti aramidyo a naasikayo iti sabsabali?

Mannakaawat ni Jesus. Nupay awan basolna, saan a nagpannakkel ni Jesus ken saanna a kinalikaguman nga agbalin a perpekto dagiti sabsabali; saan met a nadarasudos. Idi a ti maysa a babai nga “am-ammo iti siudad kas maysa a managbasol” ket nangipakita iti pammati ken panangipateg babaen ti panangbuggona iti saka ni Jesus kadagiti luluana, binaybay-an ni Jesus nga aramidenna ti kasta. Naklaat ti nangsangaili kenkuana gapu ta daytoy a tao kondenarenna dayta a babai. Ngem nailasin ni Jesus ti kinapasnek ti babai isu a dina kinondenar gapu kadagiti basolna. Imbes ketdi, kinunana: “Ti pammatim insalakannaka; mapankan a sitatalna.” Gapu iti naasi a tignay ni Jesus, dakkel ti posibilidadna a natignay ti babai a mangiwaksi iti dati a kabibiagna.​—Lucas 7:37-50.

□ Pagaammodakayo kadi a manangkomendar ken saan a manangkondenar?

Nadayaw ken saan a mangidumduma. Nalabit gapu ta agkadanggayan ken agkabagianda, nasingsinged ni Jesus iti adalanna a ni Juan.a Nupay kasta, saanna nga indumduma wenno pinaboran daytoy no idilig kadagiti dadduma nga adalanna. (Juan 13:23) Kinapudnona, idi a ni Juan ken ti kabsatna a Santiago kiniddawda a maisaadda iti naisangsangayan a posision iti Pagarian ti Dios, kinuna ni Jesus: “Daytoy panagtugaw iti makannawanko wenno iti makannigidko saanko a biang ti mangipaay.”​—Marcos 10:35-40.

Kanayon met a nadayaw ni Jesus kadagiti sabsabali. Saanna a tinulad dagiti mangidumduma a tattao idi kaaldawanna. Kas pagarigan, gagangay a maibilang idi a nababbaba dagiti babbai ngem kadagiti lallaki. Ngem ni Jesus impaayanna dagiti babbai iti dignidad. Dagiti Judio um-umsienda idi dagiti Samaritano, a dida pay kablaawan ida. Ngem maysa a Samaritana ti damo a nangyam-ammuan ni Jesus iti bagina kas Mesias, saan ket nga iti maysa a Judio. (Juan 4:7-26) Ken babbai ti inikkan ni Jesus iti nagsayaat a pribilehio nga umuna a makakita kenkuana kalpasan ti panagungarna.​—Mateo 28:9, 10.

□ Iti pannakilangenyo, saankayo kadi a mangidumduma maibatay iti puli, sekso, lenguahe, wenno nasionalidad?

Responsable nga anak ken kabsat. Nalabit nga agtutubo pay laeng ni Jesus idi natay ni Jose a pannakaamana. Mabalin a ni Jesus sinuportaranna ni nanangna ken dagiti kakabsatna babaen ti panagtrabahona kas karpintero. (Marcos 6:3) Sakbay a natay, intalekna ni nanangna iti adalanna a ni Juan.​—Juan 19:26, 27.

□ Matuladyo kadi ni Jesus babaen ti panangibaklayyo kadagiti obligasionyo iti pamiliayo?

Maysa a pudno a gayyem. Ni Jesus ket nagsayaat a gayyem. Kasano? Saanna nga inlaksid dagiti gagayyemna gapu laeng ta agkamalida, uray pay maulit-ulit dayta. Saan a kanayon a nagtignay dagiti adalanna maitunos iti pagayatanna. Ngem pinaneknekanna nga isu ket pudno a gayyemda babaen ti panangipamaysana kadagiti nasayaat a kababalinda imbes a pagduaduaanna ida. (Marcos 9:33-35; Lucas 22:24-27) Nupay dina impilit ti kapanunotanna kadakuada, pinaregtana ida a mangyebkas iti rikriknada.​—Mateo 16:13-15.

Kangrunaanna, inayat ni Jesus dagiti gagayyemna. (Juan 13:1) Kasano kadakkel ti panagayatna? Kinunana: “Awan asinoman nga addaan dakdakkel nga ayat ngem iti daytoy, a ti maysa isukona ti kararuana maigapu kadagiti gagayyemna.” (Juan 15:13) Adda pay kadi napatpateg a maipaay ti maysa iti gayyemna ngem iti mismo a biagna?

