Ni David​—No Apay a Di Nagbuteng

NAKARIKNAKA kadin iti panagbuteng?​—a Pasaray a marikna dayta ti kaaduan kadatayo. Ania ti aramidem no mabutengka?​— Mabalin nga agkamangka iti maysa a dakdakkel ken napigpigsa ngem sika. Nalabit makatulong da tatang ken nanangmo. Adu ti masursurotayo ken David no siasino ti pagpatulongantayo. Inkantana iti Dios: “Siak, iti biangko, agtalekakto kenka a mismo. . . . Iti Dios inkabilko ti panagtalekko; saanakto nga agbuteng.”​—Salmo 56:3, 4.

Siasino ngata ti nakasursuruan ni David a di agbuteng? Kadagiti kadi nagannakna?​— Awan duadua a kasta. Ni Jesse nga amana ket matalek nga inapo ni Jesu-Kristo, ti “Prinsipe ti Kappia” nga inkari ti Dios. (Isaias 9:6; 11:1-3, 10) Ti apong ni David isu ni Obed​—ti ama ni Jesse. Ti nagan ti ina ni Obed ket naipanagan iti maysa a libro ti Biblia. Ammom kadi ti naganna?​— Isu ni Ruth, ti matalek a babai nga asawa ni Boaz.​—Ruth 4:21, 22.

Siempre, nabayagen a natay da Ruth ken Boaz idi naipasngay ni David. Mabalin nga ammom ti nagan ti ina ni Boaz, ti lola ni David iti dapan. Isu ket taga-Jerico ken tinulonganna a makalibas ti dua nga Israelita nga espia. Naisalakan ti pamiliana idi narpuog ti pader ti Jerico gapu ta nangipauyaoy iti eskarlata a tali iti tawana. Ania ti naganna?​— Isu ni Rahab, a nagbalin a maysa nga agdaydayaw kenni Jehova ken ulidan ti kinatured a nasayaat a tuladen dagiti Kristiano.​—Josue 2:1-21; 6:22-25; Hebreo 11:30, 31.

Masiguradotayo a dagiti nagannak ni David insuroda kenkuana ti maipapan kadagiti amin a matalek nga adipen ni Jehova gapu ta naibilin kadagiti nagannak nga isuroda dayta kadagiti annakda. (Deuteronomio 6:4-9) Idi agangay, naibaon ni Samuel a mammadto ti Dios tapno dutokanna ni David, ti inaudi a lalaki nga anak ni Jesse, kas masanguanan nga ari ti Israel.​—1 Samuel 16:4-13.

Maysa nga aldaw, ni Jesse imbaonna ni David tapno balonanna dagiti tallo a manongna a makidangdangadang idi kadagiti Filisteo a kabusor ti Dios. Idi nakagteng ni David iti pagbabakalan, nangngegna ti higante a ni Goliat nga um-umsienna ti buyot “ti sibibiag a Dios.” Awan makaitured a makiranget ken Goliat. Nangngeg ni Ari Saul a kayat ni David ti lumaban ken Goliat isu nga inayabanna. Ngem idi makitana ni David, kuna ni Saul: “Maysaka laeng nga ubing.”

Inlawlawag ni David kenni Saul nga adda napapataynan a leon ken oso a nanggandat a mangpapatay iti karnero a taraken ti pamiliada. Kuna ni David a ni Goliat ket “agbalinto a kas iti maysa kadakuada.” Simmungbat ni Saul: “Inka, ket ni met laeng Jehova adda koma kenka.” Nangpili ni David iti lima a nalamuyot a bato, insupotna, innalana ti pallatibongna, ket napanna sinango ti higante. Idi makita ni Goliat a ti um-umay ket maysa laeng nga ubing, impukkawna: “Umayka latta kaniak, ket itedkonto ta lasagmo kadagiti [tumatayab].” Simmungbat ni David: “Umayak kenka nga addaanak iti nagan ni Jehova,” kalpasanna impukkawna: “Sigurado a kabilenkanto.”

Gapuna, nagtaray ni David iti ayan ni Goliat, inkabilna ti maysa a bato iti pallatibongna, ket tiniruanna ti muging ni Goliat. Idi nakita dagiti Filisteo a natayen ti higante, nagbutengda ket nagtatarayda. Kinamat ida dagiti Israelita ket nangabakda iti gubat. Basaenyo koma a sangapamiliaan ti intero a salaysay iti 1 Samuel 17:12-54.

Kas agtutubo, no dadduma mabutengka a mangtungpal iti bilin ti Dios. Narikna met dayta ni Jeremias idi isu ket agtutubo pay, ngem kinuna ti Dios kenkuana: “Dika agbuteng . . . ta ‘addaak kenka.’” Pinarmek ni Jeremias ti panagbutengna ket nangasaba kas imbilin ti Dios kenkuana. Kas kada David ken Jeremias, no agtalekka ken Jehova, masursuromto met ti di agbuteng.​—Jeremias 1:6-8.