□ Agtalinaedkayo kadi a gayyem uray napagura wenno nasairnakayo ti gayyemyo?

Natured ken malalaki. Saan a lupoy ni Jesus kas panangiladawan ti dadduma a pintor. Dagiti Ebanghelio iladawanda ni Jesus kas maysa a nabileg ken nakired a lalaki. Namindua a pinaruar ni Jesus dagiti negosiante agraman dagiti tagilakoda manipud iti templo. (Marcos 11:15-17; Juan 2:14-17) Idi immay ti maysa a bunggoy a mangaresto ken “Jesus a Nazareno,” situtured nga inyam-ammona ti bagina tapno masalaknibanna dagiti adalanna, ket sititibker a kinunana: “Siak dayta. Ngarud, no siak ti sapsapulenyo, bay-anyo dagitoy a mapan.” (Juan 18:4-9) Saan ngarud a pakasdaawan nga idi nakita ni Poncio Pilato ti kinatured ni Jesus iti sidong ti pannakaaresto ken di umiso a pannakatrato, kinunana: “Adtoy! Ti tao!”​—Juan 19:4, 5.

□ Determinado ken situturedkayo kadi a mangaramid iti umiso?

Dagitoy ken ti dadduma pay a nagsayaat a galad ni Jesus ti namagbalin kenkuana kas perpekto a pagtuladantayo. No tuladentayo ti kababalinna, agbalintayo a naragragsak ken nasaysayaat a tao. Daytoy ti makagapu nga indagadag ni apostol Pedro kadagiti Kristiano a sisisinged a surotenda ti addang ni Jesus. Ikagkagumaanyo kadi a suroten ti addang ni Jesus agingga iti kabaelanyo?

Saan Laeng a Pagtuladan

Ni Jesus ket saan laeng a pagtuladan. Kinunana: “Siak ti dalan ken ti kinapudno ken ti biag. Awan ti umay iti Ama malaksid no baeten kaniak.” (Juan 14:6) Saanna laeng nga impakaammo ti kinapudno maipapan iti Dios, a nanglukat iti gundaway tapno makaadanitayo Kenkuana, no di ket pinagbalinna pay a posible a magun-odan dagiti matalek a tattao ti biag.​—Juan 3:16.

No maipapan iti dayta a rason nga immay ditoy daga, kinuna ni Jesus: “Ti Anak ti tao immay, saan a tapno pagserbian, no di ket tapno agserbi ken tapno itedna ti kararuana kas subbot a kasukat dagiti adu.” (Mateo 20:28) Babaen ti panangitedna iti biagna kas daton, impasdekna ti pundasion tapno matagiragsak dagiti tattao ti agnanayon a biag. Ania ti rumbeng nga aramidentayo kas indibidual tapno magunggonaantayo iti dayta a probision? Kuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Wen, tapno masagrap ti agnanayon a biag, masapul ti pananggun-od iti pannakaammo maipapan ken Jesus, panangtulad iti ulidanna, ken panangipakita iti pammati iti ipapatayna kas daton. Paregtaendakayo a mangadal iti gubuayan dayta a pannakaammo, ti Biblia, ken ikagumaanyo nga iyaplikar ti maad-adalyo, kas inaramid ni Jesus.b

Ti mapagwadan a biag ni Jesus ti mangiwanwan kadatayo no ania a kita ti tao ti rumbeng a pagbalinantayo. Ti ipapatayna kas daton wayawayaannatayo manipud iti basol ken iti imbungana nga ipapatay. (Roma 6:23) Anian a nakaay-ay-ay ti kasasaadtayo no awan ti makaisuro nga ulidan ni Jesu-Kristo! Diyo koma ipalubos a dagiti pakakumikoman ken pakaringgoran iti biag ti mangikkat iti gundawayyo a mangusig ken mangsurot a sisisinged iti ulidan ti katan-okan a tao a nagbiag​—ni Jesu-Kristo.

[Footnotes]

[Kahon/Dagiti Ladawan iti panid 7]

◼ Nadayaw ken saan a mangidumduma ni Jesus

◼ Napudno a gayyem agingga ken patay

◼ Natured

Ikagkagumaanyo kadi a suroten ti addang ni Jesus agingga iti kabaelanyo?

[Dagiti Ladawan iti panid 5]

Ni Jesus ket natimbeng . . .

nalaka a maas-asitgan . . .

naasi